‘Nyemenya Nu Boo Aɖeke Tso Mawu Ŋu Tsã O’

ŊUTSU aɖe si le Kerala, India, ŋlɔ bena: “Le ƒe si va yi me la, Yehowa Ðasefowo vaa gbɔnye va gblɔa Mawu ƒe Fiaɖuƒe ŋutinya wɔnukuwo nam. Menɔ Katolikoha me ƒe enyi sɔŋ, gake nyemenya nu boo aɖeke tso Mawu ŋu o. Le ƒe ɖeka pɛ ko me la, mesrɔ̃ nu gbogbo aɖewo ŋutɔ.” Eyi edzi be: “Edzɔ dzi nam ŋutɔ be mese be wotaa Gbetakpɔxɔ ɖe gbegbɔgblɔ 139 me [ezu gbegbɔgblɔ 146 fifia]. Ewɔ nuku be gbegbɔgblɔwo katã me tɔwo va le Mawu ŋuti gbedasia sem.”

Togbɔ be xexemenunyala geɖe gblɔ be manya wɔ be woadze si Mawu o hã la, apostolo Paulo na eme kɔ ƒã be anya wɔ. Esime Paulo nɔ nu ƒom na Atenetɔwo ƒe ƒuƒoƒo aɖe, si me tɔ aɖewo subɔna le vɔsamlekpui aɖe si woɖi na “Mawu, si womenya o” ŋu la, egblɔ be: “Nusi mienya o, hafi miele esubɔm la, eya ke gblɔm mele le mia fiam. Mawu, si wɔ xexeame kple nusiwo katã le eme la, . . . eya ŋutɔ na agbe kple gbɔgbɔ kpakple nuwo katã amesiame, eye wòwɔ bena, amewo ƒe dukɔ sia dukɔ tso ʋu ɖeka me le anyigba la ƒe ŋku me.”—Dɔwɔwɔwo 17:23-26.

Paulo de dzi ƒo na eƒe nyaselawo be woadi Wɔla la adze sii, elabena ‘mele adzɔge tso mía dometɔ amesiame gbɔ o.’ (Dɔwɔwɔwo 17:27) Adzɔ dzi na Yehowa Ðasefowo be yewoakpe ɖe ŋuwò nàdze si Mawu vavã la kple eƒe nɔnɔme nyoameŋuwo nyuie wu.