Ðe Wòle Be Vinye Nade Sukua?

ÀTE ŋu atsɔ susu akpɔ alesi wòanɔ ne mate ŋu axlẽ nya siawo siwo le axa sia oa? Ke ne mete ŋu doa mia de dukɔa ƒe gbe si wodona le dziɖuɖudɔwɔƒewo o ya ɖe? Tsɔe be mete ŋu tɔa asi mía de dukɔ dzi le xexeame ƒe anyigbatata dzi o ɖe? Ðevi gbogbo aɖewo atsi le nɔnɔme sia tututu me. Ke viwò ya ɖe?

Ðe wòle be viwò nade sukua? Le dukɔ geɖe me la, enye dzizizi be woade gɔmedzesuku kple sekɛndrisuku eye zi geɖe la womexea fe aɖeke ɖe eta o. Ðeviwo ƒe Gomenɔamesi Nubabla bua sukudede be enye gome vevi aɖe si wòle be woana amesiame. Nenema kee Xexeame Katã ƒe Amegbetɔ ƒe Gomenɔamesiwo Ŋuti Nuŋlɔɖi la hã bui. Gake le dukɔ aɖewo me la, sukudede femaxee manɔ anyi o eye wòate ŋu ada gakuxiwo ɖe dzilawo dzi. Mina míatsɔ dzila Kristotɔ siwo di be yewo viwo nanye agbalẽnyalawo, to sukudede me loo alo mɔ bubuwo nu la, ƒe nukpɔsusu adzro nya sia mee.

Biblia me Me Siwo Nya Agbalẽ

Mawu subɔla siwo ŋkɔ woyɔ le Biblia me la dometɔ akpa gãtɔ nya nuxexlẽ kple nuŋɔŋlɔ. Yesu ƒe apostolo siwo nye Petro kple Yohanes nye Yudatɔ ƒudzidelawo gake woŋlɔ Biblia-gbalẽwo ɖe Helagbe me, menye ɖe wo degbe si nye Galileagbe me o. * Anɔ eme be wo dzilawo kpɔ egbɔ be wo viwo srɔ̃ nuxexlẽ kple nuŋɔŋlɔ ya teti. Biblia ŋlɔla bubu siwo nɔ nɔnɔme sia tɔgbe me la dometɔ aɖewoe nye alẽkplɔla Dawid, agbledela Amos, kple Yesu dadavi Yuda, si anya nye atikpala.

Ŋutsu si ŋkɔe nye Hiob nya nuxexlẽ kple nuŋɔŋlɔ, eye Biblia-gbalẽ si tɔ eƒe ŋkɔ la ɖee fia be enya nane tso dzɔdzɔmeŋutinunya ŋu. Ðewohĩ hakpanyawo ŋɔŋlɔ ƒe ŋutetewo hã le esi, elabena eƒe nya siwo woŋlɔ ɖe Hiob ƒe agbalẽa me la le hakpanyawo ƒe nɔnɔme me. Eye míenya be Kristotɔ gbãtɔwo nya agbalẽ elabena wofɔ nusiwo anya nye woƒe Ŋɔŋlɔawo me nuŋlɔɖi siwo wowɔ le kpekpewo me la le zɔwo kple ze gbagbãwo me.

Ele Vevie Be Kristotɔwo Nanya Agbalẽ

Ehiã be Kristotɔwo katã nadzi Biblia me sidzedze si le wo si la ɖe edzi ne wodi be yewoƒe nu nadze Mawu ŋu. (Filipitɔwo 1:9-11; Tesalonikatɔwo I, 4:1) Ŋɔŋlɔawo kple Biblia-srɔ̃gbalẽwo ŋudɔwɔwɔ moveviɖoɖotɔe ate ŋu ana woawɔ ŋgɔyiyi le gbɔgbɔ me. Esi Mawu na woŋlɔ eƒe Nya ɖi ta la, edi be ye subɔlawo nanye agbalẽnyalawo alesi sɔ. Biblia xexlẽ ahase egɔme nana eƒe aɖaŋuɖoɖowo dzi nya wɔna bɔbɔe. Le nyateƒe me la, ehiã be míaxlẽ eƒe akpa aɖewo wu zi ɖeka hafi ase egɔme ale be míate ŋu ade ŋugble le wo ŋu.—Psalmo 119:104; 143:5; Lododowo 4:7.

Yehowa ƒe amewo xɔa agbalẽ gbogbo aɖewo siwo nyo, siwo woŋlɔ le “dɔla nuteƒewɔla kple aɖaŋudzela” ƒe mɔfiafia te la, ƒe sia ƒe. (Mateo 24:45-47) Agbalẽ siawo ƒoa nu tso ƒomegbenɔnɔ, kɔnuwo, mawusubɔsubɔ, dzɔdzɔmeŋutinunya, kple nyati bubu geɖewo ŋu. Vevietɔ wu la, Ŋɔŋlɔawo me ɖaŋuɖoɖo siwo ku ɖe  gbɔgbɔmenyawo ŋu la le wo me. Ne viwòwo mete ŋu xlẽa nu o la, nyatakaka vevi geɖe ato wo ŋu.

Ameƒomea ƒe ŋutinya sɔsrɔ̃ le vevie elabena ekpena ɖe mía ŋu be míase nusitae wòhiã be Mawu ƒe Fiaɖuƒea nava gɔme. Duwo ŋutinya veviwo nyanya hã nyo. Biblia ƒo nu tso teƒe geɖewo, abe Israel, Egipte, kple Hela ene ŋu. Ðe viwòa ate ŋu atɔ asi wo dzi le xexeame ƒe anyigbatata dzia? Ðe wòate ŋu atɔ asi wo de dukɔ ŋutɔ dzia? Teƒewo makpɔmakpɔ adze sii le anyigba ƒe nɔnɔmetata dzi ate ŋu aɖe ame ƒe subɔsubɔdɔa wɔwɔ bliboe le anyigbamama aɖe me dzi akpɔtɔ.—Timoteo II, 4:5.

Hamea me Mɔnukpɔkpɔwo

Agbanɔamedzi geɖe siwo lɔ nuxexlẽ ɖe eme lae le Kristotɔ hamemegãwo kple subɔsubɔdɔwɔlawo dzi. Le kpɔɖeŋu me, hame ƒe kpekpewo me wɔnawo li siwo ŋu wòle be woadzra ɖo ɖo. Ehiã be woawɔ agbalẽ siwo woxɔna kple nudzɔdzɔwo ŋuti nuŋlɔɖiwo ɖi. Ne ame menya nuxexlẽ kple nuŋɔŋlɔ o la, asesẽ nɛ ŋutɔ be wòatsɔ agbanɔamedzi siawo nyuie.

Lɔlɔ̃nu faa dɔwɔlawo subɔna le Betel-ƒewo me le xexeame godoo. Be kadodo nyui nate ŋu anɔ lɔlɔ̃nu faa dɔwɔla siawo dome eye woawɔ woƒe dɔwo, abe agbalẽwo gɔmeɖeɖe kple mɔ̃wo dzadzraɖo ene la, ele be woate ŋu axlẽ dukɔ si me wole la ƒe gbe si wodona le dziɖuɖudɔwɔƒewo ahaŋlɔe. Ne mɔnukpɔkpɔ sia tɔgbe ate ŋu asu viwòwo si la, ehiã godoo be woanya nuxexlẽ kple nuŋɔŋlɔ ya teti. Susu vevi bubu kawo tae wòle be viwò nade suku ɖo?

Hiãkame Kple Aʋatsodzixɔse

Wɔna megava nɔa amesiwo hiãkame le fu wɔmee la ŋu le nɔnɔme aɖewo me o. Gake le go bubuwo me la, sukudede si sɔ ate ŋu akpe ɖe mía kple mía viwo ŋu be míava kpe fu yakatsyɔ o. Agbenɔnɔ medea agbalẽmanyala gbogbo aɖewo dzi kura o. Ðeviwo kple dzilawo gɔ̃ hã kuna ɣeaɖewoɣi elabena ga sue si wòkpɔna la wɔe be womete ŋu dea kɔdzi o. Nunyuimakpɔɖu kple aƒenyuimakpɔnɔme va nyea amesiwo mede suku tututu o alo mede kura o la tɔ gome. Sukudede alo nuxexlẽ kple nuŋɔŋlɔ ya teti nyanya ate ŋu anye kpekpeɖeŋu aɖe kokoko le go siawo me.

Agbalẽnyanya hã ɖea aʋatsodzixɔse si ate ŋu ava su ame si la dzi kpɔtɔna. Enye nyateƒe be aʋatsodzixɔse bɔ ɖe agbalẽnyalawo kple agbalẽmanyalawo siaa dome ya. Gake woate ŋu able alo aba amesiwo menya agbalẽ o la bɔbɔe wu bubuawo, le esi womate ŋu axlẽ agbalẽ siwo kloa nu le amebeble mawo dzi o ta. Eyata aʋatsodzixɔsewo va sua wo si wu eye woxɔna sena be gbɔgbɔmegbedalawo ate ŋu ada gbe na yewo nukutɔe.—Mose V, 18:10-12; Nyaɖeɖefia 21:8.

Menye Dɔ si Woakpɔ Awɔ Ta Koe Wodea Suku Ðo O

Ame geɖe sena le wo ɖokui me be susu si le agbalẽsɔsrɔ̃ ŋu koŋ enye be wòana yewoakpɔ ga. Ke hã, dɔwɔɖui mele ame aɖewo siwo de suku si o alo womekpɔa ga boo aɖeke tsɔ kpɔa nuhiahiã veviwo gbɔe o. Eyata dzila aɖewo ase le wo ɖokui me be viɖe aɖeke mele ɖevi dede suku ŋu o. Gake sukudede wɔa nu geɖe wu ame dzadzraɖo be wòawɔ dɔ axɔ fetu; edzraa  ɖeviwo ɖo ɖe agbe ŋu. (Nyagblɔla 7:12) Ne ame ate ŋu ado gbe si wodona le dukɔ si me wòle ƒe dziɖuɖudɔwɔƒewo, axlẽe, ahaŋlɔe la, nuwɔwɔ kple lãmesẽdɔwɔlawo, dziɖuɖumegãwo, alo gadzraɖoƒedɔwɔlawo nɔa bɔbɔe, alo nyea nu tsɛ gɔ̃ hã, wu be wòanye nu dziŋɔname.

Le teƒe aɖewo la, wokplɔa ɖevi siwo mede suku o la na ame be woasrɔ̃ gliɖoɖo, ɖɔkpɔkplɔ, nutɔtɔ, alo dɔ bubu aɖe le egbɔ. Dɔsɔsrɔ̃ nye nu nyui aɖe, gake ne ɖevi siawo mede suku kura o la, ɖewohĩ womanya nuxexlẽ kple nuŋɔŋlɔ nyuie o. Ðikeke mele eme o be ne wonya nuxexlẽ kple nuŋɔŋlɔ ya teti eye emegbe wosrɔ̃ dɔ la, womate ŋu aba wo o eye woakpɔ dzidzedze le agbe me wu.

Yesu Nazaretetɔ la nye atikpala eye anɔ eme be enɔ fofoa Yosef si xɔe nyi ŋu abe dɔsrɔ̃vi ene. (Mateo 13:55; Marko 6:3) Yesu nya agbalẽ hã, elabena esime wòxɔ ƒe 12 la, ete ŋu dzro nu me kple agbalẽnyalawo le gbedoxɔa me wòlé vi. (Luka 2:46, 47) Le Yesu gome la, dɔsɔsrɔ̃ medo kplamatse nusɔsrɔ̃ ƒomevi bubuwo o.

Ðe Wòle Be Woade Nyɔnuviwo Hã Sukua?

Ɣeaɖewoɣi la, dzilawo dea wo viŋutsuwo suku ke womedea wo vinyɔnuwo ya o. Ðewohĩ dzila aɖewo buna be enye gagbegblẽ be woade wo vinyɔnuwo suku eye woxɔe se be viɖe ate ŋu anɔ nyɔnuviwo ŋu ŋutɔ na wo dadawo ne wole aƒeme ŋkeke bliboa. Gake agbalẽmanyamanya  agblẽ nu le vinyɔnuvi ŋu. Dukɔ Ƒoƒuawo ƒe Ðeviwo Ŋu Nyagbɔkpɔha (UNICEF) ƒe agbalẽ aɖe gblɔ be: “Numekuku geɖe ɖee fia be nyɔnuviwo dede suku enye mɔnu nyui siwo dzi woato aɖe hiãkame dzi akpɔtɔ la dometɔ ɖeka.” (Poverty and Children: Lessons of the 90s for Least Developed Countries) Nyɔnuvi siwo de suku la te ŋu nɔa te ɖe agbemekuxiwo nu eye wowɔa nyametsotso siwo me nunya le, si ɖea vi na ƒomea me tɔwo katã.

Numekuku aɖe si wowɔ ku ɖe vidzĩwo ƒe kuku ŋu le Benin, Ɣetoɖoƒe Afrika, ɖee fia be vidada manyagbalẽwo ƒe vi siwo mexɔ ƒe atɔ̃ o la dometɔ 167 ye kuna le 1,000 ɖesiaɖe me, le esime nyɔnu siwo de sekɛndrisuku la ƒe vi 38 koe kuna. Dukɔ Ƒoƒuawo ƒe Ðeviwo Ŋu Nyagbɔkpɔha ƒo eta be: “Eyata afisi amewo de suku va ɖo la nye nu vevi aɖe le alesi vidzĩwo le kukumee me le Benin, abe alesi wòle le xexeame katã ene.” Eyata esia ɖee fia be viɖe vovovowo ate ŋu ado tso viwò nyɔnuwo dede suku me.

Ðe Hahosuku Ko Dede Sɔ Gbɔa?

Le afisiwo wòhiã le la, Yehowa Ðasefowo ɖoa hahosuku na hamea me tɔ siwo mete ŋu xlẽa nu o. * Ðoɖo nyui sia kpena ɖe amewo ŋu wosrɔ̃a nuxexlẽ, zi geɖe la esia nyea wo degbe. Ðe esia nye nusi woate ŋu atsɔ ɖo sukudede ŋutɔŋutɔ teƒe wòasɔa? Ðe wòle be  nàkpɔ hamea sinu be wòawɔ suku ƒe ɖoɖo na viwòwo ne sukuwo lia?

Togbɔ be hahosukua nye ɖoɖo aɖe si Yehowa Ðasefowo ƒe hamewo wɔ ameŋububutɔe hã la, ame tsitsi siwo si mɔnukpɔkpɔ mesu wode suku le woƒe ɖevime o koŋue wowɔe na. Anye be wo dzilawo menya vevienyenye si le sukudede ŋu o, alo be sukuwo menɔ anyi o. Woate ŋu akpe ɖe amesiawo ŋu to hahosuku siwo woɖo le hamea me la dede me. Gake hahosuku siawo menye nusi woatsɔ aɖo sukudede ŋutɔŋutɔ teƒe o eye womeɖoe be woafia suku ƒe nuwo le afima o. Womefiaa dzɔdzɔmeŋutinunya, akɔntabubu, kple blemaŋutinya le hahosuku siawo o. Gake wofiaa wo le suku siwo woɖo la me.

Le Afrika la, degbewo koŋ mee wowɔa hahosuku le wu gbe si wodona le dziɖuɖudɔwɔƒewo. Gake wodoa gbe si wodona le dziɖuɖudɔwɔƒewo la le suku siwo woɖo la me zi geɖe. Esia hã ɖea vi na ɖeviwo elabena agbalẽ gbogbo aɖewo kple agbalẽxexlẽ bubuwo bɔ ɖe gbe si wodona le dziɖuɖudɔwɔƒewo me. Togbɔ be hame ƒe hahosuku atu ɖevi ƒe sukudede ɖo hã la, mate ŋu axɔ ɖe eteƒe o. Ekema ne anya wɔ tututu la, ɖe mele be ɖeviwo nade suku oa?

Dzilawo ƒe Agbanɔamedzi

Ele be ŋutsu siwo xɔa ŋgɔ le hamea ƒe gbɔgbɔmenuhiahiãwo gbɔ kpɔkpɔ me la nanye Kristotɔ kpɔɖeŋunyuiɖolawo. Ele be woakpɔ woa ŋutɔwo ƒe aƒe kple ɖeviwo dzi “nyuie.” (Timoteo I, 3:4, 12) Aƒedzikpɔkpɔ “nyuie” bia be míawɔ nusianu si míate ŋui atsɔ akpe ɖe mía viwo ŋu be nu magagblẽ le wo ŋu le etsɔme o.

Mawu tsɔ agbanɔamedzi gã aɖe de dzila Kristotɔwo si. Ele be woatsɔ eƒe Nya anyi wo viwo ahakpe ɖe wo ŋu be woava ‘lɔ̃ sidzedze.’ (Lododowo 12:1; 22:6; Efesotɔwo 6:4) Apostolo Paulo ŋlɔ bena: “Ke ne ame aɖe melé be na ye ŋutɔ tɔwo o, eye vevietɔ na ye ŋutɔ ƒe aƒemetɔwo o la, egbe xɔse la, eye wòvɔ̃ɖi wu dzimaxɔsetɔ.” (Timoteo I, 5:8) Ele be míawɔ agbalẽsɔsrɔ̃ si sɔ ƒe ɖoɖo na mía viwo.

Ɣeaɖewoɣi la, sukudeɖoɖowo doa kpo nusiwo katã wòle be woafia ɖeviawo la gbɔ ɖoɖo le sukuviawo ƒe agbɔsɔsɔ akpa, ga si asu na sukua ƒe nuhiahiãwo makpɔmakpɔ, alo ɖewohĩ nufiala siwo dzi mele dzɔdzɔm o eye womele fe xem na tututu o ta. Eyata ele vevie be dzilawo natsɔ ɖe le nusiwo wo viwo le sɔsrɔ̃m le suku me vevie. Nunya le eme be woadze si nufialaawo, vevietɔ le sukutoɣi ɖesiaɖe ƒe gɔmedzedze, eye woate ŋu abia wo be woaɖo aɖaŋu na yewo ku ɖe alesi ɖeviawo awɔ ava zu nusrɔ̃vi nyuiwoe ŋu. Esia ana nufialawo nase le wo ɖokui me be wokpɔ ŋudzedze ɖe yewo ŋu eye wòaʋã wo be woadze agbagba geɖe aɖo nusiwo wòle be ɖeviawo nasrɔ̃ la gbɔ.

Sukudede nye ɖevi ƒe tsitsi ƒe akpa vevi aɖe. Lododowo 10:14 gblɔ be: “Nunyalawo dzraa sidzedze ɖo.” Esia nye nyateƒe le Biblia me sidzedze koŋ ŋuti. Ele be sidzedze geɖe nasu Yehowa ƒe amewo—ɖeviwo kple tsitsiawo siaa—si alesi dze be woate ŋu akpe ɖe ame bubuwo ŋu le gbɔgbɔ me eye ‘be woatsɔ wo ɖokui afia Mawu abe amesiwo like kple dɔwɔla, siwo mehiã be, ŋu nakpe o, kpakple amesiwo mã nyateƒenya la me pɛpɛpɛ ene.’ (Timoteo II, 2:15; Timoteo I, 4:15) Ekema ɖe wòle be viwòwo nade sukua? Ðikeke mele eme o be àƒo nya ta be ele be woade, togbɔ be eƒe akpa gãtɔ anɔ te ɖe nusi sɔ wu le miaƒe dukɔa me dzi hã. Gake ehiã be dzila Kristotɔwo naɖo biabia vevi sia ŋu be, ‘Ðe wòle be vinyewo nade sukua?’ Afika kee nèɖale o, ɖee mèlɔ̃ ɖe edzi be ele be woaɖo biabia ma ŋu sesĩe be ẽ oa?

[Etenuŋɔŋlɔwo]

[Aɖaka/Nɔnɔmetata si le axa 12, 13]

NE MANYA WƆ BE WOADE SUKU O

Manya wɔ be woade suku le nɔnɔme aɖewo me o. Le kpɔɖeŋu me, magazine si nye Refugees ka nya ta be ɖevi 1 le 5 me koe ate ŋu ade suku le sitsoƒesaɖawo me. Le go aɖewo me la, aglãdzedze nana wotua suku siwo le nutoa me la hena ɣeyiɣi didi aɖe. Ðewohĩ sukuwo gbɔ adidi akpa alo be womanɔ nuto aɖewo me o. Kristotɔwo yometiti hã nana wonyaa ɖeviwo le suku.

Aleke nàte ŋu akpe ɖe viwòwo ŋu le nɔnɔme sia mee? Nukae nàte ŋu awɔ ne vi geɖe le asiwo eye miele nuto aɖe si me ganyawo wɔe be wo katã mate ŋu ade suku o me? Ðe nàte ŋu ade viwòwo dometɔ ɖeka alo eve suku eye womaɖo gbɔgbɔmefɔku me oa? Ne nenemae la, ɖewohĩ woate ŋu ana kpekpeɖeŋu le nusiwo srɔ̃m wole le sukua la fiafia ɖevi mamlɛawo me.

Nusi woyɔna be sukudede le aƒeme le dukɔ aɖewo me. * Le ɖoɖo sia me la, dzilaawo dometɔ ɖeka zãa gaƒoƒo ʋɛ aɖewo tsɔ fiaa nu ɖevi la gbesiagbe. Le blemafofowo ƒe ɣeyiɣiwo me la, dzilawo kpɔ dzidzedze le nufiafia wo viwo me. Anɔ eme be le hehe nyui si dzilawo na ta la, Yakob vi ŋutsu Yosef dze te ŋu kpɔ amewo dzi esime wònye ɖekakpui dzaa ko.

Anye nu sesẽ be woafia nusiwo katã wofiana le suku la le teƒe abe sitsoƒesaɖa ene me, gake dzilawo ate ŋu azã agbalẽ siwo Yehowa Ðasefowo tana atsɔ afia nui. Le kpɔɖeŋu me, woate ŋu azã Nye Agbalẽ Si Nye Biblia-Ŋutinyawo atsɔ afia nu ɖevi suewoe wòanyo. Magazine si nye Nyɔ! ƒoa nu tso nyati vovovowo ŋu. Woate ŋu azã agbalẽ si nye Life—How Did It Get Here? By Evolution or by Creation? atsɔ fia nu tso dzɔdzɔmeŋutinunya ŋui. Xexeame katã ƒe anyigbatata sue aɖe le Yearbook of Jehovah’s Witnesses me eye woƒoa nu tso alesi agbe kple gbeƒãɖeɖe le dukɔ vovovowo me le ŋu.

Nu nyui geɖe ate ŋu ado tso eme ne wotrɔ asi le nufiamea ŋu nyuie wòsɔ ɖe ɖeviawo ƒe nugɔmesese nu. Ne woyi nuxexlẽ kple nusɔsrɔ̃ dzi la, woate ŋu atrɔ ɖe sukudede ŋu bɔbɔe ne wova kpɔ ɖe emegbe. To afɔɖeɖea wɔwɔ gbã kple agbagbadzedze me la, àte ŋu akpe ɖe viwòwo ŋu be woanya agbalẽ nyuie, eye aleke ema aɖe vii enye si!

[Etenuŋɔŋlɔ]

[[Nɔnɔmetata]

Nukae nàte ŋu awɔ ne èle afisi viwòwo mate ŋu ade suku le o?