Agbenɔɣi Nyuitɔ Kekeake

NE ÈDZE ŋgɔ nɔnɔme sesẽwo la, ɖe tsã ɣeyiɣi siwo me nuwo dze edzi na wò gadzroa wò nègblɔna be “nye si ɖu aklã kpɔe nye sia va le veve ɖuma”? Ekema de ŋugble le Fia nyanu Salomo ƒe nyawo ŋu: “Megagblɔ be, nukata tsã ŋkekewo nyo wu fifitɔwo hã o, elabena mèle biabiam ɖe nunya me o.”—Nyagblɔla 7:10.

Nukatae Salomo ɖo aɖaŋu sia? Elabena enya be tsã ɣeyiɣiwo ŋuti nukpɔsusu si da sɔ ƒe amesinɔnɔ le vevie ŋutɔ hena tenɔnɔ ɖe fifi ɣeyiɣiwo me nɔnɔme madeamedziwo nu. Le nyateƒe me la, amesiwo tsã ɣeyiɣi dzedzinamewo gadzrona la ate ŋu aŋlɔ be be kuxiwo kple xaxawo yɔ ɣeyiɣi mawo hã me eye be agbea menɔ bɔbɔe hafi o. Nanewo anya nyo awu le tsã ɣeyiɣiawo me ya, gake anɔ eme godoo be nu bubuwo hã menyo o. Abe alesi Salomo gblɔe ene la, nunya aɖeke mele eme be míanɔ ŋugble dem le tsã ɣeyiɣiwo ŋu madzemadzee o, elabena edze ƒã be míate ŋu atrɔ gaƒoɖokuia ayi megbemegbee o.

Ðe afɔku aɖe ate ŋu anɔ eme ne tsã ɣeyiɣiwo gadzroa mí veviea? Ẽ, ne ewɔnɛ be míete ŋu dana sɔna hetrɔna ɖe fifi ɣeyiɣiawo ŋu alo kpɔa ŋudzedze ɖe ɣeyiɣi siwo me míele kple mɔkpɔkpɔ si ate ŋu asu mía si ŋu o.

Le nyateƒe me la, togbɔ be kuxiwo le dzidzim ɖe edzi le xexeame hã la, fifiae nye agbenɔɣi nyuitɔ kekeake. Nukatae? Elabena míele tetem ɖe Mawu ƒe tameɖoɖo na míaƒe anyigba kple eƒe Fiaɖuƒea ƒe ŋutifafa dziɖuɖu me yayrawo ƒe emevava la ŋu. Biblia do ŋugbe be: “[Atutu] aɖatsi sia aɖatsi ɖa le woƒe ŋku me, eye ku maganɔ anyi akpɔ o, eye konyifafa kple ɣlidodo kple veve aɖeke maganɔ anyi o; elabena nu gbãtɔwo nu va yi.” (Nyaɖeɖefia 21:4) Ne nɔnɔmewo va nyo sasasã ɣemaɣi la, susu aɖeke manɔ ame aɖeke si si tae tsã ɣeyiɣiwo nagadzroe o.