Dzitsinya Nyui

CHARLES, amesi le dɔ wɔm le yunivɛsiti aɖe le Kenya bu eƒe asitelefon esi wòtrɔ tso dɔme yina aƒeme gbeɖeka. Asitelefon gakpɔtɔ nye nuzazã xɔasi kokoko le Kenya.

Charles gblɔ be: “Nyemele mɔ kpɔm be ame aɖeke agbugbɔe vɛ nam o.” Gake ewɔ nuku nɛ be le ŋkeke ʋɛ aɖewo megbe la, Yehowa Ðasefowo ƒe alɔdzedɔwɔƒe si le Kenya ƒo ka nɛ. Esi wogblɔ nɛ mlɔeba be wòava xɔ eƒe asitelefon la, ewɔ nuku nɛ ale gbegbe! Eva va eme be Yehowa Ðasefowo ƒe ɣeyiɣiawo katã ƒe subɔla aɖee ɖo ʋu ma ke kple Charles eye wòfɔ asitelefon la. Le agbagbadzedze me be yeake ɖe nua tɔ ŋu la, subɔla la tsɔ telefon la yi alɔdzedɔwɔƒea eye lɔlɔ̃nu faa dɔwɔlawo ke ɖe Charles ŋu to telefonxexlẽdzesi si dze le asitelefon la dzi zazã me.

Charles gblɔ le lɛta si wòŋlɔ na alɔdzedɔwɔƒea me be: “Mekpɔ ŋudzedze geɖe ɖe agbagba siwo miedze tsɔ dim la ŋu togbɔ be elɔ kuxi geɖewo ɖe eme hã. Meda akpe geɖe na miaƒe hamea me tɔ siwo fɔ asitelefon la hekpɔe be tɔnyee eye wotrɔe vɛ nam. Anukwareɖilawo megabɔ egbea o, gake edea dzi ƒo ŋutɔ be ame ʋɛ aɖewo to vovo heɖenɛ fiana be Yehowa Mawu ƒe Ðasefo vavãwoe yewonye.”

Wonya Yehowa Ðasefowo le afisiafi ɖe woƒe anukwareɖiɖi ta. Wosrɔ̃a apostolo Paulo, amesi gblɔ be: “Míenya le mía ɖokui me bena, dzitsinya nyui le mía si, le esi míelɔ̃ be, míanɔ agbe nyuie le nusianu me la ŋuti.” (Hebritɔwo 13:18; Korintotɔwo I, 11:1) Wonyae be agbenɔnɔ ma tɔgbe hea kafukafu vɛ na Yehowa Mawu, abe alesi Yesu gblɔe ene be: “Mina miaƒe kekeli naklẽ le amewo ƒe ŋku me, bena woakpɔ miaƒe nu nyui wɔwɔwo, eye woakafu mia Fofo, si le dziƒo.”—Mateo 5:16.