Afrikatɔ Ðokuibɔbɔla Aɖe De Asixɔxɔ Mawu ƒe Nya Ŋu

EWƆA nuku na tsaɖila siwo yia Afrika zi geɖe be Biblia me dzeɖoɖowo gɔmedzedze kple afimatɔwo nɔa bɔbɔe ŋutɔ. Nyabiase aɖewo abe, “Nukae nye Mawu ƒe Fiaɖuƒe La?” alo “Ðe woate nu akpɔ nuɖuɖu ƒe veve, dɔléle, aʋawɔwɔ, kple nuvlowɔwɔ ƒe kuxiawo gbɔ keŋkeŋua?” ene la naa ame geɖe ɖoa to nyuie. Amewo tsɔa dzidzɔ ɖea mɔ faa na amesi womenya tsã o be wòatsɔ Biblia aɖo nya ŋu na yewo. Esia ʋua mɔnukpɔkpɔ ɖi zi geɖe na Biblia nusrɔsrɔ̃ wɔwɔ edziedzi. Eye ne nusrɔ̃viawo wɔ gbɔgbɔmeŋgɔyiyi la, wova zua Kristotɔ xɔnyɔnyrɔwo.

Biblia ƒo nu tso Afrikatɔ gbãtɔwo dometɔ ɖeka si wɔ nu alea ŋu le Dɔwɔwɔwo 8:26-40. Enye Etiopia-ŋutsu aɖe si zɔ mɔ yi Yerusalem be yeaɖade ta agu na Yehowa, Mawu vavã la.

Abe alesi wòdze le nɔnɔmetata si le ete me ene la, Etiopia-ŋutsua le tasiaɖam me gbɔna va aƒe, eye wònɔ agbalẽ xatsaxatsa si wòʋu ɖe asi la xlẽm. Ame manyamanya aɖe te ɖe eŋu hebiae be: “Èle nya, si xlẽm nèle la gɔme sema?” Etiopia-ŋutsua lɔ̃ ɖe edzi ɖokuibɔbɔtɔe be yehiã kpekpeɖeŋu eye wòɖe kuku na ame tutɔa, si nye Kristotɔ nyanyuigblɔla Filipo, be wòaɖo tasiaɖam la. Ebia tso Filipo si be wòaɖe Ŋɔŋlɔawo ƒe akpa si yexlẽ teti la me na ye. Filipo ɖe eme nɛ be enye nyagblɔɖi si ku ɖe Yesu Kristo, Mesia si ku eteƒe medidi o la, ŋu. Filipo gagblɔ “Yesu ŋu nyanyui la” ŋu nya bubuwo nɛ, eye ɖikeke mele eme o be agblɔ Yesu ƒe tsitretsitsi ŋu nya hã nɛ godoo.

Nyateƒenya lédziname siawo sese na be Etiopia-ŋutsua di be yeazu Yesu ƒe nusrɔ̃la eye wòbia be: ‘Nukae xe mɔ na nye nyɔnyrɔxɔxɔ mahã?’ Le eƒe nyɔnyrɔxɔxɔ megbe la, Afrikatɔ ɖokuibɔbɔla sia dze aƒe mɔ kple dzidzɔ, eye Biblia megagblɔ nya aɖeke tso eŋuti o.

Egbea, Yehowa Ðasefowo le kpekpem ɖe ame miliɔn geɖe ŋu le xexeame godo be woasrɔ̃ nu tso “nyanyui” ma ke ŋu. Wole aƒeme Biblia nusrɔsrɔ̃ femaxee wɔm kple amesiwo ade miliɔn ade fifia.