Èxɔ Nyanyuia Dzi Se Ŋutɔŋutɔa?
Èxɔ Nyanyuia Dzi Se Ŋutɔŋutɔa?
“Mawufiaɖuƒe la ɖo vɔ. Mitrɔ le miaƒe dzi me, eye mixɔ nyanyui la dzi se!”—MARKO 1:15.
1, 2. Aleke nàɖe Marko 1:14, 15 me?
ƑE 30 M.Ŋ. mee. Yesu Kristo dze eƒe subɔsubɔdɔ gã la gɔme le Galilea. Enɔ gbeƒã ɖem “Mawu ƒe nyanyui la,” eye eƒe nya siwo nye, “Azãgbe la ɖo dzi, eye mawufiaɖuƒe la ɖo vɔ. Mitrɔ le miaƒe dzi me, eye mixɔ nyanyui la dzi se!” la wɔ dɔ ɖe Galileatɔ geɖe dzi.—Marko 1:14, 15.
2 “Azãgbe la” ɖo na Yesu be wòadze eƒe subɔsubɔdɔa gɔme be amewo nawɔ nyametsotso si ana woƒe nu nanyo Mawu ŋu. (Luka 12:54-56) ‘Mawu fiaɖuƒe la ɖo vɔ’ elabena Yesu, si nye Fia si Wotia la, nɔ anyi kpli wo. Eƒe gbeƒãɖeɖedɔa ʋã dzidzɔdzɔetɔwo be woatrɔ dzime. Gake aleke woɖee fia be ‘yewoxɔ nyanyuia dzi se’—eye aleke míaxɔ edzi asee?
3. Nuka wɔwɔ mee amewo to ɖee fia be yewoxɔ nyanyuia dzi se?
3 Abe Yesu ene la, apostolo Petro xlɔ̃ nu amewo be woatrɔ dzime. Esime Petro nɔ nu ƒom na Yudatɔwo le Yerusalem le ƒe 33 M.Ŋ. ƒe Pentekoste dzi la, egblɔ be: “Mitrɔ le miaƒe dzi me, eye mia dome amesiame naxɔ nyɔnyrɔ ɖe Yesu Kristo ƒe ŋkɔ me hena miaƒe nuvɔ̃wo ƒe keke, eye miaxɔ gbɔgbɔ kɔkɔe wòanye nunana.” Ame akpe geɖe trɔ dzime, xɔ nyɔnyrɔ, heva zu Yesu yomedzelawo. (Dɔwɔwɔwo 2:38, 41, NW; 4:4) Le ƒe 36 M.Ŋ. me la, Trɔ̃subɔdukɔwo me tɔ trɔdzimewo hã ɖe afɔ siawo. (Dɔwɔwɔwo 10:1-48) Le míaƒe ŋkekea me la, nyanyuia dzixɔxɔse le ame akpe geɖe ʋãm be woatrɔ dzime tso woƒe nuvɔ̃wo me, aɖe adzɔgbe na Mawu, ahaxɔ nyɔnyrɔ. Woxɔ xɔxɔ ƒe nyanyui la eye wole Yesu ƒe tafevɔsa la dzi xɔm se. Gawu la, wole nu wɔm le dzɔdzɔenyenye me eye wole Mawu ƒe Fiaɖuƒea ƒe akpa dzi.
4. Nukae nye xɔse?
4 Gake nukae nye xɔse? Apostolo Paulo ŋlɔ bena: “Xɔse enye dziɖoɖo ɖe nusiwo wokpɔ mɔ na ŋu kple kaka ɖe nusiwo womekpɔna o la dzi.” (Hebritɔwo 11:1) Míaƒe xɔse naa míekana ɖe edzi be nusianu si ƒe ŋugbe Mawu do le eƒe Nya la me ava eme godoo abe ɖe wòva eme gɔ̃ hã xoxo ene. Ele abe ɖe ɖaseɖiɖi aɖe li si le kpe ɖom edzi na mí be nane nye mía tɔ ene. Xɔse hã nye ‘kaka ɖe nusiwo womekpɔ haɖe o’ alo eɖeɖefia be woka ɖe nusi kpɔm womele o dzi. Míaƒe susu ƒe nugɔmesese kple dzi ƒe ŋudzedzekpɔkpɔ nana míekana ɖe edzi be nusiawo nye nu ŋutɔŋutɔwo, togbɔ be míekpɔ wo o hã.—Korintotɔwo II, 5:7; Efesotɔwo 1:18.
Míehiã Xɔse!
5. Nukatae xɔse le vevie nenema gbegbe ɖo?
5 Be gbɔgbɔmenuwo nahiã mí nye seselelãme si wotsɔ dzi míi, gake womedzi mí kple xɔse ya o. Le nyateƒe me la, ‘menye amewo katã sie xɔse le o.’ (Tesalonikatɔwo II, 3:2) Gake ele be xɔse nanɔ Kristotɔwo si hafi woate ŋu anyi Mawu ƒe ŋugbedodowo dome. (Hebritɔwo 6:12) Esi Paulo tɔ asi xɔsetɔ geɖe dzi vɔ la, eŋlɔ bena: “Esi ɖaseɖilawo ƒe alilikpo gã ŋutɔ ƒo xlã mí la, mina míaɖe nu kpekpe sia nu kpekpe kple nuvɔ̃, si ɖea to ɖe mí la ɖa, eye mina míatsɔ dzidodo anɔ dudimekeke, si woɖo na mí la dzi, eye míakpɔ Yesu, si nye xɔse ƒe gɔmeɖola kple nuwula la ɖa.” (Hebritɔwo 12:1, 2) Nukae nye “nuvɔ̃, si ɖea to ɖe mí la”? Eyae nye xɔsemanɔamesi kple xɔse si nɔ amesi tsã la ƒe toyiyi. Be xɔse sẽŋu nayi edzi anɔ mía si la, ele be ‘míalé ŋku ɖe Yesu ŋu vevie’ ahadze eƒe kpɔɖeŋu yome. Ehiã hã be míatsri agbegbegblẽnɔnɔ, awɔ avu kple ŋutilã ƒe dɔwɔwɔwo, atsri ŋutilãmenudidi, xexemenunya, kple kɔnyinyi siwo mesɔ ɖe Ŋɔŋlɔawo nu o. (Galatiatɔwo 5:19-21; Kolosetɔwo 2:8; Timoteo I, 6:9, 10; Yuda 3, 4) Gawu la, ele be míaxɔe ase be Mawu li kpli mí eye be aɖaŋuɖoɖo siwo le eƒe Nya la me wɔa dɔ nyateƒe.
6, 7. Nukatae wòsɔ be míado gbe ɖa abia xɔse?
6 Xɔse mate ŋu asu mía si le mía ŋutɔwo ƒe ŋusẽ me o. Xɔse nye Mawu ƒe gbɔgbɔ kɔkɔea, alo dɔwɔŋusẽ, ƒe kutsetsewo dometɔ ɖeka. (Galatiatɔwo 5:22, 23) Ke ne ehiã be míado ŋusẽ míaƒe xɔse ya ɖe? Yesu gblɔ be: ‘Ne mienya alesi miana nunana nyui mia viwo la, ʋuu keke Fofo si le dziƒo mana gbɔgbɔ kɔkɔe amesiwo bianɛ la o mahã?’ (Luka 11:13) Ẽ, mina míado gbe ɖa abia gbɔgbɔ kɔkɔea, elabena ate ŋu ana xɔse si míehiã atsɔ awɔ Mawu ƒe lɔlɔ̃nu le nɔnɔme sesẽtɔ kekeake gɔ̃ hã me la nasu mía si.—Efesotɔwo 3:20.
7 Esɔ be míado gbe ɖa abia xɔse geɖe. Hafi Yesu nanya gbɔgbɔ vɔ̃ aɖe adoe le ɖekakpui aɖe me la, ɖevia fofo ɖe kuku be: “Xɔse le asinye! Kpe ɖe ŋunye le afisi xɔse hiãm le!” (Marko 9:24, NW) Yesu ƒe apostolowo gblɔ be: “Na míaƒe xɔse nadzi ɖe edzi na mí.” (Luka 17:5) Eyata mina míado gbe ɖa abia xɔse ahaka ɖe edzi be Mawu ɖoa gbedodoɖa mawo ŋu.—Yohanes I, 5:14.
Mawu ƒe Nya Dzixɔxɔse le Vevie
8. Aleke Mawu ƒe Nya la dzixɔxɔse ate ŋu akpe ɖe mía ŋui?
8 Do ŋgɔ kpuie na Yesu ƒe vɔsakua la, egblɔ na eyomedzelawo be: “Migana miaƒe dzi naʋuʋu nyanyanya o; mixɔ Mawu dzi se, eye mixɔ nye hã dzinye se.” (Yohanes 14:1) Mí Kristotɔwo míexɔ Mawu kple Via dzi se. Ke Mawu ƒe Nya la ya ɖe? Ne míesrɔ̃e hewɔ eŋudɔ kple kakaɖedzi blibo be aɖaŋuɖoɖo kple mɔfiame nyuitɔwoe le eme na mí la, ate ŋu akpɔ ŋusẽ nyui ɖe míaƒe agbe dzi wòaɖe vi na mí.—Hebritɔwo 4:12.
9, 10. Aleke nàɖe nya si wògblɔ le Yakobo 1:5-8 ku ɖe xɔse ŋu mee?
9 Kuxiwo yɔ mí amegbetɔ madeblibowo ƒe agbe me fũ. Gake Mawu ƒe Nya la dzixɔxɔse ate ŋu akpe ɖe mía ŋu ŋutɔ. (Hiob 14:1) Le kpɔɖeŋu me, tsɔe be míenya alesi míanɔ te ɖe tetekpɔ aɖe nui o. Mawu ƒe Nya ɖo aɖaŋu sia na mí be: “Ne mia dometɔ aɖe le nunya hiãm la, neɖe kuku na Mawu, si na amewo katã faa, eye medoa ŋukpe ame o la, eye wòatsɔe anɛ. Ke neɖe kuku le xɔse me, eye megake ɖi aɖeke o; elabena amesi le ɖi kem la, eɖi ƒutsotsoe, si ya ƒona yina gbɔna la. Elabena ame kema megasusu be, yeakpɔ nane atso Aƒetɔ la gbɔ o; ŋutsu dzimevesusula melina sesĩe le eƒe mɔwo katã dzi o.”—Yakobo 1:5-8.
10 Yehowa Mawu mado ŋukpe mí le esi míehiã nunya hele gbe dom ɖa le ebiam ta o. Ðe eteƒe la, akpe ɖe mía ŋu be nukpɔsusu si sɔ nanɔ mía si ɖe tetekpɔa ŋu. Haxɔsetɔwo aɖo ŋku ŋɔŋlɔ nyui aɖewo dzi na mí alo míake ɖe wo ŋu ne míele Biblia srɔ̃m. Alo Yehowa ƒe gbɔgbɔ kɔkɔea afia mɔ mí le mɔ bubu aɖe nu. Mía Fofo si le dziƒo ana nunya si míatsɔ anɔ te ɖe tetekpɔwo nu la mí ne ‘míeyi edzi le ebiam le xɔse me eye míeke ɖi kura o.’ Ne míele abe ƒutsotsoe si ya ƒona yina gbɔna ene la, ke míate ŋu akpɔ mɔ be míakpɔ naneke tso Mawu gbɔ o. Nukatae? Elabena esia afia be míenye dzimevesusulawo eye míeli ke le gbedodoɖa alo mɔ bubuwo—le xɔse ɖeɖe fia gɔ̃ hã me—nu o. Eyata ehiã be xɔse sẽŋu nanɔ mía si ɖe Mawu ƒe Nya kple mɔfiame si wònana la ŋu. Mina míade ŋugble le alesi wònaa kpekpeɖeŋu kple mɔfiame ƒe kpɔɖeŋu aɖewo ŋu.
Xɔse Kple Agbemenuhiahiãwo
11. Kakaɖedzi kae Mawu ƒe Nya la dzixɔxɔse na mí ku ɖe míaƒe gbesiagbe nuhiahiãwo ŋu?
11 Ke ne míele agbemenuhiahiãwo alo ahedada ƒe fu kpem fifia ya ɖe? Mawu ƒe Nya la dzixɔxɔse na mɔkpɔkpɔ si ŋu kakaɖedzi le mí be Yehowa akpɔ míaƒe gbesiagbe nuhiahiãwo gbɔ eye ana nu gbogbo aɖewo amesiwo katã lɔ̃e la mlɔeba. (Psalmo 72:16; Luka 11:2, 3) Ade dzi ƒo na mí ne míede ŋugble le mɔ si dzi Yehowa to na nuɖuɖu eƒe nyagblɔɖila Eliya esime dɔ to la ŋu. Emegbe Mawu to nukumɔ aɖe nu wɔe be wɔ kple ami si dzi nyɔnu aɖe, via ŋutsuvi, kple Eliya nɔ agbe ɖo la mevɔ o. (Fiawo I, 17:2-16) Nenema ke Yehowa kpɔ nyagblɔɖila Yeremya ƒe nuhiahiãwo gbɔe esime Babilontɔwo va ɖe to ɖe Yerusalem. (Yeremya 37:21) Togbɔ be nuɖuɖu ʋɛ aɖe koe nɔ Yeremya kple Eliya si hã la, Yehowa kpɔ wo dzi. Ewɔa nenema ke na amesiwo xɔa eyama dzi sena egbea hã.—Mateo 6:11, 25-34.
12. Aleke xɔse akpe ɖe mía ŋu be míakpɔ nuhiahiã veviwoe?
12 Xɔse si ŋuti míatsɔ Biblia ƒe gɔmeɖosewo ŋudɔwɔwɔ akpe ɖo mana míazu ŋutilã me kesinɔtɔwo o ya, gake akpe ɖe mía ŋu be míakpɔ nuhiahiã veviwo. Le kpɔɖeŋu me: Biblia ɖo aɖaŋu na mí be míanye amesiwo ɖia anukware, kua kutri, hedoa vevie nu. (Lododowo 22:29; Nyagblɔla 5:18, 19; Korintotɔwo II, 8:21) Mele be míabu ŋkɔ nyui si anɔ mía ŋu abe dɔwɔlawo ene la nu tsɛe gbeɖe o. Le teƒe siwo dɔ nyuiwo meli woakpɔ awɔ o gɔ̃ hã la, nu dzea edzi na dɔwɔla siwo ɖia anukware, wobi, eye wodoa vevie nu la wu ame bubuwo. Togbɔ be ŋutilãmenu ʋɛ aɖewo koe anɔ dɔwɔla siawo si hã la, zi geɖe la, nuhiahiã veviwo nɔa wo si eye nusi woa ŋutɔwo wɔ dɔ kpɔ la ɖuɖu naa woƒe dzi dzea eme.—Tesalonikatɔwo II, 3:11, 12.
Xɔse Kpena Ðe Mía Ŋu be Míanɔ Te Ðe Nuxaxa Nu
13, 14. Aleke xɔse kpena ɖe mía ŋu míenɔa te ɖe nuxaxa nui?
13 Mawu ƒe Nya la ɖee fia tẽ be ele dzɔdzɔmenu be woaxa nu ne lɔlɔ̃tɔ aɖe ku. Blemafofo wɔnuteƒe Abraham fa konyi le srɔ̃a malɔ̃nugbɔ, Sara, ƒe ku ta. (Mose I, 23:2) Dawid xa nu vevie esime wòse be via Absalom ku. (Samuel II, 18:33) Ame deblibo Yesu gɔ̃ hã fa avi le exɔlɔ̃ Lazaro ƒe ku ta. (Yohanes 11:35, 36) Ne lɔlɔ̃tɔ aɖe ku la, ate ŋu adzɔ be konyifafa nawu tsɔtsɔ na mí ya, gake Mawu ƒe Nya la me ŋugbedodowo dzixɔxɔse ate ŋu akpe ɖe mía ŋu míanɔ te ɖe nuxaxa ma nu.
14 Paulo gblɔ be: ‘Mɔkpɔkpɔ le asinye na Mawu bena tsitretsitsi li na ame dzɔdzɔewo kple ame madzɔmadzɔwo siaa.’ (Dɔwɔwɔwo 24:15) Ehiã be míaxɔ ɖoɖo si Mawu wɔ be woafɔ ame gbogbowo ɖe tsitre ava agbe mee la dzi ase. (Yohanes 5:28, 29) Amesiawo dometɔ aɖewo anye Abraham kple Sara, Isak kple Rebeka, Yakob kple Lea—siwo katã dɔ alɔ̃ le ku me fifia hele tsitretsitsi ava Mawu ƒe xexe yeyea me la lalam. (Mose I, 49:29-32) Dzidzɔ kae nye si wòanye ne wofɔ lɔlɔ̃tɔwo tso ku ƒe alɔ̃ me be woanɔ agbe le anyigba sia dzi! (Nyaɖeɖefia 20:11-15) Xɔse maɖe míaƒe nuxaxa ɖa keŋkeŋ fifia ya o, gake ana míanɔ Mawu, amesi kpena ɖe mía ŋu be míanɔ te ɖe míaƒe lɔlɔ̃tɔ aɖe ƒe ku nu, la ŋu kplikplikpli.—Psalmo 121:1-3; Korintotɔwo II, 1:3.
Xɔse Doa Ŋusẽ Blanuilélawo
15, 16. (a) Nukatae míate ŋu agblɔ be xɔsetɔwo ƒe blanuiléle menye nu yeye o? (b) Nukae míate ŋu awɔ atsɔ akpɔ blanuiléle gbɔe?
15 Mawu ƒe Nya la fia hã be xɔsetɔwo gɔ̃ hã ate ŋu alé blanui. Le Hiob ƒe dodokpɔ sesẽa me la, ese le eɖokui me be Mawu gblẽ ye ɖi. (Hiob 29:2-5) Nɔnɔme wɔnublanui si me Yerusalem kple eƒe gliawo nɔ la na Nexemya lé blanui. (Nexemya 2:1-3) Esi Petro gbe nu le Yesu gbɔ megbe la, elé blanui ale gbegbe be “wòfa avi vevie.” (Luka 22:62) Eye Paulo xlɔ̃ nu haxɔsetɔ siwo le hame si le Tesalonika be ‘woafa akɔ na blanuilélawo.’ (Tesalonikatɔwo I, 5:14) Eyata menye xɔsetɔ siwo li egbea koe léa blanui o. Ekema nukae míate ŋu awɔ anɔ te ɖe blanuiléle nu?
16 Kuxi sesẽ gbogbo siwo me tom míele la ate ŋu awɔe be míalé blanui. Le esi teƒe be míabu wo abe kuxi gã ɖeka ene la, míate ŋu azã Biblia ƒe gɔmeɖosewo atsɔ akpɔ wo gbɔ ɖekaɖekae. Esia awɔe be míaƒe blanuilélea dzi naɖe akpɔtɔ. Dɔwɔna si da sɔ kple ɖiɖiɖeme nyuie hã ate ŋu akpe ɖe mía ŋu. Nu ɖeka ya metrɔna o: Mawu kple eƒe Nya dzixɔxɔse tua gbɔgbɔmenyonyo ɖo elabena edoa ŋusẽ kakaɖedzi si le mía si be etsɔa ɖe le eme na mí vavã.
17. Aleke míewɔ nya be Yehowa tsɔa ɖe le eme na mí?
17 Petro na kakaɖedzinya fakɔname sia mí be: “Mibɔbɔ mia ɖokui ɖe Mawu ƒe asi sesẽ la te, bene wòakɔ mi ɖe dzi le ɣeyiɣi, si wòɖo ɖi la dzi. Mitsɔ miaƒe dzimaɖiwo katã da ɖe eyama dzi; elabena eyama léa be na mi.” (Petro I, 5:6, 7) Hakpala la dzi ha be: “Yehowa tso amesiwo katã dze anyi la xɔ, eye wòfɔ amesiwo katã wobɔbɔ ɖe anyi la, ɖe tsitrenu.” (Psalmo 145:14) Ele be míaxɔ kakaɖedzinya siawo dzi ase, elabena wole Mawu ƒe Nya la me. Togbɔ be blanuiléle akpɔtɔ anɔ anyi hã la, aleke wòdoa ŋusẽ xɔse enye si be míanya be míate ŋu adro míaƒe dzimaɖitsitsiwo katã ɖe mía Fofo lɔlɔ̃tɔ si le dziƒo la dzi!
Xɔse Kple Tetekpɔ Bubuwo
18, 19. Aleke xɔse kpena ɖe mía ŋu be míanɔ te ɖe dɔléle nui eye be míafa akɔ na haxɔsetɔ siwo le dɔ lém?
18 Woate ŋu ado míaƒe xɔse akpɔ vevie ne mía ŋutɔwo alo míaƒe lɔlɔ̃tɔwo dze dɔ vevie. Togbɔ be Biblia megblɔ be woda gbe le Kristotɔwo abe Epafrodito, Timoteo, kple Trofimo ene ŋu nukutɔe o hã la, ɖikeke mele eme o be Yehowa kpe ɖe wo ŋu be wodo dzi. (Filipitɔwo 2:25-30; Timoteo I, 5:23; Timoteo II, 4:20) Gawu la, hakpala la dzi ha le “amesi léa fɔ ɖe hiãtɔ ŋu” ŋu be: “Yehowa akpe ɖe eŋu le dɔba dzi; ne ele dɔ lém la, atrɔ eƒe aba dzi nɔnɔ bubui.” (Psalmo 41:2-4) Aleke hakpala la ƒe nyawo ate ŋu akpe ɖe mía ŋu be míafa akɔ na haxɔsetɔ siwo le dɔ lém?
19 Mɔ ɖeka si dzi míato ana gbɔgbɔmekpekpeɖeŋu enye be míado gbe ɖa ɖekae kple amesiwo le dɔ lém alo míado gbe ɖa ɖe wo ta. Togbɔ be míabia egbea be woada gbe le wo ŋu nukutɔe o hã la, míate ŋu abia Mawu be wòana dzidodoŋusẽ kple gbɔgbɔmeŋusẽ si hiã be woado dzi le gbɔdzɔgbɔdzɔ ƒe ɣeyiɣi mawo me la wo ale be woate ŋu anɔ te ɖe woƒe kuxia nu. Yehowa alé wo ɖe te, eye mɔkpɔkpɔ na ɣeyiɣi si me “duametɔ aɖeke magblɔ be, yele dɔ lém o” atu woƒe xɔse ɖo. (Yesaya 33:24) Akɔfafa kae nye si wònye be woanyae be to Yesu Kristo si wofɔ ɖe tsitre kple Mawu ƒe Fiaɖuƒea dzi la, woaɖe ameƒomea me tɔ toɖolawo tso nuvɔ̃, dɔléle, kple ku si me tegbee! Míeda akpe na Yehowa, ‘amesi ada gbe le míaƒe dɔlélewo katã ŋu,’ ɖe mɔkpɔkpɔ wɔnuku siawo ta.—Psalmo 103:1-3; Nyaɖeɖefia 21:1-5.
20. Nukatae míate ŋu agblɔ be xɔse ate ŋu alé mí ɖe te le tsitsi ƒe “ŋkeke vɔ̃wo” me?
20 Xɔse ate ŋu alé mí ɖe te le tsitsi ƒe “ŋkeke vɔ̃wo” me, esime míaƒe lãmesẽ kple ŋusẽ dzi le ɖeɖem kpɔtɔ. (Nyagblɔla 12:1-7) Eyata ame tsitsi siwo le mía dome ate ŋu ado gbe ɖa abe alesi hakpala si tsi la dzi hae ene be: “Wòe nye nye mɔkpɔkpɔ, Aƒetɔ Yehowa . . . Megagbem le amegãkuɣi o, eye ne nye ŋusẽ nu yi la, megagblẽm ɖi o!” (Psalmo 71:5, 9) Hakpala la se le eɖokui me be yehiã Yehowa ƒe kpekpeɖeŋu eye nenema ke mía hati Kristotɔ geɖe siwo tsi le Mawu ƒe subɔsubɔdɔa me la hã sena le wo ɖokui mee. Le xɔse si le wo si ta la, woate ŋu aka ɖe edzi be Yehowa ƒe kpekpeɖeŋu si nu metsina o la aɖo yewo gbɔ ɖaa.—Mose V, 33:27.
Lé Mawu ƒe Nya Dzixɔxɔse Me Ðe Asi
21, 22. Ne xɔse le mía si la, ŋusẽ kae wòkpɔna ɖe míaƒe ƒomedodo kple Mawu dzi?
21 Nyanyuia kple Mawu ƒe Nya bliboa dzixɔse kpena ɖe mía ŋu be míate ɖe Yehowa ŋu kplikplikpli. (Yakobo 4:8) Nyateƒee, eyae nye míaƒe Aƒetɔ Dziɖulagã, eye eyae ganye mía Wɔla kple Fofo hã. (Yesaya 64:8; Mateo 6:9; Dɔwɔwɔwo 4:24) Hakpala la dzi hã be: “Fofonye nènye, nye Mawu kple nye xɔname ƒe aga.” (Psalmo 89:27) Ne míexɔ Yehowa kple eƒe Nya si tso gbɔgbɔ me dzi se la, míawo hã míate ŋu abui be enye ‘xɔname ƒe agakpe’ na mí. Mɔnukpɔkpɔ dodzidzɔname kae nye si!
22 Yehowae nye Kristotɔ siwo wotsɔ gbɔgbɔ dzii kple woƒe zɔhɛ siwo kpɔa mɔ be yewoanɔ anyigba dzi la Fofo. (Romatɔwo 8:15) Eye míaƒe Dziƒofofoa dzixɔxɔse medoa ŋukpe ame gbeɖe o. Dawid gblɔ be: “Ne nye ŋutɔ fofonye kple nye ŋutɔ danye agblẽm ɖi la, Yehowa ŋutɔ axɔm.” (Psalmo 27:10, NW) Gawu la, kakaɖedzi sia le mía si be: “Yehowa maɖe asi le eƒe dukɔ ŋu o le eƒe ŋkɔ gã la ta.”—Samuel I, 12:22.
23. Be míayi edzi anɔ ƒomedodo me kple Yehowa tegbee la, nukae wòbia tso mía si?
23 Le nyateƒe me la, be míayi edzi anɔ ƒomedodo me kple Yehowa la, ele be míaxɔ nyanyuia dzi ase ahaxɔ Ŋɔŋlɔawo dzi ase ŋutɔŋutɔ—be wonye Mawu ƒe Nya. (Tesalonikatɔwo I, 2:13) Ele be míaxɔ Yehowa dzi ase bliboe ahana eƒe Nya la naklẽ ɖe míaƒe mɔ dzi. (Psalmo 119:105; Lododowo 3:5, 6) Míaƒe xɔse atsi ne míele gbe dom ɖa nɛ heka ɖe eƒe amenuveve, nublanuikpɔkpɔ, kple kpekpeɖeŋu dzi.
24. Nya fakɔname kae wogblɔ ɖe Romatɔwo 14:8?
24 Xɔse ʋã mí be míetsɔ mía ɖokui aɖe adzɔgbe na Mawu tegbee. Esi xɔse sẽŋu le mía si ta la, ne edzɔ be míaku gɔ̃ hã la, míenye esubɔla ɖeadzɔgbe siwo si tsitretsitsi mɔkpɔkpɔ le. Ẽ, ‘ne míele agbe kple ne míeku siaa la, míenye Yehowa tɔ.’ (Romatɔwo 14:8) Mina nya fakɔname sia nanɔ dzi me na mí esi míeyi edzi ka ɖe Mawu ƒe Nya dzi eye míeyi edzi le nyanyuia dzi xɔm se.
Aleke Nàɖo Wo Ŋui?
• Nukae nye xɔse, eye nukatae míehiã nɔnɔme sia?
• Nukata wòle vevie be míaxɔ nyanyuia kple Mawu ƒe Nya bliboa dzi ase?
• Aleke xɔse kpena ɖe mía ŋu be míakpe akɔ kple tetekpɔ vovovowoe?
• Nukae akpe ɖe mía ŋu be míalé míaƒe xɔse me ɖe asi?
[Biabiawo]
[Nɔnɔmetata siwo le axa 12]
Yehowa lé Yeremya kple Eliya ɖe te le esi xɔse nɔ wo si ta
[Nɔnɔmetata siwo le axa 13]
Xɔse sẽŋu nɔ Hiob, Petro, kple Nexemya si
[Nɔnɔmetata siwo le axa 15]
Be míayi edzi anɔ ƒomedodo me kple Yehowa tegbee la, ele be míaxɔ nyanyuia dzi ase