Nusi Yehowa Ƒe Ðokuibɔbɔ Fia na Mí

DAWID nye ŋutsu si fukpekpewo ɖe kpe na. Toa ŋuʋãla, Fia Saul, sẽ ŋuta le eŋu vevie. Zi etɔ̃ sɔŋ Saul te kpɔ be yeawu Dawid kple akplɔ heti eyome atraɖii hena ƒe geɖe, si ƒoe ɖe Dawid nu be wòasi aɖo gbe. (Samuel I, 18:11; 19:10; 26:20) Ke hã, Yehowa nɔ kple Dawid. Yehowa xɔ nɛ, menye tso Saul si me ko o, ke tso eƒe futɔ bubuwo hã si me. Eyata míate ŋu ase Dawid ƒe seselelãme, siwo wòɖe gblɔ le hadzidzi me, gɔme bena: “Yehowa enye nye agakpe, nye mɔ̃ kple nye ɖela. [Yehowa ètsɔ] wò xɔxɔ ƒe akpoxɔnu la nam, eye wò [ɖokuibɔbɔ, NW] wɔm mezu gã.” (Samuel II, 22:2, 36) Dawid zu gã ɖe Israel dzi vavã. Ke aleke Yehowa ƒe ɖokuibɔbɔ wɔ akpa aɖee?

Ne Ŋɔŋlɔawo gblɔ le Yehowa ŋu be ebɔbɔ eɖokui la, mefia be nane hiãe le mɔ aɖe nu alo be ebɔbɔ ɖe ame bubuwo te o. Ðe eteƒe la, nɔnɔme lédziname sia ɖenɛ fiana be ewɔa nu ɖe amegbetɔ siwo dzea agbagba vevie be yewoadze eŋu la ŋu le ameŋububu me eye wòkpɔa nublanui na wo. Míexlẽ le Psalmo 113:6, 7 (NW) be: “[Yehowa] bɔbɔna ɖe anyi kpɔa dziƒo kple anyigba dzi, hefɔa ame tsɛ la tso ʋuʋudedi me.” Eƒe ‘bɔbɔ ɖe anyi’ fia be “ebɔbɔna ɖe anyi be yeakpɔ” alo be “ebɔbɔa Eɖokui be yeakpɔ nu.” (Today’s English Version; Young’s Literal Translation of the Holy Bible) Eyata Yehowa ŋutɔ ‘bɔbɔna ɖe anyi,’ alo ‘bɔbɔa eɖokui,’ tso dziƒo be yeaɖo to Dawid, ame madeblibo si nye ɖokuibɔbɔla si di vevie be yeasubɔ Mawu. Eyata Dawid gana kakaɖedzi mí be: “Yehowa lolo, [ke hã ekpɔa] ame bɔbɔɖokui.” (Psalmo 138:6) Ele be alesi Yehowa wɔ nu kple Dawid le nublanuikpɔkpɔ, dzigbɔɖi, kple ameŋububu me nade dzi ƒo na amesiwo katã dina vevie be yewoawɔ Mawu ƒe lɔlɔ̃nu.

Togbɔ be Yehowa nye Dziɖulagã si le ɖoƒe kɔkɔtɔ kekeake le xexeame hã la, elɔ̃na faa be yeawɔ nu kple mía dometɔ ɖesiaɖe. Esia de dzi ƒo na mí be míaɖo ŋu ɖe eƒe kpekpeɖeŋu si medoa kpo nu o la ŋu le nɔnɔme sesẽtɔwo kekeake gɔ̃ hã me. Susu aɖeke meli si ta míavɔ̃ be aŋlɔ mí be o. Le eƒe blema Israel dukɔa  gome la, woƒo nu tso Yehowa ŋu wòsɔ nyuie be, “eya, amesi ɖo ŋku [wo] dzi, esime wòbɔbɔ [wo] ɖe anyi, elabena eƒe amenuveve li tegbee.”—Psalmo 136:23.

Abe Yehowa ƒe subɔla siwo li egbea ene la, fukpekpewo ate ŋu ava mía dzi abe alesi wònɔ na Dawid ene. Anɔ eme be amesiwo menya Mawu o ɖua fewu le mía ŋu, alo ɖewohĩ, lãmegbegblẽ le fu ɖem na mí loo alo míaƒe lɔlɔ̃tɔ aɖe ku. Aleke kee míaƒe nɔnɔmea ɖale o, ne míenye dzianukwaretɔwo la, míate ŋu ate ɖe Yehowa ŋu le gbedodoɖa me, abia be wòakpɔ nublanui na mí. Yehowa ‘abɔbɔ ɖe anyi’ akpɔ míaƒe nɔnɔmea eye wòaɖo to míaƒe gbedodoɖawo. Hakpala si gbɔgbɔ ʋã gblɔ bena: “Yehowa ƒe ŋkuwo le ame dzɔdzɔewo ŋu, eye eƒe towo le woƒe ɣlidodo ŋu.” (Psalmo 34:16) Ðe meʋã wò dzi be nàde ŋugble tso Yehowa ƒe nɔnɔme lédziname si nye ɖokuibɔbɔ ŋu oa?

[Nɔnɔmetata si le axa 30]

Abe alesi Yehowa se Dawid ƒe gbedodoɖawoe ene la, elɔ̃na faa be yease míaƒe gbedodoɖawo hã egbea