Ðe Wò Xɔse Ʋãa Wò Nèɖea Afɔ si Sɔa?

KAKAÐEDZI nɔ aʋafia la si be Yesu ate ŋu ada yeƒe subɔvi ƒe lãmetutudɔ nɛ. Gake aʋafia la mekpe Yesu va eƒe aƒeme o, ɖewohĩ le esi wòbui be yemedze o alo le esi wònye Trɔ̃subɔdukɔmetɔ ta. Aʋafia la dɔ Yudatɔwo ƒe amegã aɖewo boŋ ɖe Yesu gbɔ be woagblɔ nɛ be: “Aƒetɔ, medzem be, nava ge ɖe nye xɔ te o; ke gblɔ nya ɖeka ko, eye nye dɔtsɔla ƒe lãme asẽ.” Esi Yesu dze sii be aʋafia la xɔe se be yeate ŋu ada dɔ na amesi le adzɔ ge tso ye gbɔ gɔ̃ hã la, egblɔ na ameha siwo nɔ eyome bena: “Vavã mele egblɔm na mi bena: Le Israel me hã la nyemekpɔ nenem dzixɔse sia tɔgbe kpɔ o.”—Mateo 8:5-10; Luka 7:1-10.

Nudzɔdzɔ sia ate ŋu akpe ɖe mía ŋu míalé ŋku ɖe nu vevi aɖe si xɔse bia la ŋu etɔxɛe. Xɔse vavã menye nane dzi xɔxɔ ase dzro ko o; ele be dɔwɔwɔwo nakpe ɖe eŋu. Biblia ŋlɔla Yakobo ɖe eme be: ‘Xɔse, ne dɔwɔwɔwo mele eŋu o la, enye nu kuku le eɖokui me.’ (Yakobo 2:17) Esia ƒe nyateƒenyenye gadze ƒã wu gɔ̃ hã ne míede ŋugble le nusi ate ŋu adzɔ ne womewɔ xɔse ŋudɔ o ƒe kpɔɖeŋu ŋutɔŋutɔ aɖe ŋu.

Le ƒe 1513 D.M.Ŋ. me la, Israel-dukɔa wɔ ɖeka kple Yehowa Mawu to Se ƒe nubabla la dzi. Mose gblɔ nubabla me nya si Mawu tsɔ to eyama dzi la na Israel-viwo bena: “Ne  miaɖo to nye gbe, eye mialé nye nubabla me ɖe asi la, ekema mianye . . . dukɔ kɔkɔe.” (Mose II, 19:3-6) Nyateƒee, Israel-viwo ƒe kɔkɔenyenye nɔ te ɖe toɖoɖo dzi.

Le ƒe alafa geɖewo megbe la, Yudatɔwo dze egɔme nɔ asixɔxɔ geɖe dem Sea sɔsrɔ̃ ŋu tsɔ wu eƒe gɔmeɖosewo dzi wɔwɔ. Alfred Edersheim ŋlɔ ɖe eƒe agbalẽ si nye The Life and Times of Jesus the Messiah me be: “[Rabiawo]—amesiwo nye ‘ame xɔŋkɔwo le xexeame’ gblɔe ɖi xoxoxo be nusɔsrɔ̃ le vevie wu dɔwɔwɔwo.”

Enye nyateƒe be wode se na blema Israel-viwo be woasrɔ̃ Mawu ƒe sewo moveviɖoɖotɔe. Mawu ŋutɔ gblɔ be: “Nya, siwo megblɔ na wò egbe la, natsi dzi me na wò. Ku wo ɖe to me na viwòwo, eye naƒo nu le wo ŋu, ne èbɔbɔ nɔ aƒewò me, alo nèle mɔ dzi, ne èmlɔ anyi, alo nèfɔ.” (Mose V, 6:6, 7) Gake ɖe Yehowa gblɔ kpɔ be Sea sɔsrɔ̃ nanye nusi ŋu woade asixɔxɔe wu agbenɔnɔ ɖe enu alo nusi Sea bia dzi wɔwɔa? Mina míakpɔe ɖa.

Agbalẽsɔsrɔ̃ Ƒuƒlu

Tɔtete ɖe Sea sɔsrɔ̃ ƒe vevienyenye dzi akpa anya dze nusi me susu le na Israel-viwo, le esi Yudatɔwo ƒe kɔnyinyi aɖe me léɖeasilawo xɔe se be Mawu ŋutɔ zãna gaƒoƒo etɔ̃ tsɔ srɔ̃a Sea gbesiagbe la ta. Àte ŋu ase nusitae Yudatɔ aɖewo anya abui be, ‘Ne Mawu srɔ̃a Sea edziedzi la, ɖe mele be eƒe nuwɔwɔ siwo le anyigba dzi natsi dzi ɖe esɔsrɔ̃ ŋu vevie nenema ke oa?’ la gɔme.

Kaka ƒe alafa gbãtɔ M.Ŋ., naɖo la, alesi rabiwo ƒo wo ɖokui ɖe Sea me dzodzro tsitotsito kple egɔmeɖeɖe me wòxɔ susu me na woe na woƒe nuŋububu trɔ gbo. Yesu gblɔ be: “Agbalẽfialawo kple farisitɔwo . . . [gblɔnɛ], ke womewɔnɛ o. Ke wodoa agba kpekpe,  siwo wu tsɔtsɔ la, hetsɔna ɖoa amewo ƒe abɔta; gake woawo ŋutɔ melɔ̃na be, woƒe asibide ɖeka naka wo ŋu o.” (Mateo 23:2-4) Subɔsubɔhakplɔla mawo tsɔ se kple ɖoɖo gbogbo aɖewo do agba kpekpe na ame tsɛawo, evɔ wotrɔ asi le ɖoɖo siwo ana woawo ŋutɔ navo tso se mawo ke dzi wɔwɔ me ŋu alakpatɔe. Gawu la, ame mawo siwo nyrɔ wo ɖokui ɖe nusɔsrɔ̃wo me vĩ la ‘gblẽ nusiwo le kpekpem wu le sedede la me: ʋɔnudɔdrɔ̃ kple nublanuikpɔkpɔ kple xɔse la ɖi.’—Mateo 23:16-24.

Nu wɔmoyaa kae nye si be le agbalẽfialawo kple farisitɔwo ƒe agbagbadzedze be woaɖo woa ŋutɔwo ƒe dzɔdzɔenyenye anyi me la, wova zu Se ma ke si me wobe yewolé ɖe asi la dzi dalawo boŋ! Ƒe alafa geɖe siwo wotsɔ nɔ glãka hem le nyawo kple Sea ƒe akpa suesuewo ŋu mena wote ɖe Mawu ŋu o. Nusi wògblẽ le wo ŋu sɔ kple mɔtatra si tso nusi apostolo Paulo yɔ be “dzeɖoɖo ƒuƒlu” “nudadafiafia” “aʋatsosidzedze” gbɔ la. (Timoteo I, 6:20, 21) Gake kuxi sesẽ bubue nye nusi numekuku wɔwɔ atraɖii ma gblẽ le wo ŋu. Xɔse si tututu aʋã wo be woawɔ nusi sɔ la mesu wo si o.

Woƒe Tagbɔ Ða, ke Xɔse Meʋãa Dzi na Wo O

Aleke gbegbe Yuda-subɔsubɔhakplɔlaawo ƒe nuŋububu to vovo kura tso Mawu tɔ gbɔe nye si! Hafi Israel-viwo nage ɖe Ŋugbedodonyigbaa dzi teti la, Mose gblɔ na wo bena: “Mina nya siawo katã, siwo meku ɖe to me na mi egbea la, nade dzigbɔ na mi, eye midee asi na mia viwo, ne woalé se sia ƒe nyawo katã me ɖe asi, eye woawɔ wo dzi.” (Mose V, 32:46) Edze ƒã be menye Sea sɔsrɔ̃ koe wòle na Mawu ƒe amewo be woado vevie o ke ele be woanye Sea dzi wɔlawo hã.

Gake enuenu la, Israel-dukɔa mewɔa nuteƒe na Yehowa o. Le esi teƒe be Israel-viwo nawɔ nusiwo sɔ le Mawu ŋku me la, ‘womeɖo ŋu ɖe eŋu o, eye womese eƒe gbe o.’ (Mose V, 9:23; Ʋɔnudrɔ̃lawo 2:15, 16; Kronika II, 24:18, 19; Yeremya 25:4-7) Mlɔeba la, Yudatɔwo ɖe nuteƒemawɔmawɔ vɔ̃ɖitɔ kekeake fia esime wogbe Yesu si nye Mesia la. (Yohanes 19:14-16) Eyata Yehowa Mawu hã gbe Israel eye wòtrɔ ɖe dukɔ bubu me tɔwo ŋu.—Dɔwɔwɔwo 13:46.

Le nyateƒe me la, ehiã be míakpɔ nyuie be míagage ɖe mɔ̃ ma ke me ahabui be míate ŋu atsɔ tagbɔɖaɖɛ asubɔ Mawu evɔ dzi si mexɔna sena o nanɔ mía si o. Be míagblɔe bubui la, míaƒe Biblia sɔsrɔ̃ hiã nu geɖe wu kɔlili emesidzedzewo ɖe tame ko. Ele be sidzedze vavãtɔ nade dzi gbɔ na mí be wòatrɔ míaƒe agbenɔnɔ wòaɖe vi na mí. Ðe susu anɔ eme be míasrɔ̃ nu tso numiemie siwo míeɖuna ƒe agbledede ŋu evɔ míate kpɔ gbeɖe be míaƒã nuku siawo dometɔ aɖeke oa? Enye nyateƒe be, nukuwo ƒaƒã kple beléle na wo ŋuti sidzedze aɖe sinu asu mía si ya, gake míaŋe nuku aɖeke o! Nenema kee, wòle na amesiwo srɔ̃ Biblia henya nusiwo Mawu di tso mía si hã be woaɖe mɔ nyateƒea ƒe kuwo naɖo woƒe dzi gbɔ ahamie eye wòaʋã wo be woanɔ agbe ɖe enu.—Mateo 13:3-9, 19-23.

“Mizu Nyadziwɔlawo”

Apostolo Paulo gblɔ be “xɔse la tsoa nusi wose me.” (Romatɔwo 10:17, NW) Alesi míesea Mawu ƒe Nya la gbã heva ɖea Via, Yesu Kristo, dzixɔxɔse fiana, si sɔ le dzɔdzɔme nu la nana míedzena na agbe mavɔ kpɔkpɔ. Ẽ, ebia nu geɖe wu gbɔgblɔ dzro ko be, ‘Mexɔ Mawu kple Kristo dzi se.’

Yesu xlɔ̃ nu eyomedzelawo be xɔse si aʋã wo be woawɔ nu la nanɔ wo si, hegblɔ be: “Esia me wokɔ Fofonye ŋuti le, bena mietsea ku geɖe, eye miazu nye nusrɔ̃lawo.” (Yohanes 15:8) Emegbe Yesu dadavi Yakobo ŋlɔ bena: ‘Mizu nyadziwɔlawo, eye menye  nyaselawo ɖeɖeko o!’ (Yakobo 1:22) Gake aleke míawɔ anya nusi wòle be míawɔ? Yesu to nya kple kpɔɖeŋu dzi ɖe nusi wòhiã be míawɔ adze Mawu ŋu la fia.

Esi Yesu nɔ anyigba dzi la, edo vevie le nusiwo ado Fiaɖuƒea ƒe nuwo ɖe ŋgɔ ahakɔ Fofoa ƒe ŋkɔ ŋuti la wɔwɔ me. (Yohanes 17:4-8) Le mɔ ka nu? Ame geɖe aɖo ŋku Yesu ƒe nukudɔdada na dɔnɔwo kple bunɔwo dzi. Gake Mateo ƒe Nyanyuigbalẽa gblɔ nu vevietɔ si wòwɔ eme kɔ nyuie, be: “Yesu yi ɖato duawo kple kɔƒeawo katã me, hele nu fiam le woƒe ƒuƒoƒewo, eye wòle fiaɖuƒe la ŋutinya nyui la gblɔm.” Eɖe dzesi ŋutɔ be Yesu meɖi vomeɖase na xɔlɔ̃ kple amenyanyɛ ʋɛ aɖewo alo amesiwo wòdo goe le nutoa me la ɖeɖeko o. Eku kutri eye wòwɔ mɔnu ɖesiaɖe si nɔ anyi ŋudɔ de amewo gbɔ “le Galilea katã.”—Mateo 4:23, 24; 9:35.

Yesu fia eyomedzelawo be woakpɔ gome le nusrɔ̃lawɔwɔdɔa hã me. Le nyateƒe me la, eɖo kpɔɖeŋu de blibo ɖi na wo be woasrɔ̃. (Petro I, 2:21) Yesu gblɔ na eƒe nusrɔ̃la wɔnuteƒeawo be: “Miheyi ɖawɔ dukɔwo katã ne woanye nusrɔ̃lawo, mianyrɔ wo ɖe Fofo la kple Vi la kpakple Gbɔgbɔ kɔkɔe la ƒe ŋkɔa me, miafia wo bena, woawɔ nusiwo katã meɖo na mi la.” (Mateo 28:19, 20)

Le nyateƒe me la, gomekpɔkpɔ le gbeƒãɖeɖedɔa me menye nusi le bɔbɔe o. Yesu ŋutɔ gblɔ be: “Mele mia dɔm abe alẽviwo ene ɖo ɖe amegãxiwo dome.” (Luka 10:3) Le dzɔdzɔme nu ne wotsi tre ɖe mía ŋu la, míehena ɖe megbe be míade axa na nuxaxa kple dzimaɖitsitsi dzro hehe va mía ɖokui dzi. Nu mae dzɔ le zã si me wolé Yesu. Apostoloawo si le vɔvɔ̃ ta. Emegbe le zã ma me la, Petro sẽ nu zi etɔ̃ sɔŋ be yemenya Yesu o.—Mateo 26:56, 69-75.

Gakpe ɖe eŋu la, awɔ nuku na wò be nàse be apostolo Paulo gɔ̃ hã gblɔ be ʋiʋli geɖe mee yeɖe gbeƒã nyanyuia le. Eŋlɔ agbalẽ na Tesalonika-hamea bena: “Míekpɔ dzideƒo le mía Mawu me hegblɔ eƒe nyanyui la fia mi le ʋiʋli geɖe me.”—Tesalonikatɔwo I, 2:1, 2.

Paulo kple ehati apostolo bubuawo te ŋu ɖu nuƒoƒo na ame bubuwo tso Mawu ƒe Fiaɖuƒe ŋu ƒe vɔvɔ̃ dzi, eye míawo hã míate ŋui. Le mɔ ka nu? Nu vevitɔe nye be míaɖo ŋu ɖe Yehowa ŋu. Ne míexɔ Yehowa dzi se bliboe la, xɔse ma aʋã mí be míawɔ eƒe lɔlɔ̃nu.—Dɔwɔwɔwo 4:17-20; 5:18, 27-29.

Fetu Li na Miaƒe Dɔwɔwɔ La

Agbagba siwo míedzena be míasubɔ Yehowa la le nyanya nɛ. Le kpɔɖeŋu me, ne míedze dɔ alo ɖeɖi te mía ŋu la, enyana. Enya míaƒe dzodzoetsitsiwo. Ne gakuxiwo ɖe kpe na mí alo ne edze abe míaƒe lãmesẽ alo míaƒe seselelãmewo be yeado nuxaxa na mí ene la, Yehowa nyana nɔnɔme si me tom míele ɣesiaɣi.—Kronika II, 16:9; Petro I, 3:12.

Aleke gbegbe Yehowa akpɔ dzidzɔe nye si be le míaƒe blibomademadewo kple kuxiwo megbe hã la, míaƒe xɔse ʋãa mí míeɖea afɔ si sɔ! Yehowa ƒe ɖetsɔtsɔ le eme na eƒe subɔla wɔnuteƒewo beléletɔe menye seselelãme gbɔlo aɖe ko o—ena wòdo ŋugbe na mí. Gbɔgbɔ ʋã apostolo Paulo wòŋlɔ bena: “Mawu menye madzɔmadzɔtɔ be, wòaŋlɔ miaƒe dɔwɔwɔ kple lɔlɔ̃, si mieɖe fia le eƒe ŋkɔ ta, le esime miesubɔ ame kɔkɔewo, eye miegale edzi le wo subɔm la be o.”—Hebritɔwo 6:10.

Àte ŋu aka ɖe alesi Biblia ɖɔ Yehowae be “Mawu nyateƒetɔ wònye,” kple be enye “teƒeɖola na amesiwo dinɛ vevie,” la dzi. (Mose V, 32:4; Hebritɔwo 11:6) Le kpɔɖeŋu me, nyɔnu aɖe si le California, U.S.A., gblɔ be: “Fofonye wɔ ɣeyiɣiawo katã ƒe subɔsubɔdɔa ƒe ewo hafi te vidzidzi. Egblɔ alesi Yehowa lée ɖe te le subɔsubɔdɔa me ŋuti nya dodzidzɔnamewo nam. Zi geɖe la, ezãna eƒe ga  mamlɛa katã tsɔ dzea mɔ̃memĩi be wòate ŋu ayi subɔsubɔdɔa wɔƒe. Enuenu ne egbɔ tso subɔsubɔdɔa wɔƒe la, eva doa go nuɖuɖu nukutɔe le eƒe ʋɔtru nu.”

Tsɔ kpe ɖe ŋutilãmekpekpeɖeŋu ŋu la, “Fofo, si nye dɔmetɔtrɔ Fofo kple akɔfafawo katã ƒe Mawu la” doa ŋusẽ mí le seselelãme kple gbɔgbɔ me gome hã. (Korintotɔwo II, 1:3) Ðasefo aɖe si do dzi le tetekpɔwo me ƒe geɖe enye sia, gblɔ be: “Ŋuɖoɖo ɖe Yehowa ŋu faa akɔ na ame. Enana mɔnukpɔkpɔ wò be nàka ɖe Yehowa dzi ahakpɔ alesi wòado alɔ wòe.” Àte ŋu ate ɖe ‘Gbedodoɖa sela’ la ŋu le ɖokuibɔbɔ me kple kakaɖedzi be aɖo to wò didiwo.—Psalmo 65:3.

Yayra kple teƒeɖoɖo siwo gbɔgbɔ me nuŋeŋedɔwɔlawo xɔna sɔ gbɔ ŋutɔ. (Mateo 9:37, 38) Gomekpɔkpɔ le dutoƒosubɔsubɔdɔa me de ame geɖewo dzi le lãmesẽnyawo me, eye ate ŋu aɖe vi na wò hã nenema. Gake vevietɔ wu la, ɖaseɖiɖi na amewo doa ŋusẽ ƒomedodo nyui si le mía kple Mawu dome.—Yakobo 2:23.

Nɔ Nyuiwɔwɔ Dzi

Anye vodada na Mawu subɔla aɖe be wòaƒo nya ta be enye ŋukpedodo Yehowa ne lãmegbɔdzɔgbɔdzɔ alo tsitsi wɔe be yemegate ŋu wɔa nusiwo yedi be yeawɔ le subɔsubɔdɔa me o. Nenema kee masɔ be amesiwo dɔléle, ƒomegbanɔamedziwo, alo nɔnɔme bubuawo ɖe kpe na la hã naƒo nya ta nenema o.

Ðo ŋku edzi be esime lãmegbegblẽ aɖe alo kplamatsedonu aɖe na apostolo Paulo de gbɔdzɔe kpɔ ge do kpoe la, ‘eyɔ Aƒetɔ la zi etɔ̃, bene wòadzo le ye ŋu.’ Le esi teƒe be Mawu nada dɔ na Paulo be wòate ŋu awɔ geɖe wu le Yehowa ƒe dɔa me la, Mawu gblɔ nɛ be: “Nye amenuveve sɔ gbɔ na wò; elabena nye ŋusẽ zu blibo le gbɔdzɔgbɔdzɔ me.” (Korintotɔwo II, 12:7-10) Eyata kakaɖedzi nenɔ asiwò be eɖanye nɔnɔme sesẽ kawo mee nèle dzi dom le o, Fofowò si le dziƒo kpɔa ŋudzedze ɖe nusianu si nàte ŋu awɔ atsɔ ado alɔ eƒe dɔwo ŋu.—Hebritɔwo 13:15, 16.

Mía Wɔla lɔ̃ame mebiaa nusi míate ŋu ana o la tsoa mía si o. Nusi ko wòbiae nye be xɔse naʋã mí be míaɖe afɔ si sɔ.

[Nɔnɔmetata si le axa 26]

Ðe Sea sɔsrɔ̃ ɖeɖeko sɔ gbɔa?

[Nɔnɔmetata si le axa 29]

Ehiã be dɔwɔwɔ nakpe ɖe míaƒe xɔse ŋu