“Mawu Enye Lɔlɔ̃”
“Mawu Enye Lɔlɔ̃”
“Amesi ke melɔ̃a ame o la, medze si Mawu o; elabena Mawu enye lɔlɔ̃.”—YOHANES I, 4:8.
1-3. (a) Nya kae Biblia gblɔ ku ɖe Yehowa ƒe nɔnɔme si nye lɔlɔ̃ ŋu, eye mɔ ka nue esia le etɔxɛ le? (b) Nukatae Biblia gblɔ be “Mawu enye lɔlɔ̃”?
YEHOWA ƒe nɔnɔmewo katã de ŋgɔ wu ɖesiaɖe, wode blibo, eye wonyoa ame ŋu ale gbegbe. Gake Yehowa ƒe nɔnɔme si wɔa dɔ ɖe ame dzi wu enye lɔlɔ̃. Naneke megatea mí ɖe Yehowa ŋu vevie abe eƒe lɔlɔ̃ ene o. Dzidzɔtɔe la, lɔlɔ̃ hãe nye eƒe nɔnɔme vevitɔ kekeake. Aleke míewɔ nya esia?
2 Biblia ƒo nu tso Yehowa ƒe lɔlɔ̃ ŋu le mɔ aɖe nu si megblɔ nenema kpɔ le eƒe nɔnɔme vevi bubuawo ŋu o. Ŋɔŋlɔawo megblɔ be Mawu enye ŋusẽ alo Mawu enye dzɔdzɔenyenye alo be Mawu enye nunya gɔ̃ hã kpɔ o. Nɔnɔme mawo katã le esi, egbɔ koŋ ye nɔnɔme etɔ̃ siawo katã tso. Gake ku ɖe lɔlɔ̃ ya ŋu la, wogblɔ nya si de to wu tso eŋu le Yohanes I, 4:8, be: “Mawu enye lɔlɔ̃.” Ẽ, lɔlɔ̃ dze le Yehowa ƒe nuwɔna ɖesiaɖe me. Enye eƒe amenyenye, alo nɔnɔme blibo. Ne míagblɔe gbadzaa la, míate ŋu abu eŋu ale: Yehowa ƒe ŋusẽ ye nana wòwɔa nu. Eƒe dzɔdzɔenyenye kple eƒe nunya ye fiaa mɔ alesi wòwɔa nui. Gake Yehowa ƒe lɔlɔ̃ ye ʋãnɛ wòwɔa nu. Eye eƒe lɔlɔ̃ dzena ɣesiaɣi le alesi wòzãa eƒe nɔnɔme bubuawoe me.
3 Míesenɛ zi geɖe be Yehowa ƒe amenyenye blibo lae nye lɔlɔ̃. Eyata ne míedi be míasrɔ̃ nu tso lɔlɔ̃ ŋu la, ke Yehowa ŋue wòle be míasrɔ̃ nu tsoe. Ekema mina míadzro Yehowa ƒe lɔlɔ̃ tɔxɛ la ƒe akpa aɖewo me kpɔ.
Lɔlɔ̃ɖeɖefia Gãtɔ Kekeake
4, 5. (a) Lɔlɔ̃ɖeɖefia kae nye gãtɔ kekeake le ŋutinya katã me? (b) Nukatae míate ŋu agblɔ be lɔlɔ̃ ƒe nublanu sesẽtɔ kekeake si ƒo ɖesiaɖe tae le Yehowa kple Via dome?
4 Yehowa ɖe lɔlɔ̃ fia le mɔ vovovowo nu, gake ɖeka aɖe li si ƒo bubuawo katã ta. Eyae nye eka? Eyae nye alesi wòdɔ Via be wòakpe fu ahaku ɖe mía ta. Míate ŋu agblɔe wòasɔ be esiae nye lɔlɔ̃ɖeɖefia gãtɔ kekeake si wokpɔ kpɔ le ŋutinya katã me. Nukatae míate ŋu agblɔe alea ɖo?
5 Biblia yɔ Yesu be enye “nuwɔwɔwo katã ƒe ŋgɔgbevi.” (Kolosetɔwo 1:15) Bu eŋu kpɔ ko—Yehowa ƒe Vi la nɔ anyi xoxoxo do ŋgɔ hafi wowɔ xexeame godoo si míekpɔna la. Ekema ɣeyiɣi didi ka koŋue Fofo la kple Vi la nɔ anyi ɖekae? Dzɔdzɔmeŋutinunyala aɖewo bui be xexeame godoo xɔ ƒe biliɔn 13. Ne akɔntabubu ma de gɔ̃ hã la, medidi de Yehowa ƒe Ŋgɔgbevi la ƒe agbenɔƒe nu o! Nukawo wɔm wònɔ le ƒe gbogbo manyaxlẽ mawo me? Vi la wɔ dɔ dzidzɔtɔe abe Fofoa ƒe “dɔnunɔla” ene. (Lododowo 8:30; Yohanes 1:3) Yehowa kple Via wɔ dɔ ɖekae le nu bubuwo katã wɔwɔ me. Ɣeyiɣi dodzidzɔname kawo gbegbee nye si wotsɔ nɔ anyi ɖekae! Ekema mía dometɔ kae ate ŋu ase ɖekawɔwɔ si gbegbe le wo dome ɣeyiɣi gbogbo mawo la gɔme vie gɔ̃ hã? Eme kɔ ƒã be lɔlɔ̃ ƒe nublanu sesẽtɔ kekeake si ƒo ɖesiaɖe tae le Yehowa Mawu kple Via dome.
6. Aleke Yehowa ɖe eƒe seselelãme gblɔe esime Via, Yesu xɔ nyɔnyrɔ?
6 Togbɔ be ele nenema hã la, Yehowa dɔ Via ɖo ɖe anyigba dzi be woadzii wòanye amegbetɔ vidzĩ. Esia wɔwɔ fia be ele be Yehowa nana hadede kplikplikpli kple Via lɔlɔ̃a le dziƒo nato eŋu ƒe gbogbo aɖewo. Etsɔ ɖe le Yesu me vevie Henɔ ekpɔm tso dziƒo esime wònɔ tsitsim ʋuu va zu ŋutsu deblibo. Esi Yesu xɔ ƒe 30 lɔƒo la, exɔ nyɔnyrɔ. Ɣemaɣi la, Fofoa ŋutɔ ƒo nu tẽ tso dziƒo tsɔ ɖee gblɔ be: “Amesia enye vinye, si gbɔ nyemelɔ̃a nu lena o la, si dzea ŋunye!” (Mateo 3:17) Esi Fofoa kpɔe be Yesu wɔ nusiwo katã ƒe nya wogblɔ ɖi le eŋu, si nye nusiwo katã wobia tso esi nuteƒewɔwɔtɔe la, dzi anya dzɔe ale gbegbe!—Yohanes 5:36; 17:4.
7, 8. (a) Nukawo mee Yesu to le Nisan 14, ƒe 33 M.Ŋ., eye aleke wòwɔ dɔ ɖe Fofoa si le dziƒo dzii? (b) Nukatae Yehowa ɖe mɔ be Via nakpe fu ahaku?
7 Gake aleke Yehowa se le eɖokui me le Nisan 14, ƒe 33 M.Ŋ. me, esi wofia Yesu yomemɔ eye nuvlowɔhawo va lée le zã me? Esi woɖu fewu le eŋu, ɖe ta ɖe eŋu, heƒoe kple kɔ? Esi woƒoe kple atam eye eƒe dzime vuvu ʋayaʋaya? Esi woƒo gatagbadzɛwo ɖe eƒe asi kple afɔ ɖe ati ŋu wònɔ atia ŋu le yame, esime amewo nɔ fewu ɖum le eŋu? Aleke Fofoa se le eɖokui me esi Via lɔlɔ̃a do ɣli yɔe le vevesese helĩhelĩ me? Aleke Yehowa se le eɖokui me esi Yesu gbɔ eƒe gbɔgbɔ mamlɛtɔ, eye zi gbãtɔ tso nuwɔwɔwo katã ƒe gɔmedzedze la, Via lɔlɔ̃a megava li o?—Mateo 26:14-16, 46, 47, 56, 59, 67; 27:26, 38-44, 46; Yohanes 19:1.
8 Esi seselelãme le Yehowa si ta la, veve si gbegbe wòase ɖe Via ƒe fukpekpe kple ku ta la wu gbɔgblɔ na mí. Gake nya si míate ŋu asusu koe enye nusita Yehowa ɖe mɔ nu ma dzɔ. Nukata Fofo la tsɔ eɖokui de vevesese ma gbegbe me ɖo? Yehowa ɖe nu wɔnuku aɖe fia mí le Yohanes 3:16—si nye Biblia ƒe kpukpui si le vevie ale gbegbe be woyɔnɛ be Nyanyui sue. Wogblɔ le afima be: “Ale gbegbe Mawu lɔ̃a xexeame bena, wòtsɔ ye ŋutɔ ƒe Tenuvi hena, bena amesiame, si xɔa edzi sena la, mele tsɔtsrɔ̃ ge o, ke boŋ wòakpɔ agbe mavɔ.” Eyata nusi ʋã Mawu enye: lɔlɔ̃. Womeɖe lɔlɔ̃ gã wu esia tɔgbe aɖeke fia kpɔ o.
Alesi Yehowa Ka Ðe Edzi na Mí be Yelɔ̃ Mí
9. Aleke Satana di be míasusu be nenemae Yehowa bua míi, gake kakaɖedzi kae Yehowa na mí?
9 Ke hã, biabia vevi aɖe fɔ ɖe te: Ðe Mawu lɔ̃a mí ame ɖekaɖekawoa? Ame aɖewo alɔ̃ ɖe edzi be Mawu lɔ̃ ameƒome bliboa abe alesi Yohanes 3:16 gblɔe ene. Gake wosenɛ le wo ɖokui me be, le nyateƒe me la, ‘Mawu mate ŋu alɔ̃ nye ɖeka ya ŋutɔŋutɔ gbeɖe o.’ Nya lae enye be Satana Abosam di vevie be míaxɔe ase be Yehowa melɔ̃ mí o eye míele vevie nɛ hã o. Gake aleke kee míabui be womelɔ̃a mí o alo míele vevie o, Yehowa ka ɖe edzi na mí be eƒe subɔla wɔnuteƒe ɖesiaɖe xɔ asi le eŋkume.
10, 11. Aleke Yesu ƒe kpɔɖeŋu si wòwɔ ku ɖe atsutsurɔewo ŋu ɖee fia be míexɔ asi le Yehowa ŋku me?
10 Le kpɔɖeŋu me, bu Yesu ƒe nya si wògblɔ woŋlɔ ɖe Mateo 10:29-31 ŋu kpɔ. Esi Yesu nɔ asixɔxɔ si le eƒe nusrɔ̃lawo ŋu ƒe kpɔɖeŋu wɔm la, egblɔ be: “Alo wometsɔa atsutsurɔe eve ƒlena xɔa hotsui ewo oa? Eye ne menye mia Fofo ƒe lɔlɔ̃nu o la, wo dometɔ aɖeke mele dzedze ge ɖe anyigba o; ke miaƒe taɖawo katã hã woxlẽe! Eyaŋuti migavɔ̃ o! Mia tɔ vena wu atsutsurɔe geɖewo tɔ.” Bu nusi nya mawo fia na amesiwo nɔ Yesu ƒe nyawo sem le ƒe alafa gbãtɔ me ŋu kpɔ.
11 Le Yesu ƒe ŋkekea me la, atsutsurɔe ye nye xevi si ƒe asi bɔbɔ wu ɖesiaɖe si wotsɔ ɖaa nui. Nuƒlela tsɔa gaku sue ɖeka tsɔ xɔa atsutsurɔe evee. Gake Yesu gblɔ kpee le Luka 12:6, 7 be ne wotsɔ gaku sue eve la, woaxɔ atsutsurɔe atɔ̃, menye ene o. Wotsɔa xe ɖeka dea edzi, abe ɖe meɖi naneke o ene. Ðewohĩ xe mawo meɖi naneke le amewo ŋku me o, gake aleke Wɔla la ya bua woe? Yesu gblɔ be: “Womeŋlɔ wo dometɔ aɖeke [esi wotsɔ de edzi gɔ̃ hã] be le Mawu ƒe ŋku me o.” Yesu ƒe nyawo me anɔ kɔkɔm na mí azɔ. Ne Yehowa dea asixɔxɔ atsutsurɔe ɖeka ŋu alea ɖe, ke aleke gbegbe amegbetɔ axɔ asi nɛ enye si! Abe alesi Yesu ɖe emee ene la, Yehowa nya nusianu tso mía ŋu. Kpɔe ɖa ko be ede dzesi míaƒe taɖawo ƒe xexlẽme gɔ̃ hã!
12. Nukatae míate ŋu aka ɖe edzi be nu ŋutɔŋutɔe Yesu wɔnɛ esime wògblɔ be woxlẽ míaƒe taɖawo?
12 Ame aɖewo abui be esia ya ɖe Yesu nɔ ami ɖem ɖe nya la. Gake wò ya bu tsitretsitsi mɔkpɔkpɔa ŋu kpɔ. Hafi Yehowa nagbugbɔ mí awɔ la, ke efia be edze si nusianu tsitotsito le mía ŋu nyuie ale gbegbe! Edea asixɔxɔ mía ŋu ale gbegbe be eɖoa ŋku míaƒe nusianu dzi, si me míaƒe domenyiŋusẽfianu kple nusiwo katã míelé ɖe susu me ƒe geɖe kpakple míaƒe nuteƒekpɔkpɔwo katã le. Ne míetsɔe sɔ kple míaƒe taɖawo ƒe xexlẽme—ta ɖesiaɖe toa ɖa 100,000 le mama dedie nu—la, dɔ tsɛ aɖe ko esia ya nye nɛ. Aleke gbegbe Yesu ƒe nyawo na kakaɖedzi mí be Yehowa tsɔa ɖe le eme na mía dometɔ ɖesiaɖe wòsɔ nyuie nye si!
13. Aleke Fia Yosafat ƒe nya la fia be Yehowa léa ŋku ɖe nyuiwɔwɔ si le mía me ŋu togbɔ be míenye ame madeblibowo hã?
13 Biblia gaɖe nu bubu fia si ka ɖe edzi na mí be Yehowa lɔ̃a mí. Eléa ŋku ɖe nu xɔasi si le mía me kple míaƒe nɔnɔme nyuiwo ŋu. Le kpɔɖeŋu me, bu Fia nyui Yosafat ŋu kpɔ. Esi fia la wɔ bometsinu aɖe la, Yehowa ƒe nyagblɔɖila gblɔ nɛ be: “Le esia ta Yehowa ƒe dɔmedzoe va dziwò.” Nya sia ŋu bubu atɔ dzi na ame loo! Gake Yehowa ƒe gbedasia mese ɖe afima o. Eyi edzi be: “Ke wokpɔ nyuiwɔwɔ aɖewo le ŋuwò.” (Kronika II, 19:1-3) Eyata Yehowa ƒe dɔmedzoe dzɔdzɔe si wòdo la megbã ŋku nɛ wògbe “nyuiwɔwɔ” si le Yosafat me la kpɔkpɔ o. Ðe medea dzi ƒo na mí be míanya be mía Mawu la léa ŋku ɖe nyuiwɔwɔ si le mía me ŋu togbɔ be míenye ame madeblibowo hã oa?
Mawu si ‘Lɔ̃a Tsɔtsɔke’
14. Ne míewɔ nuvɔ̃ la, nuteɖeamedzi ƒe seselelãme kae ava mía dzi, gake aleke Yehowa ƒe tsɔtsɔke ate ŋu aɖe vi na míi?
14 Ne míewɔ nuvɔ̃ la, mɔkpɔkpɔbuɖeame, ŋukpe, kple fɔɖiɖi si míase le mía ɖokui me awɔe be míasusu be míate ŋu adze asubɔ Yehowa gbeɖe o. Gake ɖo ŋku edzi be Yehowa ‘lɔ̃a tsɔtsɔke.’ (Psalmo 86:5) Ẽ, ne míetrɔ dzime eye míedze agbagba vevie be míagawɔ wo o la, Yehowa ƒe tsɔtsɔke ate ŋu aɖe vi na mí. Bu alesi Biblia la ƒo nu tso Yehowa ƒe lɔlɔ̃ ƒe akpa sia ŋu kpɔ.
15. Afika kee Yehowa tea míaƒe nuvɔ̃wo ɖa tso mía gbɔ va sena?
15 Hakpala Dawid zã nya siwo me kɔ nyuie tsɔ ƒo nu tso Yehowa ƒe tsɔtsɔke ŋui, be: ‘Alesi ɣedzeƒe didi tso ɣetoɖoƒe gbɔe la, nenema Wòte míaƒe dzidadawo ɖa boo tso mía gbɔe.’ (Psalmo 103:12) Aleke gbegbe ɣedzeƒe didi tso ɣetoɖoƒe gbɔe? Le gɔmesese aɖe nu la, ɣedzeƒe nyea teƒe diditɔ kekeake tsoa ɣetoɖoƒe gbɔ ɣesiaɣi; akpa eveawo mate ŋu ado go gbeɖe o. Agbalẽnyala aɖe gblɔ be nya sia fia “vaseɖe adzɔge ʋĩ ke; vaseɖe didiƒe ʋĩtɔ kekeake si ate ŋu ava susu me na ame.” Dawid ƒe nya siawo siwo tso gbɔgbɔ me le eɖem fia be ne Yehowa tsɔ ke la, etea míaƒe nuvɔ̃wo ɖa tso mía gbɔ kuraa.
16. Ne Yehowa tsɔ míaƒe nuvɔ̃wo ke mí la, nukatae míaɖe dzi ɖi be ebua mí be mía ŋuti kɔ emegbe?
16 Ète kpɔ be yeaɖe ɖi aɖe si ɖe ɖe awu ɣi me ɖa kpɔa? Ðewohĩ togbɔ be nèwɔ ɖesiaɖe si nàte ŋui hã, nusi ɖe ɖe eme la gbe ɖeɖe. De dzesi nya si Yehowa gblɔ le ŋutete si le esi be wòatsɔ ake ŋu le afisia: ‘Ne miaƒe nuvɔ̃wo biã abe nyagadzĩ ene la, woafu abe sno ene, eye ne wobiã abe aɖabɛ ene la, woazu abe alẽfu ene.’ (Yesaya 1:18) Nya si gɔme woɖe le afisia be “nyagadzĩ” la fia nusi ƒe amadede biã hɛ. * “Aɖabɛ” hã nye amadede si biã dzẽ ale gbegbe si wotsɔ dea ama awuwoe. Míate ŋu ato mía ŋutɔwo míaƒe agbagbadzedzewo me aɖe nuvɔ̃ si ɖe ɖe mía ŋu la ɖa akpɔ gbeɖe o. Gake Yehowa ate ŋu ana nuvɔ̃ siwo biã hɛ abe nyagadzĩ kple aɖabɛ ene la nafu tititi abe sno alo ɖetifu si womede amae o ene. Eyata ne Yehowa tsɔ míaƒe nuvɔ̃wo ke mí la, mele be míabui be nuvɔ̃ mawo gakpɔtɔ le mía ŋu le míaƒe agbemeŋkeke mamlɛawo me o.
17. Gɔmesese ka nue Yehowa tsɔa míaƒe nuvɔ̃wo ƒua gbe ɖe emegbe le?
17 Le akpedaha wɔdɔɖeamedzi aɖe si Xizkiya kpa esi wove enu wòhaya tso kuba dzi vɔ megbe me la, egblɔ na Yehowa be: ‘Ètsɔ nye nuvɔ̃wo katã ƒu gbe ɖe megbewò.’ (Yesaya 38:17) Wogblɔ le Yehowa ŋu le afisia be etsɔ nuvɔ̃wɔla si trɔ dzime ƒe nuvɔ̃ ƒu gbe ɖe Emegbe afisi Megakpɔa wo loo alo naa eƒe ŋku ganɔa wo ŋu o. Numeɖegbalẽ aɖe gblɔ be woate ŋu agblɔ nukpɔsusu si dze le afisia ale: “Nèwɔ [nye nuvɔ̃wo] abe ɖe womedzɔ kura o ene.” Ðe esia mede dzi ƒo ŋutɔ oa?
18. Aleke nyagblɔɖila Mixa ɖee fia be ne Yehowa tsɔ nuvɔ̃wo ke la, Eɖea wo ɖa tegbee?
18 Nyagblɔɖila Mixa ɖe alesi wòka ɖe edzi be Yehowa atsɔ eƒe ame siwo trɔ dzime ƒe nuvɔ̃wo ake woe la gblɔ esime wònɔ nu ƒom tso gbugbɔgaɖɔɖo ŋuti ŋugbedodo aɖe ŋu, be: ‘Mawu kae de nuwò? Wò amesi tsɔa vodada kena. Eye àtsɔ míaƒe nuvɔ̃wo katã aƒu gbe ɖe atsiaƒu ƒe gogloƒe.’ (Mixa 7:18, 19) Bu nusi nya mawo fia na amesiwo nɔ anyi le Biblia ƒe ɣeyiɣiwo me ŋu kpɔ. Ðe mɔ aɖe li si dzi woato agaɖe nane si ‘wotsɔ ƒu gbe ɖe atsiaƒu ƒe gogloƒe’ akea? Ekema Mixa ƒe nyawo le fiafiam be ne Yehowa tsɔ míaƒe nuvɔ̃wo ke la, eɖea wo ɖa tegbee.
‘Mía Mawu ƒe Dɔmetɔtrɔ Kple Nublanuikpɔkpɔ’
19, 20. (a) Nukae nye Hebrigbe me nya si gɔme woɖe be “woakpɔ nublanui” alo “woase veve ɖe ame nu” ƒe gɔmesese? (b) Aleke Biblia zã vidada ƒe seselelãme tsɔ fia nu mí ku ɖe Yehowa ƒe dɔmetɔtrɔ ŋui?
19 Dɔmetɔtrɔ nye Yehowa ƒe lɔlɔ̃ ƒe akpa bubu. Nukae nye dɔmetɔtrɔ? Le Biblia me la, ƒomedodo kplikplikpli aɖe le dɔmetɔtrɔ kple nublanuikpɔkpɔ dome. Hebri kple Hela gbe me nya geɖe li siwo wozãna tsɔ ƒoa nu tso dɔmetɔtrɔ lɔlɔ̃tɔe ŋu. Le kpɔɖeŋu me, bu Hebrigbe me dɔwɔnya ra·chamʹ si gɔme woɖena zi geɖe be “woakpɔ nublanui” alo “woase veve ɖe ame nu” ŋu kpɔ. Hebrigbe me nya sia si Yehowa zã na eɖokui la do ƒome kple nya si wozãna na “vidzidɔ” eye woate ŋu agblɔ be enye “vidada ƒe dɔmetɔtrɔ.”
20 Biblia zã seselelãme siwo le vidada me ɖe via ŋu tsɔ fia nu mí tso Yehowa ƒe dɔmetɔtrɔ ŋu. Yesaya 49:15 gblɔ be: “Ðe nyɔnu aŋlɔ eƒe vidzĩ be, eye eƒe dɔme [ra·chamʹ] agbe tɔtrɔ ɖe eƒe dɔmevi ŋua? Ne woawo ŋlɔe be hã la, nyea nyemaŋlɔ wò be o.” Be míasusui be vidada aŋlɔ nonana kple beléle na via fẽ be nye nu sesẽ. Ne èbu eŋu kpɔ la, vidzĩ nye wɔnamanɔŋutɔ; si hiã dadaa ƒe belélename kple lɔlɔ̃ zã kple keli. Gake ewɔ nublanui be míagblɔ be menye numadzɔkpɔ be vidadawo nagblẽ wo vi fẽwo ɖi o, vevietɔ le “ɣeyiɣi vɔ̃” siawo me o. (Timoteo II, 3:1, 3) “Ke hã,” Yehowa ya gblɔ be: “Nyea nyemaŋlɔ wò be o!” Yehowa ƒe dɔmetɔtrɔ ɖe esubɔlawo ŋu de to sasasã wu dzɔdzɔme seselelãme gãtɔ si ava susu me na mí—si nye vidada ƒe dɔmetɔtrɔ ɖe via fẽ ŋu.
21, 22. Nɔnɔme ka mee Israel-viwo to le blema Egipte, eye aleke Yehowa wɔ nui?
21 Aleke Yehowa ɖea dɔmetɔtrɔ fia abe vidada si lɔ̃ via ene? Míekpɔa Yehowa ƒe dɔmetɔtrɔ nyuie le alesi wòwɔ nu ɖe Israel-dukɔa ŋu me. Va ɖo ƒe alafa 16 lia D.M.Ŋ. ƒe nuwuwu lɔƒo la, wowɔ Israel-vi miliɔn geɖe kluviwoe le Egipte, afisi wote wo ɖe anyi ŋutasesẽtɔe le. (Mose II, 1:11, 14) Israel-viwo do ɣli yɔ Yehowa le woƒe xaxaɣiwo be wòakpe ɖe yewo ŋu. Aleke Mawu si yɔ kple dɔmetɔtrɔ wɔ nui?
22 Woƒe nɔnɔmea wɔ nublanui na Yehowa. Egblɔ be: “Mekpɔ alesi wole nye dukɔ tem ɖe anyi le Egipte keŋ, eye mese woƒe ɣli, si wodo, . . . menya woƒe fukpekpewo.” (Mose II, 3:7) Yehowa mate ŋu akpɔ eƒe amewo ƒe fukpekpe teƒe alo ase woƒe ɣlidodo eye wòagbe vevesese ɖe wo nu o. Yehowa nye Mawu veveseɖeamenula. Eye veveseseɖeamenu—alesi woase veve ɖe ame bubuwo ƒe vevesese nu—do ƒome kplikplikpli kple dɔmetɔtrɔ. Gake menye ɖeko Yehowa se veve ɖe eƒe amewo nu ko evɔ o; eʋãe wòwɔ nane tsɔ kpe ɖe wo ŋu ŋutɔŋutɔ hã. Yesaya 63:9 gblɔ be: “Eɖe wo le eƒe lɔlɔ̃ kple eƒe [dɔmetɔtrɔ] ta.” Yehowa tsɔ “asi sesẽ” kplɔ Israel-viwo tso Egipte. (Mose V, 4:34) Emegbe ena nuɖuɖu wo nukutɔe eye wòkplɔ wo yi anyigba wɔnu dzi be wòanye wo tɔ.
23. (a) Aleke hakpala la ƒe nyawo ka ɖe edzi na mí be Yehowa tsɔ ɖe le eme na mía dometɔ ɖesiaɖe? (b) Mɔ kawo nue Yehowa kpena ɖe mía ŋu le?
23 Yehowa meɖea dɔmetɔtrɔ fiaa eƒe amewo ƒe ƒuƒoƒo ɖeɖeko o. Mawu si lɔ̃ mí la tsɔ ɖe le mía dometɔ ɖesiaɖe me vevie. Enya fu ɖesiaɖe si kpem míele la nyuie. Hakpala la ŋlɔ bena: “Yehowa ƒe ŋkuwo le ame dzɔdzɔewo ŋu, eye eƒe towo le woƒe ɣlidodo ŋu. Yehowa tsɔ ɖe amesiwo ƒe dzi gbã gudugudu la gbɔ, eye wòxɔna na amesiwo ƒe gbɔgbɔ woƒo ƒu anyi.” (Psalmo 34:16, 19) Ekema aleke Yehowa kpena ɖe mí ame ɖekaɖekawo ŋui? Menye ɖe wòɖea nusi ƒe fu kpem míele la ɖa kokoko o. Gake ewɔ nu geɖe ƒe ɖoɖo na amesiwo biaa eƒe kpekpeɖeŋu. Aɖaŋuɖoɖo siwo sɔ na agbenɔnɔ le eƒe Nya la me si ate ŋu ana nɔnɔmeawo natrɔ. Yehowa na dzikpɔla siwo dze le gbɔgbɔ me, amesiwo dzea agbagba be yewoaɖe eƒe dɔmetɔtrɔ afia le kpekpe ɖe ame bubuwo ŋu me la, le hamea me. (Yakobo 5:14, 15) Esi Yehowa nye ‘Gbedodoɖasela’ ta la, enaa “gbɔgbɔ kɔkɔe amesiwo bianɛ.” (Psalmo 65:3; Luka 11:13) Nunana siawo katã nye “míaƒe Mawu ƒe dɔmetɔtrɔ kple nublanuikpɔkpɔ.”—Luka 1:78.
24. Aleke nàwɔ nu ɖe lɔlɔ̃ si Yehowa ɖe fia ŋui?
24 Ðe medoa dzidzɔ na mí be míade ŋugble tso mía Fofo si le dziƒo ƒe lɔlɔ̃ ŋu oa? Le nyati si do ŋgɔ me la, woɖo ŋku edzi na mí be Yehowa wɔa eƒe ŋusẽ, dzɔdzɔenyenye, kple nunya ŋudɔ le lɔlɔ̃mɔ nu be wòaɖe vi na mí. Eye le nyati sia me la, míekpɔe be Yehowa ɖe eƒe lɔlɔ̃ fia ameƒomea tẽ—kple mí ame ɖekaɖekawo hã—le mɔ tɔxɛ siwo ɖe dzesi nu. Fifia asɔ be mía dometɔ ɖesiaɖe nabia eɖokui be, ‘Aleke mawɔ nu ɖe lɔlɔ̃ si Yehowa ɖe fiam la nui?’ Neva eme be wòaʋã wò be nàlɔ̃e kple wò dzi blibo, wò tamesusu blibo, wò luʋɔ blibo, kple wò ŋusẽ blibo. (Marko 12:29, 30) Neva eme be alesi nènɔa agbee gbesiagbe naɖe wò didi vevie be yeate ɖe Yehowa ŋu kplikplikpli afia. Eye neva eme be Yehowa, lɔlɔ̃ ƒe Mawu la, nate ɖe ŋuwò geɖe wu—tso fifia yi ɖe mavɔmavɔ me!—Yakobo 4:8.
[Etenuŋɔŋlɔ]
^ mm. 16 Agbalẽnyala aɖe gblɔ be nyagadzĩ “meklona o, alo mekpãna o. Zãmu alo tsidzadza, alo enyanyã, alo eŋudɔwɔwɔ ɣeyiɣi didi, mate ŋu ana wòaklo gbeɖe o.”
Èɖo Ŋku Wo Dzia?
• Aleke míewɔ nya be lɔlɔ̃ enye Yehowa ƒe nɔnɔme vevitɔ kekeake?
• Nukatae woate ŋu agblɔe wòasɔ be alesi Yehowa dɔ Via be wòava kpe fu ahaku ɖe mía ta nye lɔlɔ̃ɖeɖefia gãtɔ kekeake?
• Aleke Yehowa ka ɖe edzi na mí be yelɔ̃ mía dometɔ ɖesiaɖe?
• Mɔnu siwo me kɔ ƒã ka mee Biblia ƒo nu tso Yehowa ƒe tsɔtsɔke ŋu le?
[Biabiawo]
[Nɔnɔmetata si le axa 15]
‘Mawu . . . tsɔ ye ŋutɔ ƒe Tenuvi hena’
[Nɔnɔmetata si le axa 16, 17]
“Mia tɔ vena wu atsutsurɔe geɖewo tɔ”
[Afi Si Míexɔ Mɔɖeɖe Tso]
© J. Heidecker/VIREO
[Nɔnɔmetata si le axa 18]
Alesi vidada sena le eɖokui me ɖe via ŋu ate ŋu afia nu mí ku ɖe Yehowa ƒe dɔmetɔtrɔ ŋu