“Edzɔ Dzi Nam Ŋutɔ be Mexɔ Hehe Sia”

SƆHƐ aɖe si woyɔna be Kazuna ƒe nu ku esime eƒe nufiala gblɔ nɛ be wòanɔ sukua teƒe akpɔ gome le dodokpɔ aɖe si me wòaƒo dutoƒonuƒo aɖe le Eŋlisigbe me. Sekɛndrisuku siwo katã le Hokkaido-ƒukpo si le Japan ƒe dziehe dzi la kpɔa gome le dodokpɔ sia me, gake suku si me Kazuna le ya meɖo sukuvi aɖeke ɖa wòva wɔ dodokpɔ sia kpɔ o. Le ŋkeke si dzi woawɔ dodokpɔa la, Kazuna nɔ vɔvɔ̃m elabena sukuvi bubu 50 ye wòyina dodokpɔa wɔ ge kplii. Esi wòkpɔ be ʋɔnudrɔ̃la eve siwo nye Eŋlisiawo ŋkumee yele nuƒoa ƒo ge le la, ema na vɔvɔ̃ gaɖoe ɖe edzi wu.

Woyɔ amesiwo ɖu dzi le dodokpɔa me la tso amesi xɔ nunana suetɔ la dzi. Esi wova yɔ ame mamlɛtɔ Kazuna be eyae xɔ nunana gãtɔ la, eƒe nu ku. Ewɔ mo yaa na eya kple eƒe nufiala si nɔ anyi ɖe egbɔ la ale be wotrɔ kpɔ wo nɔewo ƒe ŋkume dũ. Nua ganɔ mo yaa wɔm na Kazuna kokoko esi wòzɔ yi nuƒolanɔƒea va xɔ eƒe nunanaa—si nye nunana gãtɔ kekeake!

Kazuna ɖe nu me dzidzɔtɔe be: “Hehe si Yehowa ƒe habɔbɔa nam to Teokrasi Subɔsubɔ Sukua dzi lae na mete ŋu xɔ nunana sia. Edzɔ dzi nam ŋutɔ be mexɔ hehe sia.” Suku sia si me Kazuna dze gomekpɔkpɔ le tso esime wònye ɖevi sue la nye kpekpe siwo Yehowa Ðasefowo wɔna dometɔ ɖeka. Kazuna dzra ɖo ɖe dodokpɔa ŋu esime wògbugbɔ ŋku lé nyuie ɖe alesi wòazã nuƒomɔ̃a, alesi wòaƒo nu kple dzonɔameme kpakple vividoɖeameŋu, alesi wòazã ŋutinuwo, alesi wòana kadodo nanɔ woa kple eƒe nyaselawo dome, kple nu bubu siwo wofiana le Teokrasi Subɔsubɔ Sukua ŋu.

Taflatse miele kpewòm be nàva akpɔ alesi wowɔa suku siae le Yehowa Ðasefowo ƒe Fiaɖuƒe Akpata si le mia gbɔ mee ɖa. Yi ne wò ŋutɔ nàkpɔ alesi wòɖea vi na ɖeviwo kple tsitsiawo siaae ɖa. Amesiame ate ŋu ayi kpekpea faa. Ne èdi be yeanya suku sia dometɔ si te ɖe wò aƒeme ŋu wu la, ke taflatse bia Yehowa Ðasefo siwo le miaƒe nutoa me.