Alesi Nàwɔ Yehowa Nanye Wò Mawu

LE Biblia ŋlɔɣi la, ame aɖewo nɔ ƒomedodo kplikplikpli me kple Yehowa ale gbegbe be wogblɔ be enye woƒe Mawu. Le kpɔɖeŋu me, le Ŋɔŋlɔawo me la, woyɔ Yehowa be “Abraham ƒe Mawu,” “Dawid ƒe Mawu,” kple “Eliya ƒe Mawu.”—Mose I, 31:42; Fiawo II, 2:14; 20:5.

Aleke amesiawo dometɔ ɖesiaɖe wɔ va nɔ ƒomedodo kplikplikpli me kple Mawu? Nukae míate ŋu asrɔ̃ tso wo gbɔ ale be míawo hã míate ŋu atu mía kple Wɔla la dome ƒomedodo sẽŋu aɖe ɖo ahalée ɖe te?

Abraham Xɔ “Yehowa Dzi Se”

Abraham ye nye ame gbãtɔ si ŋu Biblia gblɔ le be exɔ Yehowa dzi se. Xɔsee nye Abraham ƒe nɔnɔme vevitɔ si na eƒe nu nyo Mawu ŋu. Le nyateƒe me la, Yehowa kpɔ ŋudzedze ɖe Abraham ŋu ale gbegbe be Wɔla la ɖe eɖokui fia Mose emegbe be yee nye “Abraham” kple via Isak kpakple tɔgbuiyɔvia Yakob “ƒe Mawu.”—Mose I, 15:6; Mose II, 3:6.

Aleke Abraham wɔ be Mawu dzixɔse sia va su esi? Gbã la, Abraham tu eƒe xɔse ɖe gɔmeɖoanyi like dzi. Anye be Noa ƒe viŋutsu Sem, amesi ŋutɔ kpɔ alesi Mawu kpɔa ame tae teƒe, ye anya fia Yehowa ƒe mɔwoe. Sem nye amesi ŋutɔ kpɔ alesi Yehowa ‘dzra Noa, dzɔdzɔenyenye ƒe gbeƒãɖela la, hekpe ɖe ame adre bubuawo ŋu ko ɖo, esime wòhe tsiɖɔɖɔ va ame mavɔ̃mawuwo ƒe xexeme dzi’ la teƒe. (Petro II, 2:5) Abraham anya srɔ̃e tso Sem gbɔ be ne Yehowa do nane ƒe ŋugbe la, evaa eme godoo. Aleke kee wòɖale o, esime Mawu do ŋugbe na Abraham ŋutɔ la, ekpɔ dzidzɔ hetu eƒe agbenɔnɔ katã ɖe sidzedze si ŋu kakaɖedzi le be ŋugbedodo ma ava eme la dzi.

Esi gɔmeɖoanyi like nɔ Abraham si ta la, dɔwɔwɔwo na eƒe xɔse me gasẽ ɖe edzi. Apostolo Paulo ŋlɔ bena: “Le xɔse me Abraham ɖo to, esime woyɔe be, wòado go ayi ɖe afisi wòava xɔ wòanye eƒe domenyinyi la, eye wòdo go; gake menya afisi yim wòle o.” (Hebritɔwo 11:8) Toɖoɖo ƒe nuwɔna ma hã na be Abraham ƒe xɔsea de to ɖe edzi, si ŋuti nusrɔ̃la Yakobo ŋlɔ le be: “Èkpɔ bena, xɔse wɔ dɔ kpe ɖe eƒe dɔwɔwɔwo ŋu, eye wotsɔ dɔwɔwɔwo wɔ xɔse la blibo.”—Yakobo 2:22.

Gawu la, Yehowa ɖe mɔ wodo Abraham ƒe xɔse kpɔ, si na be wògasẽ ŋu ɖe edzi. Paulo yi edzi gblɔ be: “Le xɔse me Abraham tsɔ Isak na, esime wotee kpɔ, eye eya, amesi  xɔ ŋugbedodo la, tsɔ eƒe tenuvi na.” Dodokpɔ dzraa xɔse ɖo henaa eme sẽna ɖe edzi, ale be ‘wòxɔa asi geɖe wu sika.’—Hebritɔwo 11:17; Petro I, 1:7.

Togbɔ be Abraham menɔ agbe kpɔ nusiwo katã ƒe ŋugbe Mawu do la ƒe mevava o hã la, edzɔ dzi nɛ be wòkpɔ be ame bubuwo dze yeƒe kpɔɖeŋua yome. Woƒo nu tso srɔ̃a, Sara, kple eƒe ƒomea me tɔ etɔ̃ bubuwo—siwo nye Isak, Yakob, kple Yosef—hã ƒe xɔse ɖedzesi ŋu le Biblia me.—Hebritɔwo 11:11, 20-22.

Abraham ƒe Xɔse Tɔgbe Egbea

Ele vevie be xɔse nanɔ amesiame si di be Yehowa nanye yeƒe Mawu la si. Paulo ŋlɔ bena: “Ne xɔse mele mía si o la, míate ŋu adze Mawu ŋu o.” (Hebritɔwo 11:6) Aleke Mawu subɔla awɔ atu Abraham ƒe xɔse sẽŋu la tɔgbe ɖo?

Abe alesi wònɔ le Abraham gome ene la, ele be míatu míaƒe xɔse ɖe gɔmeɖoanyi like dzi. Míate ŋu awɔ esia nyuie to Biblia kple Biblia-srɔ̃gbalẽwo sɔsrɔ̃ edziedzi dzi. Biblia xexlẽ kple ŋugbledede le nusi míexlẽ ŋu ate ŋu ana míaka ɖe edzi be Mawu ƒe ŋugbedodowo ava eme. Ekema aʋã mí be míatrɔ míaƒe agbenɔnɔ ɖe mɔkpɔkpɔ ma si ŋu kakaɖedzi le la ŋu. Toɖoɖo, si me gomekpɔkpɔ le gaglãgbe subɔsubɔdɔa me kple Kristotɔwo ƒe kpekpewo dede hã le, nye nusi doa ŋusẽ míaƒe xɔse.—Mateo 24:14; 28:19, 20; Hebritɔwo 10:24, 25.

Woado míaƒe xɔse akpɔ godoo eye ɖewohĩ tsitretsiɖeŋu, dɔdzedze sesẽ, míaƒe ame vevi aɖe ƒe ku, alo nu bubu aɖe adoe akpɔ. Nuteƒewɔwɔ me léle ɖe asi na Yehowa le dodokpɔwo me naa míaƒe xɔse ganyona ɖe edzi eye wònana wòxɔa asi wu sika. Míeɖanɔ agbe kpɔ Mawu ƒe ŋugbedodowo ƒe mevava loo alo míeɖakpɔe o, míaƒe xɔse ate mí ɖe Yehowa ŋu wu. Gawu la, míaƒe kpɔɖeŋu ade dzi ƒo na ame bubuwo be woasrɔ̃ míaƒe xɔse. (Hebritɔwo 13:7) Aleae wònɔ le Ralph, amesi de dzesi be xɔse nɔ ye dzilawo si eye wòsrɔ̃e la, gome. Eɖe nu me be:

“Esi menɔ dzinyelawo gbɔ la, wode dzi ƒo na ƒome bliboa be míafɔ ŋdi kanyaa bene míate ŋu axlẽ Biblia ɖekae. Míeto esia wɔwɔ me xlẽ Biblia bliboa.” Ralph gakpɔtɔ xlẽa Biblia ŋdi sia ŋdi, eye esia naa wòdzea ŋkekea gɔme nyuie. Ralph wɔa gaglãgbe subɔsubɔdɔa kple fofoa kwasiɖa ɖesiaɖe. “Ɣemaɣie mesrɔ̃ alesi wowɔa tɔtrɔyiwo hewɔa aƒeme Biblia nusɔsrɔ̃e.” Fifia Ralph nye lɔlɔ̃nu faa dɔwɔla le Yehowa Ðasefowo ƒe alɔdzedɔwɔƒewo dometɔ ɖeka le Europa. Vi nyui kae nye si edzilawo ƒe xɔsea ɖe!

Ŋutsu si Dze Yehowa Ŋu

Dawid, amesi wodzi le ƒe siwo ade 900 le Abraham megbe, nye ame ɖedzesi le Yehowa subɔla siwo woyɔ le Ŋɔŋlɔawo me la dome. Nyagblɔɖila Samuel gblɔ le alesi Yehowa tia Dawid be eyae ava nye fia le etsɔme ŋu be: ‘Yehowa adi ŋutsu, si dze eŋu, na eɖokui.’ Ƒomedodo si nɔ Yehowa kple Dawid dome la nɔ kplikplikpli ale gbegbe be nyagblɔɖila Yesaya yɔ “Yehowa” na tɔgbuiayɔvi Fia Xizkiya be “Dawid ƒe Mawu.”—Samuel I, 13:14; Fiawo II, 20:5; Yesaya 38:5.

Togbɔ be Dawid ƒe nu dze Yehowa ŋu hã la, ɣeyiɣi aɖewo tui si me wòna eƒe dzodzrowo ɖu eyama dzi. Zi etɔ̃ sɔŋue wòda vo gãwo: Ena wotsɔ nubablaɖakaa le mɔ si medze o nu esime wotsɔe yina Yerusalem; ewɔ ahasi kple  Bat-Seba hena wowu srɔ̃a, Uriya; eye ena woxlẽ Israel kple Yuda dukɔa me tɔwo le esime Yehowa mebiae tso esi be wòawɔe o. Le goawo dometɔ ɖesiaɖe me la, Dawid da le Mawu ƒe Se dzi.—Samuel II, 6:2-10; 11:2-27; 24:1-9.

Gake esime wotsɔ Dawid ƒe nuvɔ̃wo ɖo eŋkume la, elɔ̃ ɖe eƒe agɔdzedzeawo dzi eye mebu fɔ ame aɖeke ɖe wo ta o. Elɔ̃ ɖe edzi be yemewɔ ɖoɖo nyui ɖe Aɖakaa tsɔtsɔ adzoe ŋu o, hegblɔ kpee be “míebia [gbe Yehowa] se, abe alesi dze ene o.” Esi nyagblɔɖila Natan klo nu le Dawid ƒe ahasiwɔwɔa dzi la, Dawid ɖo eŋu be: “Mewɔ nuvɔ̃ ɖe Yehowa ŋu.” Eye esi wòva nya bometsinu si wònye wòwɔ be wòna woxlẽ ameawo la, elɔ̃ ɖe edzi be “mewɔ nuvɔ̃ ŋutɔ be, mewɔ nusia.” Dawid trɔ dzime le eƒe nuvɔ̃awo me heyi edzi nɔ Yehowa ŋu kplikplikpli.—Kronika I, 15:13; Samuel II, 12:13; 24:10.

Ne Míeda Vo

Dawid ƒe kpɔɖeŋua de dzi ƒo na mí ŋutɔ le míaƒe agbagbadzedze be míawɔ Yehowa míaƒe Mawui me. Ne amesi ƒe nu dze Yehowa ŋu ŋutɔ lae wɔ nuvɔ̃ gã mawo la, mele be dzi naɖe le míaƒo ne, le míaƒe agbagbadzedzewo katã megbe la, míeda vo ɣeaɖewoɣi alo wɔ nu gbegblẽ gãwo gɔ̃ hã o. (Nyagblɔla 7:20) Nyateƒe si wònye be esime Dawid trɔ dzime la, wotsɔ eƒe nuvɔ̃wo kee la ate ŋu afa akɔ na mí. Nusiae dzɔ ɖe Uwe * dzi ƒe aɖewo enye esi va yi.

Uwe nye hamemegã le Yehowa Ðasefowo ƒe hame aɖe me. Ɣeaɖeɣi la, dzodzro vɔ̃wo ɖu eyama dzi eye wònɔ agbe gbegblẽ. Gbã la, Uwe dze agbagba be yeatsyɔ nu nyaa dzi abe Dawid ene, kple mɔkpɔkpɔ be Yehowa aŋe aɖaba aƒu yeƒe dzidada la dzi. Mlɔeba la, Uwe ƒe dzitsinya va nɔ fu ɖem nɛ ale gbegbe be wòʋu nuvɔ̃ me na ehati hamemegã aɖe eye woɖe afɔwo tsɔ kpe ɖe Uwe ŋu be wòahaya tso gbɔgbɔmefɔku si wòdze la me.

Uwe trɔ dzime tso eƒe nuvɔ̃wo me henɔ Yehowa kple eƒe hamea ŋu. Ekpɔ dzidzɔ ɖe kpekpeɖeŋu si wonae la ŋu ale gbegbe be le kwasiɖa aɖewo megbe la, eŋlɔ agbalẽ na hamemegãwo tsɔ da akpee na wo tso dzi blibo me ɖe kpekpeɖeŋua ta. Eŋlɔ bena: “Míekpe ɖe ŋunye meɖe vlododo ɖa le Yehowa ƒe ŋkɔ dzi.” Uwe te ŋu lé eƒe ƒomedodo kple Yehowa la ɖe te eye le ɣeyiɣi aɖe megbe la, wogbugbɔ ɖoe subɔla le hame ma ke me.

‘Amesi Nu Vena abe Míawo Ke Ene’

Eliya, amesi nɔ anyi le ƒe alafa si kplɔ Dawid tɔ ɖo me la, nye Israel ƒe nyagblɔɖila veviawo dometɔ ɖeka. Eliya nye tadedeagu vavãtɔ taʋlila le ɣeyiɣi si me nufitifitiwɔwɔ kple agbegbegblẽnɔnɔ do agbogbo la me, eye meʋuʋu gbeɖe le Yehowa subɔsubɔ me o. Mewɔ nuku o be Elisa, amesi xɔ ɖe eteƒe la, yɔ Yehowa ɣeaɖeɣi be “Eliya ƒe Mawu”!—Fiawo II, 2:14.

Ke hã, amegbetɔ koe Eliya nye. Yakobo ŋlɔ bena: “Eliya nye ame, eye nu venɛ abe míawo ene.” (Yakobo 5:17) Le kpɔɖeŋu me, esi wòɖu Baal subɔlawo dzi vevie le Israel la, fianyɔnu Izebel do ŋɔdzi nɛ be yeawui. Aleke wòwɔ nui? Vɔvɔ̃ ɖoe eye wòsi yi gbedzi. Esi Eliya yi ɖanɔ dzoŋgbalẽti aɖe te le gbeadzi la, efa konyi be: “Esɔ gbɔ! Azɔ, Yehowa, xɔ nye luʋɔ, elabena nyemenyo wu fofonyewo o.” Eliya megadi be yeanye nyagblɔɖila o ke edzroe be yeaku boŋ.—Fiawo I, 19:4.

Gake Yehowa ɖee fia be yese Eliya ƒe seselelãmeawo gɔme. Mawu do ŋusẽ Eliya hegbugbɔ kakaɖedzi nae be metsi akogo o, elabena ame bubuwo hã li siwo lé tadedeagu vavã me ɖe asi nuteƒewɔwɔtɔe. Gawu la, Yehowa gakpɔtɔ ka ɖe Eliya dzi hede dɔ asi nɛ.—Fiawo I, 19:5-18.

Eliya ƒe makemakeɖuɖua mefia be eƒe nu megadze Mawu ŋu o. Esime Kristo Yesu ƒe nɔnɔme trɔ le Petro, Yakobo, kple Yohanes ŋkume le ƒe si ade 1,000 megbe la, amekawoe Yehowa tia be woadze le ŋutegaa me akpe ɖe Yesu ŋu? Mose kple Eliyae. (Mateo 17:1-9) Edze ƒã be Yehowa bu Eliya be enye  nyagblɔɖila kpɔɖeŋunyuiɖola. Togbɔ be Eliya nye ‘amesi nu vena abe míawo ke ene’ hã la, Mawu kpɔ ŋudzedze ɖe dɔ sesẽ si wòwɔ le tadedeagu dzadzɛ gbugbɔgaɖoanyi kple Eŋkɔ ŋuti kɔkɔ me ŋu.

Fu si Míaƒe Seselelãme Wɔa Mí

Dzi aɖe le Yehowa subɔla siwo li egbea la ƒo alo woatsi dzodzodzoe ɣeaɖewoɣi. Akɔfaname kae nye si wònye be míanya be Eliya hã se le eɖokui me nenema tututu! Eye aleke kakaɖedzi gasua mía si enye si be alesi ko Yehowa se Eliya ƒe seselelãmewo gɔmee la, nenema kee Wòsea fu si míaƒe seselelãme wɔa mí la hã gɔmee.—Psalmo 103:14.

Le go aɖe me la, míelɔ̃ Yehowa kpakple mía havi eye míedina be míawɔ Yehowa ƒe dɔ si nye gbeƒãɖeɖe Fiaɖuƒenyanyuia. Le go bubu me la, alesi womele ɖeke tsɔm le gbeƒã si ɖem míele me o ate ŋu ate ɖe mía dzi alo atsi dzodzodzoe le amesiwo lé fu tadedeagu vavã ƒe ŋɔdzidonamewo ta. Gake abe alesi ko Yehowa bla ali dzi na Eliya wòyi dɔa dzii la, nenema kee wòblaa ali dzi na esubɔlawo egbea hã. Le kpɔɖeŋu me, se Herbert kple Gertrud ƒe nya sia ɖa.

Herbert kple Gertrud nye Yehowa Ðasefo siwo xɔ nyɔnyrɔ le Leipzig, German Democratic Republic si nɔ anyi va yi, le ƒe 1952 me. Nuwo sesẽ na Mawu subɔlawo ɣemaɣi, elabena woɖo asi woƒe dutoƒosubɔsubɔdɔa dzi. Aleke Herbert se le eɖokui me le gbeƒãɖeɖe tso aƒeme yi aƒeme ŋu?

“Míetsi dzodzodzoe ɣeaɖewoɣi. Ne míele tso aƒeme yi aƒeme dɔa wɔm la, míenyana ne kpovitɔwo ado ɖe mía dzi kpoyi alé mí o.” Nukae kpe ɖe Herbert kple ame bubuwo ŋu be woɖu vɔvɔ̃ ma dzi? “Míesrɔ̃ Biblia le mía ɖokui si nyuie. Eye Yehowa do ŋusẽ mí be míeyi míaƒe gbeƒãɖeɖedɔa dzi.” Nanewo dzɔ ɖe Herbert dzi le eƒe dutoƒosubɔsubɔdɔa wɔwɔ me siwo do ŋusẽe—heɖi kokoe nɛ gɔ̃ hã.

Herbert ke ɖe nyɔnu aɖe si nɔ eƒe ƒe 40 kple ƒe 60 domee, si tsɔ ɖe le Biblia me, ŋu. Esi Herbert gatrɔ yi egbɔ le ŋkeke aɖewo megbe la, ɖekakpui aɖe nɔ aƒea me hese dzeɖoɖoa. Le miniti ʋɛ aɖewo megbe la, Herbert ƒe ŋku kli nane si tso dzika ƒo nɛ. Kpovitɔwo ƒe kuku nɔ zikpui dzi le xɔa ƒe dzogoe aɖe me. Ðekakpuia, si nye kpovitɔ si ɖoe kplikpaa be yealé Herbert la, tɔe.

Ðekakpuia blu bena: “Yehowa Ðasefoe nènye! Na makpɔ wò mɔɖegbalẽvi ɖa.” Herbert ɖe eƒe mɔɖegbalẽvia de esi. Emegbe nu truka aɖe dzɔ. Nyɔnua trɔ ɖe kpovitɔa ŋu hexlɔ̃ nui be: “Ne nane dzɔ ɖe Mawu ƒe ame sia dzi la, wò afɔ megaɖo aƒe sia me azɔ o.”

Ðekakpui la tɔ sẽ, gbugbɔ mɔɖegbalẽvia na Herbert, eye megaxa lée o. Herbert se emegbe be kpovitɔa ƒe ŋugbetɔe nye nyɔnua ƒe vinyɔnu. Edze ƒã be ekpɔ be anyo na ye be ye kple nyɔnuvia yewoakpɔtɔ anɔ ŋugbedodo me tsɔ wu be yeade Herbert asi.

Wɔ Yehowa Wò Mawui

Nukae míate ŋu asrɔ̃ tso nudzɔdzɔ siawo me? Abe Abraham ene la, ele be míaxɔ Yehowa ƒe ŋugbedodowo dzi ase bliboe. Abe Dawid ene la, ele be míatrɔ ɖe Yehowa ŋu aɖe dzimetɔtrɔ vavãtɔ afia ɣesiaɣi si míada vo. Eye abe Eliya ene la, ehiã be míaɖo ŋu ɖe Yehowa ŋu bene wòado ŋusẽ mí ne míetsi dzimaɖi. Ne míewɔe alea la, míate ŋu awɔ Yehowa míaƒe Mawui fifia yi ɖe mavɔmavɔ me, elabena enye “Mawu gbagbe, si nye amewo katã xɔla, vevietɔ xɔsetɔwo.”—Timoteo I, 4:10.

[Etenuŋɔŋlɔ]

[Nɔnɔmetata siwo le axa 25]

Toɖoɖo nuwɔnawo na be Abraham ƒe xɔse de to ɖe edzi

[Nɔnɔmetata si le axa 26]

Abe Dawid ene la, ele be míatrɔ dzime ne míewɔ nuvɔ̃

[Nɔnɔmetata si le axa 28]

Alesi Yehowa se Eliya ƒe seselelãmewo gɔmee la, nenemae wòsea mía tɔ hã gɔmee