Nukata Wòle Be Míado Gbe Ða Madzudzɔmadzudzɔe?
Nukata Wòle Be Míado Gbe Ða Madzudzɔmadzudzɔe?
“Minɔ gbedodoɖa dzi madzudzɔmadzudzɔe! Mida akpe le nusianu ŋuti.”—Tesalonikatɔwo 1, 5:17, 18.
1, 2. Aleke Daniel ɖee fiae be yebua gbedodoɖa ƒe mɔnukpɔkpɔa nu xɔasii, eye ŋusẽ kae wòkpɔ ɖe woa kple Mawu dome ƒomedodo dzi?
ENYE numame na nyagblɔɖila Daniel be edoa gbe ɖa na Mawu zi etɔ̃ gbeɖeka. Edzea klo ɖe eƒe dziƒoxɔ ƒe fesre si woɖe dze ŋgɔ Yerusalem la nu doa gbe ɖa. (Fiawo I, 8:46-49; Daniel 6:11) Esi fia de se be womegado gbe ɖa na ame aɖeke tsɔ wu Media-fia Dario ko o gɔ̃ hã la, Daniel meʋuʋu kura o. Amesia si lɔ̃a gbedodoɖa yi edzi ɖe kuku na Yehowa madzudzɔmadzudzɔe, esia ɖade eƒe agbe afɔku me loo alo meɖadee o.
2 Aleke Yehowa bu Daniel? Esi mawudɔla Gabriel va be yeaɖo Daniel ƒe gbedodoɖawo dometɔ ɖeka ŋu la, eɖɔ nyagblɔɖila sia be enye ‘amesi wolɔ̃ vevie’ alo ‘amesi gbɔ womelɔ̃a nu le kura o.’ (Daniel 9:20-23) Le Xezekiel ƒe nyagblɔɖia me la, Yehowa yɔ Daniel be ame dzɔdzɔe. (Xezekiel 14:14, 20) Le Daniel ƒe agbemeŋkekewo me la, edze ƒã be eƒe gbedodoɖawo na xɔlɔ̃wɔwɔ kplikplikpli nɔ woa kple eƒe Mawu dome, eye Dario kura hã kpɔe dze sii nenema.—Daniel 6:17.
3. Abe alesi dutanyanyuigblɔla aɖe ƒe nuteƒekpɔkpɔ ɖee fia ene la, aleke gbedodoɖa ate ŋu akpe ɖe mía ŋu míalé nuteƒewɔwɔ me ɖe asii?
3 Gbedodoɖa edziedzi hã ate ŋu akpe ɖe mía ŋu míado dzi le dodokpɔ sesẽwo me. Le kpɔɖeŋu me, bu nusi dzɔ ɖe Harold King, si nye dutanyanyuigblɔla le China, si wode ameɖekɛgaxɔ me dzi ŋu kpɔ. Nɔviŋutsu King gblɔ le nusi dzɔ ɖe edzi ŋu be: “Woate ŋu aɖem ɖe aga tso hanyeviwo gbɔ, gake ame aɖeke mate ŋu aɖem ɖe aga tso Mawu gbɔ o. . . . Eyata medzea klo zi etɔ̃ gbesiagbe ɖe nye gaxɔ, si ne amesiame tso eme va yina la, wòate ŋu akpɔm me, doa gbe ɖa wòɖina wosena, eye Daniel, amesi ŋu Biblia ƒo nu le nɔa susu me nam. . . . Ewɔ abe le ɣeyiɣi mawo me la, Mawu ƒe gbɔgbɔ fiaa mɔ nye tamesusu yina ɖe nusiwo aɖe vi gbogbotɔ kekeake nam gbɔe ene eye wònaa meɖea dzi ɖi. Gbɔgbɔmeŋusẽdodo kple akɔfafa kae nye si gbedodoɖa nye nam!”
4. Gbedodoɖa ŋu biabia kawo mee míadzro le nyati sia me?
4 Biblia gblɔ be: “Minɔ gbedodoɖa dzi madzudzɔmadzudzɔe! Mida akpe le nusianu ŋuti.” (Tesalonikatɔwo I, 5:17, 18) Le nuxlɔ̃ame sia ta la, mina míabu nyabiase siwo gbɔna ŋu akpɔ: Nukata wòle be míalé fɔ ɖe míaƒe gbedodoɖa ŋu? Susu kawo tae wòle be míanɔ tetem ɖe Yehowa ŋu ɣeawokatãɣi ɖo? Eye nukae wòle be míawɔ ne míese le mía ɖokui me be míedze ado gbe ɖa na Mawu o le míaƒe gbɔdzɔgbɔdzɔwo ta?
Gbedodoɖa Nena Mia Kplii Dome Xɔlɔ̃dzedze me Nasẽ
5. Xɔlɔ̃dzedze tɔxɛ kae gbedodoɖa kpena ɖe mía ŋu míetuna ɖo?
5 Àdi be Yehowa nabu wò exɔlɔ̃ea? Eƒo nu le blemafofo Abraham ŋu le mɔ ma nu. (Yesaya 41:8; Yakobo 2:23) Yehowa di be míatu ƒomedodo ma tɔgbe ɖo kpli ye. Ekpe mí tẽ be míate ɖe ye ŋu. (Yakobo 4:8) Ðe mele be amekpekpe ma nana míabu tame tso nunana tɔxɛ si gbedodoɖa nye ŋu oa? Aleke wònyea nu sesẽe nye si hafi woaɖe mɔ na wò nàƒo nu na dziɖuɖumegã ŋkutatɔ aɖe, kaka nàhayi exɔlɔ̃ zu ge! Ke hã, xexeame katã Wɔla ya le dzi dem ƒo na mí be míate ɖe ye ŋu faa le gbedodoɖa me, ɣesiaɣi si dze mía ŋu loo alo ɣesiaɣi si wòhiã be míadoe ɖa. (Psalmo 37:5) Míaƒe gbedodoɖa madzudzɔmadzudzɔe kpena ɖe mía ŋu xɔlɔ̃dzedze kplikplikpli nɔa mía kple Yehowa dome.
6. Nukae Yesu ƒe kpɔɖeŋu fia mí le alesi ‘gbedodoɖa madzudzɔmadzudzɔe’ hiãe ŋu?
6 Gake kpɔ alesi wòle bɔbɔe be míagbe fɔléle ɖe gbedodoɖa ŋui ɖa! Gbesiagbegbenɔnɔ me amemiamiawo ate ŋu axɔ míaƒe susu me ale gbegbe be míate kpɔ be míaƒo nu na Mawu o. Yesu de dzi ƒo na eƒe nusrɔ̃lawo be ‘woanɔ gbe dom ɖa ɖaa,’ eye nenemae eya ŋutɔ hã wɔe. (Mateo 26:41) Togbɔ be vovo menɔa eŋu gbaɖekegbe o tso ŋdi va ɖo zã me hã la, edia ɣeyiɣi ƒoa nu na Fofoa si le dziƒo. Ɣeaɖewoɣi Yesu fɔna “fɔŋli” doa gbe ɖa. (Marko 1:35) Ɣebubuɣiwo la, eɖea aga yia afisi sa ɖe aga le ŋkekea ƒe nuwuwu ɖaƒoa nu na Yehowa. (Mateo 14:23) Yesu dia ɣeyiɣi ɣesiaɣi doa gbe ɖa, eye nenema ke wòle be míawo hã míadii.—Petro I, 2:21.
7. Nudzɔdzɔ kawoe wòle be woaʋã mí míaƒo nu na mía Fofo si le dziƒo gbesiagbe?
7 Mɔnukpɔkpɔ geɖe sua mía si siwo sɔ na ɖokuisi gbedodoɖa gbesiagbe ne míedo go kuxiwo, tetekpɔwo, kple ne wòhiã be míawɔ nyametsotsowo. (Efesotɔwo 6:18) Ne míedia Mawu ƒe mɔfiafia le agbenɔnɔ ƒe akpa sia akpa la, ado ŋusẽ mía kplii dome xɔlɔ̃wɔwɔ. Ne xɔlɔ̃ eve kpɔ kuxiwo gbɔ ɖekae la, ɖe menaa woƒe xɔlɔ̃wɔwɔa me sẽna ɖe edzi oa? (Lododowo 17:17) Nenema ke wòle ne míeziɔ ɖe Yehowa ŋu eye míekpɔ be ekpena ɖe mía ŋu.—Kronika II, 14:10.
8. Nukae míesrɔ̃ tso míaƒe ɖokuisi gbedodoɖawo ƒe didime ŋu le Nexemya, Yesu, kple Xana ƒe kpɔɖeŋuwo me?
8 Aleke gbegbee wòle be wòadzɔ dzi na míi enye si be Mawu meɖo seɖoƒe na nya si míedi be míagblɔ nɛ ƒe didime alo zi gbɔ zi alesi míedi be míado gbe ɖa nɛ o! Nexemya do gbe kpui aɖe ɖa le tame hafi gblɔ eƒe biabia na Persia-fia. (Nexemya 2:4, 5) Yesu hã do gbe kpui aɖe ɖa esime wòbia be Yehowa nena ŋusẽ ye yeafɔ Lazaro ɖe tsitre. (Yohanes 11:41, 42) Gake Xana ya “[do gbe] ɖa le Yehowa ŋku me eteƒe didi” esime wònɔ eƒe dzimenyawo gblɔm nɛ. (Samuel I, 1:12, 15, 16) Míaƒe ɖokuisi gbedodoɖawo ate ŋu anɔ kpuie alo woadidi le hiahiã alo nɔnɔmeawo nu.
9. Nukata wòle be kafukafu kple akpedada ɖe nusiwo gbegbe Yehowa wɔ na mí ta nanɔ míaƒe gbedodoɖawo me?
9 Biblia me gbedodoɖa geɖe me nyawo nye ŋudzedzekpɔnya siwo tso dzi me na Yehowa le eƒe ɖoƒe si ƒo ɖesiaɖe ta kple eƒe dɔ wɔnukuwo ta. (Mose II, 15:1-19; Kronika I, 16:7-36; Psalmo 145) Apostolo Yohanes kpɔ amegã xoxo 24-awo—Kristotɔ amesiaminawo le woƒe dziƒonɔƒewo—wole Yehowa kafum le gbɔgblɔm be: “Mía Aƒetɔ kple mía Mawu, wòe dze be, naxɔ ŋutikɔkɔe kple bubu kple ŋusẽ; elabena wòe wɔ nuwo katã, eye wò lɔlɔ̃nu ta woli, eye wowɔ wo ɖo.” (Nyaɖeɖefia 4:10, 11) Ele be míawo hã míakafu Wɔla la enuenu. Dzidzɔ kae nye si wònyena na dzilawo ne wo vi da akpe na wo tso dzi me ɖe nane si wowɔ nɛ ta! Ŋugbledede le Yehowa ƒe dɔmenyonyo ŋu ŋudzedzekpɔkpɔtɔe kple míaƒe akpedada si tso dzi me ɖe eta gbɔgblɔ nɛ nye mɔnu nyui aɖe si dzi míato atrɔ asi le míaƒe gbedodoɖawo ƒe nyonyome ŋu.
‘Gbedodoɖa Madzudzɔmadzudzɔe’—Nukatae?
10. Akpa kae gbedodoɖa wɔna le ŋusẽdodo míaƒe xɔse me?
10 Gbedodoɖa edziedzi hiã vevie na míaƒe xɔse me léle ɖe asi. Esi Yesu gblɔ ‘alesi wòle be woado gbe ɖa ɣesiaɣi ɖeɖimateameŋutɔe’ ƒe kpɔɖeŋu vɔ la, ebia be: “Ne Amegbetɔvi la va la, ɖe wòakpɔ xɔse la le anyigba la dzi mahã?” (Luka 18:1-8) Gbedodoɖa vevie si tso dzi me tua xɔse ɖo. Esi blemafofo Abraham nɔ amegã kum eye vi menɔ esi haɖe o la, eƒo nu tso nya la ŋu na Mawu. Le eŋuɖoɖo me la, Yehowa bia tso esi gbã be wòawu ta dzi akpɔ dziƒo ɖa eye wòaxlẽ ɣletiviawo, ne ate ŋui. Emegbe Mawu gaka ɖe edzi na Abraham be: “Nenema wò ƒome anɔ.” Nukae do tso eme? Abraham “[xɔ] Yehowa dzi se, eye wòbui nɛ dzɔdzɔenyenyee.” (Mose I, 15:5, 6) Ne míeʋu dzi me na Yehowa le gbedodoɖa me hexɔ kakaɖedzinya siwo wògblɔ ɖe Biblia me de eme, eye míeɖo toe la, ado ŋusẽ míaƒe xɔse.
11. Aleke gbedodoɖa ate ŋu akpe ɖe mía ŋu le kuxiwo gbɔ kpɔkpɔ mee?
11 Gbedodoɖa agate ŋu akpe ɖe mía ŋu hã be míakpɔ kuxiwo gbɔ. Ðe nuwo te ɖe mía dzi eye nya sesẽwo dzɔna ɖe mía dzia? Biblia gblɔ na mí be: “Tsɔ wò nyawo dro ɖe Yehowa dzi, eyae akpɔ tawò; emana ke naɖe le ame dzɔdzɔe te akpɔ gbeɖe o.” (Psalmo 55:23) Ne nyametsotso sesẽwo dze ŋgɔ mí la, míate ŋu asrɔ̃ kpɔɖeŋu si Yesu ɖo ɖi. Edo gbe ɖa zã blibo ɖeka hafi tia eƒe apostolo 12-awo. (Luka 6:12-16) Eye le ŋkeke si do ŋgɔ na eƒe ku ƒe zã me la, Yesu do gbe ɖa vevie ale gbegbe be “eƒe fifia le abe ʋukɔwo ene hele gegem ɖe anyigba toŋtoŋ.” (Luka 22:44) Nukae nye emetsonu? “[Woɖo] toe le esi wòvɔ̃a Mawu la ŋuti.” (Hebritɔwo 5:7) Míaƒe gbedodoɖa vevie edziedzi akpe ɖe mía ŋu be míanɔ te ɖe nuteɖeamedziwo kple dodokpɔ sesẽwo nu.
12. Aleke tete ɖe Yehowa ŋu le gbedodoɖa me naa wòdzena kɔte be etsɔ ɖe le eme na mí?
12 Nu bubu si ta míate ɖe Yehowa ŋu le gbedodoɖa mee nye be eya hã tena ɖe mía ŋu. (Yakobo 4:8) Ne míeʋu míaƒe dzi me na Yehowa le gbedodoɖa me la, ɖe míesenɛ le mía ɖokui me be etsɔ ɖe le míaƒe nuhiahiãwo me eye wòléa be na mí tufafatɔe oa? Míesenɛ ŋutɔŋutɔ le mía ŋutɔwo mía ɖokui me be Mawu lɔ̃ mí. Yehowa metsɔ dɔ si nye be yease ye subɔlawo ƒe gbedodoɖa ɖesiaɖe si woado ɖa na wo Fofo si le dziƒo la de asi na ame bubu aɖeke tsɔ kpe ɖe eya ŋutɔ ɖokui ŋu o. (Psalmo 66:19, 20; Luka 11:2) Eye ele mía kpem be ‘míatsɔ míaƒe dzimaɖitsitsiwo katã ada ɖe ye dzi elabena yeléa be na mí.’—Petro I, 5:6, 7.
13, 14. Susu kawo tae wòle be míanɔ gbe dom ɖa madzudzɔmadzudzɔe?
13 Gbedodoɖa ate ŋu ana dzo nanɔ mía me geɖe wu ɖe dutoƒo subɔsubɔdɔa wɔwɔ ŋu eye wòado ŋusẽ mí ne wòwɔ na mí be míana ta le ɖekematsɔleme kple tsitretsiɖeŋu ta. (Dɔwɔwɔwo 4:23-31) Gbedodoɖa agate ŋu akpɔ mía ta tso “Abosam ƒe aɖaŋu vɔ̃wo” me. (Efesotɔwo 6:11, 17, 18) Ne míele avu wɔm kple dodokpɔ siwo míedoa goe gbesiagbe la, míate ŋu abia Mawu ɣeawokatãɣi be wòado ŋusẽ mí. Yesu de biabia si nye be Yehowa ‘neɖe mí tso vɔ̃ɖitɔ,’ Satana Abosam, ‘si me’ eƒe kpɔɖeŋu gbedodoɖa la me.—Mateo 6:13.
14 Ne míeyi edzi le kpekpeɖeŋu biam le gbedodoɖa me be míaɖu dzodzro vɔ̃wo dzi la, míakpɔe be Yehowa akpe ɖe mía ŋu. Kakaɖedzi sia le mía si be: “Nuteƒewɔla enye Mawu, amesi mana mɔ bena, woate mi akpɔ awu alesi miate ŋui la o; ke ana gododo le eme hã akpe ɖe tetekpɔ ŋuti, bene miate ŋu atsɔe.” (Korintotɔwo I, 10:13) Apostolo Paulo ŋutɔ kpɔ Yehowa ƒe ŋusẽdoame ƒe beléle teƒe le nudzɔdzɔ vovovo me. Egblɔ be: “Metea ŋu wɔa nuwo katã le Kristo, amesi doa ŋusẽm la me.”—Filipitɔwo 4:13; Korintotɔwo II, 11:23-29.
Nɔ Gbedodoɖa Dzi Togbɔ Be Gbɔdzɔgbɔdzɔwo Le Ŋuwò Hã
15. Nukae ate ŋu adzɔ ne míegava le agbe nɔm ɖe Mawu ƒe dzidzenuwo nu o?
15 Be woase míaƒe gbedodoɖawo la, mele be míagbe Mawu ƒe Nya la me nuxlɔ̃amewo xɔxɔ o. Apostolo Yohanes ŋlɔ be: “Nusianu, si míebiae la, míaxɔe atso esi me; elabena míeléa eƒe seawo me ɖe asi, eye míewɔa nusiwo dzea eŋu.” (Yohanes I, 3:22) Gake nukae ate ŋu adzɔ ne míaƒe agbenɔnɔ mesɔ ɖe Mawu ƒe dzidzenuwo nu o? Adam kple Xawa yi ɖaɣla wo ɖokuiwo le woƒe nuvɔ̃ wɔwɔ le Eden-bɔa me megbe. Awɔ na míawo hã be ‘míasi abe na Yehowa’ ahadzudzɔ gbedodoɖa. (Mose I, 3:8) Dzikpɔla mɔzɔla kpɔnuteƒe aɖe si ŋkɔe nye Klaus gblɔ be: “Nusi mede dzesii enye be ɣesiaɣi kloe la, vodada gbãtɔ si amesiwo ɖea wo ɖokui ɖa tso Yehowa kple eƒe habɔbɔa ŋu wɔna ye nye be wodzudzɔa gbedodoɖa.” (Hebritɔwo 2:1) Nusiae dzɔ ɖe José Ángel dzi. Egbɔ be: “Ade ƒe enyi kloe la, bebli hafi medoa gbe ɖa na Yehowa. Mesena le ɖokuinye me be nyemedze aƒo nu nɛ o, evɔ megabunɛ kokoko be eyae nye Fofonye si le dziƒo hafi.”
16, 17. Gblɔ alesi gbedodoɖa edziedzi ate ŋu akpe ɖe mía ŋu míaɖu gbɔgbɔ me gbɔdzɔgbɔdzɔwo dzi ƒe kpɔɖeŋu aɖewo.
16 Awɔ na mía dometɔ aɖewo be míedze ado gbe ɖa o le gbɔdzɔgbɔdzɔ le gbɔgbɔ me alo nugbegblẽwɔwɔ aɖe ta. Evɔ ɣemaɣi tututue wòhiã be míazã gbedodoɖa ƒe nunana la bliboe hafi. Yona si le eƒe dɔdasi nu. Gake ‘Yona yɔ Yehowa le eƒe xaxawo me, eye Wòtɔ nɛ. Yona do ɣli tso tsieƒe ƒe ƒodo me, eye Yehowa se eƒe gbe.’ (Yona 2:3) Yona do gbe ɖa, Yehowa ɖo eƒe gbedodoɖaa ŋu, eye Yona haya le gbɔgbɔ me.
17 José Ángel hã do gbe ɖa vevie bia kpekpeɖeŋu. Egblɔ be: “Meʋu nye dzi me eye meɖe kuku bia Mawu ƒe tsɔtsɔke. Eye ekpe ɖe ŋunye hã vavã. Nyemexɔe se be magatrɔ ava nyateƒea me ne menye gbedodoɖae kpe ɖe ŋunye o. Fifia medoa gbe ɖa edziedzi gbesiagbe, eye wòdzroam vevie.” Ele be míavo le mía ɖokui me ɣesiaɣi be míaƒo nu tso míaƒe vodadawo ŋu na Mawu naneke maɣlamaɣlae eye míatsɔ ɖokuibɔbɔ abia eƒe tsɔtsɔke. Esi Fia Dawid ʋu eƒe dzidadawo me la, Yehowa tsɔ eƒe nuvɔ̃wo kee. (Psalmo 32:3-5) Ðe Yehowa di be yeakpe ɖe mía ŋu, menye be yeabu fɔ mí o. (Yohanes I, 3:19, 20) Eye hamemetsitsiwo ƒe gbedodoɖawo ate ŋu akpe ɖe mía ŋu le gbɔgbɔ me, elabena woƒe kukuɖeɖewo “tea ŋu wɔa nu geɖe.”—Yakobo 5:13-16.
18. Kakaɖedzi kae le Mawu subɔlawo si eɖanye aleke kee wotra mɔe o?
18 Fofo kae anya via si va egbɔ ɖokuibɔbɔtɔe be wòakpe ɖe ye ŋu eye be yeaxɔ aɖaŋuɖoɖo atso egbɔ esime ɖevia wɔ vodadaa? Vi nudomegblẽla la ƒe kpɔɖeŋu fia be aleke gbegbee míetrae o, edzɔa dzi na mía Fofo si le dziƒo ŋutɔ ne míetrɔ va egbɔ. (Luka 15:21, 22, 32) Yehowa le amesiwo katã tra mɔ la kpem be woayɔ ye, “elabena [yetsɔa] nuvɔ̃ kena geɖe.” (Yesaya 55:6, 7) Togbɔ be Dawid wɔ nuvɔ̃ gã geɖewo hã la, eyɔ Yehowa gblɔ nɛ be: “Mawu se nye gbedodoɖa, eye megaɣla ɖokuiwò ɖe nye kokoƒoƒowo o!” Egblɔ kpee be: “Mefa konyi, eye meɖe hũ le fiẽ, ŋdi kple ŋdɔ, eye [Yehowa] ɖo to nye gbe.” (Psalmo 55:2, 18) Aleke gbegbee wòfaa dzi na amee nye si!
19. Nukata mele be míatsɔe be ne ewɔ abe womeɖo míaƒe gbedodoɖawo ŋu o la, ke efia be Mawu mekpɔ ŋudzedze ɖe mía ŋu o?
19 Ke ne womeɖo míaƒe gbedodoɖa ŋu na mí enumake o ɖe? Ekema ele be míakpɔ egbɔ be míaƒe biabiaa sɔ ɖe Yehowa ƒe lɔlɔ̃nu nu eye míebiae to Yesu ƒe ŋkɔ dzi. (Yohanes 16:23; Yohanes I, 5:14) Gake nusrɔ̃la Yakobo gblɔ le Kristotɔ aɖewo ŋu be womeɖo woƒe gbedodoɖawo ŋu o le esi ‘womebiana kple susu nyui o’ ta. (Yakobo 4:3) Le go bubu me la, mele be míaƒo nya ta kaba be gbedodoɖa siwo dze abe womeɖo wo ŋu o ene nyea kpeɖodzi ɣesiaɣi be Mawu mekpɔ ŋudzedze ɖe ame ŋu o. Ɣeaɖewoɣi la, Yehowa ate ŋu aɖe mɔ esubɔla wɔnuteƒewo nanɔ gbedodoɖa dzi le nane ŋu vaseɖe ɣeaɖeɣi hafi woakpɔ ŋuɖoɖoa. Yesu gblɔ be: “Minɔ ebiabia dzi, eye woana mi.” (Mateo 7:7, 8, NW) Esi wòle alea ta la, ehiã be ‘míanɔ gbedodoɖa dzi ɖaasi.’—Romatɔwo 12:12.
Do Gbe Ða Edziedzi
20, 21. (a) Nukatae wòhiã be míado gbe ɖa madzudzɔmadzudzɔe le ‘ŋkeke mamlɛ’ siawo me? (b) Nukae míaxɔ ne míetena vaa Yehowa ƒe amenuveve fiazikpui la gbɔ gbesiagbe?
20 Amemiamiawo kple kuxiwo le dzidzim ɖe edzi le ‘ɣeyiɣi sesẽ siwo me nɔnɔ sẽ,’ si nye dzesi na ‘ŋkeke mamlɛawo’ la me. (Timoteo II, 3:1) Eye ele bɔbɔe be fukpekpewo naxɔ susu me na mí. Gake míaƒe gbedodoɖa madzudzɔmadzudzɔe ana míatu míaƒe agbenɔnɔ ɖe gbɔgbɔmenuwo dzi togbɔ be kuxiwo, tetekpɔwo, kple dziɖeleƒonamenuwo aɖe kpe na mí hã. Míaƒe gbedodoɖa na Yehowa gbesiagbe ate ŋu ana dzideƒo si hiã mí vevie la mí.
21 Yehowa, ‘Gbedodoɖasela la,’ mexaxa akpa be mase míaƒe gbedodoɖawo o. (Psalmo 65:3) Megadzɔ gbeɖe be míaxaxa akpa na nuƒoƒo nɛ o. Mía kple Mawu dome xɔlɔ̃dzedzee nye nu xɔasitɔ kekeake si le mía si. Migana míabui nu tsɛe gbeɖe o. “Eyata minɛ míatsɔ dzideƒo ate va eƒe amenuvevezikpui la gbɔ, bene míaƒe asi nasu nublanuikpɔkpɔ dzi, eye míakpɔ amenuveve hena mía xɔxɔ le hiahiãgbe.”—Hebritɔwo 4:16.
Aleke Nàɖo Wo Ŋui?
• Nukae míesrɔ̃ tso nyagblɔɖila Daniel gbɔ ku ɖe vevienyenye si le gbedodoɖa ŋu ŋuti?
• Aleke míawɔ ado ŋusẽ xɔlɔ̃dzedze si le mía kple Yehowa dome?
• Nukata wòle be míado gbe ɖa madzudzɔmadzudzɔe?
• Nukata mele be míaɖe mɔ esese le mía ɖokui me be míedze o naxe mɔ na míaƒe gbedodoɖa na Yehowa o?
[Biabiawo]
[Nɔnɔmetata si le axa 16]
Nexemya do gbe kpui aɖe ɖa le tame hafi gblɔ eƒe biabia na Persia-fia
[Nɔnɔmetata si le axa 17]
Xana ‘do gbe didi aɖe ɖa le Yehowa ŋkume’
[Nɔnɔmetata siwo le axa 18]
Yesu do gbe ɖa zã blibo ɖeka hafi tia eƒe apostolo 12-awo
[Nɔnɔmetata siwo le axa 20]
Mɔnukpɔkpɔwo sua mía si ŋkeke bliboa katã be míado gbe ɖa