Video si Wowɔ be Wòawɔ Dɔ Ðe Sɔhɛwo Dzi

EDE dzi ƒo na sɔhɛ geɖewo be woalé ŋku ɖe woƒe agbenɔnɔ ŋu vevie esime wokpɔ video si nye Young People Ask—How Can I Make Real Friends? * (Sɔhɛwo Biana Be—Aleke Mawɔ Adze Xɔlɔ̃ Vavãwo?) Ŋɔŋlɔawo me nuxlɔ̃ame si sɔ, Kristotɔ sɔhɛwo ŋutɔ ƒe numenyawo, kple egbegbe drama ʋãme aɖe si wotu ɖe Dina ƒe ŋutinya si le Biblia me dzi la le video sia me. (Mose I, ta 34) Nya siwo gbɔna ku ɖe videoa ŋu la tso Mexico.

Martha gblɔ be: “Videoa wɔ dɔ ɖe dzinye ŋutɔ. Edze abe nye tututue wowɔe na ene. Mesusuna be esɔ gbɔ be nye nufialawo kple sukuhatiwo nya be menye Yehowa Ðasefo. Medo kpo kpeɖoɖo edzi to gbeƒãɖeɖe na wo me. Meda akpe ɖe nyatakaka siwo katã Yehowa nana la ta, vevietɔ esiwo wɔ dɔ ɖe mía dzi abe video sia ene.”

Juan Carlos gblɔ be: “Video sia nana wobua tame vavã. Abe ɖekakpui ene la, mewɔ vodada aɖewo si sɔ kple amesiwo le dramaa me dometɔ aɖewo tɔ. Ƒe aɖewo va yi la, menɔ agbe eve nɔm, gake mede dzesii be agbenɔnɔ ma ate ŋu ahe afɔkuwo vɛ. Le videoa kpɔkpɔ megbe la, meɖoe kplikpaa be mawɔ nuteƒe na Yehowa.”

Sulem ʋu eme be: “Esi mekpɔ videoa la, ewɔ dɔ ɖe dzinye ale gbegbe. Do ŋgɔ la, medzudzɔ Biblia xexlẽ, eye nyemedoa gbe ɖa na Yehowa tututu o. Esi mese nya siwo sɔhɛawo gblɔ le videoa me la, eʋãm be madze Biblia sɔsrɔ̃ gɔme eye be mado gbe ɖa na Yehowa.”

Sɔhɛ siwo li egbea doa go kuxi geɖewo, eye xɔlɔ̃ siwo wotiana ate ŋu akpɔ ŋusẽ ɖe woƒe agbenɔnɔ dzi vevie. (Psalmo 26:4; Lododowo 13:20) Video si nye Young People Ask—How Can I Make Real Friends? le kpekpem ɖe wo dometɔ geɖe ŋu be woawɔ nyametsotso nyuiwo le go sia me.

[Etenuŋɔŋlɔwo]