Nuwo Kpɔkpɔ abe Alesi Mawu Kpɔa Woe Ene

SEPTEMBER 14, 2002, nye ŋkeke aɖe si dzi yame kɔ nyuie le New York, U.S.A. Gbemagbe la, ame 6,521 siwo tso dukɔ vovovowo me la kpe ta le Patterson Hehexɔƒea kpakple Yehowa Ðasefowo ƒe dɔwɔƒe eve bubu siwo le nutoa me la me. Ameha la kpe ta be yewoakpɔ Gbetakpɔxɔ Habɔbɔa ƒe Gilead Biblia Suku ƒe klass 113 lia ƒe sukunuwuwu teƒe. Sukuviawo tso dukɔ 14 me eye wotsɔ ɣleti atɔ̃ siwo do ŋgɔ la nɔ dzadzram ɖo ɖe dutanyanyuigbɔgblɔdɔ wɔwɔ le dukɔ 19 siwo me woɖo wo ɖo ŋu.

Carey Barber, si le eƒe ƒe 98 lia me eye wònye Yehowa Ðasefowo ƒe Dziɖuha la me tɔ, ye nɔ zi me na wɔnaa. Ehe susu yi dzidzedze si Gilead Suku, si dzra ame akpe gbogbowo ɖo be woanye dutanyanyuigblɔlawo, la kpɔ le ƒe 60 kloe me la dzi. Nɔviŋutsu Barber gblɔ be: “Menye amiɖeɖe ɖe nyae wònye be woagblɔ be hehe si woxɔ kpee la le vi gãwo ɖem o. Le nyateƒe me la, kpekpeɖeŋu si dutanyanyuigblɔla siwo wona hehee na ame fafa akpe alafa geɖewo la wɔe be wotsɔ woƒe agbe ɖe adzɔgbee na Yehowa hexɔ eƒe tadedeagu vavãtɔ kple subɔsubɔ kɔkɔea le anyigba bliboa dzi.”

Sukuviawo dometɔ geɖe ɖe didi be yewoakeke yewoƒe subɔsubɔdɔa ɖe enu fia hafi de Gilead. Atsu kple asi aɖe tsɔ ƒe ɖeka kple nane nɔ Mandaringbe srɔ̃m kple susu be yewoate ŋu akpe ɖe Chinatɔ gbogbo siwo le yewoƒe nutoa me le Canada ŋu. Srɔ̃tɔ bubu hã te Albaniagbe sɔsrɔ̃ le wo ɖokui si eye emegbe woʋu yi Albania be yewoakpɔ ame gbogbo siwo va le ɖe tsɔm le Biblia me le afima la ƒe nuhiahiãwo gbɔ. Gilead sukuvi bubuwo tso Hungary, Guatemala, kple Dominican Republic, siwo nye dukɔ siwo me woʋu yi be yewoaɖa na kpekpeɖeŋu le esi Mawu ƒe Nyaa fialawo hiã vevie le dukɔ mawo me ta.

Azɔ, hafi woadzo ayi woƒe dɔdasiawo wɔƒe le Afrika, Ɣedzeƒe Europa, Titina kple Anyiehe Amerika, kple Ɣedzeƒeʋĩ la, wode dzi ƒo na sukuvi siwo katã nɔ sukua nu wum be woabu Mawu ŋu le nusianu si woawɔ me.

Mibu Nyawo Ŋu abe Alesi Mawu Abu Woe Ene

Esi Nɔviŋutsu Barber gblɔ eƒe ŋgɔdonyawo vɔ la, ekpe Maxwell Lloyd, si nye United States Alɔdzekɔmitia me tɔ, va kplɔ̃a ta. Eƒo nu tso nyati si nye “Mibu Nusianu Ŋu abe Alesi Mawu Abu Woe Ene” ŋu. Nɔviŋutsu Lloyd he susu yi kpɔɖeŋu siwo Dawid kple Mawu ƒe Vi, Yesu, ɖo la dzi. (Samuel I, 24:6; 26:11; Luka 22:42) Le ŋkuɖoɖo edzi na sukuviawo be ɣleti atɔ̃ siwo wotsɔ srɔ̃ Biblia la na hehe wo be woabu nuwo ŋu abe alesi Mawu bua woe ene megbe la, nuƒola la bia be: “Ne miele Biblia srɔ̃m kple amewo le dukɔ yeye siwo me yi ge miala me la, miakpe ɖe wo ŋu be woabu nuwo ŋu abe alesi Mawu bua woe enea?” Eye exlɔ̃ nu sukuviawo be ne wole aɖaŋu ɖom na amewo la, “Migagblɔ be: ‘Le nye nukpɔsusu nu la, mebu be . . .’ o. Ke boŋ, mikpe ɖe wo ŋu woakpɔ alesi Mawu  bua nya lae. Ne miewɔe alea la, mianye yayra ŋutɔŋutɔ na amesiwo miade ha kplii le dukɔ si me miayi me.”

Amesi kplɔe ɖo enye Gerrit Lösch, amesi nye Dziɖuhaa me tɔ. Esi wònɔ nuƒo si ƒe tanyae nye “Meli Kpli Wò” ƒom la, ehe susu yi nudzɔdzɔ geɖe siwo me Yehowa gblɔ na esubɔla wɔnuteƒewo be, “meli kpli wò” la dzi. (Mose I, 26:23, 24; 28:15; Yosua 1:5; Yeremya 1:7, 8) Le míaƒe ŋkekea me la, kakaɖedzi sia tututu ate ŋu anɔ mía si ɖe Yehowa ŋu ne míeyi edzi wɔ nuteƒe nɛ. Nɔviŋutsu Lösch gblɔ be: “Ðe nèvɔ̃na be yemakpɔ amesiwo yeasrɔ̃ Biblia kpli oa? Ðo ŋku edzi be Yehowa gblɔ be, ‘Meli kpli wò.’ Ðe nèvɔ̃na be ŋutilãmenuwo masu ye oa? Yehowa be: ‘Yemele asi ɖe ge le ŋuwò alo le gblẽ wò ge ɖi akpɔ o.’” (Hebritɔwo 13:5) Nɔviŋutsu Lösch wu enu kple ŋkuɖoɖo edzi na sukuviawo be Yesu do ŋugbe be yeanɔ kple yeƒe nusrɔ̃la wɔnuteƒewo le nusrɔ̃lawɔwɔdɔa me.—Mateo 28:20.

“Ðe Nànɔ Dedie le Dzoa Mea?” yee nye Gilead nufiala Lawrence Bowen ƒe nuƒoa ƒe tanya. Egblɔ be le nya si fɔ ɖe te le Eden ta la, amesiwo katã di be yewoasubɔ Yehowa ɖeka ko la toa nɔnɔme sesẽwo kple ɣeaɖewoɣi la, dodokpɔ siwo nɔa abe dzo ene me. Ede dzi ƒo na sukuvi siwo  le sukua nu wum be woasrɔ̃ Yesu, amesi kpɔ dedienɔnɔ vavãtɔ to ŋuɖoɖo ɖe Yehowa ŋu bliboe me, eye wòlɔ̃ to dodokpɔ siwo nɔ abe dzo ene, siwo ŋu Yehowa ɖe mɔ ɖo be wòana Via ƒe toɖoɖo nade blibo me, la ƒe kpɔɖeŋu. (Hebritɔwo 5:8, 9) Woate ŋu atsɔ Yehowa asɔ kple sikaklɔla si zãa dzo ƒe ŋusẽ si sɔ tsɔ ɖea ɖi le eŋui. Le nyateƒe me la, xɔse si wodo kpɔ kple dzo la naa ame nɔa dedie wu sika si me woɖe ɖi le. Nukatae? Nɔviŋutsu Bowen gblɔ be: “Elabena xɔse si wodo kpɔ ate ŋu anɔ te ɖe nyaƒoɖeamenu ɖesiaɖe nu, eye edzraa mí ɖo be míado dzi kakaka vaseɖe ‘nuwuwu.’”—Mateo 24:13.

Gilead nufiala bubu, Mark Noumair, bia be: “Wò Nu Anyo Ame Ŋua?” Eƒe tanya nɔ te ɖe Samuel I, 2:26, si ɖɔ Samuel be “eƒe nu nyo Yehowa kple amegbetɔwo ŋu” dzi. Le nuƒoƒo tso Samuel ƒe kpɔɖeŋu ŋu vɔ la, Nɔviŋutsu Noumair, amesi tsɔ ƒe ewo kple edzivɔ wɔ dutanyanyuigbɔgblɔdɔ le Afrika, gblɔ be: “Miawo hã miaƒe nu ate ŋu anyo Mawu ŋu ne mielé dɔ si Mawu de asi na mi me ɖe asi nuteƒewɔwɔtɔe. Ede dutanyanyuigbɔgblɔdɔ xɔasi aɖe asi na mi.” Emegbe Nɔviŋutsu Noumair de dzi ƒo na sukuvi siwo le sukua nu wum la be woabu woƒe dɔdasiawo be enye nu kɔkɔe si Mawu de yewo si eye be woatsɔ Mawu ƒe nukpɔsusu awɔ woƒe dɔdasiawoe.

Esime sukuviawo nɔ sukua la, mɔnukpɔkpɔ geɖe su wo si le kwasiɖanuwuwuwo woƒo nu tso ‘Mawu ƒe nu dzɔtsu’ siwo le Biblia me la ŋu na amesiwo le nutoa me. (Dɔwɔwɔwo 2:11) Le nyateƒe me la, woƒo nu tso nu siawo ŋu le gbe vovovo ewo me. Esi Gilead nufiala bubu Wallace Liverance, nɔ nuƒo si ƒe tanyae nye “‘Mawu ƒe Nu Dzɔtsuwo’ Nyɔa Amewo be Woawɔ Afɔɖeɖe” ƒom la, ebia gbe sukuviawo ƒe ƒuƒoƒo aɖe si gblɔ woƒe nuteƒekpɔkpɔwo. Egblɔ be: “Gbɔgbɔa ʋã amesiwo nɔ dziƒoxɔa dzi le Pentekoste-ŋkekea dzi be woƒo nu tso ‘Mawu ƒe nu dzɔtsuwo’ ŋu. Gbɔgbɔ ma ke wɔa dɔ egbea ɖe Mawu subɔla wɔnuteƒewo katã dzi.” Eʋã ame aɖewo gɔ̃ hã wosrɔ̃ gbegbɔgblɔ yeyewo kple susu be woaɖi ɖase na ame bubu geɖe.

Nyawo Bubu abe Alesi Mawu Bua Woe ene Ŋuti Aɖaŋuɖoɖo Nyuiwo

Le nuƒo gbãtɔwo megbe la, Gary Breaux kple William Young, siwo nye United States Betel-ƒomea me tɔwo, bia gbe dukɔ vovovo siwo me dutanyanyuigblɔlawo le dɔ wɔm le la ƒe alɔdzekɔmiti me tɔwo kpakple srɔ̃tɔ aɖe si tsɔ ƒe 41 wɔ dutanyanyuigbɔgblɔdɔae. Nusi wogblɔ la ƒe ɖee nye: “Amesiwo media nu geɖe o la wɔa dutanyanyuigbɔgblɔdɔa eteƒe didina. Woɖoa susu nusitae wova ŋu. Wonya be yewova gbeƒã ɖe ge nyanyuia ahakpe ɖe amewo ŋu be woadze si Yehowa.”

David Splane, si nye Dziɖuhaa me tɔ bubu, ƒo wɔnaa ta kple nuƒo si ƒe tanyae nye “Menye Adzɔge Ʋĩ Mieyina O!” Nuka fiamee wònɔ esi wònye be ɖee wole sukunuwula 46 la ɖom ɖe dukɔwo me le xexeame godoo? Eɖe eme be: “Afika kee mieɖale le anyigba dzi o, mianɔ Mawu ƒeme ɖaa ne miekpɔtɔ le nuteƒe wɔm ko.” Ẽ, Kristotɔ nuteƒewɔlawo katã le subɔsubɔm le Mawu ƒe gbɔgbɔmegbedoxɔ gã la, alo aƒe, si woɖo anyi le Yesu ƒe nyɔnyrɔxɔɣi le ƒe alafa gbãtɔ me la ƒe akpa aɖe, metsɔ le afisi wole ŋutɔŋutɔ me o. (Hebritɔwo 9:9) Aleke wòfa akɔ na vavalawo enye si be woanya be Yehowa tsɔ ɖe esubɔla wɔnuteƒe siwo katã le anyigba dzi la gbɔ! Abe alesi ko Yehowa tsɔ ɖe le Yesu me esime wònɔ anyigba dzi ene la, nenema kee Wòtsɔa ɖe le mí katã kple subɔsubɔ si míetsɔna Nɛ mee, metsɔ le afisi míele me o. Eyata le tadedeagu ƒe nyawo me la, míele adzɔge tso mía nɔewo kple Yehowa kpakple Yesu gbɔ gbeɖegbeɖe o.

Le gbedoname siwo woxɔ tso xexeame godoo la sese, afisi woɖo sukuviawo ɖo yɔyɔ, kple lɛta si sukuviawo ŋlɔ tsɔ ɖe woƒe ŋudzedzekpɔkpɔ ɖe hehe si woxɔ le Gilead ŋu fia xexlẽ megbe la, zimenɔla la he wɔnaa va nuwuwu dzidzedzetɔe. Ede dzi ƒo na dutanyanyuigblɔla yeyeawo be woalé woƒe dɔ nyui la me ɖe asi eye dzi nadzɔ wo le Yehowa ƒe subɔsubɔdɔa me.—Filipitɔwo 3:1.

[Aɖaka si le axa 23]

SUKUVIAWO ŊUTI NYATAKAKA

Dukɔ siwo me wotso ƒe xexlẽme: 14

Dukɔ siwo me woɖo wo ɖo ƒe xexlẽme: 19

Sukuviawo ƒe xexlẽme: 46

Ƒe si woxɔ le mama dedie nu: 35.0

Ƒe si wole nyateƒea me le mama didie nu: 17.2

Ɣeyiɣiawo katã ƒe subɔsubɔƒewo le mama didie nu: 13.7

[Nɔnɔmetata si le axa 24]

Gbetakpɔxɔ Habɔbɔa ƒe Gilead Biblia Suku ƒe Klass 113 lia Nuwulawo

Ðoɖo si nu woŋlɔ ŋkɔawo ɖo le ete yi ale: Woxlẽ fliawo tso ŋgɔgbe yi megbee, eye woŋlɔ ŋkɔawo tso miame yi ɖusime le fli ɖesiaɖe dzi.

(1) Ligthart, M.; Hosoi, S.; Berktold, A.; Liem, C.; Aoki, J. (2) Baglyas, J.; Bouqué, S.; Bossi, A.; Alton, J.; Escobar, I.; Escobar, F. (3) Stoica, A.; Stoica, D.; Freimuth, S.; Karlsson, M.; LeBlanc, R. (4) Bianchi, R.; Bianchi, S.; Kaminski, L.; Joseph, L.; Paris, S.; LeBlanc, L. (5) Paris, M.; Skidmore, B.; Horton, J.; Horton, L.; Skidmore, G. (6) Liem, B.; Alton, G.; Quirici, E.; Langlois, M.; Steininger, S.; Aoki, H. (7) Langlois, J.; Steininger, M.; Bossi, F.; Kaminski, J.; Bouqué, J.; Ligthart, E.; Hosoi, K. (8) Baglyas, J.; Quirici, M.; Karlsson, L.; Freimuth, C.; Berktold, W.; Joseph, R.