Gilead Suku—Exɔ Ƒe 60 le Hehenana Dutanyanyuigblɔlawo Me

“MÍAƑE Biblia sɔsrɔ̃ moveviɖoɖotɔe na míete ɖe Yehowa ŋu kplikplikpli eye míesrɔ̃ nu geɖe tso eƒe habɔbɔa ŋu. Esia dzra mí ɖo ɖe dutadɔdasi wɔwɔ ŋu.” Aleae klass gbãtɔ nuwula aɖe ɖɔ nusi wòsrɔ̃ le Gbetakpɔxɔ Habɔbɔa ƒe Gilead Biblia Sukuae. Gilead Sukua ɖoa amewo ɖe dutanyanyuigblɔƒe tso esime woʋu enu ƒe 60 enye si va yi. Le March 8, 2003, dzi la, wowɔ klass 114 lia ƒe sukunuwuwu wɔnawo le Gbetakpɔxɔ Habɔbɔa ƒe Hehenaƒe le Patterson, New York. Ame 6,404 siwo kpe ta ɖe takpexɔa me kple ɖe afisiwo wona wòdze le television dzi le la lé to ɖe wɔnaa si me nuƒowo, gbebiamewo, kple ƒuƒoƒowo ƒe numedzodzro le la ŋu nyuie.

Theodore Jaracz, si nye Dziɖuhaa me tɔ, ye nɔ zia me na wɔnaa. Eƒe ŋgɔdonyawo na nyasela siwo tso dukɔ vovovowo me, amesiwo nye amedzrowo tso Asia, Carib-nutowo, Titina kple Anyiehe Amerika, kple Europa, va la nɔ to dzi vevie. Nɔviŋutsu Jaracz tu eƒe nyawo ɖe Timoteo II, 4:5 dzi tsɔ te gbe ɖe dutanyanyuigblɔla siwo xɔ hehe le Gilead la ƒe dɔ vevitɔ—si nye be ‘woawɔ nyanyuigblɔla ƒe dɔ’—dzi. Dutanyanyuigblɔla ɖia ɖase le nyateƒea ŋu to Biblia fiafia amewo me.

Sukuviwo Xɔ Nufiame Mamlɛa

Le nuƒo kpui siwo me John Larson, si nye United States Alɔdzekɔmitia me tɔ xɔ ŋgɔ le me la, eƒo nuƒo si doa ŋusẽ ame ƒe xɔse si ƒe tanyae nye, “Ne Mawu Le Mía Dzi la, Ameka Atsi Tre Ðe Mía Ŋuti?” (Romatɔwo 8:31) Nuƒola la ɖe Biblia ƒe nukpɔsusu si tae wòle be sukuviawo naɖo ŋu ɖe Yehowa ƒe ŋusẽ ŋu bliboe be akpe ɖe yewo ŋu yewoaɖu nusianu si ado kplamatse wo le woƒe dɔdasia me dzi la me. Nɔviŋutsu Larson nɔ te ɖe Romatɔwo 8:38, 39 dzi xlɔ̃ nu sukuviawo be: “Tɔ nàde ŋugble le ŋusẽ si zãm Mawu le ɖe nuwò ŋu, eye nàɖo ŋku edzi be naneke mate ŋu agblẽ alesi gbegbe Yehowa tsɔ ɖe le mewòe me o.”

Nuƒola si kplɔe ɖo enye Guy Pierce, si nye Dziɖuha la me tɔ. Etia tanya si nye “Mina Dzidzɔ Nenɔ Miaƒe Ŋkuwo Dzi!” (Luka 10:23) Eɖe eme be dzidzɔ vavãtɔ kpɔkpɔ lɔ Yehowa nyanya kple eƒe tameɖoɖo mavɔwo gɔmesese kpakple Biblia ƒe nyagblɔɖiwo me vava teƒekpɔkpɔ ɖe eme. Afisiafi si sukuviawo ayi la, woate ŋu ayi edzi anɔ dzidzɔ akuakua kpɔm to nana be dzi nanɔ wo dzɔm me. Nɔviŋutsu Pierce de dzi ƒo na sukunuwulawo be woade ŋugble le Yehowa ƒe dɔmenyonyo ŋu nyuie eye woaɖo woƒe susu kple dzi Eƒe lɔlɔ̃nu wɔwɔ dzi. (Psalmo 77:13) Ne sukua nuwulawo yi edzi lé dzi ɖe ƒo la, woate ŋu aɖu kuxi ɖesiaɖe si ado kplamatse wo la dzi.

Emegbe amesiwo fia nu sukuviawo gbesiagbe la dometɔ eve gblɔ kaklãnya dedziƒonamewo na wo. “Ðe Nèle Ŋutikɔkɔe Dima?” enye nya si Lawrence Bowen bia le eƒe  nuƒoa ƒe tanya me. Ame geɖe bua ŋutikɔkɔe be eyae nye kafukafu, bubu, kple ŋkɔxɔxɔ didi na ame ɖokui. Gake hakpala Asaf va kpɔ nusi ŋutikɔkɔe vavãtɔ nye la dze sii—si nye ƒomedodo xɔasi si me bubu le me nɔnɔ kple Yehowa. (Psalmo 73:24, 25) Wode dzi ƒo na sukunuwulaawo be woalé woa kple Yehowa dome ƒomedodo kplikplikpli me ɖe asi to alesi woayi dzi anɔ Biblia srɔ̃m wòade to me. Ele mawudɔlawo ‘dzrom be yewoanya’ nu tso Yehowa ƒe tameɖoɖowo me vava si to Kristo dzi ŋu. (Petro I, 1:12) Wodi be yewoasrɔ̃ nu geɖe tso wo Fofo ŋu alesi yewoate ŋui ale be yewoate ŋu aɖe eƒe ŋutikɔkɔe afia. Emegbe nuƒola la de dzi ƒo na sukuviawo be woakɔ Yehowa ŋuti le woƒe dutanyanyuigbɔgblɔdɔa me to kpekpe ɖe amewo ŋu be woake ɖe kesinɔnu xɔasitɔ kekeake ŋu me.

Wallace Liverance, amesi nye ŋkɔŋlɔla le sukua, he nuƒo gbãtɔawo siwo nye nuƒo siwo kplɔ wo nɔewo ɖo la va nuwuwui kple tanya si nye ‘Gblɔ Mawu ƒe Nunya le Nya Ɣaɣla Kɔkɔe Me.’ (Korintotɔwo I, 2:7) Nukae nye mawumenunya si ŋu apostolo Paulo ƒo nu le le eƒe dutanyanyuigbɔgblɔdɔa me? Eyae nye Yehowa ƒe nunyamɔ sẽŋu si me wòato ahe ŋutifafa kple ɖekawɔwɔ ava xexeame katãe. Nunya sia nɔ te ɖe Yesu dzi. Le esi teƒe be Paulo naɖe gbeƒã hadomekpekpeɖeŋunana la, ekpe ɖe amewo ŋu wokpɔ alesi  Mawu ava ɖe Adam ƒe nuvɔ̃a me tsonuwo ɖae la dze sii. (Efesotɔwo 3:8, 9) Nuƒola la de dzi ƒo na eƒe nyaselawo be: “Miwɔ miaƒe subɔsubɔmɔnukpɔkpɔa ŋudɔ abe alesi Paulo, amesi bu eƒe dutanyanyuigbɔgblɔdɔa abe mɔnukpɔkpɔ si wòazã atsɔ akpe ɖe amewo ŋu woakpɔ alesi Yehowa ana eƒe tameɖoɖowo nava eme, wɔe ene.”

Le esia megbe la, Mark Noumair, si nye Gilead nufiala bubu, xɔ ŋgɔ na numedzodzro dodzidzɔname aɖe si wowɔ kple sukuviawo dometɔ geɖe. Eƒe tanya si nye “Mawu ƒe Nya Sɔsrɔ̃ Naa Wokpɔa Subɔla Veviedolawo” la te gbe ɖe Paulo ƒe nya siwo le Romatɔwo 10:10 dzi. Sukuviawo ɖe gbeadzisubɔsubɔdɔa me nuteƒekpɔkpɔ gbogbo aɖewo siwo do dzidzɔ na wo esime wole sukua gblɔ. Woƒe nuteƒekpɔkpɔa ɖee fia be ne míesrɔ̃ Mawu ƒe Nya hede ŋugble le eŋu la, Yehowa Mawu kple eƒe Fiaɖuƒea ŋuti nu nyuiwo ayɔ miaƒe dzi me eye wòanɔ míaƒe nuyiwo dzi. Le ɣleti atɔ̃ si sukuviawo tsɔ nɔ Gbetakpɔxɔ Habɔbɔa ƒe Hehenaƒea la, wodze aƒeme Biblia nusɔsrɔ̃ gɔme kple ɖetsɔlemetɔ 30 kple edzivɔwo le hame si tsɔ afima gbɔ la ƒe anyigbamama si me wowɔa dɔ le edziedzi me.

Ame Tsitsiwo Ƒo Nu

Esi sukuviawo nɔ sukua la, wokpɔ viɖe tso hadede kple United States Betel-ƒomea me tɔwo me. Robert Ciranko kple Robert P. Johnson, siwo wɔa dɔ le alɔdzedɔwɔƒea bia gbe Yehowa subɔla wɔnuteƒe aɖewo siwo le subɔsubɔm ɣeyiɣi didi aɖe enye sia siwo dome dzikpɔla mɔzɔla siwo le hehe tɔxɛ xɔm le Gbetakpɔxɔ Habɔbɔa ƒe Hehenaƒea hã le. Amesiwo katã wobia gbee la nye Gilead sukunuwula siwo wɔ dutanyanyuigbɔgblɔdɔ kpɔ. Nya siwo me nunya le sese tso gbɔgbɔmeme bibi siawo gbɔ gana kakaɖedzi sukuviawo kple woƒe ƒometɔwo kpakple xɔlɔ̃wo.

Woƒe aɖaŋuɖoɖowo dometɔa aɖewoe nye: “Mido vevie nu alesi wòanya wɔe le subɔsubɔdɔa me kple le hamea me.” “Migabu mia ɖokui ame vevii fũ o. Miɖo susu nusitae mienye dutanyanyuigblɔlawo la ŋu, eye mina afisi mieyi nazu miaƒe aƒeme.” Nya dedziƒoname bubuwo ɖe alesi Gilead hehenana dzraa subɔlawo ɖoe ɖe dɔ nyui wɔwɔ ŋu, metsɔ le afisi woɖo wo ɖo me o la fia. Wo dometɔ aɖewoe nye si: “Míesrɔ̃ alesi míawɔ nu aduadu ahawɔ dɔ ɖekae.” “Sukua kpe ɖe mía ŋu be míate ŋu atrɔ ɖe dekɔnu bubuwo ŋu.” “Wofia alesi míazã Ŋɔŋlɔawo le mɔ bubuwo nui mí.”

John E. Barr, si nye Dziɖuha la me tɔ ɣeyiɣi didi aɖee nye sia ƒo wɔnaa ƒe nuƒo vevia. Eƒe tanya si wotu ɖe Ŋɔŋlɔawo dzi enye, “Woƒe Numegbe Ði Hoo le Anyigba Blibo la Katã Dzi.” (Romatɔwo 10:18) Ebia be, Ðe Mawu ƒe amewo te ŋu ɖo nudidi sia gbɔ egbea? Ẽ, wote ŋui! Tso keke ƒe 1881 me ke la, wobiaa Gbetakpɔxɔ magazine la xlẽlawo be: “Èle gbeƒã ɖema?” Emegbe nuƒolaa he nyaselawo ƒe susu yi amekpekpe ɖedzesi si wona le ƒe 1922 takpekpe si wowɔ le Cedar Point, Ohio, U.S.A. me la dzi be: “Miɖe Gbeƒã Fia la Kple eƒe Fiaɖuƒe la!” Esi ɣeyiɣiawo va le yiyim la, dzo si nɔ Mawu subɔla wɔnuteƒewo me ʋã wo be woaɖe gbeƒã Fiaɖuƒenyateƒe wɔnukuawo na dukɔwo katã. To agbalẽ siwo wota kple nuƒoƒo dzi la, nyanyuia gbɔgblɔ ɖo anyigba ƒe didiƒewo—wònye bubu kple kafukafu na Yehowa. Nɔviŋutsu Barr xlɔ̃ nu sukunuwulawo le nyataƒoƒo ʋãme aɖe me be woade dzesi yayra siwo wokpɔ la, hegblɔ be: “Gbesiagbe, ne miele gbe dom ɖa na Yehowa le afisi woɖo mi ɖo la, mida akpe nɛ tso miaƒe dzime ke ɖe akpa si wɔm miele le nya siawo ƒe emevava me ta, be: ‘Woƒe numegbe ɖi hoo le anyigba blibo la katã dzi.’”

Le nuƒo sia megbe la, woxlẽ gbedonamewo, eye zimenɔla la na ɖaseɖigbalẽ sukuviawo dometɔ ɖesiaɖe. Emegbe esime dzidzɔ kple blanuiléle ƒe seselelãme ɖo sukuviawo me ɖe dzodzo ta la, sukuviawo teƒenɔla xlẽ sukuviawo ƒe tameɖoɖo kplikpaa na Dziɖuhaa kple Betel-ƒomea, tsɔ ɖe alesi sukua nuwulawo ɖoe be yewoakafu Yehowa “tso fifia vaseɖe mavɔ me” fia.—Psalmo 115:18.

Míele gbe dom ɖa be sukunuwula siawo nate ŋu atrɔ ɖe teƒe yeye si woyina la ŋu ahana kpekpeɖeŋu nyui le xexeame katã ƒe gbeƒãɖeɖedɔa me, abe alesi amesiwo woɖo ɖa do ŋgɔ na wo ƒe 60 aɖewo enye sia la wɔe ene.

[Aɖaka si le axa 23]

SUKUVIAWO ŊUTI NYATAKAKA

Dukɔ siwo me wotso ƒe xexlẽme: 12

Dukɔ siwo me woɖo wo ɖo ƒe xexlẽme: 16

Sukuviawo ƒe xexlẽme: 48

Ƒe si woxɔ le mama dedie nu: 34.4

Ƒe si wole nyateƒea me le mama didie nu: 17.6

Ɣeyiɣiawo katã ƒe subɔsubɔƒewo le mama dedie nu: 13.5

[Nɔnɔmetata si le axa 24]

Gbetakpɔxɔ Habɔbɔa ƒe Gilead Biblia Suku ƒe Klass 114 lia

Ðoɖo si nu woŋlɔ ŋkɔawo ɖo le ete yi ale: Woxlẽ fliawo tso ŋgɔgbe yi megbee, eye woŋlɔ ŋkɔawo tso miame yi ɖusime le fli ɖesiaɖe dzi.

(1) Rosa, D.; Garrigolas, J.; Lindström, R.; Pavanello, P.; Tait, N. (2) Van Hout, M.; Donabauer, C.; Martínez, L.; Millar, D.; Festré, Y.; Nutter, S. (3) Martínez, P.; Clarke, L.; Maughan, B.; Fischer, L.; Romo, G. (4) Romo, R.; Eadie, S.; Tuynman, C.; Campbell, P.; Millar, D.; Rosa, W. (5) Lindström, C.; Garrigolas, J.; Markevich, N.; Lindala, K.; van den Heuvel, J.; Tait, S.; Nutter, P. (6) Maughan, P.; Pavanello, V.; Eadie, N.; West, A.; Clarke, D.; Markevich, J. (7) Fischer, D.; Donabauer, R.; Curry, P.; Curry, Y.; Carfagno, W.; West, M.; Tuynman, A. (8) Van Hout, M.; Campbell, C.; Festré, Y.; Carfagno, C.; van den Heuvel, K.; Lindala, D.