Dzimekɔkɔ—Enyo, Gake Ðe Eya Ðeɖe Sɔ Gbɔa?

ÐE WODEA asixɔxɔ dzimekɔkɔ ŋu le míaƒe gbesiagbegbenɔnɔ me ŋutɔŋutɔa? Nyagɔmeɖegbalẽ aɖe ɖe “dzimekɔkɔ” gɔme be “ameŋkumenu alo alakpanu mawɔmawɔ; nyateƒetoto; nuwɔwɔ wòato mɔ ɖeka; nuvãnyenye.” Ðikeke mele eme o be nɔnɔme sia le vevie hena ƒomedodo nyui me nɔnɔ kple amewo. Apostolo Paulo xlɔ̃ nu be: “Miɖo to miaƒe aƒetɔwo le ŋutilã nu le nusianu me; menye le ame ŋku me nuwɔwɔ me, abe alesi wòdzea amewo ŋu la ene o, ke boŋ le dzimekɔkɔ me le Aƒetɔ la vɔvɔ̃ me.” (Kolosetɔwo 3:22) Amekae madzɔ dzi na be yeƒe dɔwɔla nye amesi kɔa dzime ɖe dɔ ŋu wɔna o? Egbea la, ele bɔbɔe wu be amesiwo kɔa dzime la nakpɔ dɔ wòanɔ wo si woanɔ wɔwɔm.

Gake nusi naa dzimekɔkɔ nyoa ame ŋu wue nye alesi wòkpɔa ŋusẽ ɖe mía kple Mawu dome ƒomedodo dzii. Blema Israel-viwo xɔ Mawu ƒe yayra esime wowɔ seawo dzi helé fɔ ɖe ŋkekenyuiwo ɖuɖu ŋu nyuie. Esime Paulo nɔ nu ƒom tso kɔkɔenyenye si anɔ hamewo me ŋu la, exlɔ̃ nu Kristotɔwo be: “Mina míaɖu ŋutitotoŋkekenyuie, menye le amɔwɔ ʋaʋã xoxo me o, eye menye le vɔ̃ɖiwɔwɔ kple nu tovo wɔwɔ ƒe amɔwɔ ʋaʋã me o, hafi le dzadzɛnyenye kple nyateƒe ƒe amɔwɔ maʋãmaʋã la me boŋ.” (Korintotɔwo I, 5:8) Be míaƒe tadedeagu nadze Mawu ŋu la, menye ɖeko dzimekɔkɔ nyo o, ke ele vevie hã. Ke hã, de dzesii be dzimekɔkɔ ɖeɖe mesɔ gbɔ o. Ele be wòazɔ aduadu kple nyateƒe.

Tɔdziʋu si woyɔna be Titanic la wɔlawo kple eɖolawo anya xɔe se kple dzi blibo be tɔdziʋu gã la mate ŋu anyrɔ gbeɖegbeɖe o. Gake le eƒe mɔzɔzɔ gbãtɔ me le ƒe 1912 me la, elɔ tsikpe aɖe eye ame 1,517 bu woƒe agbe. Ƒe alafa gbãtɔ me Yudatɔ aɖewo anya ka ɖe mɔ si dzi wotona subɔa Mawu la dzi kple dzi blibo, gake woƒe veviedodonua ‘menye kple sidzedze vavãtɔ o.’ (Romatɔwo 10:2) Be míaƒe nu nadze Mawu ŋu la, ele be nusiwo dzi míexɔ se kple dzi blibo la nanɔ te ɖe nyateƒenyawo dzi. Adzɔ dzi na Yehowa Ðasefo siwo le miaƒe nutoa me be yewoakpe ɖe ŋuwò nàdzro nusi wòfia be woasubɔ Mawu kple dzimekɔkɔ kple nyateƒe la me.