Nyabiabia Siwo Tso Exlẽlawo Gbɔ

Ðe wònye nuvɔ̃ be woaɖe aƒemelã aɖe si nɔa ame ŋu si le dɔ lém vevie alo tsi akpa ƒe agbe ɖa?

Ame gbogbo aɖewo tsɔ ɖe le lã vovovowo me vevie eye woƒe nu dzɔa dzi na wo. Lã aɖewo siwo nɔa ame gbɔ le aƒeme va zua evelia na ame. Le kpɔɖeŋu me, wonya avuwo be wotsɔa toɖoɖo blibo kple xɔlɔ̃wɔwɔ naa woƒe aƒetɔwo. Eyata gɔmesese va nɔa lɔlɔ̃ si nɔa amewo kple woƒe lã mamlãewo dome ŋu, vevietɔ ne lãa nye esi nɔ wo gbɔ ƒe geɖe.

Ke hã lã geɖewo ƒe agbenɔƒewo medidi boo o. Avuwo te ŋu nɔa agbe ƒe 10 va ɖo ƒe 15 alo wu nenema, abe alesi dadiwo hã te ŋu nɔnae ene, eye enɔa te ɖe eƒomevi siwo wonye dzi. Ne lã mamlãewo tsi la, dɔléle te ŋu ɖea fu na wo eye wozua lã nuwɔewo, eye ate ŋu ate ɖe woƒe aƒetɔ siwo ɖoa ŋku alesi wozã tsã esi wometsi nenema gbegbe o la dzi. Ðe wòanye nuvɔ̃ be woaɖe wo le fukpekpe ma mea, si nye be woaɖe woƒe agbe ɖa?

Kristotɔ adi be yeawɔ nu le ɖekawɔwɔ me kple Mawu ƒe lɔlɔ̃nu ne ele nu wɔm kple lãwo. Le nyateƒe me la, ŋlɔmiwɔwɔ le wo ŋu tsi tre ɖe Mawu ƒe lɔlɔ̃nu ŋu, elabena eƒe Nya la gblɔ be: “Ame dzɔdzɔe sea veve na eƒe lãwo ti.” (Lododowo 12:10) Ke hã esia mefia be Mawu bua lãwo abe alesi wòbua amegbetɔwo ene o. Esi Mawu wɔ amegbetɔ la, eɖee fia eme kɔ ƒã be vovototo le woawo kple lãwo dome. Le kpɔɖeŋu me, ena amegbetɔwo agbe mavɔ nɔnɔ ƒe mɔkpɔkpɔ, gake mewɔe alea na lãwo o. (Romatɔwo 6:23; Petro II, 2:12) Esi wònye eyae nye Wɔla ta la, ekpɔ mɔ afia ƒomedodo si dze be wòanɔ amegbetɔwo kple lãwo dome.

Mose I, 1:28 gblɔ ƒomedodo si esia nye na mí. Mawu gblɔ na ame gbãtɔawo be: “Miaɖu ƒumelãwo kple dziƒoxe dzodzoewo kple lã, siwo katã zɔna le anyigba dzi la dzi.” Nenema ke wogblɔ le Psalmo 8:7-9 hã be: “[Mawu tsɔ] nuwo katã de [amegbetɔ ƒe] afɔ te: alẽwo kple nyiwo siaa hekpe ɖe gbemelãwo hã ŋu, dziƒoxeviwo kple ƒumelãwo kple nusianu, si zɔa atsiaƒu me.”

Mawu na eme kɔ be amegbetɔ ate ŋu awɔ lãwo ŋudɔ nyuie ahawu wo. Le kpɔɖeŋu me, woate ŋu azã woƒe agbalẽa atsɔ awɔ nudodowoe. Mawu ɖe mɔ hã na amegbetɔwo be woaɖu lã le Noa ƒe ŋkekea me Tsiɖɔɖɔa megbe, si nye nusi wotsɔ kpe ɖe amagbe si wotsɔ na wo va yi la ŋu.—Mose I, 3:21; 4:4; 9:3.

Esia meɖe mɔ be woanɔ lãwo wum yakatsyɔ hena modzakaɖeɖe nuwɔnawo o. Le Mose I, 10:9 la, Biblia ɖɔ Nimrod be enye “adela kalẽtɔ.” Gake mawunyakpukpui sia gayi edzi gblɔ be esia na ‘wòtsi tre ɖe Yehowa ŋu.’

Eyata togbɔ be amegbetɔ nye agbo ɖe lãwo dzi hã la, mele be wòazã ŋusẽ ma le mɔ gbegblẽ nu o, ke boŋ ele be wòazãe le ɖekawɔwɔ me kple Mawu ƒe Nya la ƒe gɔmeɖosewo. Esia ate ŋu alɔ alesi womazi kpi akpɔ aƒemelã aɖe ne etsi akpa, ne exɔ abi vevie, alo ne dɔléle si awui godoo dze edzi o la ɖe eme. Le go sia me la, enye Kristotɔ ƒe agbanɔamedzi be wòatso nya me le nusi wòawɔ ŋu. Ne ekpɔ be anye nublanuikpɔkpɔ be yemazi kpi akpɔ aƒemelã si ŋu mɔkpɔkpɔ gobi aɖeke megale o, si le fu kpem la, ekema ate ŋu atiae be yeana woawui.