Alesi Woanɔ Te Ðe Dziɖeleameƒo Nui

ÐE DZI ɖe le ƒowòa? Le tamanyamanya le nuwo nu kple dzrewɔwɔ ƒe ɣeyiɣi sia me la, dzi ɖena le ame geɖe ƒo. Dzi ɖe le ame aɖewo ƒo le esi dɔwɔɖui mele wo si o ta. Ame aɖewo hã le agbagba dzem be yewoanɔ te ɖe afɔku megbe ƒe nɔnɔme madeamedziwo nu. Ƒomekuxiwo, dɔléle sesẽ aɖe, alo akogotsitsi le fu ɖem na ame bubuwo hã.

Ne dzi ɖe le ƒowò la, afikae nàte ŋu atrɔ ɖo hena kpekpeɖeŋu? Ame miliɔn geɖe le xexeame godoo kpɔ akɔfafa to Mawu ƒe Nya, Biblia, xexlẽ me. Apostolo Paulo ƒe nya siawo na kakaɖedzi wo be: “Woakafu Mawu, mía Aƒetɔ Yesu Kristo Fofo, si nye dɔmetɔtrɔ Fofo kple akɔfafawo katã ƒe Mawu la, amesi fa akɔ na mí le míaƒe xaxa blibo la katã me.” (Korintotɔwo II, 1:3, 4) Nukata màxlẽ nya siawo kple Biblia me nya bubuwo le wò ŋutɔ wò Biblia me o? Esia wɔwɔ ‘afa akɔ na wò dzi, eye wòado ŋusẽ wò.’—Tesalonikatɔwo II, 2:17.

Àte ŋu akpɔ kpekpeɖeŋu si ana nànɔ te ɖe dziɖeleameƒo nu to hadede kple amesiwo subɔa Yehowa me hã. Lododowo 12:25 gblɔ be: “Nuxaxa le dzi me tea ame ɖe anyi; ke xɔlɔ̃nya doa dzidzɔ na ame.” Ne míede Kristotɔwo ƒe kpekpewo la, míesena “xɔlɔ̃nya” ma, si ‘vivina na luʋɔ, eye wòyɔa dɔ ƒuwo.’ (Lododowo 16:24) Nukata màde kpekpe le Yehowa Ðasefowo ƒe Fiaɖuƒe Akpata me be nàkpɔ alesi gbegbe hadede ma tɔgbe ate ŋu akpɔ ŋusẽ ɖe dziwòe la na ɖokuiwò o?

Ŋusẽ si tsoa gbedodoɖa me hã ate ŋu aɖe vi na wò. Ne èse le ɖokuiwò me be agbemedzimaɖitsitsiwo wu tsɔtsɔ na ye la, gblɔ wò seselelãme ememetɔwo na ‘gbedodoɖa Sela’ la. (Psalmo 65:3) Mía Wɔla, Yehowa Mawu, nya mí wu alesi míenya mía ɖokuii. Míate ŋu aɖo ŋu ɖe eƒe kpekpeɖeŋu ŋu. Eƒe Nya do ŋugbe na mí be: “Tsɔ wò nyawo dro ɖe Yehowa dzi, eyae akpɔ tawò; emana ke naɖe le ame dzɔdzɔe te akpɔ gbeɖe o.” (Psalmo 55:23) Nyateƒee, “ŋusẽ yeye ɖoa amesiwo kpɔa mɔ na Yehowa ya ŋu.”—Yesaya 40:31.

Yehowa Mawu na ŋusẽdoamenu sẽŋu siwo ate ŋu akpe ɖe mía ŋu be míanɔ te ɖe dziɖeleameƒo nu dzidzedzetɔe la mí. Àzã woa?