Ðe Míava Se Vivi na Dedienɔnɔ Vavãtɔ Gbaɖegbea?

ÐEVIWO le fefe fem kple wo dzila lɔ̃ame dzidzɔtɔe—amekae nusia kpɔkpɔ medzɔa dzi na o? Ðeviawo sena le wo ɖokui me be yewo le dedie le dzila lébenameawo gbɔ. Ke hã, le ɖevi geɖe gome la, dzidzɔɣi siawo meli na wo o. Ðe eteƒe la, ele be ɖevi aɖewo natsi dzi ɖe afisi woakpɔ amlɔ le zã me ŋu gbesiagbe. Ðe mɔkpɔkpɔ aɖe li na ɖevi siawo siwo tsi ablɔ dzi kple ame bubu siwo li evɔ dedienɔƒe aɖeke mele wo si o la?

Togbɔ be kakaɖedzi aɖeke manɔ etsɔme ŋu o hã la, Mawu ƒe Nya na mɔkpɔkpɔ. Nyagblɔɖila Yesaya gblɔ ɖi be ɣeyiɣi aɖe ava si me amewo katã anɔ anyi le dedienɔnɔ blibo me. Eŋlɔ bena: “Woatu xɔ anɔ eme, eye woade weingble aɖu eme kutsetse. Womatu xɔ ame bubu nanɔ eme o, eye womaƒã nu ame bubu naɖu o.”—Yesaya 65:21, 22.

Gake ɖe kakaɖedzi le mɔkpɔkpɔ sia ŋua? Ne èbu eŋu kpɔ la, menye ɣesiaɣie nya “mɔkpɔkpɔ” naa kakaɖedzi blibo ame o. Le kpɔɖeŋu me, nya aɖe li wogblɔna edzidzi le Brazil be: “A esperança é a última que morre.” Egɔme le nyagbeawo nu enye, “Mɔkpɔkpɔe nye nu mamlɛtɔ si kuna.” Esia fia be mɔkpɔkpɔ gakpɔtɔ nɔa ame geɖe si nenye be kakaɖedzi aɖeke mele eŋu o hã. Gake mɔkpɔkpɔ si Mawu gbagbe la ɖo mía ŋkume la to vovo. Apostolo Paulo ŋlɔ bena: “Amesiame, si xɔa [Mawu dzi] sena la, womado ŋukpee o.” (Romatɔwo 10:11) Biblia me nyagblɔɖi siwo va eme xoxo na kakaɖedzi mí be ŋugbe bubu siwo katã Yehowa Mawu do la hã ava eme. Ne ŋugbedodo mawo va eme la, nɔnɔme siwo ƒonɛ ɖe ɖeviwo nu be woatsi ablɔ dzi la azu gbaɖegbenyawo.

Egbea gɔ̃ hã la, aɖaŋuɖoɖo nyui siwo le Biblia me la ate ŋu akpe ɖe amesiwo mɔkpɔkpɔ bu ɖo la ŋu be woƒe agbe naganyo ɖe edzi eye woakpɔ dedienɔnɔ vavãtɔ. Aleke wòanya wɔe? Adzɔ dzi na Yehowa Ðasefo siwo le miaƒe nutoa me la be woakpe ɖe ŋuwò nàkpɔ nyabiabia siawo ƒe ŋuɖoɖo.