Agbagbadzedze Siwo Doa Agbenyuinɔnɔ ƒe Dzidzenuwo Ðe Ŋgɔ

Le ƒe 2001 ƒe nuwuwu la, amesiwo ɖo to nyadzɔdzɔwo tso Mozambique-dukɔa ƒe Radiodɔwɔƒea se gbeƒãɖeɖe sia be:

“Dukplɔla la ɖi tsa yi Yehowa Ðasefowo ƒe alɔdzedɔwɔƒe si le Maputo. Ede dzi ƒo na subɔsubɔha sia be woado vevie nu le agbagba si dzem wole le agbenyuinɔnɔ ƒe dzidzenuwo dodo ɖe ŋgɔ le ƒomewo me kple to nuxexlẽ fiafia ame tsitsiwo ƒe ɖoɖo si le wo si me. Amesiwo ade 10,000 kpɔ viɖe tso ɖoɖo siawo me xoxo. Le Dukplɔla Chissano ƒe nya nu la, ɖoɖo siawo ƒomevi dze na kafukafu, le esi wònye kpekpeɖeŋu xɔasi wole amewo nam le dukɔa me le agbalẽmanyamanya ƒe kuxi si kpɔtɔ le fu ɖem na dukɔ sia la gbɔ kpɔkpɔ me.”

Gbeƒãɖeɖea yi edzi kple dukplɔlaa ƒe nuƒoa me nya vevi aɖewo si wolé ɖe mɔ̃ dzi be: “Edea dzi ƒo ŋutɔ be woakpɔ be ame geɖe tsɔ ɖe le agbalẽsrɔ̃nyawo me. Efia mí be dukɔmeviwo akpe ɖe mía ŋu be míaɖu ame gbogbowo ƒe agbalẽmanyamanya ƒe kuxi sia dzi. Le esia ta, madi be made dzi ƒo na Yehowa Ðasefowo be woado vevie woƒe agbalẽfiafia ɖoɖoa, le gbegbɔgblɔ ƒomevi ɖesiaɖe me. Nu vevitɔae nye be amewo nanya agbalẽ eye be wòanɔ bɔbɔe na amewo be kadodo nanɔ wo dome be woate ŋu ava kpɔ gome le nufiafia amewo me nyuie le etsɔme.”

Yehowa Ðasefowo fia nuxexlẽ kple nuŋɔŋlɔ le teƒe 850 le Mozambique dukɔ bliboa me bena amewo nate ŋu axlẽ Mawu ƒe Nyaa le wo ɖokui si. Tsɔ kpe ɖe eŋu la, wowɔa aƒeme Biblia nusɔsrɔ̃ kple amesiwo ade 50,000 femaxee kwasiɖa ɖesiaɖe. Esiawo katã nye xexeame katã ƒe Biblia-fiafiadɔ si wɔm wole le dukɔ 235 me fifia la ƒe akpa aɖe. (Mateo 24:14) Wò hã àte ŋu akpɔ viɖe tso ɖoɖo sia me. Taflatse te ɖe Yehowa Ðasefo siwo le wò nutoa me ŋu faa.