Vudo Siwo Me Tsi Menɔna O

LE Biblia ƒe ɣeyiɣiwo me la, woɖea vudowo be tsi nanɔ wo me koŋ. Ɣeaɖewoɣi le Ŋugbedodonyigbaa dzi la, esiawo koe nye mɔnu siwo dzi wotona kpɔa tsi si hiã vevie la zãna.

Yeremya zã vudowo le kpɔɖeŋumɔ nu tsɔ gblɔ Mawu ƒe ʋɔnudrɔ̃nya aɖe be: “Nye dukɔ wɔ vɔ̃ ƒomevi eve: wogblẽ nye, amesi nye tsi gbagbe vudo la ɖi, be woaɖe tsido na woawo ŋutɔ ɖokui, tsido, siwo gɔme ŋɔ, tsi mate ŋu anɔ wo me o.”—Yeremya 2:13.

Israel-viwo gblẽ woƒe Mawu, Yehowa—“tsi gbagbe vudo”—la ɖi hewɔ asrafowo dome nubabla siwo ŋu womate ŋu aɖo ŋu ɖo o kple trɔ̃subɔdukɔwo eye wode ta agu na alakpamawu siwo si ŋusẽ aɖeke mele o. Le Yeremya ƒe kpɔɖeŋua nu la, sitsoƒe siawo siwo ŋu wole ŋu ɖom ɖo la menye naneke wu vudo siwo gɔme ŋɔ siwo si ŋusẽ aɖeke mele be woakpɔ wo ta alo aɖe wo o.—Mose V, 28:20.

Ðe nusɔsrɔ̃ aɖe le ŋutinya me kpɔɖeŋu sia me na mí egbea? Abe alesi wònɔ le Yeremya ƒe ŋkekea me ene la, Mawu mavɔmavɔtɔ, Yehowa, gakpɔtɔ nye agbetsi Dzɔtsoƒe ɖeka kolia. (Psalmo 36:10; Nyaɖeɖefia 4:11) Eyama gbɔ koe amegbetɔwo ate ŋu akpɔ agbe mavɔ le, to Via, Yesu Kristo, dzi. (Yohanes 4:14; 17:3) Ke hã abe Yeremya ŋɔlimetɔwo ene la, ameƒomea me tɔ gbogbo aɖewo ɖoe koŋ gbe Mawu ƒe nya si le Biblia me eye wona wòbu eƒe asixɔxɔ gɔ̃ hã. Ðe eteƒe la, woɖoa ŋu ɖe dunyahehe me ɖoɖo malikewo, amegbetɔ ƒe nuŋububu gbɔlowo, kpakple nukpɔsusu kple xexemenunya maɖevi siwo medea bubu Mawu ŋu o la ŋu. (Korintotɔwo I, 3:18-20; Kolosetɔwo 2:8) Tiatia nyuitɔ dze ƒã. Ameka ŋue nàɖo ŋu ɖo? Yehowa, “tsi gbagbe vudo” la ŋue naɖo ŋu ɖo, loo alo ɖe ‘vudo siwo gɔme ŋɔ siwo me tsi mate ŋu anɔ o’ ŋua?

[Nɔnɔmetata si le axa 32]

Mawunɔ aɖe ƒe kpememe si ŋu woke ɖo le yɔdo aɖe me le Israel

[Afi Si Míexɔ Mɔɖeɖe Tso]

Photograph taken by courtesy of the British Museum