Menye Modzakaɖeɖe Dzro Koe O

FEFE doa dzidzɔ na ɖeviwo. Gake agbalẽ si nye The Developing Child ɖe nu me be, “esia menyea nuwɔna tsɛ aɖe alo wɔna gbɔlo aɖe ko o. Edze abe eyae kpena ɖe ɖeviwo ŋu wonyaa nusiwo ƒo xlã wo la ene.” To fefe siwo ɖeviwo fena me la, wosrɔ̃a alesi woazã woƒe sidzenuwo, henyaa nu geɖe tsoa woƒe nutome ŋu, eye wosrɔ̃a alesi woawɔ nu kple amewoe.

Ne ɖeviwo nya xɔ ƒe ene alo atɔ̃ heyina ko la, wofena fefe siwo me wotsɔa wo ɖokui ɖoa ame tsitsiwo teƒe hesrɔ̃a woƒe nuwɔnawo le. Yesu ƒo nu ɣeaɖeɣi tso ɖevi aɖewo siwo nɔ fefem la ŋu. Wo dometɔ aɖewo di be yewoawɔ “srɔ̃kpekpe,” bubuawo di be yewoawɔ nu abe “kuteƒee” yewole ene, eye abe alesi wònɔna le ɖeviwo gomee ene la, wohe nya le wo nɔewo dome le esi wo tɔ aɖewo medi be yewoakpɔ gome le fefea me o ta. (Mateo 11:16, 17) Fefe siawo tɔgbe ate ŋu ana agbemenuwɔna ɖɔʋuwo natsi susu me na ɖeviwo esi wole tsitsim.

Ðevi siwo le nɔnɔmetata siawo me le fefe, si me wo dometɔ ɖeka wɔ eɖokui Biblia-fiala eye evelia hã wɔ eɖokui nusrɔ̃vii le la, fem. Menye Biblia-nusɔsrɔ̃ ŋutɔŋutɔ wɔm wole o, gake edze ƒã be nuwɔna si nye Biblia me gbedasi gbɔgblɔ na ame tsi susu me na wo. Eye nusɔsrɔ̃ sia wɔwɔ nye nu vevi aɖe, elabena Yesu de se na eyomedzelawo katã be woawɔ amewo woanye nusrɔ̃lawo eye woafia wo be woawɔ nusiwo katã yefia wo la.—Mateo 28:19, 20.

Edze be dzi nadzɔ dzila siwo ƒe viwo fena fefe, siwo me wosrɔ̃a Biblia kple amewo, ƒoa nuƒowo, alo nɔa gbeƒã ɖem tso aƒeme yi aƒeme le la vavã. Le dzɔdzɔme nu la, ɖeviwo srɔ̃a nusiwo wokpɔ ame tsitsi siwo dome wole la wɔna. Ðeviwo ƒe Biblia me fefewo wɔwɔ na wòdze ƒã be wole wo nyim “le Aƒetɔ la ƒe hehe kple nuxɔxlɔ̃ la me.”—Efesotɔwo 6:4.

Yehowa di be ɖeviwo nakpɔ gome le tadedeagu vavãtɔ me. Egblɔ na Mose be wòana “ɖeviwo” hã nanɔ eteƒe ne wole Sea xlẽm. (Mose V, 31:12) Ne ɖeviwo kpɔe be wona yewokpɔ gome le wɔna aɖewo me la, ana woanɔ nusiwo srɔ̃m wole la wɔm le woƒe fefewo me. Eye ɖevi si fena fefe siwo me wòwɔa eɖokui Mawu ƒe subɔlae le la le afɔ gbãtɔ siwo ana wòava zu mawusubɔla la ɖem.