Míele Kpewòm Dzidzɔtɔe

FIẼNUÐUÐU Mamlɛa, si Aƒetɔ Yesu Kristo ɖo anyi anye ƒe 2,000 enye si va yi la, nye nusi de ŋgɔ wu ŋutinya me wɔna dodzidzɔname aɖe ko. Tso esime woɖoe anyi la, ekpɔ ŋusẽ ɖe amewo dzi vevie. Nya siwo ame geɖe xlẽ le Nyanyuigbalẽawo me tso nusi dzɔ le zã ma me ŋu wɔ dɔ ɖe wo dzi ale gbegbe be wodzea agbagba be yewoaɖu Aƒetɔ ƒe Fiẽnuɖuɖua le mɔ vovovowo nu.

Eme kɔ be amewo dzea agbagba siawo katã, esi wònye Yesu Kristo ŋutɔe de se be ye yomedzelawo naɖu azã sia eye be woanɔ ewɔwɔ dzi ta. Egblɔ na wo tẽ be: “Minɔ esia wɔwɔ dzi hena ŋkuɖoɖo dzinye.”—Luka 22:19, NW; Korintotɔwo I, 11:23-25.

Gake be azãa naɖe vi ŋutɔŋutɔ la, ele be gɔmesese vavãtɔ si Mawu ƒe Nya, Biblia na tso eŋu la nanɔ ame si. Tsɔ kpe ɖe eŋu la, ele vevie be woanya nusi Biblia gblɔ tso ɣeyiɣi si wòle be woaɖui kple alesi woaɖui la ŋu.

Le Yesu ƒe sededea dzi wɔwɔ me la, Yehowa Ðasefo siwo le xexeame godoo akpe ta le Kuɖagbe, April 16, 2003, ƒe fiẽ aɖo ŋku Yesu ƒe kua dzi. Anye ɣeyiɣi si me woadzro Ŋɔŋlɔawo me ahagbugbɔ dzo yeye ade xɔse kple lɔlɔ̃ si le wo si na Aƒetɔ Yesu Kristo, amesi gblɔ be: “Ale gbegbe Mawu lɔ̃a xexeame bena, wòtsɔ ye ŋutɔ ƒe Tenuvi hena, bena amesiame, si xɔa edzi sena la, mele tsɔtsrɔ̃ ge o, ke boŋ wòakpɔ agbe mavɔ” la me. (Yohanes 3:16) Míele kpewòm dzidzɔtɔe be nàwɔ ɖeka kpli wo le fiẽ ma me bena wò hã nàte ŋu ado ŋusẽ xɔse kple lɔlɔ̃ si le asiwò na Yesu Kristo kple Yehowa Mawu, Dziƒofofo la.