Kpekpeɖeŋu Ŋutɔŋutɔ na Ame Dahewo

ESI Mawu ƒe Vi, Yesu Kristo nɔ anyigba dzi la, etsɔ ɖe le eme na ame dahewo ŋutɔŋutɔ eye wòkpena ɖe wo ŋu. Nuteƒekpɔla aɖe gblɔ le Yesu ƒe subɔsubɔdɔa ŋu be: “Ŋkunɔwo le nu kpɔm, eye tekunɔwo le azɔli zɔm, anyidzela ŋuti le kɔkɔm, eye tokunɔwo le nu sem, ame kukuwo le tsi tre tsim, eye wole nyanyui la gblɔm fia ame dahewo.” (Mateo 11:5) Ke ame dahe miliɔn siwo le anyigba dzi egbea ya ɖe? Ðe nyanyui aɖe li na woa? Ẽ, mɔkpɔkpɔ gbedasi aɖe li!

Togbɔ be xexe bliboa mebua ame dahewo o eye woŋlɔa wo be zi geɖe hã la, Mawu ƒe Nya, Biblia do ŋugbe be: “Womaŋlɔ ame dahe be ɖikaa o, eye hiãtɔwo ƒe mɔkpɔkpɔ mabu tegbee o.” (Psalmo 9:19) Akɔfanya siawo ava eme ne Mawu ƒe Fiaɖuƒea, si nye dziƒodziɖuɖu ŋutɔŋutɔ va xɔ ɖe amegbetɔwo ƒe dziɖuɖu teƒe. (Daniel 2:44) Esi Yesu nye dziƒodziɖuɖu ma ƒe Fia ta la, “ave hiãtɔwo kple ame dahewo nu, eye wòaɖe ame dahewo ƒe luʋɔ. Aɖe woƒe luʋɔ tso teteɖeanyi kple ŋutasesẽ me, eye woƒe ʋu axɔ asi le eŋku me.”—Psalmo 72:13, 14.

Aleke agbenɔnɔ anɔ ne Kristo le anyigba dzi ɖum? Amesiwo anɔ agbe le Kristo ƒe xexeame dziɖuɖu te la aɖu woƒe asinudɔwɔwɔwo. Biblia gblɔ le Mixa 4:3, 4 be: “Wo dome amesiame abɔbɔ nɔ anyi ɖe eƒe weinka kple eƒe gboti te bɔkɔɔ; elabena Yehowa Zebaot ƒe nue gblɔe.” Mawu ƒe Fiaɖuƒea akpɔ dɔlényawo kple kunyawo gɔ̃ hã gbɔ. (Yesaya 25:8) Xexe si to vovo kura kae nye si wòanye! Míate ŋu axɔ Biblia ƒe ŋugbedodo siawo dzi ase elabena Mawu ŋutɔ ƒe gbɔgbɔe ʋã amewo woŋlɔ wo.

Tsɔ kpe ɖe mɔkpɔkpɔ gbedasi si Biblia nana ŋu la, ekpena ɖe mía ŋu be míate ŋu anɔ te ɖe gbesiagbekuxiwo nu, si ƒe ɖee nye alesi míate ŋu aɖu bubumanɔameŋu si ahedada te ŋu hena vɛ la dzi. Kristotɔ si si nu mele o nya to Biblia sɔsrɔ̃ me be yexɔ asi le Mawu ŋkume abe Kristotɔ si si kesinɔnuwo le ene. Biblia ƒe agbalẽ si nye Hiob gblɔ be Mawu “meɖia kesinɔtɔwo ƒe nya wua ame dahewo tɔ o, elabena wo katã la eƒe asinudɔwɔwɔwo wonye.” (Hiob 34:19) Mawu lɔ̃ ame eveawo katã sɔsɔe.—Dɔwɔwɔwo 10:34, 35.