Èwɔa Nuteƒe Le Nusianu Mea?
Èwɔa Nuteƒe Le Nusianu Mea?
“Amesi wɔa nuteƒe le nu suetɔ ke me la, enyea nuteƒewɔla le nu geɖewo hã me.”—LUKA 16:10.
1. Yehowa ƒe nyateƒetɔnyenye ƒe kpeɖodzi ɖeka ɖe?
ÈLÉ ŋku ɖe nusi dzɔna ɖe ati ƒe vɔvɔlidodo dzi ne ɣeyiɣi va le yiyim le ŋkekea me ŋu kpɔa? Àkpɔ be vɔvɔlia ƒe lolome kple nɔƒe trɔna edziedzi! Abe vɔvɔli ene la, amegbetɔwo ƒe ɖoɖowo kple ŋugbedodowo melia ke o. Gake Yehowa Mawu ya metrɔna ne ɣeyiɣiwo va le yiyim o. Nusrɔ̃la Yakobo yɔe be “kekeliwo ƒe Fofo” hegblɔ be: “Liɖɔɖɔ alo tɔtrɔ ƒe vɔvɔlidodo aɖeke [mele egbɔ] o.” (Yakobo 1:17) Yehowa metrɔna gbeɖe o, enye amesi dzi woaka ɖo le nya suetɔ kekeake gɔ̃ hã me. Enye “Mawu nyateƒetɔ.”—Mose V, 32:4.
2. (a) Nukatae wòle be míadzro mía ɖokui me akpɔ ɖa be míenye nuteƒewɔlawo hã? (b) Nuteƒewɔwɔ ŋuti biabia kawo mee míadzro?
2 Aleke Mawu buna le esubɔlawo ƒe nuteƒewɔwɔ ŋu? Ebua wo abe alesi Dawid bui ene, amesi gblɔ le wo ŋu be: “Metsɔ nye ŋku ɖo anyigba dzi nuteƒewɔlawo ŋu, be woanɔ gbɔnye; amesi zɔa maɖifɔmɔ dzi la, eya asubɔm.” (Psalmo 101:6) Ẽ, Yehowa subɔlawo ƒe nuteƒewɔwɔ doa dzidzɔ nɛ. Esɔ be apostolo Paulo ŋlɔ be: ‘Nusi wodina tsoa xɔnuviwo gbɔ enye bena, woakpɔ wo nuteƒewɔlawoe.’ (Korintotɔwo I, 4:2) Nukae nuteƒewɔla nyenye lɔ ɖe eme? Agbe ƒe akpa kawoe wòle be míawɔ nuteƒe le? Yayra kawoe ‘zɔzɔ le fɔmaɖimaɖi me’ hena vɛ?
Nusi Wòfia Be Woanye Nuteƒewɔla
3. Nukae ɖenɛ fiana be míenye nuteƒewɔlawo?
3 Hebritɔwo 3:5 gblɔ be, ‘Mose nye nuteƒewɔla abe subɔla ene.’ Nukae na nyagblɔɖila Mose nye nuteƒewɔla? Le avɔgbadɔa tutu kple emenuwo dada ɖe wo nɔƒe ŋuti la, “Mose wɔe pɛpɛpɛ. Alesi Yehowa de se nɛ la, nenema wòwɔ.” (Mose II, 40:16) Abe Yehowa subɔlawo ene la, míenyea nuteƒewɔlawo ne míesubɔe toɖoɖotɔe. Le nyateƒe me la, esia wɔwɔ bia hã be míalé nuteƒewɔwɔ me ɖe asi na Yehowa ne míele dodokpɔ sesẽwo me tom hã. Gake nuteƒewɔwɔ le dodokpɔ gãwo ɖeɖe me mefiana be míenye nuteƒewɔlawo o. Yesu gblɔ be: “Amesi wɔa nuteƒe le nu suetɔ ke me la, enyea nuteƒewɔla le nu geɖewo hã me, eye amesi wɔa nu madzɔmadzɔ le nu suetɔ ke me la, enyea nu madzɔmadzɔ wɔla le nu geɖewo hã me.” (Luka 16:10) Ele be míalé nuteƒewɔwɔ me ɖe asi le nusiwo adze nu suewoe gɔ̃ hã me.
4, 5. Nukae míaƒe nuteƒewɔwɔ le “nu suetɔ ke” me ɖena fiana?
4 Toɖoɖo gbesiagbe le “nu suetɔ ke” me le vevie le susu eve aɖewo ta. Gbã la, eɖea alesi míebua Yehowa ƒe dziɖulanyenyee fiana. Wò ya bu nuteƒewɔwɔ ŋuti dodokpɔ si dze ŋgɔ ame eve gbãtɔ, Adam kple Xawa, ŋu kpɔ ko. Nusi wodi tso wo gbɔ la mena woxaxa le naneke me le mɔ aɖeke nu o. Woɖe mɔ ɖe Eden-bɔa me ti kutsetse hamehamewo ŋu na wo, ɖeka pɛ ko—si nye “ati, si na wodzea si nyui kple vɔ̃”—ƒe kutsetse dzaa ko ɖuɖu nu wode se ɖo. (Mose I, 2:16, 17) Ame eve gbãtɔa ƒe nuteƒewɔwɔ le sedede bɔbɔe ma dzi wɔwɔ me afia be wode Yehowa ƒe dziɖulanyenye dzi. Yehowa ƒe mɔfiamewo dzi wɔwɔ le míaƒe gbesiagbegbenɔnɔ me fia be míede Yehowa ƒe dziɖulanyenye dzi.
5 Evelia, alesi míewɔ nui le “nu suetɔ ke” me akpɔ ŋusẽ ɖe alesi míawɔ nui le “nu geɖewo hã me,” siwo nye dodokpɔ gã siwo míado goe le agbe me, la dzi. Le go sia me la, bu nusi dzɔ ɖe Daniel, kple ehavi Hebri-vi wɔnuteƒe etɔ̃awo—Xananya, Misael, kple Azarya dzi ŋu kpɔ. Wokplɔ wo yi aboyo mee le Babilon le ƒe 617 D.M.Ŋ. me. Ðekakpuivi dzaa koe ŋutsuvi eneawo nye, ɖewohĩ wonye ƒewuiviwo, esi wokplɔ wo yi Fia Nebukadnezar ƒe fiasã mee. Le afima la, “[woɖo] woƒe gbesiagbe nuɖuɖu na wo tso fia ƒe nuɖuɖu kple wein me, ne woatsɔ anyi woe ƒe etɔ̃; emegbe woasubɔ fia la.”—Daniel 1:3-5.
6. Dodokpɔ kae dze ŋgɔ Daniel kple ehati Hebri-ɖekakpuivi etɔ̃awo le Babilon-fiasã me?
6 Gake Babilon-fia ƒe nuɖuɖuwo he gbetɔame aɖe va Hebri-ɖekakpuivi eneawo dzii. Nuɖuɖu siwo wotsri le Mose ƒe Sea me anya nɔ fia la ƒe nuɖuɖuwo dome. (Mose V, 14:3-20) Ðewohĩ wometsoa ʋu lãwo nyuie hafi zãna o, eyata lã mawo tɔgbe ɖuɖu anye dada le Mawu ƒe Sea dzi. (Mose V, 12:23-25) Azɔ hã nuɖuɖu mawo ate ŋu anye nuɖuɖu siwo wotsɔ sa vɔe na trɔ̃wo, elabena Babilon trɔ̃subɔlawo tsɔa nuɖuɖu sana vɔe nenema hafi ɖuna le hame.
7. Nukae Daniel kple exɔlɔ̃ etɔ̃a ƒe toɖoɖo ɖe fia?
7 Ðikekemanɔmee la, nuɖuɖu aɖewo tsitsri manye nya vevi si ŋu Babilon fiaƒemetɔwo atsi dzi ɖo o. Gake Daniel kple exɔlɔ̃awo ya ɖoe kplikpaa le woƒe dzime be yewomaƒo ɖi yewo ɖokui to nuɖuɖu siwo wotsri le Se si Mawu de na Israel-viwo me la ɖuɖu me o. Nya sia lɔ woƒe nuteƒewɔwɔ kple anukwareɖiɖi na Mawu ɖe eme. Eyata wobia be yewoƒe nuɖuɖu nanye amagbewo, eye yewoƒe nunono nanye tsi ko, eye wolɔ̃ ɖe edzi na wo. (Daniel 1:9-14) Nusia si ɖekakpuivi ene siawo wɔ maɖi naneke le ame aɖewo gbɔ egbea o. Ke hã, woƒe toɖoɖo Mawu ɖe akpa si dzi wode le Yehowa ƒe dziɖulanyenye ƒe nya la me fia.
8. (a) Nuteƒewɔwɔ ŋuti dodokpɔ gã kae dze ŋgɔ Hebri-vi etɔ̃awo? (b) Nukae do tso dodokpɔa me, eye nukae wòfia?
8 Nuteƒewɔwɔ le nusi adze numaɖinui me kpe ɖe Daniel xɔlɔ̃ etɔ̃awo ŋu wokpe akɔ kple dodokpɔ si lolo wu. Ʋu Biblia-gbalẽ si nye Daniel ƒe ta 3 lia, eye nàxlẽ alesi Hebri-vi etɔ̃awo dze ŋgɔ ku esi wogbe tadedeagu na sikalegba si Fia Nebukadnezar li anyi la ta. Esi wokplɔ wo va fia la gbɔe la, woɖe tame si woɖo kplikpaa la gblɔ dzinɔameƒotɔe be: “Kpɔ ɖa, mía Mawu, si subɔm míele la, ate ŋu aɖe mí tso kpodzo bibi la me, eye wòate ŋu aɖe mí tso wò fia si me. Ke ne menɔ alea o hã la, fia, nyae be, míele wò mawuwo subɔ ge akpɔ gbeɖe o, eye míado gbe ɖa na sikalegba, si nèli anyi la o.” (Daniel 3:17, 18) Ðe Yehowa ɖe woa? Ŋutsu siwo lé ɖekakpuiviawo ɖaƒu gbe ɖe kpodzo bibia me la ŋutɔ fiã keŋkeŋ, gake Hebri-vi wɔnuteƒe etɔ̃awo do agbagbee—dzo meʋẽ le wo ŋu gɔ̃ hã o! Alesi woɖonɛ kplikpaa wɔa nuteƒe le nu suetɔwo kekeake gɔ̃ hã mee kpe ɖe wo ŋu wowɔ nuteƒe le dodokpɔ gã ma me. Ðe esia meɖe nuteƒewɔwɔ le nu suewo me ƒe vevienyenye fia oa?
Nuteƒewɔwɔ le “Anyigbadzinu Madzɔmadzɔwo” Zazã Me
9. Nuka ŋue Yesu nɔ nu ƒom tsoe hafi gblɔ nya si le Luka 16:10?
9 Hafi Yesu naɖe gɔmeɖose si nye be amesi wɔa nuteƒe le nusiwo dze nu suewoe me wɔa nuteƒe le nu gãwo me afia la, exlɔ̃ nu eƒe nyaselawo be: “Mitsɔ anyigbadzinu madzɔmadzɔwo dze xɔlɔ̃woe na mia ɖokui bena, ne wo nu tsi la, woaxɔ mi ɖe agbadɔ mavɔwo me.” Nya sia yomee wògblɔ nuteƒewɔwɔ le nu suetɔwo ke me ƒe nya la ɖo. Emegbe Yesu gblɔ be: “Eyaŋuti, ne miezu nuteƒewɔlawo le anyigbadzinu madzɔmadzɔwo me o la, ameka atsɔ nyateƒenu ade mia si mahã? . . . Dɔla aɖeke mate ŋu asubɔ aƒetɔ eve o; elabena ɖewo alé fu ɖeka, eye wòalɔ̃ evelia, alo aku ɖe ɖeka ŋuti, eye wòado vlo evelia. Miate ŋu asubɔ Mawu kple anyigbadzinuwo o.”—Luka 16:9-13.
10. Aleke míate ŋu aɖe nuteƒewɔwɔ afia le “anyigbadzinu madzɔmadzɔwo” zazã mee?
10 Nya siwo ƒo xlã Yesu ƒe nya siwo le Luka 16:10 ɖee fia be, nusi ŋu koŋ wònɔ nu ƒom le hafi gblɔ nya mawo la ku ɖe “anyigbadzinu madzɔmadzɔwo,” siwo nye míaƒe ŋutilãmenunɔamesiwo alo kesinɔnuwo zazã ŋu. Woyɔ wo be nu madzɔmadzɔwo elabena ŋutilãmekesinɔnuwo—vevietɔ ga—le amegbetɔ nuvɔ̃mewo ƒe ŋusẽ te. Gawu la, didi be woazu kesinɔtɔ ate ŋu akplɔ ame ade numadzɔmadzɔwɔwɔ me. Míeɖea nuteƒewɔwɔ fiana ne míezã míaƒe ŋutilãmenunɔamesiwo nunyatɔe. Le esi teƒe be míazã wo ɖokuitɔdiditɔe la, míadi be míazã wo le Fiaɖuƒea ƒe nuwo dodo ɖe ŋgɔ kple kpekpeɖeŋunana amewo me boŋ. Ne míewɔ nuteƒe le go sia me la, ekema míedze xɔlɔ̃ Yehowa Mawu kple Yesu Kristo, amesiwo tɔe ‘agbadɔ mavɔawo’ nye. Woaxɔ mí ɖe agbadɔawo me, eye woana agbe mavɔ mí le dziƒo alo anyigba dzi Paradiso me.
11. Nukatae mele be míagbe numeɖeɖe na amesiwo míeɖea gbeƒã na be míexɔa nudzɔdzɔ hena xexeame katã ƒe dɔ si wɔm Yehowa Ðasefowo le o?
11 Azɔ hã, bu mɔnukpɔkpɔ si míenana amesiwo míenaa Biblia alo Biblia-srɔ̃gbalẽwoe le Fiaɖuƒegbedasia gbɔgblɔ na wo me henana wonyana be míexɔa nudzɔdzɔwo hena xexeame katã ƒe dɔ si wɔm Yehowa ƒe amewo le la ŋu kpɔ. Ðe esia menye mɔnukpɔkpɔ míena wo be woawɔ woƒe ŋutilãmenuwo ŋudɔ nunyatɔe oa? Togbɔ be ŋutilãmenuwo ŋudɔwɔwɔ ŋue wozã Luka 16:10 me nyawo na tẽ hã la, gɔmeɖose si dze le afima la lɔ agbenɔnɔ ƒe akpa bubuwo hã ɖe eme.
Anukwareɖiɖi Le Vevie Ŋutɔ
12, 13. Nukawo mee míate ŋu aɖe anukwareɖiɖi afia le?
12 Apostolo Paulo ŋlɔ be: “Míenya le mía ɖokui me bena, dzitsinya nyui le mía si, le esi míelɔ̃ be, [míaɖi anukware, NW] le nusianu me la ŋuti.” (Hebritɔwo 13:18) Le nyateƒe me la, “nusianu” si woyɔ la lɔ nusianu si ku ɖe ga ŋu la hã ɖe eme. Míexea fe siwo le mía ŋu kpakple míaƒe adzɔwo kaba anukwareɖiɖitɔe. Nukatae? Míewɔnɛ le míaƒe dzitsinya ta, eye vevietɔ la, le lɔlɔ̃ na Mawu kple toɖoɖo eƒe nufiamewo ta. (Romatɔwo 13:5, 6) Aleke míewɔa nui ne míefɔ nane? Míetrɔnɛ na nua tɔ. Ðaseɖiɖi nyui ka gbegbee wònyena ne míegblɔ nusi ʋã mí míegbugbɔ nua na nutɔ!
13 Nuteƒewɔwɔ kple anukwareɖiɖi le nusianu me bia hã be míaɖi anukware le míaƒe dɔwɔƒewo. Anukwareɖiɖi le dɔme hea amewo ƒe susu vaa Mawu si subɔm míele dzi. Míetona kuviawɔwɔ me “fina” ɣeyiɣi o. Ke boŋ míewɔa dɔ kple moveviɖoɖo, abe Yehowae míele ewɔm na ene. (Efesotɔwo 4:28; Kolosetɔwo 3:23) Wobu akɔnta be le Europa-dukɔ aɖe me la, ayedɔe dɔwɔla siwo yina ɖɔktawo gbɔ ɖaxɔna dɔdzedze ŋuti ɖaseɖigbalẽ ne yewoatsɔ abia mɔe le dɔwɔƒe la ƒe akpa ɖeka le etɔ̃ me dzena. Mawu subɔla vavãwo mekpaa nya tsɔ doa taflatsee be yewoagbe dɔmeyiyi o. Wodoa Yehowa Ðasefowo ɖe ŋgɔ le dɔme ɣeaɖewoɣi, le woƒe anukwareɖiɖi kple dɔsesẽwɔwɔ si dɔtɔawo de dzesii ta.—Lododowo 10:4.
Anukwareɖiɖi le Míaƒe Kristotɔwo ƒe Subɔsubɔdɔa Me
14, 15. Mɔ siwo dzi míaɖe nuteƒewɔwɔ le Kristotɔwo ƒe subɔsubɔdɔa me afia le dometɔ aɖewo ɖe?
14 Aleke míeɖea nuteƒewɔwɔ fiana le subɔsubɔdɔ si wode asi na mí la mee? Biblia gblɔ be: “Mina [míatsɔ] kafukafuvɔsa anɔ Mawu nam; esia nye nuyi, siwo ʋua eŋkɔ me la, ƒe kutsetse.” (Hebritɔwo 13:15) Mɔ vevitɔ si dzi míaɖe nuteƒewɔwɔ afia le le gbeadzisubɔsubɔdɔa me enye be míakpɔ gome le eme edziedzi. Ðe susu aɖe li si ta míana ɣleti aɖe nato mía ŋu ɖasemaɖimaɖii le Yehowa kple eƒe tameɖoɖo ŋua? Gomekpɔkpɔ le ɖaseɖiɖidɔa me edziedzi kpena ɖe mía ŋu be míebina ɖe edzi.
15 Mɔ nyui bubu si dzi míaɖe nuteƒewɔwɔ le gbeadzisubɔsubɔdɔa me afia le enye aɖaŋuɖoɖo siwo dzena le Gbetakpɔxɔ kple Míaƒe Fiaɖuƒe Subɔsubɔdɔ me ŋudɔ wɔwɔ. Ne míedzra ɖo ɖe ɖaseɖinya siwo ƒe aɖaŋu woɖo alo bubu siwo asɔ ŋu hezã wo la, ɖe míekpɔnɛ be míaƒe gbeadzisubɔsubɔdɔa tsea ku wu oa? Ne míeke ɖe ame aɖe si ɖe Fiaɖuƒegbedasia ŋuti ɖetsɔleme fia ŋu la, ɖe míetrɔna yina amea gbɔ kaba ɖatua ɖetsɔlemea ɖoa? Eye aƒeme Biblia nusɔsrɔ̃ siwo gɔme míedzena kple ɖetsɔlemetɔwo ya ɖe? Ðe míeléa fɔ ɖe wo ŋu wɔna nuteƒewɔwɔtɔea? Míaƒe nuteƒewɔwɔ le gbeadzisubɔsubɔdɔa me ate ŋu anye agbe na mía ŋutɔwo kple amesiwo ɖoa to mí.—Timoteo I, 4:15, 16.
Mía Ðokui Ðeɖeɖa tso Xexeame Gbɔ
16, 17. Mɔ kawo nue míate ŋu aɖee afia le be míeɖe mía ɖokui ɖa tso xexeame gbɔ?
16 Yesu gblɔ le eyomedzelawo ŋu le gbe si wòdo ɖa na Mawu me be: “Nye la metsɔ wò nya la na wo, eye xexeame lé fu wo, elabena wometso xexeame o, abe alesi nye hã nyemetso xexeame o ene. Nyemele biabiam be, naɖe wo tso xexeame o, ke boŋ bena, nadzra wo ɖo tso vɔ̃ɖitɔ la si me. Wometso xexeame o, abe alesi nye hã nyemetso xexeame o ene.” (Yohanes 17:14-16) Ðewohĩ míaɖoe kplikpaa aɖe mía ɖokui ɖa tso xexeame gbɔ le nya gãwo abe akpaɖekedzimademade, mawusubɔsubɔ ŋkekenyui kple kɔnuwo, kple agbegbegblẽnɔnɔ ene me. Ke le nya suewo me ya ɖe? Ðe wòanye be xexeame ƒe mɔwo le ŋusẽ kpɔm ɖe mía dzi evɔ míede dzesii oa? Le kpɔɖeŋu me, ne míekpɔ nyuie o la, ele bɔbɔe be míaƒe nudodowo nava nye esiwo ŋu bubu mele o eye womesɔ o! Nuteƒewɔwɔ bia be míadzra mía ɖokui ɖo le “ŋukpekpe kple ɖokuidziɖuɖu” me. (Timoteo I, 2:9, 10) Ẽ, “míena nuɖiaɖia aɖeke le naneke me o, bene womagaka mo na míaƒe subɔsubɔ la o, ke boŋ le nuwo katã me la míeɖea mía ɖokui fiana abe Mawu ƒe subɔlawo ene.”—Korintotɔwo II, 6:3, 4.
17 Le bubudede Yehowa ŋu ta la, nusiwo míedona tsɔ yina míaƒe hame ƒe kpekpewoe nyea esiwo ŋu bubu le. Nenema ke míewɔna le míaƒe takpekpe suewo kple gãwo hã mee. Ehiã be míaƒe nudodowo nasɔ ɖe teƒe si yim míele nu ahasɔ na ŋku. Ewɔwɔ alea nyea ɖaseɖiɖi na amesiwo léa ŋku ɖe mía ŋu. Mawudɔlawo gɔ̃ hã léa ŋku ɖe míaƒe dɔwɔwɔwo ŋu, abe alesi wolé ŋku ɖe Paulo kple ehati Kristotɔwo tɔ ŋui ene. (Korintotɔwo I, 4:9) Eyata ele be míaƒe nudodowo nasɔ ɣesiaɣi. Le ame aɖewo gbɔ la, nyamaɖinyae nuteƒewɔwɔ le awu siwo míedona tiatia me nye, gake enye nya vevi le Mawu ya gbɔ.
Nuteƒewɔwɔ me Yayrawo
18, 19. Yayra kawoe nuteƒewɔwɔ hena vɛ?
18 Woyɔ Kristotɔ vavãwo be “Mawu ƒe amenuveve bubu ƒomevi geɖewo ƒe xɔnuvi nyuiwo.” Esi wonye xɔnuvi nyuiwo ta la, ‘wokpɔa ŋusẽdodo tsoa ŋusẽ si Mawu nana me.’ (Petro I, 4:10, 11) Gawu la, esi míenye xɔnuviwo ta la, nusi menye mía ŋutɔwo tɔ o ye wotsɔ de asi na mí—si nye Mawu ƒe amenuvevenunanawo, siwo dome nyanyuigbɔgblɔdɔa hã le. Ne míeɖe mía ɖokui fia xɔnuvi nyuiwoe la, míexɔa ŋusẽdodo tsoa ŋusẽ si Mawu nana, si nye “ŋusẽ si gbɔ dzɔdzɔmetɔ ŋu” la me. (Korintotɔwo II, 4:7, NW) Hehexɔxɔ nyui ka gbegbee nye si, si akpe ɖe mía ŋu míanɔ te ɖe dodokpɔ ɖesiaɖe si míado goe le etsɔme la nu!
19 Hakpala dzi ha be: “Milɔ̃ Yehowa, mi eƒe [nuteƒewɔlawo, NW] katã; Yehowa kpɔa anukwaretɔwo ta.” (Psalmo 31:24) Mina míaɖoe kplikpaa alé nuteƒewɔwɔ me ɖe asi ɣesiaɣi, kakaɖedzi blibo nanɔ mía si be Yehowa nye “amewo katã xɔla, vevietɔ [nuteƒewɔlawo, NW].”—Timoteo I, 4:10.
Èɖo Ŋku Wo Dzia?
• Nukatae wòle be míawɔ “nuteƒe le nu suetɔ ke me”?
• Aleke míate ŋu aɖe nuteƒewɔwɔ afia
le nya siwo ku ɖe anukwareɖiɖi ŋu me?
le nyanyuigbɔgblɔdɔa me?
le mía ɖokui ɖeɖeɖa tso xexeame gbɔ me?
[Biabiawo]
[Nɔnɔmetata siwo le axa 26]
Amesi wɔa nuteƒe le nu suetɔ ke me, wɔa nuteƒe le nu geɖewo hã me
[Nɔnɔmetata si le axa 29]
‘Miɖi anukware le nusianu me’
[Nɔnɔmetata si le axa 29]
Mɔ nyui aɖe si dzi míaɖe nuteƒewɔwɔ afia le enye be míadzra ɖo ɖe gbeadzisubɔsubɔdɔa ŋu nyuie
[Nɔnɔmetata si le axa 30]
Dzra ɖokuiwò ɖo le ŋukpekpe kple ɖokuidziɖuɖu me