Eusebius ‘Eyae To Sɔlemeha Ŋutinyaŋɔŋlɔ Vɛa?’

LE ƑE 325 M.Ŋ. me la, Roma Fiagã Konstantino ɖo du ɖe bisiɔpwo katã be woakpe ta le Nicaea. Eƒe taɖodzinu enye: be yeakpɔ ƒomedodo si le Mawu kple Via dome ƒe nya si hem wole ɣeyiɣi didi la gbɔ. Eusebius, si tso Kaisarea, amesi wobuna agbalẽnyalae wu eŋɔlimetɔwo katã la, nɔ amesiwo de kpekpea dome. Eusebius srɔ̃ Ŋɔŋlɔawo moveviɖoɖotɔe eye wònye Kristotɔ mawuɖekasubɔlawo taʋlila.

Le Nicaea ƒe Aɖaŋudetakpekpe me la, Encyclopædia Britannica gblɔ be: “Konstantino ŋutɔe nɔ zi me eye wòxɔ ŋgɔ le numedzodzroawo me vevie, eye eya ŋutɔ do . . . mɔnu vevi aɖe si woatsɔ akpɔ nyaa gbɔe ɖa si me wògblɔ ƒomedodo si le Kristo kple Mawu dome le, le xɔsemeʋunya si aɖaŋuɖotakpekpea na me be, ‘woa kple Fofo la le ɖeka’ . . . Le bubu si bisiɔpawo tsɔ na fiagã la ta la, wo katã de asi xɔsemeʋuʋua te, negbe wo dometɔ eve koe mele eme, evɔ wònye metrɔ na wo dometɔ geɖe hafi o gake.” Ðe Eusebius nɔ ame eve sia domea? Nukae míate ŋu asrɔ̃ tso akpa si wònɔ la me? Mina míalé ŋku ɖe amesi Eusebius nye—nusiwo wònya kple dɔ siwo wòwɔ—ŋu.

Eƒe Nuŋlɔɖi Ðedzesiwo

Woanya dzi Eusebius le Palestina le ƒe 260 M.Ŋ. me lɔƒo. Ede ha kple Pamphilus, si nye sɔlemeha si le Kaisarea la dzikpɔla, tso ɖevi me. Esi Eusebius ge ɖe suku si Pamphilus ɖo me la, eva zu sukuvi veviedola aɖe. Ewɔ agbalẽdzraɖoƒe gã si le Pamphilus si la ŋudɔ moveviɖoɖotɔe. Eusebius lé fɔ ɖe eƒe nusɔsrɔ̃, vevitɔ Biblia sɔsrɔ̃, ŋu. Eva zu Pamphilus xɔlɔ̃ vevi aɖe hã, eye wòyɔ eɖokui emegbe be “Pamphilus ƒe Eusebius.”

Eusebius gblɔ le taɖodzinu siwo nɔ esi ŋu be: “Enye nye taɖodzinu be maŋlɔ nu tso alesi Apostolo kɔkɔeawo va ɖe wo nɔewo yome kple ɣeyiɣi si tso mía Ðela la ƒe ɣeyiɣiwo kple mía tɔ dome la ŋu; be magblɔ nudzɔdzɔ vevi agbɔsɔsɔ si wogblɔ be edzɔ le sɔlemehaa ƒe ŋutinya me; eye mayɔ amesiwo ɖu dzi henɔ zi me le sɔlemehaa me le nuto siwo xɔŋkɔ wu me, kple amesiwo ɖe gbeƒã Mawu ƒe nya la kple nu loo alo tsɔ asi ŋlɔe le hame ɖesiaɖe me la ƒe ŋkɔwo.”

Woɖoa ŋku Eusebius dzi le eƒe agbalẽ si ŋu wodea bubui ŋutɔ si ƒe tanyae nye History of the Christian Church ta. Wobua eƒe babla ewo siwo wota le ƒe 324 M.Ŋ. lɔƒo la be wonye sɔlemehaa ƒe blemaŋutinya vevitɔwo kekeake. Le dzidzedzekpɔkpɔ sia ta la, wova bu Eusebius be eyae nye amesi to sɔlemehaa ƒe ŋutinyaŋɔŋlɔ vɛ.

Tsɔ kpe ɖe Church History ŋu la, Eusebius ŋlɔ Chronicle, le babla eve me. Babla gbãtɔ nye blemaŋutinya gbadzaa si wòto ɖe eme. Le ƒe  alafa enelia me la, eva zu nuŋlɔɖi si dzi wonɔa te ɖo kua xexeme ƒe nudzɔdzɔwo me. Babla evelia tɔ asi ŋkeke siwo dzi ŋutinyamenudzɔdzɔawo dzɔ dzi. Eusebius ɖo nudzɔdzɔawo ɖe fliwo me tsɔ fia alesi fiawo kplɔ wo nɔewo ɖoe le dukɔ vovovowo me.

Eusebius ŋlɔ ŋutinyagbalẽ eve bubu, siwo ƒe tanyae nye Martyrs of Palestine kple Life of Constantine. Gbãtɔa ƒo nu tso ƒe 303-10 M.Ŋ. me nudzɔdzɔwo ŋu hedzro amesiwo ku xɔsetaku ɣemaɣi me. Eusebius anya nye nudzɔdzɔ mawo teƒekpɔla. Ŋutinya me numeɖeɖe veviwoe le agbalẽ evelia, si wota wònye agbalẽ ene le Fiagã Konstantino ƒe ku le ƒe 337 M.Ŋ. me megbe la me. Le esi wòanye ŋutinya si le tẽ teƒe la, eƒe kpa gãtɔ nye kafukafunyawo.

Ŋuɖoɖo aɖe si Eusebius na Hierocles—si nye Roma mɔmefia le eŋɔlime—nɔ ametaʋligbalẽ siwo wòŋlɔ la me. Esi Hierocles ŋlɔ nu tsi tre ɖe Kristotɔwo ŋu la, Eusebius ɖo eŋu tsɔ ʋli wo tae. Gawu la, eŋlɔ agbalẽ 35, siwo wobu be enye dɔ vevi aɖe si wɔwɔ bia agbagbadzedze geɖe le susɔeawo dome, tsɔ ɖo kpe edzi be Mawue ŋlɔ Ŋɔŋlɔawo. Wuiatɔ̃ gbãtɔawo dze agbagba be yewoaɖo kpe edzi be esɔ be Kristotɔwo nalɔ̃ ɖe Hebritɔwo ƒe ŋɔŋlɔ kɔkɔeawo dzi. Blaeve mamlɛawo ɖo kpe edzi be Kristotɔwo tɔ dzɔ be woaɖe asi le Yudatɔwo ƒe gɔmeɖosewo ŋu ahatrɔ ɖe gɔmeɖose kple nuwɔna yeyewo ŋu. Agbalẽ siawo katã ʋli Kristotɔnyenye ta le alesi Eusebius se egɔmee nu.

Eusebius nɔ agbe ƒe 80 sɔŋ (ƒe 260 va ɖo 340 M.Ŋ. lɔƒo) heva zu nuŋlɔla xɔŋkɔ siwo nɔ anyi le blema la dometɔ ɖeka. Eƒe nuŋɔŋlɔwo ku ɖe ƒe alafa etɔ̃ gbãtɔawo me nudzɔdzɔwo vaseɖe Fiagã Konstantino ŋɔli ŋu. Le eƒe agbenɔƒeawo ƒe nuwuwu la, bisiɔp ƒe dɔ siwo wòwɔ le Kaisarea la va kpe ɖe agbalẽŋɔŋlɔ dɔ si wòwɔna ŋu. Togbɔ be wonya Eusebius abe blemaŋutinyaŋlɔla ene hã la, enye xɔsetaʋlila, anyigbatala, gbeƒãɖela, numekula, kple amesi ŋlɔa nu eme kɔna.

Taɖodzinu Eve Siwo Nɔ Esi

Nukatae Eusebius ƒo ta ɖe dɔ gã si ɖeke mesɔ kpli o la wɔwɔ me? Ŋuɖoɖoa nɔ te ɖe dzixɔse si nɔ esi be ɣeyiɣi si me woɖe asi le nu xoxowo ŋu heɖo ta yeyea gbɔ mee yele la dzi. Ese le eɖokui me be nu gãwo dzɔ le dzidzime siwo va yi me eye ehiã be woaŋlɔ wo ada ɖi na dzidzimevi siwo ava va.

Taɖodzinu bubu—si nye xɔsetaʋiʋli—nɔ Eusebius si. Exɔe se be Mawu gbɔe Kristotɔnyenye tso. Gake ame aɖewo nɔ tsitre tsim ɖe nukpɔsusu sia ŋu. Eusebius ŋlɔ bena: “Enye nye taɖodzinu hã be mayɔ amesiwo nukpɔsusu yeyewo totovɛ wɔe be wowɔ vodada gãtɔwo kekeake hedo boblo wo ɖokuiwo alakpatɔe be yewonye sidzedze tovɛlawo evɔ wole abe amegãxi nyanyrã gblẽnuwo ene le Kristo ƒe alẽhaa ŋu nublanuimakpɔmakpɔtɔe la ƒe ŋkɔwo kple woƒe xexlẽme kple zi gbɔ zi alesi wowɔe la.”

Ðe Eusebius bu eɖokui Kristotɔea? Anye be ebui nenema, elabena eyɔ Kristo be “mía Ðela.” Egblɔ be: “Enye nye tameɖoɖo . . . be magblɔ nublanuinya si dzɔ ɖe Yuda dukɔ bliboa dzi kpata le esi woɖo nugbe ɖe mía Ðela la ŋu ta, eye míaŋlɔ mɔ siwo nu Trɔ̃subɔdukɔ me tɔwo dze Mawu ƒe nyaa dzi le kpakple zi alesi wodze edzii, eye maɖɔ amesiwo to ʋukɔkɔɖi kple fuwɔamewo me ʋli eta le ɣeyiɣi vovovowo me ƒe nɔnɔme, kpakple nuvɔ̃ siwo me woʋu le mía ŋutɔwo ƒe ŋkekea me, kple nublanui kpakple kpekpeɖeŋu si mía Ðela la na wo katã la.”

 Numekuku Gbogbo Siwo Wòwɔ

Agbalẽ agbɔsɔsɔme si Eusebius ŋutɔ xlẽ heyɔ nya tso wo me la sɔ gbɔ ŋutɔ. Eusebius ƒe agbalẽwo me koe woto nya nu tso ame ŋkuta geɖe siwo nɔ anyi le Mia Ŋɔli ƒe ƒe alafa etɔ̃ gbãtɔawo me la ŋu. Eƒe agbalẽwo me koe nuŋlɔɖi vevi aɖewo si kɔ afɔɖeɖe vevi aɖewo me la dze le. Nyatakakatsoƒe siwo megali o lae wòkpɔ wo tsoe.

Eusebius do vevie nu le nyawo nuƒoƒoƒu me eye wòwɔe tsitotsito. Edze abe edze agbagba ŋuɖɔɖotɔe be yeade vovototo nyatakaka siwo ŋu kakaɖedzi le kple esiwo ŋu mele o me ene. Ke hã vodada megbe eƒe agbalẽwo me nɔnɔ o. Ɣeaɖewoɣi la, eŋlɔ amewo ŋutinya gbegblẽwo eye mesea woƒe nuwɔnawo gɔ̃ hã gɔme o. Ewɔ vodadawo le ɖoɖo si nu nuwo dzɔ ɖo me ɣeaɖewoɣi. Eusebius menya alesi wodea atsyã nuŋɔŋlɔ mee hã o. Gake togbɔ be kpɔtsɔtsɔ siawo dze le eŋu hã la, wobua agbalẽ geɖe siwo woŋlɔ la be wònye nu xɔasiwo ŋutɔ.

Nyateƒea Lɔ̃lae Wònyea?

Eusebius tsɔ ɖe le Fofo la kple Vi la dome ƒomedodo ƒe nya si gbɔ menya le kpɔkpɔm o la me. Ðe Fofo la li do ŋgɔ na Vi la, abe alesi Eusebius xɔe se enea? Alo ɖee Fofo la kple Vi la dzɔ gbeɖekaa? Ebia be: “Ne ɖee wodzɔ gbeɖeka la, alekee Fofo la anye Fofo eye Vi la nanye Vi?” Etsɔ Ŋɔŋlɔawo gɔ̃ hã ɖo kpe eƒe dzixɔsea dzi heyɔ Yohanes 14:28, si gblɔ be ‘Fofo la lolo wu Yesu,’ kple Yohanes 17:3, afisi wogblɔ le Yesu ŋuti be enye amesi Mawu vavã ɖeka kolia la ‘dɔ ɖa.’ Eusebius nɔ te ɖe Kolosetɔwo 1:15 kple Yohanes 1:1 dzi ɖe nu me be Logos, alo Nya la, nye “Mawu makpɔmakpɔ ƒe nɔnɔme”—Mawu ƒe Vi.

Gake nukutɔe la, Eusebius da asi ɖe nukpɔsusu totroa dzi le Nicaea Aɖaŋudetakpekpea ƒe nuwuwu. To vovo na Ŋɔŋlɔawo ƒe nukpɔsusu si nɔ esi be Mawu kple Kristo menye amesiwo le tasɔsɔ me hedzɔ gbeɖeka o la, ewɔ ɖeka kple fiagã la boŋ.

Nusi Míate Ŋu Asrɔ̃ tso Eme

Nukatae Eusebius na ta le Nicaea Aɖaŋudetakpekpea me heda asi le nufiafia si mesɔ ɖe Ŋɔŋlɔawo nu o dzi? Dunyahehe ƒe susue nɔ tame nɛa? Nukatae wòde takpekpea ɖo ya? Togbɔ be bisiɔpwo katãe woɖo dua ɖo hã la, wo dometɔ ʋɛ aɖewo—ame 300—koe de. Ðe wòanye be Eusebius tsi dzi ɖe ɖoƒe si le esi le hadome la léle ɖe te ŋua? Nukatae Fiagã Konstantino bui amegãe nenema gbegbe? Eusebius nɔ fiagãa ƒe nuɖusi me le aɖaŋudetakpekpea me.

Anye be Eusebius ŋe aɖaba ƒu Yesu ƒe nudidi si nye be Ye yomedzelawo naganye ‘xexeame ƒe akpa aɖeke o’ la dzi. (Yohanes 17:16; 18:36) Nusrɔ̃la Yakobo bia be: “Mi ahasiwɔlawo, mienya bena, xexeame ƒe xɔlɔ̃dzedze enye ketɔnyenye na Mawu oa?” (Yakobo 4:4) Eye aleke Paulo ƒe nuxlɔ̃amea sɔ enye si be: “Migazu amesiwo atsɔ kɔkuti tutɔ na dzimaxɔsetɔwo ti o!” (Korintotɔwo II, 6:14) Mina míaɖe mía ɖokui ɖa tso xexeame gbɔ esi míele ‘ta dem agu na Fofo la le gbɔgbɔ kple nyateƒe me.’—Yohanes 4:24.

[Nɔnɔmetata si le axa 29]

Courtesy of Special Collections Library, University of Michigan

[Nɔnɔmetata si le axa 31]

Nicaea Aɖaŋudetakpekpea ƒe nɔnɔmetata

[Nɔnɔmetata si le axa 31]

Scala/Art Resource, NY