Tsitretsitsi La Mɔkpɔkpɔ Wɔnuku Aɖee

AME geɖewo xɔ tsitretsitsia dzi se. Woƒo nu tso tsitretsitsia ŋu le Islam-subɔsubɔa ƒe agbalẽ kɔkɔe, Koran, ƒe ta blibo ɖeka me. Eƒe Surah, alo ta, 75 lia ƒe akpa ɖe gblɔ be: “Meta Tsitretsitsiŋkeke la . . . Ðe amegbetɔ susuna be Míate ŋu akpe eƒe ƒuwo oa? . . . Ebia be: ‘Gbekagbee nye Tsitretsitsiŋkeke la?’ Ðe ŋusẽ mele Esi, (eyama ke si), be wòana agbe ame kukuwo oa?”—Surah 75:1-6, 40.

The New Encyclopædia Britannica gblɔ be: “Zoroaster-subɔsubɔha xɔ Nuvɔ̃ ɖeɖeɖa mlɔeba, ameƒomeviwo katã fɔfɔ ɖe tsitre, Ʋɔnudɔdrɔ̃ Mamletɔ, kple xexeme yeye aɖe gbugbɔgaɖoanyi na ame dzɔdzɔewo dzi se.”

Encyclopaedia Judaica ɖe tsitretsitsia gɔme be “enye dzixɔse si nye be ame kukuwo atsɔ woƒe ŋutilãwo agbɔ agbee eye woagava nɔ agbe le anyigba la dzi ake.” Gake numekugbalẽ ma ke gblɔ hã be, dzixɔse si woxɔ de Yuda-subɔsubɔ me be luʋɔ makumaku le amegbetɔ si la nye nya si tɔtɔa ame. Agbalẽa lɔ̃ ɖe edzi be: “Ne míagblɔe tututu la, tsitretsitsi ŋuti dzixɔsea kple luʋɔmakumaku ƒe dzixɔsea tsi tre ɖe wo nɔewo ŋu.”

Hindu-subɔsubɔ fiana nu be wogbugbɔa ame dzina, alo amea gadzɔna, zi geɖe. Be nya sia nanye nyateƒe la, ke ele be luʋɔ si nɔa agbe le ku megbe la nanɔ ame si. Hindu-subɔsubɔ gbalẽ kɔkɔe Bhagavad Gita gblɔ be: “Nusi xɔ ameti bliboa me la nye nusi womate ŋu atsrɔ̃ o. Ame aɖeke mate ŋu atsrɔ̃ luʋɔ si mekuna o la akpɔ o.”

Buddha-subɔsubɔ to vovo na Hindu-subɔsubɔ le susua nu be mexɔ luʋɔ makumaku ƒe anyinɔnɔ dzi se o. Ke hã, egbea la, Buddhatɔ siwo le Ɣedzeƒeʋĩ la xɔe se be luʋɔ makumaku la yi ɖagena ɖe ŋutilã bubu me. *

Alesi Wotɔtɔ Tsitretsitsi Nufiafia Lae

Le kunu siwo Kristodukɔa wɔna zi geɖe me la, woƒoa nu tso luʋɔa ƒe agbenɔnɔ le ku megbe kple tsitretsitsia siaa ŋu. Le kpɔɖeŋu me, Anglikantɔwo ƒe Osɔfowo gblɔa nya sia zi geɖe be: “Zi alesi wònya dze Mawu Ŋusẽkatãtɔ la ŋu le eƒe nublanuikpɔkpɔ gã la ta be wòaxɔ mía nɔvi lɔlɔ̃tɔ si dzo le mía gbɔ la ƒe luʋɔ ko la, míawo ya míele eƒe ŋutilã la ɖim, anyigba na anyigba, afi na afi, anyi na anyi; atsɔ nɔ mɔ kpɔm vevie na Tsitretsitsi yi agbe mavɔ me, to míaƒe Aƒetɔ Yesu Kristo dzi.”—The Book of Common Prayer.

Nyagbɔgblɔ sia ate ŋu ana ame manya ne tsitretsitsia ŋue Biblia fia nu tsoe loo alo luʋɔ makumaku ŋue wòfia nu tsoe o. Gake se nya si Franseawo ƒe Protestanttɔwo ƒe Nufialagã  Oscar Cullmann gblɔ ɖa. Eŋlɔ ɖe eƒe agbalẽ si nye Immortality of the Soul or Resurrection of the Dead? (Luʋɔ ƒe Nu Makumakunyenye Ye loo alo Ame Kukuwo ƒe Tsitretsitsie?) me be: “Vovototo gã aɖe le Kristotɔwo ƒe mɔkpɔkpɔ be woava fɔ ame kukuwo ɖe tsi tre kple Helatɔwo ƒe luʋɔ makumaku dzixɔsea dome. . . . Togbɔ be Kristotɔnyenye va de ɖekawɔwɔ aɖe dzixɔse eve siawo dome emegbe eye egbea amesi yɔa eɖokui be yenye Kristotɔ menyana kae nye ka o hã la, nyemekpɔ susu si tae wòle be míaɣla nusi mía kple agbalẽnyala akpa gãtɔ míesusu be enye nyateƒe la o. . . . Tsitretsitsi dzixɔse ŋu koŋue woƒo nu tsoe le Nubabla Yeyea me wu. . . . Ame, si ku ŋutɔŋutɔ, lae woagbɔ agbe to Mawu ƒe nu gbugbɔgawɔ yeyee aɖe dzi.”

Mewɔ nuku kura o be ku kple tsitretsitsi ŋu nyawo tɔtɔa ame geɖewo. Be nya siawo magatɔtɔ mí o la, ke ehiã be míatrɔ ɖe Biblia si me nyateƒenya siwo amegbetɔwo Wɔla, Yehowa Mawu, na mí la ŋu. Woŋlɔ tsitretsitsi aɖewo ŋu nya ɖe Biblia me. Mína míadzro nuŋlɔɖi siawo dometɔ ene me eye míabu nusi woɖe fia la ŋu.

“Nyɔnuwo Xɔ Woƒe Ame Kukuwo Agbagbe le Tsitretsitsi Me”

Le lɛta si apostolo Paulo ŋlɔ na Yudatɔ siwo va zu Kristotɔwo me la, egblɔ be nyɔnu xɔsetɔwo “xɔ woƒe ame kukuwo agbagbe le tsitretsitsi me.” (Hebritɔwo 11:35) Nyɔnu mawo dometɔ ɖeka nɔ Zarpat, si nye Foinike-du aɖe si te ɖe Zidon ŋu le Mediterranea Ƒuta la me. Enye ahosi aɖe si xɔ Mawu ƒe nyagblɔɖila Eliya amedzroe ɖe eƒeme eye wòna nuɖuɖui togbɔ be dɔ sesẽ aɖe to ɣemaɣi hã. Nublanuitɔe la, nyɔnu sia ƒe viŋutsuvi dze dɔ eye wòku. Eliya tsɔe enumake yi xɔtaxɔ si me wòdze la me eye wòɖe kuku na Yehowa be wòana ŋutsuvia nagbɔ agbe. Nukutɔe la, ŋutsuvia ‘gbɔ agbe.’ Eliya tsɔe na dadaa hegblɔ be: “Kpɔ ɖa, viwò la tsi agbe.” Aleke nyɔnua wɔ nui? Egblɔ dzidzɔtɔe be: “Azɔ medze sii bena, Mawu ƒe amee nènye, eye Yehowa ƒe gbe, si le nuwò la, nye nyateƒe.”—Fiawo I, 17:22-24.

Atsu kple asi dɔmenyola aɖewo nɔ Zarpat ƒe anyiehe du aɖe si gbɔ didi anɔ kilometa 100 me, amesiwo kpɔ nyagblɔɖila Elisa si va xɔ ɖe Eliya teƒe dzi. Nyɔnua nye ame ŋkuta aɖe le wo dedu Sunem me. Eya kple srɔ̃a woɖoe be yewoana Elisa nadze yewoƒe aƒea ƒe xɔtaxɔ me. Vimadzimadzi si nye nuxaxa na wo la trɔ zu dzidzɔ gbago esi nyɔnua dzi viŋutsuvi. Esi ɖevia nɔ tsitsim la, ekplɔa nuxalawo ɖo yia fofoa gbɔ le agble me zi geɖe. Afɔku aɖe dzɔ gbeɖeka. Ðevia nɔ lãgbelãgbe dom be ta le ye ɖum. Subɔviawo dometɔ ɖeka ƒu du tsɔe yi aƒeme. Dadaa xɔe ɖe akɔ, gake ʋɛʋɛʋɛ la, ɖeko ɖevia ku. Dadaa si tɔtɔ ŋutɔ la yi ɖadze Elisa dzi be wòaxɔ na ye. Eɖe subɔvi ɖeka kpe ɖe eɖokui ŋu eye wodze dzieheɣetoɖoƒe ƒe mɔ ɖo ta Karmel-to, si nye nuto si me Elisa nɔ, gbɔ.

Enumake nyagblɔɖila la dɔ eƒe subɔvi Gexazi ɖo ɖa gbã, eye eya hã kpɔe be ɖevia ku nyateƒe. Elisa kple nyɔnua dze eyome, gake  nukae dzɔ esi woyi ɖaɖo Sunem mlɔeba? Nuŋlɔɖi si le Fiawo II, 4:32-37 gblɔ be: “Eye esi Elisa va xɔa me la, kpɔ ɖa, ɖevi la ku wotsɔ mlɔ eƒe aba dzi. Eye wòge ɖe eme hedo ʋɔa ɖe woa kple eve la nu, eye wòdo gbe ɖa na Yehowa. Emegbe wòde aba la dzi hetsyɔ akɔ ɖe ɖevi la dzi; etsɔ yeƒe nu ɖo eƒe nu, yeƒe ŋku ɖo eƒe ŋku dzi, eye wòtsɔ yeƒe asi ɖo eƒe asiwo me, eye wòdra ɖe edzi, vaseɖe esime dzo ɖo lã me na ɖevi la. Emegbe wòtrɔ hezɔ le xɔa me yi afi zi ɖeka kple afime zi ɖeka; eye wòde aba la dzi hetsyɔ akɔ ɖe edzi. Tete ŋutsuvi la nyè zi adre, eye ŋutsuvi la ʋu ŋku. Eye wòyɔ Gexazi gblɔ bena: Yɔ Sunami-nyɔnu sia vɛ. Esi wòɖayɔe wòva egbɔ la, egblɔ be: Kɔ viwò la. Tete wòyi ɖabɔbɔ ɖe eƒe afɔ nu hede ta agu, eye wòkɔ via hedo go dzo.”

Abe ahosi si nɔ Zarpat ene la, Sunem-nyɔnua hã nya be Mawu ƒe ŋusẽ mee nusi dzɔ la tso. Dzi dzɔ nyɔnu eve siawo siaa ŋutɔ ɖe alesi Mawu gbɔ agbe wo vi siwo gbɔ womelɔ̃a nu le o la.

Amesiwo Wofɔ Ðe Tsitre le Yesu ƒe Subɔsubɔdɔa Wɔɣi

Anɔ abe ƒe 900 megbe la, wofɔ ame bubu ɖe tsitre le Nain du, si medidi boo tso Sunem ƒe dziehe gbɔ o, la godo. Esi Yesu Kristo kple eƒe nusrɔ̃lawo zɔ mɔ tso Kapernaum heɖo Nain ƒe agbonu la, wokpɔ be wotsɔ ame aɖe yina ɖiɖi ge, eye Yesu kpɔ ahosi si ƒe vi ɖekɛe ku la. Yesu gblɔ nɛ be wòadzudzɔ avifafa. Luka, si nye atikewɔla, ɖɔ nusi dzɔ emegbe la ale: “Eye esi [Yesu te] va la, ede asi aɖaka la ŋuti; eye etsɔlawo tɔ ɖe tsitre. Eye wògblɔ bena: Ðekakpui, mele egblɔm na wò bena: Tsi tre! Eye ame kuku la fɔ bɔbɔ nɔ anyi, eye wòde asi nuƒoƒo me, eye wòtsɔe na dadaa.” (Luka 7:14, 15) Amesiwo kpɔ nukunu sia teƒe la kafu Mawu. Tsitretsitsia ŋuti nya kaka de anyiehe gome ke ɖaɖo Yudea kple du siwo ƒo xlãe la me. Yohanes Amenyrɔɖetsimela ƒe nusrɔ̃lawo ke hã se tsitretsitsia ŋu nya eye wova gblɔe na Yohanes. Eya hã dɔ eƒe nusrɔ̃lawo ɖa be woaɖadi Yesu ahabiae be Eyae nye Mesia si wonɔ mɔ kpɔm na la mahã. Yesu gblɔ na wo bena: “Miheyi ɖagblɔ nusi miekpɔ kple nusi miese la, fia Yohanes bena: Ŋkuagbãtɔwo le nu kpɔm, tekunɔwo le azɔli zɔm, eye anyidzelawo ŋuti le kɔkɔm; tokunɔwo le nu sem, ame kukuwo le tsitre tsim, eye wole nyanyui la gblɔm fia ame dahewo.”—Luka 7:22.

Amesi Yesu fɔ ɖe tsitre si wɔ nuku wu eye amewo nya nu tso eŋu wu enye exɔlɔ̃ kplikplikpli, Lazaro, fɔfɔ ɖe tsitre. Le go sia ya  me la, ɣeyiɣi si Lazaro ku kple ɣeyiɣi si me Yesu va ɖo woƒe aƒea me la dome didi vie. Esi Yesu va ɖo Betania mlɔeba la, Lazaro ku ŋkeke enee nye ema. Esi Yesu gblɔ be woaɖe kpe si wotsɔ ɖo yɔdoa nu la ɖa la, Marta melɔ̃ o, eye wògblɔ be: “Aƒetɔ, eƒaƒã xoxo, elabena exɔ ŋkeke ene sɔŋ.” (Yohanes 11:39) Ke hã, aleke kee Lazaro ƒe ŋutilã ɖaƒaƒãe o mewɔe be mete ŋu tsi tre o. Esi Yesu ɖe gbe ko la, “ame kuku, si ƒe afɔwo kple asiwo le babla la, do go kple ameɖivɔwo, eye taku bla ŋku me nɛ.” Nusiwo Yesu ƒe futɔwo wɔ emegbe la ɖo kpe edzi be Lazaro ŋutɔŋutɔe fɔ ɖe tsitre.—Yohanes 11:43, 44; 12:1, 9-11.

Nya ta kae míaƒo tso tsitretsitsi ene siawo ŋuti nuŋlɔɖiwo ŋu? Amesiwo wofɔ ɖe tsitre la dometɔ ɖesiaɖe ŋutɔŋutɔe gbɔ agbe. Woƒe ƒometɔwo ŋutɔ ke hã kpɔ wo katã dzesii. Amesiwo wofɔ ɖe tsitre la dometɔ aɖeke megblɔ nusi dzɔ ɖe edzi le ɣeyiɣi kpui si me wonye ame kukuwo la me o. Wo dometɔ aɖeke megblɔ be yezɔ mɔ yi ɖe xexe bubu aɖe me o. Anɔ eme be wo katã gbɔ agbe le lãmesẽ nyui me. Ðeko wòwɔ na wo abe alɔ̃e wodɔ vie henyɔ ene, abe alesi Yesu ŋutɔ hã gblɔe ene. (Yohanes 11:11) Ke hã, amesiawo dometɔ ɖesiaɖe gaku le ɣeyiɣi aɖe megbe.

Anyinɔnɔ Kple Ame Veviwo Ake—Mɔkpɔkpɔ Wɔnuku Aɖee

Le Owen ƒe ku kpata si ŋu míeƒo nu tsoe le nyati si do ŋgɔ me megbe kpui la, fofoa yi ɖasrã aƒelika aɖe kpɔ. Ekpɔ amekpegbalẽvi aɖe le kplɔ̃ aɖe dzi si dzi woŋlɔ dutoƒonuƒo aɖe si Yehowa Ðasefowo aƒo ƒe tanya ɖo. Nuƒoa ƒe tanya si nye “Afikae Ame Kukuwo Le?,” la lé dzi nɛ. Nyabiase ma tututue nɔ fu ɖem nɛ. Eyi ɖase dutoƒonuƒoa eye nya siwo woxlẽ le Biblia me la fa akɔ nɛ ŋutɔ. Eva nyae be ame kukuwo mekpea fu o. Le esi teƒe be ame kukuwo, tsɔ kpe ɖe Owen ŋu, nanɔ fu kpem le dzomavɔ me alo be Mawu nava tsɔ wo woava zu mawudɔlawo le dziƒo la, wole yɔdo me hele lalam vaseɖe ɣeyiɣi si me woafɔ wo ɖe tsitre.—Nyagblɔla 9:5, 10; Xezekiel 18:4.

Ðe afɔku aɖe dzɔ le wò ƒomea mea? Abe alesi wònɔ le Owen fofo gome ene la, ɖe mènya afisi wò ame vevi siwo ku la le fifia oa eye mènya ne mɔkpɔkpɔ aɖe li be àgava kpɔ wo ake oa? Ne nenemae la, míekpe wò be nàde ŋugble le nusiwo Biblia fia yi ŋgɔe tso tsitretsitsia ŋu la ŋuti. Ðewohĩ àbia be: ‘Ɣekaɣie woafɔ amewo ɖe tsitre? Amekawo koŋue woafɔ ɖe tsitre?’ Taflatse xlẽ nyati siwo kplɔe ɖo nàse alesi wodzro nyabiase siawo kple bubuwo mee.

[Etenuŋɔŋlɔ]

[Nɔnɔmetata si le axa 5]

Eliya ɖe kuku na Yehowa be wòagbɔ agbe ɖevia

[Nɔnɔmetata si le axa 5]

Yehowa zã Elisa tsɔ fɔ Sunem-nyɔnua ƒe vi ɖe tsitre

[Nɔnɔmetata si le axa 6]

Yesu fɔ ahosi si nɔ Nain ƒe viŋutsu ɖe tsitre

[Nɔnɔmetata si le axa 7]

Tsitretsitsia ana ƒometɔwo nagava nɔ anyi kple woƒe ame veviwo ake