Mí Katã Míehiã Kafukafu

ŊKEKEA me nyo na nyɔnuvi sue la. Togbɔ be ehiã be woaɖɔe ɖo ɣeaɖewoɣi hã la, gbemagbe ya ewɔ ɖevi nyui ale gbegbe. Gake esi wona nyɔnuvi suea yi ɖamlɔ anyi fiẽ ma la, dadaa se be enɔ avi fam. Esi wòbiae nusita wònɔ avia fam ɖo la, aɖatsi nɔ dodom le mo nɛ blobloblo wògblɔ be: “Ðe nyemewɔ ɖevi nyui egbea oa?”

Nyabiase sia tɔ dadaa abe hɛ ene. Kakaa wòkpɔ vianyɔnuvia wòwɔ vodada aɖe la, eɖɔe ɖo xoxo. Gake togbɔ be ekpɔe be nyɔnuvi suea dze agbagba vevie helé eɖokui wɔ nuwo nyuie gbemagbe hã la, dadaa megblɔ nya aɖeke tsɔ kafui o.

Menye nyɔnuvi suewo koe hiã kafukafu kple dzideƒonamenya o. Mí katã míehiãe—abe alesi ko míehiã nuxlɔ̃ame kple ɖɔɖɔɖoe ene.

Aleke míesena le mía ɖokui me ne wokafu mí tso dzime? Ðe menaa dzi dzɔa mí henaa míaƒe lãme kɔna ŋkeke bliboa oa? Anye be míese le mía ɖokui me be wode dzesi míaƒe agbagbadzedze, eye wotsɔ ɖe le mía me. Enaa dzi ɖoa mía ƒo be viɖe le nusi míewɔ ŋu, eye wòʋãa mí be míagawɔe wu ema ɣebubuɣi. Mewɔ nuku o be zi geɖe ne ame aɖe dze agbagba gblɔ dzideƒonamenya aɖe tsɔ kafu mí anukwaretɔe la, míelɔ̃na tena ɖe ame ma ŋu.—Lododowo 15:23.

Yesu Kristo nya alesi wòhiãe be woakafu amee. Le talento-lododoa me la, aƒetɔ la (si tsi tre ɖi na Yesu ŋutɔ) kafu dɔla wɔnuteƒe evea siaa be: ‘Wòe wɔ dɔ, dɔla nyui kple nuteƒewɔla!’ Aleke wòde dzi ƒoe nye si! Togbɔ be woƒe ŋutetewo kple dɔwɔwɔ to vovo sã hã la, wokafu wo sɔsɔe.—Mateo 25:19-23.

Eyata mina míaɖo ŋku nyɔnuvi sue ma dada dzi. Mehiã be míalala amewo nafa avi hafi míakafu wo o. Ke boŋ míate ŋu aɖoe ada ŋku ɖi be míakpɔ nane akafu le amewo ŋu hã. Le nyateƒe me la, susu nyuiwo le mía si si ta míakafu amewo tso dzime faa le mɔnukpɔkpɔ ɖesiaɖe me.