Lɔlɔ̃ Nye Nu Vevi Aɖe

ƑE, DEKƆNU, gbegbɔgblɔ, alo ameƒomevi ka me tɔ woɖanye o, amegbetɔwo katã hiã na lɔlɔ̃. Ne womekpɔ didi sia gbɔ o la, dzi medzɔa ame o. Dɔdadaŋutinumekula aɖe ŋlɔ bena: “Lɔlɔ̃ kple kadodo kplikplikplie nye nu vevi siwo dzi ne míadze dɔ loo alo ahaya, nusiwo ahe blanuiléle vɛ kple nusiwo ahe dzidzɔkpɔkpɔ vɛ, nusiwo ana míakpe fu kple nusiwo ana míaƒe lãme nahaya nɔ te ɖo. Ne ɖe atike yeye aɖe ate ŋu awɔ nusiawo la, anye ne ɖɔkta ɖesiaɖe kloe anɔ ekafum na eƒe dɔnɔwo le dukɔa me. Anye dɔgbegblẽwɔwɔ be womazãe na ame o.”

Ke hã, ameƒome si li egbea, vevietɔ eƒe nyakakamɔnuwo kple ameŋkutawo tea gbe ɖe kesinɔnuwo didi, ŋusẽkpɔkpɔ, ŋkɔxɔxɔ, kple gbɔdɔdɔ dzi zi geɖe tsɔ wu vividoɖeameŋu kple lɔlɔ̃ ƒe kadodo siwo amegbetɔwo hiã. Nufiala geɖewo tea gbe ɖe xexea me ƒe taɖodzinuwo kple xexemedɔwo dzi eye wogblɔna be woawo koe hea dzidzedzekpɔkpɔ vɛ. Nyateƒee, sukudede kple ame ƒe ŋutetewo tutuɖo le vevie ya, gake ɖe wòle be woati eyome eŋumabumabui ale gbegbe be womagakpɔ ɣeyiɣi na ƒomea kple xɔlɔ̃wo oa? Agbalẽŋlɔla nyagbalẽ aɖe si nɔ anyi le blema eye wòdze aɖaŋu le ŋkuléle ɖe amegbetɔwo ƒe nɔnɔme ŋu me tsɔ amesi si dzɔdzɔmeŋutete le gake lɔlɔ̃ mele esi o la sɔ kple ‘ayawagba si ɖina alo gakogui si ɖina.’ (Korintotɔwo I, 13:1) Amesiawo ate ŋu ava zu kesinɔtɔwo, alo amexɔŋkɔwo gɔ̃ hã, gake womekpɔa dzidzɔ vavãtɔ gbeɖe o.

Yesu Kristo amesi nya amegbetɔwo nyuie eye wòlɔ̃ wo vevie la tsɔ lɔlɔ̃ na Mawu kple amehavi ɖo teƒe vevi aɖe le eƒe nufiafia me. Egblɔ be: “Lɔ̃ Aƒetɔ, wò Mawu, kple wò dzi blibo kple wò luʋɔ blibo kpakple wò tamesusu blibo. . . . Lɔ̃ hawòvi abe wò ŋutɔ ɖokuiwò ene.” (Mateo 22:37-39) Amesiwo wɔna ɖe nya siawo dzi koe ate ŋu anye Yesu yomedzelawo vavã. Eyata wògblɔ be: “Esia me amewo katã woanyae le bena, nye nusrɔ̃lawo mienye, ne lɔlɔ̃ le mia dome.”—Yohanes 13:35.

Gake aleke ame atu lɔlɔ̃ ɖo le egbexexea mee? Eye aleke dzilawo ate ŋu afia amelɔlɔ̃ wo viwoe? Nyati si kplɔe ɖo la adzro biabia siawo me.

[Nɔnɔmetata si le axa 3]

Esesẽ ŋutɔ be woatu lɔlɔ̃ ɖo le xexe si me ɖokuitɔdidi xɔ aƒe ɖo