Nusita Míate Ŋu Anɔ Mía Ðokui Si o

“Ne ame le eve la, enyo wu ame ɖeka, . . . Ne wo dometɔ ɖeka dze anyi la, nɔvia afɔe ɖe tsitre.”—Fia Salomo

BLEMA Israel Fia Salomo gblɔ be: “Ne ame le eve la, enyo wu ame ɖeka, elabena woakpɔ fetu nyui ɖe woƒe agbagbadzedzewo ta. Elabena ne wo dometɔ ɖeka dze anyi la, nɔvia afɔe ɖe tsitre; ke baba na amesi tsi akogo, elabena ne edze anyi la, evelia meli afɔe ɖe tsitre o.” (Nyagblɔla 4:9, 10) Nunyala sia si lé ŋku ɖe amegbetɔwo ƒe agbenɔnɔ ŋu la to esia me te gbe ɖe alesi wòhiãe be míanɔ hadede me kple vevienyenye si le ame ɖokui maɖemaɖe ɖe aga ŋu dzi. Gake esia menye amegbetɔ ƒe nukpɔsusu ko o. Mawu ƒe nunya kple gbɔgbɔ mee Salomo ƒe nyaa tso.

Nunya mele eme be míaɖe mía ɖokui ɖe aga o. Amewo hiã wo nɔewo. Mí katã míehiã ŋusẽdodo kple kpekpeɖeŋu si míate ŋu akpɔ tso amegbetɔ bubuwo gbɔ la. Biblia me lododo aɖe gblɔ be: “Amesi ɖe eɖokui ɖe aga le eya ŋutɔ ƒe dzodzro yome dim.” (Lododowo 18:1) Eyata mewɔ nuku o be hadomegbenɔnɔ ŋuti nunyalawo dea dzi ƒo na amewo be woanɔ ƒuƒoƒo aɖe me eye woatsɔ ɖe le ame bubuwo me.

Le susu siwo wodo ɖa ku ɖe nɔvisiléle le nutowo me ɖoɖo te ake ŋu la, Nufialagã Robert Putnam ƒo nu tso “ŋusẽdodo subɔsubɔ ƒe dzixɔsewo” ŋu. Yehowa Ðasefowo ɖe dzesi le go sia me elabena wonɔa dedie le hame siwo le abe ƒome ene le anyigba dzi godoo me. Le ɖekawɔwɔ me kple apostolo Petro ƒe nyawo la, ‘wolɔ̃a nɔviwo ƒe habɔbɔ blibo’ la, si me tɔwo nye ‘Mawu vɔ̃lawo.’ (Petro I, 2:17) Ðasefoawo ƒoa asa na wo ɖokui ɖeɖe ɖe aga kple nusiwo wògblẽna le ame ŋu hã elabena dɔ nyui gbogbo siwo tadedeagu vavã bia la nana woƒoa wo ɖokui ɖe kpekpe ɖe wo haviwo ŋu me ɣesiaɣi be woasrɔ̃ Mawu ƒe Nya, Biblia, me nyateƒea.—Timoteo II, 2:15.

Lɔlɔ̃ Kple Hadede Trɔ Woƒe Agbe

Yehowa Ðasefowo nye ƒuƒoƒo wɔɖeka si me tɔ ɖesiaɖe wɔa akpa vevi aɖe. Le kpɔɖeŋu me, bu Miguel, Froylán, kple Alma Ruth, siwo nye Latin-Amerika ƒome ɖeka me tɔ etɔ̃, ƒe nyaa ŋu kpɔ. Ƒumedɔléle aɖe ƒomevi si nana ame kua te la nɔ wo ŋu tso wo dziɣi ke. Woa kple etɔ̃a katã zãa bunɔkekewo. Aleke hadede kple Ðasefoawo kpɔ ŋusẽ ɖe woƒe agbe dzie?

Miguel gblɔ be: “Meto lãmesẽkuxi sesẽwo me, gake esi mete hadede kple Yehowa ƒe amewo la, nye agbenɔnɔ trɔ. Afɔku le ame ɖokui ɖeɖe ɖe aga me ŋutɔ. Hadede kple haxɔsetɔwo le Kristotɔwo ƒe kpekpewo kple wo dome nɔnɔ  kwasiɖa ɖesiaɖe, kpe ɖe ŋunye mekpɔ dzidzeme ŋutɔ.”

Alma Ruth gblɔ kpee be: “Tsã la, meléa blanui vevie ɣeaɖewoɣi; mexaa nu vevie. Gake esi meva se nu tso Yehowa ŋu la, mese le ɖokuinye me be mate ŋu ado ƒome kplikplikpli kplii. Ema va zu nu xɔasitɔ kekeake nam le agbe me. Míaƒe ƒomea na kpekpeɖeŋu geɖe mí, eye ema te mí ƒoƒui ɖe edzi.”

Miguel fofo fia nuxexlẽ kple nuŋɔŋlɔ Miguel lɔlɔ̃tɔe. Emegbe Miguel kpe ɖe Froylán kple Alma Ruth ŋu woawo hã nya nu siawo. Esia nɔ vevie hena woƒe gbɔgbɔmemenyenye. Alma Ruth gblɔ be: “Nuxexlẽ sɔsrɔ̃ ɖe vi na mí ale gbegbe elabena to ema dzi ko hafi míete ŋu xɔa gbɔgbɔmenunyiamewo to Biblia kple Biblia-srɔ̃gbalẽwo xexlẽ me.”

Fifi laa la, Miguel nye Kristotɔ hamemegã. Froylán xlẽ Biblia bliboa zi gbɔ zi asieke sɔŋ. Alma Ruth dzi eƒe subɔsubɔ na Yehowa ɖe edzi to mɔɖeɖedɔa, alo ɣeyiɣiawo katã ƒe Fiaɖuƒegbeƒãɖeɖedɔa wɔwɔ me tso ƒe 1996 me. Egblɔ be: “Yehowa ƒe kpekpeɖeŋu wɔe be meɖo taɖodzinu sia gbɔ, le nɔvinyenyɔnu lɔlɔ̃tɔ siwo menye ɖeko wokpena ɖe ŋunye le gbeƒãɖeɖe me o, ke boŋ le nufiafia hã me to alɔdodom le Biblia-nusɔsrɔ̃ 11 siwo mete ŋu ɖo anyi la wɔwɔ me.”

Emelia, si dze afɔku si wɔe be wòtsi bunɔkeke me le abi siwo wòxɔ ɖe afɔ kple eƒe dzimeƒu me ta hã ɖo kpɔɖeŋu nyui bubu. Yehowa Ðasefo siwo le Mexico City srɔ̃ Biblia kplii, eye wòxɔ nyɔnyrɔ le ƒe 1996 me. Emelia gblɔ be: “Hafi mava dze si nyateƒea la, medi be mawu ɖokuinye; nyemegadi be manɔ agbe o. Mese le ɖokuinye me be taɖodzinu aɖeke megale asinye o eye menɔa avi dzi zã kple keli. Gake esi mede ha kple Yehowa ƒe amewo la, mese le ɖokuinye me be nɔviawo lɔ̃m. Alesi wotsɔ ɖe le menyee la de dzi ƒo nam. Hamemegãwo dometɔ ɖeka le abe nɔvi alo fofo ene nam. Woa kple subɔsubɔdɔwɔla aɖewo kplɔam yia kpekpeawo eye woteam le bunɔkekea me le gbeƒãɖeɖedɔa me.”

José, amesi xɔ nyɔnyrɔ zu Yehowa Ðasefo le ƒe 1992 me la, ɖeɖekoe nɔ aƒeme. Exɔ ƒe 70 eye woxɔ dzudzɔ le dɔme le ƒe 1990 me. José léa blanui edziedzi, gake esi Ðasefo aɖe ɖe gbeƒã nɛ megbe la, ete Kristotɔwo ƒe kpekpewo dede enumake. Nusiwo wòsena hekpɔna le afima la dzɔa dzi nɛ. Le kpɔɖeŋu me, ekpɔ alesi nɔviawo di be yewoade ha kplii la dze sii eye wòse le eɖokui me bena wotsɔ ɖe le eme na ye be yenye ame. Hamemegã kple subɔsubɔdɔwɔla  siwo le woƒe hamea mee kpɔa edzi fifia. (Filipitɔwo 1:1; Petro I, 5:2) Haxɔsetɔ siawo nye “akɔfafa” nɛ. (Kolosetɔwo 4:11) Wo kplɔnɛ yia ɖɔkta gbɔe, srãnɛ kpɔ le aƒeme, hena kpekpeɖeŋui le dɔ ene siwo wowɔ nɛ me. Egblɔ be: “Wotsɔ ɖe le eme nam. Wonye nye ƒometɔwo nyateƒe. Hadede kpli wo vivia nunye.”

Dzidzɔ Vavã Le Nunana Me

Ðeko Fia Salomo ƒo nu tso tofloko si ame ƒe ŋusẽ katã zazã ɖe kɔlili ŋutilã me kesinɔnuwo ŋu nye ŋu megbe koe wògblɔ be “ne ame le eve la, enyo wu ame ɖeka.” (Nyagblɔla 4:7-9) Esiae nye nusi tututu yome ame geɖe tina vevie egbea, togbɔ be esia biana be woatsɔ amegbetɔwo dome ƒomedodo le ƒomea me kple egodo siaa asa vɔe hã.

Ŋukeklẽ kple ɖokuitɔdidi ƒe gbɔgbɔ ƒoe ɖe ame geɖe nu be woaɖe wo ɖokui ɖe aga. Esia mena wokpɔ dzidzɔ loo alo dzidzeme aɖeke le agbe me o, elabena dziɖeleameƒo kple mɔkpɔkpɔbuɖeamee nye nusiwo bɔ ɖe amesiwo tsɔ wo ɖokui de asi na gbɔgbɔ sia la dome. To vovo na esia la, nuŋlɔɖi siwo me nya míegblɔ fifia ɖe ŋusẽ nyui si hadede kple amesiwo subɔa Yehowa eye lɔlɔ̃ na eyama kple na wo haviwo ʋãna la kpɔna ɖe ame dzi fia. Kristotɔwo ƒe kpekpewo dede edziedzi, hati Kristotɔwo ƒe kpekpeɖeŋu kple ɖetsɔleme, kple gomekpɔkpɔ le subɔsubɔdɔa me veviedodotɔe wɔa akpa vevi aɖe le kpekpe ɖe amesiawo ŋu be woaɖu dziɖeleameƒo ƒe seselelãme siwo ame ɖokui ɖeɖe ɖe aga hena vɛ dzi.—Lododowo 17:17; Hebritɔwo 10:24, 25.

Esi wònye be mía nɔewo dzie míaƒe agbe nɔ te ɖo ta la, ele dzɔdzɔme nu be nuwɔwɔ na amewo hea dzidzeme vɛ. Albert Einstein, amesi ƒe dɔwɔwɔwo ɖe vi na amewo, gblɔ be: “Ele be woakpɔ . . . asixɔxɔ si le ame ŋu le nusi wònana me ke menye le nusi woanɛ me o.” Esia wɔ ɖeka kple míaƒe Aƒetɔ Yesu Kristo ƒe nya siawo be: “Nana enye yayra wu xɔxɔ.” (Dɔwɔwɔwo 20:35) Eyata, togbɔ be esɔ be ame nalɔ̃ mí hã la, lɔlɔ̃ɖeɖefia ame bubuwo nye nusi tua ame ƒe lãmesẽ hã ɖo.

Dzikpɔla mɔzɔla aɖe si tsɔ ƒe geɖe srã hamewo kpɔ be yeana gbɔgbɔmekpekpeɖeŋu wo eye wokpe asi ɖe takpeƒewo tutu na Kristotɔ siwo si nu mele bo o ŋu ɖe eƒe seselelãmewo gblɔ ale: “Dzidzɔ si le nɔvinyewo subɔsubɔ me kple ŋudzedzekpɔkpɔ si nɔa mo na wo la kpɔkpɔ ʋãam be mayi edzi anɔ mɔ siwo nu mate ŋu akpe ɖe wo ŋu le la dim. Nusi teƒe mekpɔ la ɖee fia be ɖetsɔtsɔ le ame bubuwo mee nye nusi koŋ naa dzi dzɔa ame. Eye menyae be abe hamemegãwo ene la, ele be míanɔ ‘abe sitsoƒe tso ya nu, . . . tɔʋu le gbegbe kple agakpe gã nyadri ƒe vɔvɔli le kuɖiɖinyigba dzi ene.’”—Yesaya 32:2.

Aleke Anyinɔnɔ Ðekae Mehevivinae O Enye Si!

Le nyateƒe me la, viɖe gbogbowo kple dzidzɔ vavãtɔ le kpekpe ɖe amewo ŋu kpakple didi be yeade ha kple amesiwo subɔa Yehowa me. Hakpala la gblɔ be: “Kpɔ ɖa, aleke mehenyo, eye wòvivinae, ne nɔviwo le afi ɖeka!” (Psalmo 133:1) Ðekawɔwɔ si anɔ ƒome mee nye nu vevi aɖe le kpekpeɖeŋunana ame nɔewo me, abe  alesi wodze le Miguel, Froylán, kple Alma Ruth ƒe nyaa mee ene. Eye yayra kae nye si wònye be míawɔ ɖeka kple mía nɔewo le tadedeagu vavã me! Esi apostolo Petro ɖo aɖaŋu na srɔ̃ŋutsu kple srɔ̃nyɔnu Kristotɔwo vɔ la, egblɔ bena: “Mlɔeba la mi katã misusu nu ɖeka, ame nu nawɔ nublanui na mi; milɔ̃ mia nɔewo abe nɔviwo ene; miaƒe dɔme natrɔ ɖe ame ŋu; mibɔbɔ mia ɖokui.”—Petro I, 3:8.

Xɔlɔ̃wɔwɔ akuakua ɖea vi nyuiwo, le seselelãme kple gbɔgbɔ me gome. Esi apostolo Paulo nɔ nu ƒom na haxɔsetɔwo la, exlɔ̃ nu wo be: “Mifa akɔ na dzikatsoƒoetɔwo, mixɔ na gbɔdzɔgbɔdzɔtɔwo, migbɔ dzi ɖi na amewo katã. . . . Miti nyuididi na mia nɔewo kple amewo katã yome ɖaasi.”—Tesalonikatɔwo I, 5:14, 15.

Eyata di mɔ ɖɔʋu siwo dzi nàto awɔ nyui na amewo. ‘Wɔ nu nyui na amesiame, ke vevietɔ na haxɔsetɔwo’ elabena esia ana gɔmesese vavã naɖo wò agbe ŋu eye wòado wò dzidzɔ kple dzidzedze kpɔkpɔ ɖe ŋgɔ. (Galatiatɔwo 6:9, 10) Yesu ƒe nusrɔ̃la Yakobo ŋlɔ bena: “Ne nɔviŋutsu alo nɔvinyɔnu le amama, eye gbesiagbe nuɖuɖu le wo hiãm, eye mia dome ame aɖe gblɔ na wo bena: Miheyi le ŋutifafa me, miƒu dzo, eye miɖu nu ɖi ƒo, gake miena nusiwo hiã ŋutilã o la, viɖe ka wònye mahã?” (Yakobo 2:15, 16) Nya sia ƒe ŋuɖoɖo dze ƒã. Ehiã be ‘míagakpɔ nusi nye mía ŋutɔ tɔ ko dzi o, ke boŋ míakpɔ nusi nye ame bubu tɔ la hã dzi.’—Filipitɔwo 2:4.

Tsɔ kpe ɖe ŋutilã me kpekpeɖeŋu si Yehowa Ðasefowo nana amewo ne hiahiã kpata tɔxɛ aɖe do mo ɖa alo ne afɔku aɖe dzɔ ŋu la, wole kpekpem ɖe havi amegbetɔwo ŋu vevie le mɔ vevi aɖe nu—to gbeƒãɖeɖe Mawu ƒe Fiaɖuƒe ŋuti nyanyuia me. (Mateo 24:14) Gome si Ðasefo 6,000,000 kple edzivɔwo kpɔna le gbeƒãɖeɖe mɔkpɔkpɔ kple akɔfafa ƒe gbedasi sia na amewo me nye lɔlɔ̃ ƒe ɖetsɔleme vavã si le wo si na wo ƒe kpeɖodzi. Gake kpekpeɖeŋunana tso Ŋɔŋlɔ Kɔkɔeawo me hã nana wokpɔa amegbetɔwo ƒe nu vevi bubu gbɔ. Eyae nye ka?

Nu Vevi aɖe Gbɔ Kpɔkpɔ

Be míate ŋu akpɔ dzidzɔ vavãtɔ la, ehiã be ƒomedodo si sɔ nanɔ mía kple Mawu dome. Wogblɔ ɖi be: “Nyateƒe si wònye be amegbetɔ, siwo nɔ afisiafi le ɣeyiɣiwo katã me, tso gɔmedzedze va ɖo egbea, se le eɖokui me be yeatrɔ ɖe nane si wòbu be ede ŋgɔ eye wòsẽ ŋu wu ye ŋu, fia be woƒã subɔsubɔ ɖe eme eye ele be dzɔdzɔmeŋutinunya nada asi ɖe edzi. . . . Ele be alesi amewo le amesi ƒo nuwo katã ta dimee le xexeame katã hexɔ edzi se la nana míaƒe nu naku, wòawɔ nuku na mí eye míade bubu deto eŋu.”—Man Does Not Stand Alone, si A. Cressy Morrison ta.

Yesu Kristo gblɔ be: “Dzidzɔtɔwoe nye amesiwo tsɔa ɖe le woƒe gbɔgbɔmenuhiahiã me.” (Mateo 5:3, NW) Amewo mekpɔa dzidzedze aɖeke le wo ɖokui ɖeɖe ɖe aga tso ame bubuwo ŋu ɣeyiɣi didi aɖe me o. Gake mía ɖokui ɖeɖe ɖe aga tso mía Wɔla la gbɔ nye ŋkubiãnya wu. (Nyaɖeɖefia 4:11) Ele be ‘Mawu ŋuti sidzedze’ sɔsrɔ̃ kple eŋudɔwɔwɔ nanye nu vevi aɖe le míaƒe agbe me. (Lododowo 2:1-5) Le nyateƒe me la, ele be míaɖoe kplikpaa be míakpɔ míaƒe gbɔgbɔmenuhiahiãwo gbɔ, elabena míate ŋu anɔ agbe Mawu manɔmee o. Agbe si me dzidzɔ kple teƒeɖoɖo vavã le la nɔ te ɖe ƒomedodo nyui me nɔnɔ kple Yehowa, ‘amesi ɖeɖe koe ɖo kpo ɖe anyigba blibo la dzi,’ la dzi.—Psalmo 83:19.

[Nɔnɔmetata si le axa 4]

[Nɔnɔmetata si le axa 5]

Miguel: “Meto lãmesẽkuxi sesẽwo me, gake esi mete hadede kple Yehowa ƒe amewo la, nye agbenɔnɔ trɔ”

[Nɔnɔmetata si le axa 5]

Alma Ruth: “Esi meva se nu tso Yehowa ŋu la, mese le ɖokuinye me be mate ŋu ado ƒome kplikplikpli kplii”

[Nɔnɔmetata si le axa 6]

Emelia: “Hafi mava dze si nyateƒea la, . . . mese le ɖokuinye me be taɖodzinu aɖeke megale asinye o”

[Nɔnɔmetata si le axa 7]

Hadede kple tadeagula vavãwo nana míekpɔa míaƒe gbɔgbɔmenuhiahiãwo