Gɔmeɖoanyi Ka Dzie Nèle Etum Ðo?

GƆMEÐOANYI ƒe sesẽ dzi koŋue xɔ ƒe kelili nɔa te ɖo. Ɣeaɖewoɣi la, Biblia wɔa gɔmeɖose sia ŋudɔ le kpɔɖeŋumɔ nu.

Le kpɔɖeŋu me, nyagblɔɖila Yesaya, yɔ Yehowa Mawu be amesi “ɖo anyigba gɔme anyi.” (Yesaya 51:13) Gɔmeɖoanyi sia nye Mawu ƒe se siwo metrɔna o siwo ƒe kpɔkplɔ te anyigba le zɔzɔm le eye wolée ɖe te sesĩe ɖe eƒe anyinɔwo dzi ne magaʋã gbeɖe akpɔ o. (Psalmo 104:5) Mawu ƒe Nya, Biblia la, ƒo nu tso ‘gɔmeɖoanyi’ siwo lé amegbetɔƒomea ɖe te la hã ŋu. Esiawoe nye dzɔdzɔenyenye, se, kple ɖoɖo. Ne ‘wogblẽ’ alo gbɔdzɔ wo me to numadzɔmadzɔwɔwɔ, nufitifitiwɔwɔ, kple ŋutasesẽ me la, ɖoɖo si nu wonɔa agbe ɖo le hadome me gblẽna.—Psalmo 11: 2-6; Lododowo 29:4.

Gɔmeɖose sia ku ɖe ame ɖesiaɖe hã ŋu. Esime Yesu Kristo nɔ eƒe Todzimawunya xɔŋkɔa ta ƒom la, Egblɔ be: “Eyaŋuti amesiame, si se nye nya siawo, eye wòwɔ wo dzi la, matsɔe aɖo ŋutsu nyanu, si tu eƒe xɔ ɖe kpe gbadza dzi la ŋuti; eye tsi dzana, eye tɔwo ɖɔna, eye yawo ƒona, eye wova nyẽa zi le nenem xɔ ma te, eye memuna o; elabena woɖo egɔme anyi ɖe kpe gbadza dzi. Eye amesiame, si sea nye nya siawo, eye mewɔa wo dzi o la, woatsɔe aɖo ŋutsu manyanu, si tu eƒe xɔ ɖe ke dzi la ŋuti; eye tsi dzana, eye tɔwo ɖɔna, eye yawo ƒona, eye wova nyẽa zi le nenem xɔ ma te, eye wòmu, eye eƒe anyidzedze ɖi gbloo.”—Mateo 7: 24-27.

Gɔmeɖoanyi ka dzi nèle wò agbe tum ɖo? Ame mavɔ̃mawuwo ƒe xexemenunya si wotu ɖe ke si mate ŋu alé nu ɖe te o, si ava mu gbloo dziea? Alo kpe gbadza sesẽ si nye toɖoɖo Yesu Kristo ƒe nyawo, si akpe ɖe ŋuwò be nànɔ te ɖe kpɔɖeŋu yaƒoƒowo nu la dzie nèle etum ɖoa?