Míazɔ Le Yehowa Ƒe Ŋkɔ Me Ðaa Tegbee!

“Míazɔ le Yehowa, mía Mawu la ƒe ŋkɔ me ɖaa tegbee.”​—MIXA 4:5.

1. Gbedasi kae le Mixa ta 3 va ɖo 5 me?

NYA aɖe le Yehowa si wòagblɔ na eƒe dukɔa, eye Mixae nye nyagblɔɖila si zãm wòle. Mawu ɖo tame be yeabia hlɔ̃ nugbegblẽwɔlawo. Ahe to na Israel le eƒe xɔsegbegbe ta. Gake dzidzɔtɔe la, Yehowa ayra amesiwo zɔna le eƒe ŋkɔ me. Gbedasi siawo dze le Mixa ƒe nyagblɔɖi ta 3 va ɖo 5 me.

2, 3. (a) Nɔnɔme kae wòle be Israel ƒe kplɔlawo naɖe afia, gake nuka boŋ wɔmee wonɔ? (b) Aleke nàɖe kpɔɖeŋunyagbɔgblɔ si wozã le Mixa 3:2, 3 mee?

² Mawu ƒe nyagblɔɖilaa gblɔ be: “Mi Yakob ƒe tatɔwo kple Israel ƒe aƒe me amegãwo, ɖe menye miaƒe dɔ wònye be, miadze si se la oa?” Nyateƒee, emae nye dɔ si wòle be woawɔ, gake nuka tututu wɔmee wole? Mixa gblɔ be: “Mi amesiwo léa fu nyui, eye mielɔ̃a vɔ̃, mievuvua agbalẽ le wo ŋu kple lã le woƒe ƒuwo ŋu. Mi amesiwo ɖua nye dukɔ ƒe lã, miefloa agbalẽ le wo ŋu, eye miegbãa woƒe ƒuwo; mieflia wo dea ze abe lã ene, eye abe lã le kutu me ene.”—Mixa 3:1-3.

³ Mikpɔe ɖa ko, kplɔlawo nɔ ame dahe wɔnamanɔŋutɔwo tem ɖe anyi! Kpɔɖeŋunya siwo wozã le afisia la gɔmesese mesesẽ na Mixa ƒe nyaselawo kura o. Ne wotso alẽ be woatsɔ aƒo detsii la, woɖea agbalẽ le eŋu gbã eye emegbe woflinɛ. Ɣeaɖewoɣi la, wogbãa ƒuawo be ƒutomemi nate ŋu ado bɔbɔe. Woɖaa lãa kple ƒua siaa le kutu gã aɖe me, abe alesi Mixa gblɔe ene. (Xezekiel 24:3-6, 10) Kpɔɖeŋu nyui kae nye si ɖe alesi kplɔla vɔ̃ɖiawo nɔ fu wɔm dukɔa le Mixa ƒe ŋkekea me fia!

Yehowa Di Tso Mía Si be Míawɔ Nu Dzɔdzɔe

4. Vovototo kae nɔ Yehowa kple Israel ƒe kplɔlawo dome?

⁴ Vovototo gã ŋutɔ aɖe le Yehowa, Alẽkplɔla lɔ̃ame la, kple Israel ƒe kplɔlawo dome. Esi wodo kpo ʋɔnu dzɔdzɔe dɔdrɔ̃ ta la, wodo kpo dɔ si wode wo si be woakpɔ alẽhaa ta la wɔwɔ. Ðe eteƒe la, wonɔ kpɔɖeŋu ƒe alẽha la tafam ɖokuitɔdiditɔe, hegbea ʋɔnu dzɔdzɔe dɔdrɔ̃ na wo eye ‘wona ʋukɔkɔɖi bɔ’ abe alesi Mixa 3:10 gblɔe ene. Nukae míate ŋu asrɔ̃ tso nɔnɔme sia me?

5. Nukae Yehowa di tso amesiwo le ŋgɔ xɔm le eƒe amewo dome la si?

⁵ Mawu di tso amesiwo le ŋgɔ xɔm le eƒe amewo dome si be woadrɔ̃ ʋɔnu dzɔdzɔe na eƒe amewo. Wo wɔnɛ nenema le Yehowa subɔlawo dome egbea. Gawu la, esia wɔ ɖeka kple Yesaya 32:1, afisi míexlẽ le be: “Kpɔ ɖa, fia aɖu fia ɖe dzɔdzɔenyenye nu, eye amegãwo aɖu dzi ɖe [ʋɔnu dzɔdzɔe dɔdrɔ̃] nu.” Gake nukae míekpɔ le Mixa ƒe ɣeyiɣia me? ‘Amesiwo léa fu nyui helɔ̃a vɔ̃’ yi edzi nɔ ʋɔnu madzɔmadzɔ drɔ̃m madzudzɔmadzudzɔe.

Amekawo ƒe Gbedodoɖawo Ŋue Woɖona?

6, 7. Nya vevi ka dzie wote gbe ɖo le Mixa 3:4 me?

⁶ Ðe Mixa ŋɔlimetɔ vɔ̃ɖiwo ate ŋu akpɔ mɔ be Yehowa nave yewo nua? Gbeɖe! Mixa 3:4 gblɔ be: “Woado ɣli ayɔ Yehowa, ke matɔ na wo o, eye wòaɣla ŋku me ɖe wo ɣemaɣi le woƒe nuwɔna vɔ̃ɖiwo ta.” Esia he nya vevi aɖe ɖe go.

 ⁷ Yehowa maɖo míaƒe gbedodoɖawo ŋu ne míewɔa nuvɔ̃ o. Maɖo eŋu ne míenɔa agbe eve, wɔa nuvɔ̃ ɣlana hewɔna abe ɖe míele Mawu subɔm anukwareɖiɖitɔe ene o. Dawid dzi ha le Psalmo 26:4 be: “Nyemebɔbɔ nɔ ame tovowo gbɔ o, eye nyemede afɔ gbedegblemimewo ƒe ha me o.” Aleke Yehowa ya aɖo amesiwo ɖonɛ koŋ tua afɔkpo eƒe Nya la ƒe gbedodoɖawo ŋui!

Mawu ƒe Gbɔgbɔa Doa Ŋusẽ Wo

8. Nuxlɔ̃ame kae wona aʋatsonyagblɔɖila siwo nɔ anyi le Mixa ƒe ɣeyiɣia me?

⁸ Nuwɔna manyomanyo kawo gbegbee nye si bɔ ɖe Israel ƒe gbɔgbɔ me kplɔlawo dome! Aʋatsonyagblɔɖilawo na Mawu ƒe dukɔa tra le gbɔgbɔ me. Kplɔla ŋuklẽlawo doa boblo “ŋutifafa” gake ‘wohoa aʋa ɖe amesiame si mena nu wo be woaɖu o la ŋu.’ Yehowa gblɔ be: “Eyata zã gbɔna dodo ge na mi, miakpɔ ŋutega o; blukɔ le dodo ge na mi, miaka afã o; ɣe aɖo to ɖe nyagblɔɖilawo, eye ŋkeke anyɔ tsiɖitsiɖi ɖe wo. Ŋukpe alé nukpɔlawo, bokɔnɔwo ƒe mo atsi dã, eye wo katã woabla nu ɖe ge.”​—Mixa 3:5-7a.

9, 10. Be ‘woabla nu ɖe ge’ gɔme ɖe, eye nukatae mehiã be Mixa nawɔ nusia ƒomevi o?

⁹ Nukatae ‘woabla nu ɖe ge’? Esia nye nusi Mixa ŋɔlimetɔ vɔ̃ɖiawo wɔna le ŋukpe ta. Eye ele be ŋu nakpe ame vɔ̃ɖi siawo. ‘Mawu megaɖoa nya aɖeke ŋu’ na wo o. (Mixa 3:7b) Yehowa mesea ame vɔ̃ɖi dadala aɖeke ƒe gbedodoɖa o.

¹⁰ Susu aɖeke meli si ta wòle be Mixa ‘nabla nu ɖe ge o.’ Ŋu mele ekpem o. Yehowa ɖoa eƒe gbedodoɖa ŋu. Se nya si nyagblɔɖila wɔnuteƒea gblɔ le Mixa 3:8 ɖa: “Nye la, ŋusẽ kple Yehowa ƒe gbɔgbɔ, dzɔdzɔenyenye kple dzideƒo yɔm fũ.” Aleke gbegbe Mixa da akpee nye si be le ɣeyiɣi geɖe si wòtsɔ wɔ subɔsubɔdɔa nuteƒewɔwɔtɔe me la, ‘ŋusẽ kple Yehowa ƒe gbɔgbɔ yɔe fũ’ ɣeawokatãɣi! Esiae na ŋusẽe wòtsɔ ‘gblɔ Yakob ƒe dzidadawo kple Israel ƒe nuvɔ̃wo nɛ.’

11. Aleke wodoa ŋusẽ amegbetɔwoe be woaɖe gbeƒã Mawu ƒe gbedasia?

¹¹ Mixa hiã ŋusẽ si lolo wu amegbetɔ tɔ be wòate ŋu agblɔ Mawu ƒe ʋɔnudrɔ̃gbedasia. Yehowa ƒe gbɔgbɔ, alo dɔwɔŋusẽ sẽŋu, le vevie. Ke míawo ya ɖe? Yehowa koe ado ŋusẽ mí kple eƒe gbɔgbɔ kɔkɔea hafi míate ŋu awɔ gbeƒãɖeɖedɔ si wode mía si la. Ne míeɖonɛ koŋ wɔa nuvɔ̃ la, agbagba siwo míadze be míaɖe gbeƒã la katã azu dzodzro godoo. Eyata Mawu maɖo to míaƒe gbe siwo míado ɖa be wòado ŋusẽ mí míatsɔ awɔ dɔ siae o. Le nyateƒe me la, míate ŋu agblɔ mía Fofo si le dziƒo la ƒe gbedasiwo o negbe “Yehowa ƒe gbɔgbɔ” le mía dzi. To gbedodoɖa siwo ŋu woɖona kpakple gbɔgbɔ kɔkɔea ƒe kpekpeɖeŋu me la míete ŋu ƒoa nu tsoa Mawu ƒe nya ŋu dzinɔameƒotɔe abe Mixa ene.

12. Nukatae Yesu ƒe nusrɔ̃la gbãtɔwo te ŋu ‘gblɔ mawunya la kple dzideƒo’?

¹² Ðewohĩ èɖo ŋku nuŋlɔɖi si le Dɔwɔwɔwo 4:23-31 dzi. Tsɔe be yenye Yesu ƒe ƒe alafa gbãtɔ me nusrɔ̃lawo dometɔ  ɖeka. Yometila zazɛ̃nyahelawo le agbagba dzem be yewoamiã nu na Kristo yomedzelawo. Gake nuteƒewɔla siawo do gbe ɖa na woƒe Aƒetɔ Dziɖulagã heƒo koko nɛ be: “[Yehowa], kpɔ woƒe ŋɔdzidodowo ɖa, eye nana be, wò dɔlawo nagblɔ wò nya la kple dzideƒo katã.” Nukae do tso eme? Esi wodo gbe ɖa vɔ la, teƒe si woƒo ƒu ɖo la ʋuʋu, eye gbɔgbɔ kɔkɔea yɔ wo katã taŋ eye wogblɔ mawunya la kple dzideƒo. Eyata mina míado gbe ɖa akpɔ Yehowa sinu ahaɖo ŋu ɖe eŋu be wòakpe ɖe mía ŋu kple gbɔgbɔ kɔkɔea le míaƒe subɔsubɔdɔa wɔwɔ me.

13. Nukae adzɔ ɖe Yerusalem kple Samaria dzi, eye nukatae?

¹³ Gabu Mixa ƒe ŋkekea ŋu kpɔ ko. Mixa 3:9-12 gblɔ be tatɔ ʋufɔɖilaawo drɔ̃a ʋɔnu le zãnunana ta, nunɔlaawo fiaa nu le fetu ta, eye aʋatsonyagblɔɖilaawo kaa afã na amewo xɔa ga. Mewɔ nuku o be Mawu gblɔ be Yuda ƒe fiadu, Yerusalem “azu glikpo”! Esi alakpasubɔsubɔ kple agbenyuimanɔmanɔ bɔ le Israel hã ta la, gbɔgbɔ ʋã Mixa wòxlɔ̃ nu be Mawu ana Samaria ‘nazu anyiglãgo.’ (Mixa 1:6) Le nyateƒe me la, nyagblɔɖila la nɔ agbe kpɔ Asiria-ʋakɔwo he Samaria ƒe tsɔtsrɔ̃ si wògblɔ ɖi la vɛ le ƒe 740 D.M.Ŋ. me. (Fiawo II, 17:5, 6; 25:1-21) Edze ƒã be Yehowa ƒe ŋusẽ me koe woate ŋu agblɔ nya sẽŋu siawo siwo wogblɔ ɖi ɖe Yerusalem kple Samaria ŋu la le.

14. Aleke nyagblɔɖi si woŋlɔ ɖe Mixa 3:12 la va emee, eye aleke wòle be esia nakpɔ ŋusẽ ɖe mía dzii?

¹⁴ Yuda mate ŋu asi le Yehowa ƒe toheʋɔnudɔdrɔ̃a nu gbeɖe o. Le nyagblɔɖi si woŋlɔ ɖe  Mixa 3:12 ƒe emevava nu la, woade Zion “abe agble ene.” Kpeɖodzi siwo su miasi le ƒe alafa 21 lia me na míenya be nusiawo dzɔ esime Babilontɔwo tsrɔ̃ Yuda kple Yerusalem le ƒe 607 D.M.Ŋ. me. Nusia dzɔ ƒe gbogbo aɖewo le Mixa ƒe nyagblɔɖia megbe, gake kakaɖedzi nɔ esi be woava eme. Ele be kakaɖedzi ma tɔgbe nanɔ míawo hã si be nuɖoanyi vɔ̃ɖi si li egbea ava nuwuwu le ‘Yehowa ƒe ŋkeke’ si wogblɔ ɖi la dzi.—Petro II, 3:11, 12.

Yehowa Kpɔ Nyawo Gbɔ

15. Aleke nàgblɔ nyagblɔɖi si woŋlɔ ɖe Mixa 4:1-4 le wò ŋutɔ wò nyagbewo mee?

¹⁵ Ne míetrɔ yi megbe la, míekpɔe be Mixa gblɔ mɔkpɔkpɔgbedasi dodzidzɔname aɖe. Nya dodzidzɔname kawo gbegbee nye si míekpɔ le Mixa 4:1-4! Mixa ƒe nyawo ƒe akpa aɖe gblɔ ale: “[Ava] me le ŋkeke mlɔeawo me be, Yehowa ƒe aƒe ƒe to la akɔ ta agbɔ towo ŋu, eye wòaƒo togbɛwo ta, eye anyigba dzi dukɔwo aƒo zi ɖe eŋu. . . . Adrɔ̃ ʋɔnu na dukɔ geɖewo, eye wòatso nya me na anyigba dzi dukɔ geɖewo vaseɖe didiƒe ke. Woatsɔ woƒe yiwo atu agblenuwoe, eye woatsɔ woƒe akplɔwo atu hɛ gobɛwoe; dukɔ magatsɔ yi ɖe dukɔ ŋu azɔ o, eye womagasrɔ̃ aʋawɔwɔ azɔ o. Eye wo dome amesiame abɔbɔ nɔ anyi ɖe eƒe weinka kple eƒe gboti te bɔkɔɔ; elabena Yehowa Zebaot ƒe nue gblɔe.”

16, 17. Aleke Mixa 4:1-4 le eme vam egbea?

¹⁶ Amekawoe nye “dukɔ geɖewo” kple ‘dukɔ sesẽwo’ siwo ŋu woƒo nu tsoe le afisia? Womenye xexe sia me dukɔwo kple dziɖuɖuwo o. Ke boŋ, nyagblɔɖia ku ɖe ame vovovo siwo tso dukɔwo katã me siwo wɔ ɖeka le subɔsubɔ kɔkɔe me le Yehowa ƒe tadedeagu vavãa ƒe to la ŋu.

¹⁷ Le ɖekawɔwɔ me kple Mixa ƒe nyagblɔɖia la, eteƒe madidi o Yehowa ƒe tadedeagu dzadzɛa axɔ anyigba bliboa dzi le nyagblɔɖia ƒe emevava bliboa nu. Egbea la, wole Yehowa ƒe mɔwo fiam “amesiwo ƒe nɔnɔme sɔ na agbe mavɔ kpɔkpɔ.” (Dɔwɔwɔwo 13:48, NW) Yehowa le ʋɔnu drɔ̃m hele nya me tsom le gbɔgbɔ me na xɔsetɔ siwo va le Fiaɖuƒea ƒe akpa dzi. Woanye “ameha gã” me tɔ siwo atso “xaxa gã la.” (Nyaɖeɖefia 7:9, 14) Esi wotsɔ woƒe yiwo tu kodziwoe ta la, wole ŋutifafa me kple wo hati Yehowa Ðasefowo kple ame bubuwo fifia gɔ̃ hã. Dzidzɔ kae nye si wònye be míanɔ wo dome!

Woɖoe Kplikpaa be Yewoazɔ le Yehowa ƒe Ŋkɔ me

18. Nukae ‘ame ŋutɔ ƒe weinka kple eƒe gboti te nɔnɔ’ fia?

¹⁸ Le míaƒe ŋkekea si me vɔvɔ̃ lé amewo le xexeame godoo me la, enye dzidzɔ na mí ale gbegbe be míele Yehowa ƒe mɔwo srɔ̃m. Míele mɔ kpɔm na ɣeyiɣi si tu aƒe kpuie si me menye ɖeko Mawu lɔ̃la siawo magasrɔ̃ aʋawɔwɔ azɔ o, ke woanɔ woƒe weinka kple gboti te bɔkɔɔ la vevie. Zi geɖe la, wodoa gbotiwo ɖe weingble me. (Luka 13:6) Anyinɔnɔ ɖe ame ŋutɔ ƒe weinka kple gboti te bɔkɔɔ fia ŋutifafa, nudzedziname, kple dedienɔnɔ ƒe nɔnɔmewo. Fifia gɔ̃ hã la, míaƒe ƒomedodo kple Yehowa naa susume ƒe akɔdzeanyi kple gbɔgbɔmededienɔnɔ mí. Ne nɔnɔme mawo va le Fiaɖuƒedziɖuɖua te la, míagavɔ̃ na naneke kura o eye míanɔ dedie le nusianu me.

19. Be woazɔ Yehowa ƒe ŋkɔ me gɔme ɖe?

¹⁹ Be Mawu nakpɔ ŋudzedze ɖe mía ŋu ahayra mí la, ele be míazɔ le Yehowa ƒe ŋkɔ me. Wote gbe ɖe esia dzi vevie le Mixa 4:5, afisi nyagblɔɖila la gblɔ le be: “Ne dukɔwo katã dometɔ ɖesiaɖe le zɔzɔm le eƒe mawu ƒe ŋkɔ me hã la, míawo ya míazɔ le Yehowa, mía Mawu la ƒe ŋkɔ me ɖaa tegbee.” Zɔzɔ le Yehowa ƒe ŋkɔ me mefia be woanɔ gbɔgblɔm ko be eyae nye míaƒe Mawu ko evɔ o. Ebia nu geɖe wu Kristotɔwo ƒe kpekpewo dede kple Fiaɖuƒegbeƒãɖeɖedɔa wɔwɔ ko, togbɔ be dɔ siawo le vevie hã. Ne míele zɔzɔm le Yehowa ƒe ŋkɔ me la, efia be míeɖe adzɔgbe nɛ eye miele  agbagba dzem be míasubɔe nuteƒewɔwɔtɔe tso luʋɔ blibo ƒe lɔlɔ̃ me. (Mateo 22:37) Eye esi míenye esubɔlawo ta la, míeɖoe kplikpaa be míazɔ le mía Mawu Yehowa ƒe ŋkɔ me ɖaa tegbee.

20. Nya kae wogblɔ ɖi le Mixa 4:6-13?

²⁰ Azɔ na míade ŋugble le nyagblɔɖinya siwo le Mixa 4:6-13 ŋu. Ele na “Zion-nyɔnuvi” la be wòayi aboyo me le ‘keke Babel ke.’ Nusia tututue dzɔ ɖe Yerusalem nɔlawo dzi le ƒe alafa adrelia D.M.Ŋ. me. Ke hã, Mixa ƒe nyagblɔɖia ɖee fia be ame susɔea aɖewo atrɔ agbɔ va Yuda, eye ne wogbugbɔ ɖo Zion te la, Yehowa akpɔ egbɔ be wogbã woƒe futɔwo gudugudu.

21, 22. Aleke Mixa 5:1 va emee?

²¹ Wogblɔ nudzɔdzɔ dodzidzɔname bubuwo ɖe Mixa ta 5 lia me. Le kpɔɖeŋu me, se nya si wogblɔ le Mixa 5:1-3 ɖa. Mixa gblɔe ɖi be Dziɖula si Mawu ɖo—“amesi dzɔɣi tso tititi le gbaɖegbe ʋĩ ke”—la adzɔ tso Betlexem. Aɖu fia abe alẽkplɔla ene ‘le Yehowa ƒe ŋusẽ me.’ Gawu la, menye Israel ɖeɖekoe Dziɖula sia akpɔ ŋusẽ le o, ke boŋ “vaseɖe anyigba ƒe mlɔenu” ke. Amesi wònye la atɔtɔ amewo le xexeame godoo, gake menye nya ɣaɣla na míawo ya o.

²² Amekae nye ame vevitɔ kekeake si wodzi le Betlexem kpɔ? Eye amekae ‘akpɔ ŋusẽ vaseɖe anyigba ƒe mlɔenu ke’? Ame bubu aɖeke meli tsɔ wu Mesia, Yesu Kristo o! Esime Herodes Gãtɔ bia nunɔlagãwo kple agbalẽfialawo be afikae woadzi Mesia la ɖo hã la, woɖo eŋu nɛ be: “Le Betlexem le Yudea.” Woyɔ nya tso Mixa 5:1 gɔ̃ hã. (Mateo 2:3-6) Ame tsɛawo dometɔ aɖewo hã nya esia, elabena Yohanes 7:42 gblɔ be wogblɔ be: “Ðe ŋɔŋlɔ la megblɔ bena: Kristo la ava atso Dawid ƒe ƒome kple Betlexem-kɔƒe, afisi Dawid nɔ la me o mahã?”

Dzidzeme Vavã na Ameawo

23. Nukae le dzɔdzɔm fifia wònye Mixa 5:6 ƒe emevava?

²³ Mixa 5:4-14 ƒo nu tso Asiriatɔwo ƒe amedzidzedze si akpɔ dzidzedze ɣeyiɣi kpui aɖe ko ŋu eye wòɖee fia be Mawu abia hlɔ̃ dukɔ siwo gbe toɖoɖo. Mixa 5:6 do ŋugbe be Yudatɔ trɔdzime ƒe ame susɔeawo agbugbɔ ava wo denyigba dzi, gake nya siawo ku ɖe míaƒe ŋkekea hã ŋu. Mixa gblɔ be: “Yakob ƒe ame mamlɛawo anɔ dukɔ geɖewo dome, abe Yehowa ƒe zãmu kple tsidzadza ɖe gbe dzi . . . ene.” Wozã kpɔɖeŋunyagbɔgblɔ vivi sia tsɔ gblɔ nya ɖi be gbɔgbɔ me Yakob, alo Israel ƒe ame susɔeawo anye yayra tso Mawu gbɔ na amewo. Enye dzidzɔ na Yesu ƒe “alẽ bubuwo,” siwo si anyigbadzinɔnɔ ƒe mɔkpɔkpɔ le be yewoasubɔ aduadu kple egbegbe “Mawu ƒe Israel la” ƒe ame susɔeawo eye wole asi kpem ɖe wo ŋu be woana dzidzeme ame bubuwo le gbɔgbɔ me. (Yohanes 10:16; Galatiatɔwo 6:16; Zefanya 3:9) Le go sia me la, nya vevi aɖe li si ŋu wòle be míade ŋugble le. Ele be mí Fiaɖuƒegbeƒãɖelawo katã míade asixɔxɔ mɔnukpɔkpɔ si su mía si be míatsɔ akɔfanya vavãwo ayi na amewo la ŋu vevie.

24. Mixa ta 3 va ɖo 5 me nya vevi kawoe wɔ dɔ ɖe dziwò?

²⁴ Nukae nèsrɔ̃ le Mixa ƒe nyagblɔɖia ƒe ta 3 va ɖo 5 me? Ðewohĩ nya vevi siawo tɔgbe: (1) Mawu di be amesiwo le ŋgɔ xɔm le eƒe amewo dome nadrɔ̃ ʋɔnu dzɔdzɔe. (2) Yehowa maɖo míaƒe gbedodoɖa ŋu ne míeɖonɛ  wɔa nuvɔ̃ o. (3) Ne Mawu do ŋusẽ mí kple eƒe gbɔgbɔ kɔkɔea ko hafi míate ŋu awɔ gbeƒãɖeɖedɔ si wode asi na mí awu enu. (4) Be Mawu ƒe ŋudzedzekpɔkpɔ nanɔ mía dzi la, ele be míazɔ le Yehowa ƒe ŋkɔ me. (5) Ele be mí Fiaɖuƒegbeƒãɖelawo míade asixɔxɔ mɔnukpɔkpɔ si su mía si be míatsɔ akɔfanya vavãwo ayi na amewo la ŋu vevie. Nya vevi bubuwo hã anya wɔ dɔ ɖe dziwò. Nu bubu kae míagate ŋu asrɔ̃ tso Biblia me nyagblɔɖigbalẽ sia me? Nyati si kplɔe ɖo akpe ɖe mía ŋu míakpɔ nusɔsrɔ̃ vevi siwo míate ŋu akpɔ tso Mixa ƒe nyagblɔɖia siwo tua xɔse ɖo la ƒe ta eve mamlɛa me.

Aleke Nàɖo Wo Ŋui?

• Nukae Mawu di tso amesiwo xɔa ŋgɔ le eƒe amewo dome si?

• Nukatae gbedodoɖa kple gbɔgbɔ kɔkɔea le vevie le subɔsubɔ si míetsɔna na Yehowa me?

• Aleke amewo ‘zɔna le Yehowa ƒe ŋkɔ mee’?

[Biabiawo]

[Nɔnɔmetata si le axa 15]

Àte ŋu aɖe kpɔɖeŋu si Mixa wɔ ku ɖe kutu aɖe ŋu mea?

[Nɔnɔmetata siwo le axa 16]

Míetsɔa dzinɔameƒo wɔa miaƒe subɔsubɔdɔae abe Mixa ene