“Yehowa ƒe Ŋkɔ Dodo Ðe Dzi Tae”

LE XEXEAME godoo la, wokpɔa ŋudzedze ɖe magazine siwo nye Gbetakpɔxɔ kple Nyɔ! ŋu le esi woƒoa nu tso mawusubɔsubɔ ŋu eye nufiame veviwo le wo me ta. Ame aɖe si xlẽa míaƒe magazinewo le France ɖe esia gblɔ le lɛta si gbɔna me:

“Afrikatɔ ɖetugbi aɖe si menya agbalẽ yi ŋgɔ boo o ye menye. Medze miaƒe magazinewo xexlẽ gɔme nyitsɔ laa sia ko. Nya siwo le wo me na meva le dzesi dem asixɔxɔ si le nuxexlẽ ŋu. Miawoe kpe ɖe ŋunye meva nya nyagbe geɖe wu eye mate ŋu aŋlɔ lɛta evɔ vodada ʋɛ aɖewo koe anɔ eme wu tsã.

“Ewɔ moyaa nam ŋutɔ be mieŋlɔa nu tsoa nusianu si ku ɖe amegbetɔwo, anyigba, kple Wɔla la ŋu alea gbegbe. Nyatiawo gɔmesese le bɔbɔe ale gbegbe be wo xexlẽ dzroa ame. Ŋutete mele ame aɖeke ŋu be wòafia nu ameƒomeviwo katã le ɣeyiɣi ɖeka me abe alesi miele ewɔmee ene o.

“Ewɔa ŋku nam hã be menye gadidi tae miewɔa esiawo katã ɖo o, ke boŋ Yehowa ƒe ŋkɔ dodoɖedzi tae. Menya be ekpɔa ŋudzedze ɖe mia ŋu, eye mele akpe dam na mi. Taflatse miyi dzi miadi ŋusẽdoame tso Wɔla la gbɔ be miate ŋu anɔ nu fiam.”

Yehowa Ðasefowo le Biblia-fiafiadɔa wɔm le dukɔ 235 me. Wotana Gbetakpɔxɔ ɖe gbegbɔgblɔ 148 me eye Nyɔ! ɖe gbegbɔgblɔ 87 me. Menye amegbetɔ aɖeke kafukafu tae wotaa magazine siawo ɖo o. Wotrɔ asi le aɖaŋuɖoɖo siwo tso Biblia me kple nyatakaka yeye siwo le wo me ŋu be woatsɔ ade bubu Wɔla la ŋui, amesi gblɔ be: “Nye Yehowa . . . enye amesi fia nusi nyo na wò la wò.” (Yesaya 48:17) Na Ŋɔŋlɔ Kɔkɔeawo kple Biblia-srɔ̃gbalẽ siawo xexlẽ edziedzi naɖe vi na wò.