Nukae Dzɔ Ðe Wo Dzi?

NOF kple No nye Biblia me ŋkɔ siwo wonya na Egipte ƒe fiadu xɔŋkɔ siwo nye Memphis kple Thebes tsã. Nof (Memphis) nɔ Cairo ƒe anyiehe kilometa 23 aɖewo le Nil-tɔsisia ƒe ɣetoɖoƒe gome. Gake le ɣeyiɣi aɖe megbe la, Memphis megava nye Egipte ƒe fiadu o. Kaka ƒe alafa 15 lia D.M.Ŋ. naɖo la, fiadu yeye, si nye No (Thebes), va nɔ Egipte si, si nɔ Memphis ƒe anyiehe gome anɔ kilometa 500 lɔƒo. Gbedoxɔwo ƒe gli gbagbã gbogbo siwo le Thebes dometɔ ɖeka enye Karnak, si wobu be eyae nye xɔ gãtɔ kekeake si wotu kple sɔtiwo kpɔ. Wowɔ Thebes kple eƒe Karnak gbedoxɔa wonye afisi wosubɔa Amon, si nye Egiptetɔwo ƒe mawu gãtɔ le.

Nukae Biblia ƒe nyagblɔɖiwo gblɔ ɖi le Memphis kple Thebes ŋu? Wodrɔ̃ ʋɔnu Egipte ƒe Farao kple eƒe mawuwo, vevietɔ eƒe mawu gã “Amon [si] le No.” (Yeremya 46:25, 26) ‘Woatsi’ tadeagula siwo ƒoa zi ɖe afima ‘nu.’ (Xezekiel 30:14, 15) Eye nenema tututue wòva dzɔe. Nusi ko kpɔtɔ le Amon ƒe subɔsubɔ mee nye gbedoxɔ ƒe gli gbagbãwo. Egbegbe du si nye Luxor lɔ blema Thebes nutoa ƒe akpa aɖe kple kɔƒe suesue siwo wotso ɖe gli gbagbãwo dome la ɖe eme.

Le Memphis ya gome la, naneke mekpɔtɔ o negbe eƒe ameɖiƒewo ko. Biblia ŋunyala Louis Golding gblɔ be: “Le ƒe alafa geɖe me la, Arabiatɔ siwo ɖu Egipte dzi ku Memphis ƒe gli gbagbã gbogboawo teƒe tsɔ tu woƒe fiadu [Cairo] si le tɔsisia ƒe go kemɛ dzi. Nil-tɔsisia kple Arabia xɔtulawo wɔ woƒe dɔ nyuie ale gbegbe be ne èzɔ to blemadua ƒe nutowo me kilometa gbogbowo hã la, màkpɔ kpe aɖeke le ke yibɔ nyigba la dzi o.” Nyateƒee, abe alesi wogblɔe ɖi le Biblia me ene la, Memphis va zu ‘aƒedo eye ame vɔ le eme.’—Yeremya 46:19.

Esiawo nye kpɔɖeŋu geɖe siwo ɖoa kpe Biblia ƒe nyateƒetoto dzi la dometɔ eve pɛ ko. Thebes kple Memphis ƒe tsɔtsrɔ̃ na mí susu vevi si ta wòle be míaka ɖe Biblia me nyagblɔɖi siwo mekpɔ va eme haɖe o dzi.—Psalmo 37:10, 11, 29; Luka 23:43; Nyaɖeɖefia 21:3-5.

[Nɔnɔmetata Tsoƒe si le axa 32]

Photograph taken by courtesy of the British Museum