Mawu Xɔlɔ̃wo Le “Xɔlɔ̃ƒukpowo” Dzi

Le ƒe 1932 me la, meli aɖe he nuku xɔasi aɖewo va Tonga. Melikulaa tsɔ agbalẽvi si nye “Where are the Dead?” (Afikae Ame Kukuwo Le?) na Charles Vete. Charles xɔe se be yeke ɖe nyateƒea ŋu. Le ɣeyiɣi aɖe megbe la, Charles bia Yehowa Ðasefowo ƒe dɔwɔƒegã be yeaɖe agbalẽvia gɔme ɖe yewo degbe me eye wolɔ̃ ɖe edzi nɛ. Esi wòɖe egɔme vɔ la, wota agbalẽvi sia 1,000 ɖo ɖee ale be wòdze wo mama gɔme. Aleae wodze Yehowa ƒe Fiaɖuƒe ŋuti nyateƒea ƒe kuwo wuwu gɔmee le Tonga fiaɖuƒea me.

TONGA le Anyiehe Pacifik ƒe ɣedzeƒe. Eƒe ƒukpo si lolo wu lae nye Tongatapu, eye edidi tso Auckland si le New Zealand ƒe dziehe gome abe kilometa 2,000 ene. Ƒukpo 171 ye le Tonga, eye ame le wo dometɔ 45 dzi. Ƒe alafa 18 lia me Britaintɔ anyigbayeyedila xɔŋkɔ James Cook yɔ ƒukpo suesue siawo siwo sa ɖe aga la be “Xɔlɔ̃ƒukpowo.”

Ƒukpowo ƒe ƒuƒoƒo etɔ̃ ye le Tonga si me amesiwo ade 106,000 le, eye wo dometɔ gãtɔwoe nye Tongatapu, Ha’apai, kple Vava’u. Yehowa Ðasefowo ƒe hame atɔ̃ siwo le afima la dometɔ etɔ̃ le Tongatapu si amewo sɔ gbɔ ɖo wu, ɖeka le Ha’apai eye mamlɛa le Vava’u. Yehowa Ðasefowo ɖo dutanyanyuigblɔlawo ƒe aƒe kple gbegɔmeɖedɔwɔƒe aɖe ɖe teƒe aɖe si tsɔ ɖe Nuku’alofa, si nye fiadua, ŋu be woakpe ɖe amewo ŋu woava zu Mawu xɔlɔ̃wo.—Yesaya 41:8.

Amewo nya Charles Vete nyuie tso ƒe 1930-ƒeawo me ke be enye Yehowa Ðasefo, evɔ ƒe 1964 me hafi wòxɔ nyɔnyrɔ. Ame bubuwo va kpe ɖe eŋu le gbeƒãɖeɖedɔa me, eye le ƒe 1966 me la, wotu Fiaɖuƒe Akpata aɖe si me ame 30 ate ŋu anɔ. Le ƒe 1970 me la, woɖo hame aɖe si me Fiaɖuƒegbeƒãɖela 20 nɔ le Nuku’alofa.

Tso ɣemaɣi ke la, edze ƒã be nyagblɔɖila Yesaya ƒe nyawo le eme vam kɔte le Tonga ƒukpoawo dzi be: “Woade bubu Yehowa ŋu, eye woaɖe gbeƒã eƒe kafukafu le ƒukpowo dzi!” (Yesaya 42:12) Fiaɖuƒedɔa le ku tsem, eye ena ame  geɖe va le tetem ɖe Yehowa ŋu. Le nutome gã takpekpe si wowɔ le Nuku’alofa le ƒe 2003 me la, ame gbogbotɔ siwo va la ƒe xexlẽme nɔ 407 eye ame 5 xɔ nyɔnyrɔ. Ame 621 siwo de Ŋkuɖodzia le ƒe 2004 me la fia be dzidziɖedzi geɖe gale ŋgɔ.

Agbe Tsɛ Nɔnɔ

Ke hã le nuto siwo didi tso fiadua ŋu me la, Fiaɖuƒegbeƒãɖelawo ƒe hiahiã gã aɖe gali kokoko. Le kpɔɖeŋu me, ehiã be ame 8,500 siwo le Ha’apai ƒukpo 16-awo dzi la nase nu geɖe tso Biblia me nyateƒea ŋu. Ha’apai ƒukpowo ƒe akpa gãtɔ le bali me, detiwo bɔ ɖe wo dzi eye ke ɣiwo le woƒe ƒuta siwo didi la. Atsiaƒu me tsi si le afima la me kɔ nyuie wòɖe dzesi, eye zi geɖe la, àte ŋu akpɔ nusi le tsi gɔme wu meta 30 gɔ̃ hã. Tsiƒuƒu le adzakpowo kple tɔmelã siwo nɔa amadede vovovo me ƒe hatsotso siwo wu alafa ɖeka dome la doa dzidzɔ na ame ale gbegbe. Zi geɖe la, kɔƒeawo nɔa sue. Togbɔ be menye aƒe gãwo mee wole o hã la, wotu xɔawo ale be wote ŋu nɔa te ɖe ahomya siwo tuna le anyigba xɔdzowo dzi la nu.

Breadfruit (arbre à pain) kple mangoti naa vɔvɔli ameawo eye woƒe kutsetse nye nuɖuɖu na wo hã. Nuɖuɖu didi kple eɖaɖa xɔa ɣeyiɣi geɖe le ŋkekea me. Hekpe ɖe halã ŋu la, ƒukpodzinɔla siawo ɖea lãwo hã le atsiaƒu me. Abɔ siwo ƒomea wɔna naa wokpɔa nuɖuɖu siwo ɖona ɖe to me kple detsiƒonuwo. Aŋutitiwo ŋutɔ miena; eye netiwo kple akɔɖutiwo bɔ ɖe afima. Amesiwo nya alesi woazã gbewo, atiwo ƒe aŋgba, tsro kple ke atsɔ ada dɔe la fianae woƒe dzidzimeviwo.

Ke hã, nu nyuitɔ kekeake si le Ha’apai ƒukpoawo dzi lae nye eƒe ame siwo wɔa amedzro, siwo tomefafa teƒewo nɔnɔ ma. Ame aɖeke media nu gã le afisia o. Nyɔnu akpa gãtɔ wɔa aɖaŋudɔwo—wolɔ̃a kusi, avɔ aɖe si wotsɔa ka siwo woɖe le atiwo ƒe tsro me lɔ̃na si woyɔna be tapa, kple abawo. Ne Tonga nyɔnuwo le dɔ wɔm la, wonɔa anyi ɖekae nɔa dze ɖom, nɔa ha dzim, henɔa nu kom le ati aɖe ƒe vɔvɔli te, eye zi geɖe la, àkpɔ ɖevi kple vidzĩ aɖewo siwo le fefem alo le alɔ̃ dɔm le afima lɔƒo. Nyɔnuwo koŋ ye dia lãwo abe abɔbɔ, fɔlĩ, agalã kpakple tɔmelã bubu siwo woɖuna, kpakple tsi me numiemie ɖuɖu siwo wotsɔ wɔa salad vivi aɖee la ne ƒua mie.

Ŋutsu akpa gãtɔ wɔa dɔ le abɔ me, yia lãɖeƒe, kpaa atidzinuwo, kpaa akro, alo dzraa woƒe ɖɔwo ɖo. Ŋutsuwo, nyɔnuwo, kple ɖeviwo nɔa meli sue siwo wotsɔ ɖea lãe me heva kpɔa woƒe ƒometɔ siwo le ƒukpo bubuwo dzi la ɖa, be woayi kɔdzi, aƒle nu alo adzra nu.

Teƒe Aɖeke Medidi Akpa na Nyanyuia O

Dziɖeɖi ƒe nɔnɔme sia mee nutoa me tɔwo nɔ hafi dutanyanyuigblɔla eve kple mɔɖela eve aɖewo va ɖo le Ŋkuɖodzia ɖuɣi le ƒe 2002 me. Nutoa me tɔ aɖewo do go nɔviwo kpɔ, eye Ha’apai nɔlawo xɔ Yehowa Ðasefowo ƒe agbalẽwo, eye wonɔ Biblia srɔ̃m kple Ðasefoawo kura gɔ̃ hã.

Taɖodzinu etɔ̃e nɔ Biblia fiala ene siwo yi wo gbɔ la si: be yewoama Biblia-srɔ̃gbalẽwo, adze aƒeme Biblia-nusɔsrɔ̃wo gɔme, eye woakpe ɖetsɔlemetɔwo be woava Aƒetɔ ƒe Fiẽnuɖuɖu la ɖuƒe. Woɖo taɖodzinu etɔ̃awo katã gbɔ. Amesiwo wokpe la dometɔ 97 va Yesu ƒe ku ƒe Ŋkuɖodzia ɖuƒe. Wo dometɔ aɖewo ɖo meli siwo tame womegba o heva togbɔ be tsi nɔ dzadzam vevie  eye ya sesẽwo nɔ ƒoƒom hã. Esi yame mekɔ o ta la, wo dometɔ geɖe tsi afisi woɖu Ŋkuɖodzia le dɔ zã ma me, eye wotrɔ yi woƒe aƒewo me le ŋufɔke.

Menye dɔ bɔbɔe ye nɔ Ŋkuɖodzinuƒoa ƒola ŋu o. Dutanyanyuigblɔla si ƒo nuƒoa gblɔ be: “Mehiã be magblɔ alesi wòanye nu sesẽ be nàƒo Ŋkuɖodzinuƒo eve le gbe aɖe si mèse nyuie o me le fiẽ ɖeka me la na mi o. Àte ŋu akpɔ alesi metsi dzodzodzoe la le susu me. Gbedodoɖa kpe ɖe ŋunye lo! Meɖo ŋkui be mezã nya kple nyagbe aɖewo siwo nyemeka ɖe edzi be mesrɔ̃ kura o.”

Ðetsɔleme sia si le amewo me xoxo si nyanyuigblɔlawo tu ɖo le Ha’apai ƒukpoawo dzi la wɔe be nutoa me tɔ ŋutsu eve kple wo srɔ̃wo xɔ nyɔnyrɔ. Ŋutsuawo dometɔ ɖeka ɖe ɖetsɔleme fia ɖe Ðasefowo ƒe agbalẽwo ŋu esime wònɔ hehe xɔm be wòava zu subɔla le nutoa me sɔlemea me.

Togbɔ be hiãtɔe ŋutsu sia nye hã la, eya kple srɔ̃a wodzea agbagba godoo naa gakpekpeɖeŋu gbogbo aɖe ne woyɔ woƒe ŋkɔ be woava dzɔ nu le sɔlemehaa ƒe gadzɔdzɔɖoɖo si wowɔna ƒe sia ƒe me. Ðasefo aɖe si yi afima kpɔ la gblɔ na ŋutsua be wòaʋu Timoteo I, 5:8 le eƒe Biblia me ne wòaxlẽe. Apostolo Paulo ŋlɔ le afima be: “Ne ame aɖe melé be na ye ŋutɔ tɔwo o, eye vevietɔ na ye ŋutɔ ƒe aƒemetɔwo o la, egbe xɔse la, eye wòvɔ̃ɖi wu dzimaxɔsetɔ.” Biblia me gɔmeɖose sia wɔ dɔ ɖe ŋutsua ƒe dzi dzi. Ekpɔe dze sii be esi yele ga gbogbo si sɔlemea biana tso ye si nam ta la, yemete ŋu le yeƒe ƒomea ƒe nuhiahiã veviwo gbɔ kpɔm nɛ o. Le gadzɔdzɔ si wogawɔ le ƒe si kplɔe ɖo me la, ga nɔ kotoku me nɛ, gake mete ŋu ŋlɔ nya siwo le Timoteo I, 5:8 la be o. Esi woyɔ eŋkɔ la, egblɔ na nunɔlaa dzideƒotɔe be yeƒe ƒomea ƒe nuhiahiãwo le vevie na ye wu. Esia wɔe be woɖu fewu le ŋutsu sia kple srɔ̃a ŋu le hadome eye sɔlemea ƒe ŋgɔnɔlawo nyra ɖe wo dzi.

Esi ŋutsu sia kple srɔ̃a srɔ̃ Biblia kple Yehowa Ðasefowo megbe la, wova zu nyanyuigbeƒãɖelawo. Ŋutsua gblɔ be: “Biblia me nyateƒea trɔ nye agbenɔnɔ. Nyemegasẽa ŋuta hewɔa ŋlɔmi le nye ƒomea ŋu o. Nyemeganoa aha fũ o. Míaƒe kɔƒea me tɔwo ate ŋu akpɔ tɔtrɔ siwo nyateƒea na mewɔ le nye agbe me. Mele mɔ kpɔm be woawo hã woava lɔ̃ nyateƒea abe alesi melɔ̃e ene.”

Quest si Wozã Tsɔ Di Ameawoe

Ɣleti ʋɛ aɖewo le ƒe 2002 Ŋkuɖodzia ɖuɖu megbe la, meli bubu he nu vevi aɖewo va Ha’apai si sa ɖe aga la. Modzakaɖetɔdziʋu aɖe si didi meta 18 si wotsɔ ŋkɔ na be Quest si tso New Zealand la di mɔ va ɖo Tonga ƒukpowo dzi. Amesiwo nɔ eme lae nye Gary kple Hetty, kpakple wo vinyɔnuvi Katie. Tonga nɔvi asieke kple dutanyanyuigblɔla eve kplɔ wo ɖo le ʋudzimɔzɔzɔ eve me. Ðasefo siwo le nutoa me kpe ɖe wo ŋu woku tɔdziʋua aɖaŋutɔe, eye ɣeaɖewoɣi la, wotoa teƒe aɖewo siwo kpo le siwo wometo kpɔ o. Menye dzidzɔdonameɖokui tsaɖiɖie esiawo nye o. Biblia me nyateƒea fiafia tae amesiwo le eme la va ɖo. Wokpe atsiaƒu ƒe teƒe gã aɖe aɖe ɖo le ƒukpo 14 dzi. Womeɖe gbeƒã Fiaɖuƒe ŋuti nyanyuia le ƒukpo mawo dometɔ aɖewo dzi kpɔ o.

Aleke amewo xɔ nya lae? Zi geɖe la, nutoa me tɔwo dina vevie be yewoanya nusitae wova ɖo, eye woɖe vividoɖeameŋu kple amedzrowɔwɔ si nye numame na wo la fia nɔviawo. Ne ƒukpodzinɔlaawo nya se nusitae wova ɖo ko la,  wodaa akpe kakaka ɖe eta. Ðasefo siwo yi afima la kpɔe kɔte be ƒukpoawo dzi nɔlawo dea bubu Mawu ƒe Nya la ŋu eye wotsi dzi ɖe woƒe gbɔgbɔmenuhiahiãwo ŋu.—Mateo 5:3

Enuenu la, amedzroawo nɔa anyi ɖe avemetiwo te eye ame geɖe ƒoa xlã wo henɔa nya geɖe biam wo le Ŋɔŋlɔawo ŋu. Ne zã do la, ekema woyia Biblia me dzeɖoɖoawo dzi le aƒewo me. Ƒukpoawo dometɔ ɖeka dzi tɔwo ɖe kuku na Ðasefo siwo nɔ dzodzom la be: “Migadzo o! Elabena ne miedzo ɖe, amekae aɖo míaƒe biabiawo ŋu na mí?” Ðasefo aɖe gblɔ be: “Esesẽna ɣesiaɣi be nàdzo le ame geɖe siawo siwo si alẽ ƒe nɔnɔme le eye nyateƒea ƒe dɔ le wo wum la gbɔ. Míeƒã nyateƒea ƒe ku geɖe.” Esime Quest la va ɖo ƒukpo aɖe dzi la, Ðasefoawo de dzesii be amesiame le funyivɔ me. Dumegãa srɔ̃ ku koe nye ema wova ɖo. Eda akpe na nɔviawo be wotsɔ Biblia me gbedasi fakɔname aɖe vɛ na ye.

Ƒukpo aɖewo gbɔ ɖoɖo mele bɔbɔe o. Hetty ɖe nu me be: “Le ƒukpo aɖe dzi la, ƒuta nyui aɖeke meli si woadze ɖo o, negbe kpe aɖewo siwo kɔkɔ siwo dzɔ abe meta ɖeka kple edzivɔ ene koe le atsiaƒua me. Míaƒe tɔdziʋu sue si wotsɔ rɔba wɔe la koe ate ŋu ayi afima. Gbã la, ele be míada míaƒe akplowo ɖo ɖe ame geɖe siwo le ƒua ta siwo di be yewoakpe ɖe mía ŋu la. Azɔ ne tɔdziʋu suea gogo kpeawo la, ele be míadzo ayi kpeawo tame hafi atsiaƒua nagahee dzoe yi tsia me.”

Gake menye amesiwo katã nɔ tɔdziʋua me lae nye ƒudzidelawo o. Le ƒudzinɔnɔ kwasiɖa eve megbe la, ʋumefia la ŋlɔ ku ɖe woƒe tɔtrɔ ayi ƒukpo gãtɔ si nye Tongatapu dzi ŋu be: “Ele be míagaku tɔdziʋua ato tsia dzi gaƒoƒo 18. Míetɔ ɖe mɔ dzi hafi va ɖo le amesiwo ƒua dzi nɔnɔ na wolé dɔ ta. Edzɔ dzi na mí be míeɖo ta aƒe, gake ewɔ nublanui hã na mí be míedzo le ame gbogbo mawo siwo se Fiaɖuƒegbedasia gbɔ. Míegblẽ wo ɖe Yehowa si me, be eƒe gbɔgbɔ kɔkɔea kple mawudɔlawo nakpe ɖe wo ŋu woayi ŋgɔ le gbɔgbɔ me.”

Woate Ŋu Akpɔ Mɔ na Nu Nyui Geɖe tso Ƒukpo Mawo Dzi

Ɣleti ade aɖewo le Quest la ƒe dzodzo megbe la, wode dɔ asi na mɔɖela vevi eve siwo nye Stephen kple Malaki be woaɖe gbeƒã le Ha’apai ƒukpoawo dzi. Wova kpe ɖe ŋutsu eve kple wo srɔ̃ siwo xɔ nyɔnyrɔ nyitsɔ laa le afima ŋu wofia Biblia amewo. Wole numedzodzro viviwo wɔm tso nufiafia veviwo ŋu, eye gbeƒãɖelaawo le Biblia zãm nyuie.

Le December 1, 2003 dzi la, woɖo hame ɖe Haʹapai, si nye atɔ̃lia le Tonga. Ðevi geɖe le amesiwo dea kpekpe le hame ma me la me. Woɖoa to nyuie le kpekpeawo me. Wonɔa anyi kpoo hedina vevie be yewoaɖo nya ŋu. Nutome sue dzikpɔla de dzesii be “alesi gbegbe wonya Nye Agbalẽ Si Nye Biblia-Ŋutinyawo me nyawoe la ɖee fia be wo dzilawo tsɔ agbanɔamedzi si le wo dzi be woaƒã Biblia ƒe nyateƒea ɖe wo viwo me la nu vevii.” Eme kɔ ƒã be míate ŋu anɔ mɔ kpɔm be Yehowa xɔlɔ̃ geɖe wu ado tso nuŋeŋe sia si le dzidzim ɖe edzi la me.

Esi Charles Vete ɖe agbalẽvi si nye Where Are the Dead? gɔme ɖe wo degbe Tongan me ƒe 70 kple edzivɔe nye esi va yi la, menya kura be Fiaɖuƒenukua ava wɔ dɔ ɖe yeƒe dukɔa me tɔwo dzi o. Tso gɔmedzedze nyaŋui ma dzi la, Yehowa yi edzi le nyanyui gbeƒãɖeɖedɔ si le ta kekem ɖe edzi ɖaa la yram le míaƒe anyigba la ƒe teƒe saɖeaga ma. Míate ŋu agblɔe kakaɖedzitɔe egbea be Tonga le ƒukpo saɖeaga siwo le tɔtrɔm ɖe Yehowa ŋu le kpɔɖeŋunyagbɔgblɔ nu la dome. (Psalmo 97:1; Yesaya 51:5) Yehowa xɔlɔ̃wo va le ‘xɔlɔ̃ƒukpo’ siawo dzi fifia.

[Nɔnɔmetata si le axa 8]

Charles Vete, 1983

[Nɔnɔmetata si le axa 9]

Wole avɔ si woyɔna be “tapa” lɔ̃m

[Nɔnɔmetata si le axa 10]

Wozã “Quest” la tsɔ kaka nyanyuia le Tonga

[Nɔnɔmetata si le axa 11]

Gbegɔmeɖeƒuƒoƒo si le Nukuʹalofa

[Picture Credit Lines on page 9]

Tapa vɔ lɔlɔ̃: © Jack Fields/CORBIS; nɔnɔmetata siwo ƒo xlã nuŋɔŋlɔawo le axa 8 kple 9, kple lãɖeɖe: © Fred J. Eckert