‘Aɖaŋudzela Léa Ŋku Ðe Eƒe Afɔɖeɖe Ŋu’

AÐAŊUDZELA nye ame aɖe si bi ɖe nɔnɔmewo kple kuxiwo gbɔ kpɔkpɔ me eye eƒe tagbɔ ɖa, ebuna nu ŋu nyuie eye sidzedze deto le esi, ewɔna nyametsotso nyui eye wòɖɔa ŋu ɖo, eƒe nugɔmesese de to eye wòwɔa nu le nunya me. Medana alakpa alo wɔa ameflunu o. Lododowo 13:16 gblɔ be: “Nugɔmesela [“aɖaŋudzela” NW] wɔa nu ɖe nunya me.” Nyateƒee, aɖaŋudzedze alo ŋuɖɔɖɔɖo, nye nɔnɔme nyoameŋu.

Aleke míate ŋu adze aɖaŋu le míaƒe gbesiagbegbenɔnɔ mee? Aleke nɔnɔme sia dzena le tiatia siwo míewɔna, alesi míewɔa nu ɖe amewo ŋu, kple alesi míewɔa nu le nɔnɔme vovovo me la mee? Teƒeɖoɖo kawoe ŋuɖɔɖola xɔna? Afɔku kawoe woƒona asa na? Blema Israel-fia Salomo na nyabiabia siawo ƒe ŋuɖoɖo siwo sɔ la mí, abe alesi míaxlẽe le Lododowo 14:12-25 ene. *

Tia Wò Mɔ le Nunya Me

Le nyateƒe me la, vovototo dede nyui kple vɔ̃ dome ƒe ŋutete hiã hafi ame nate ŋu awɔ tiatia nyuiwo eye nu nadze edzi nɛ le agbe me. Gake Biblia xlɔ̃ nu be: “Ame aɖewo ƒe mɔ dzɔ le wo ŋku me; ke eƒe nuwuwu enye ku ƒe [“mɔwo,” NW].” (Lododowo 14:12) Eyata ele be míasrɔ̃ alesi míade vovototo nusi nye nu nyui ŋutɔŋutɔ kple nusi dze abe nu nyui ene dome. Nyagbɔgblɔ “ku ƒe mɔwo” ɖee fia be ameflumɔ mawo tɔgbe geɖe li. Bu nanewo siwo me wòle be míakpɔ nyuie le ahaƒo asa na la ŋu kpɔ.

Zi geɖe wobua xexeame kesinɔtɔ xɔŋkɔwo be wonye bubume siwo dze na kafukafu. Woƒe ameŋkutanyenye le hadome kple hotsuikpɔkpɔ ate ŋu ana wòadze abe woƒe nuwɔnawo nyo ene. Gake ɖe mɔ siwo dzi amesiawo tona zua kesinɔtɔwo alo ame xɔŋkɔwo ŋu kɔa? Ðe wowɔa nu dzɔdzɔe henɔa agbe nyuia? Ame aɖewo hã li siwo doa vevie nu ŋutɔ le woƒe subɔsubɔdzixɔsewo me léle ɖe asi me. Gake ɖe woƒe veviedodo nu nye kpeɖodzi vavã be woƒe dzixɔsewo nyoa?—Romatɔwo 10:2, 3.

Ameɖokuibeble ate ŋu ana mɔ aɖe nadze mɔ dzɔdzɔe na ame. Ne míenɔa te ɖe nusi mía ŋutɔwo míebu be enyo dzi wɔa nyametsotso la, ke míaƒe dzi, si nye mɔfiala alakpatɔ, la dzie ma míetua nyametsotso wɔwɔ ɖo. (Yeremya 17:9)

Dzitsinya si womena mɔfiafia alo hehe ɖɔʋu aɖekee o ate ŋu akplɔ mí atrae míabu nuwɔna alo mɔ manyomanyo be enye mɔ nyui. Ekema nukae akpe ɖe mía ŋu be míatia mɔ nyuitɔ?

Veviedodo ɖokuisinusɔsrɔ̃ le Mawu ƒe Nya la me nyateƒe gogloawo ŋu hiã vevie ne míedi be míanye amesiwo “na hehe woƒe sidzedze ŋutetewo . . . be woade vovototo nyui kple vɔ̃ dome.” Gawu la, ele be míana hehe ŋutete siawo “to wo zazã me” le Biblia ƒe gɔmeɖosewo ŋudɔwɔwɔ me. (Hebritɔwo 5:14, NW) Ele be míakpɔ nyuie be míagana mɔ aɖe si dze abe enyo ene nana míatra ɖa tso ‘mɔ xaxɛ si kplɔa ame yina ɖe agbe me’ la dzi o.—Mateo 7:13, 14.

Ne ‘Dzi la le Veve Sem’

Ðe míate ŋu akpɔ dzidzɔ ne míekpɔ susu me ƒe akɔdzeanyi oa? Ðe nukoko kple dzidzɔdodonameɖokui nana vevesese si nu sẽ dzi kana  ɖena kpɔtɔna? Aɖaŋudzedzee wònye be woano ahamuame atsɔ atsi blanuiléle ƒe nɔnɔmewo nu, azã atikemuamewo, alo ate kpɔ be woaɖe seselelãme mawo ɖa to agbegbegblẽ nɔnɔ mea? Ŋuɖoɖoae nye ao. Fia nyanu la gblɔ be: “Veve le dzi me wotoa egbɔ koa nu.”—Lododowo 14:13a.

Nukoko ate ŋu atsyɔ vevesese dzi, ke edoa kpo eɖeɖeɖa. Biblia gblɔ be “Ɣeyiɣi li na nusianu.” Nyateƒee, “avifaɣi li, eye nukoɣi li; konyifaɣi li, eye ɣeɖuɣi li.” (Nyagblɔla 3:1, 4) Ne míaƒe blanuiléle nu gbe tsotso la, ele be míaɖe afɔ aɖewo atsɔ aɖu edzii, eye míabia ‘aɖaŋuɖoɖo’ ne ehiã. (Lododowo 24:6) * Nukoko kple dzidzɔ dodo na ame ɖokui siaa ɖea vi vaseɖe afi aɖe, gake womeɖea vi na ame boo o. Salomo xlɔ̃ nu tsi tre ɖe dzidzɔ dodo na ame ɖokui vivivo kple modzakaɖeɖe manyomanyowo ŋu gblɔ bena: “Dzidzɔ sia ƒe nuwuwu nyea nuxaxa.”—Lododowo 14:13b.

Tosẽla Kple Ame Nyui​—Aleke Woɖia Ƒoe?

Israel-fia la yi edzi bena: “Tosẽla ƒe zɔzɔme ɖia ƒo nɛ, nenema enye ame nyui ƒe nuwɔwɔ hã.” (Lododowo 14:14) Aleke tosẽla kple ame nyui ƒe zɔzɔme ɖia ƒo na woe?

Tosẽla metsɔa ɖeke le akɔntabubu na Mawu me o. Eyata nusi sɔ le Yehowa ŋku me wɔwɔ meɖi nya aɖeke le xɔsemanɔsitɔ gbɔ o. (Petro I, 4:3-5) Amesia tɔgbe ƒe ŋutilãmenudidi ƒe agbenɔnɔ me tsonuwo ɖia ƒo nɛ. (Psalmo 144:11-15a) Gake ame nyui ya tsia dzi ɖe nusi sɔ le Mawu ŋkume la wɔwɔ ŋu. Eléa Mawu ƒe dzidzenu dzɔdzɔewo me ɖe asi le eƒe nuwɔnawo katã me. Amesia ƒe nuwɔnawo me tsonuwo ɖia ƒo nɛ elabena Yehowae nye eƒe Mawu eye ekpɔa dzidzɔ si womate ŋu atsɔ ɖeke asɔ kplii o tsoa Dziƒoʋĩtɔ la subɔsubɔ me.—Psalmo 144:15b.

‘Mègaxɔ Nya sia Nya Dzi Se O’

Esi Salomo tsɔ amebebewu ƒe mɔwo nɔ sɔsɔm kple ŋuɖɔɖola ƒe mɔwo la, egblɔ bena: “Amebebewu xɔa nya sia nya dzi sena; ke nunyala léa ŋku ɖe eƒe afɔɖeɖe ŋu.” (Lododowo 14:15) Womate ŋu aflu nunyala bɔbɔe o. Mexɔa nya sia nya si wòse dzi sena alo zɔna ɖe ame bubuwo ƒe nukpɔsusu nu ko o, ke boŋ eléa ŋku ɖe eƒe afɔɖeɖewo ŋu nyuie. Edoa afɔ  na nya la ŋuti nyateƒeawo katã si na wòwɔa nu le nunya me.

Tsɔ nyabiabia si nye, “Ðe Mawu aɖe lia?” abe kpɔɖeŋu ene. Amebebewu ƒe nɔnɔmee nye be wòaxɔ nusi dzi ame geɖe alo ame ŋkutawo xɔ se la ade me. Gake aɖaŋudzela ya gbɔa dzi ɖi daa nyateƒeawo kpɔna. Edea ŋugble tso mawunyakpukpuiwo abe Romatɔwo 1:20 kple Hebritɔwo 3:4 ene ŋu. Le mawusubɔsubɔnyawo gome la, ŋuɖɔɖola mexɔa subɔsubɔhakplɔlawo ƒe nyawo dzi sena dzro ko o. ‘Edoa nya siwo wogblɔna le Mawu ƒe ŋkɔ me la kpɔna, nenye ɖe wotso Mawu gbɔ.’—Yohanes I, 4:1.

Aleke gbegbe nunya le eme enye si be míawɔ ɖe nuxlɔ̃ame si nye be ‘míagaxɔ nya sia nya dzi ase o’ dzii enye si! Anyo be amesiwo si wobia tso be woaxlɔ̃ nu amewo le Kristo-hamea me la koŋ nabu nya sia nya vevie. Ele be aɖaŋuɖolaa nanya nu tso nya blibloa katã ŋu. Ele be wòalé to ɖe nya siwo wòase tso akpa eveawo gbɔ la ŋu nyuie be wòanya nyateƒeawo katã si ana be kpɔtsɔtsɔ manɔ eƒe aɖaŋuɖoɖo ŋu o alo be made akpa aɖeke dzi o.—Lododowo 18:13; 29:20.

‘Woalé Fu Ayedzela’

Esi Israel-fia la ganɔ susu hem yi vovototo bubu si le nunyala kple bometsila dome dzi la, egblɔ bena: “Nunyala vɔ̃na, eye wòtsria vɔ̃; ke bometsila nyrãna, eye wòɖoa dzi ɖe eɖokui ŋu. Dɔmedzoetɔ wɔa bometsinu; woalé fu amesi ɖoa aye ɖe tame.”—Lododowo 14:16, 17.

Nunyala vɔ̃na na nugbegblẽwɔwɔ me tsonu vɔ̃wo. Eyata eɖɔa ŋu ɖo eye wòxɔa aɖaŋuɖoɖo ɖesiaɖe si akpe ɖe eŋu be wòaƒo asa na nuvɔ̃ɖiwɔwɔ. Vɔvɔ̃ ma tɔgbe mekpɔa ŋusẽ ɖe bometsila ya dzi o. Esi wòɖoa dzi ɖe eɖokui ŋu ta la, egbea ame bubuwo ƒe aɖaŋuɖoɖo xɔxɔ tosesẽtɔe. Esi dzi kuna amesia tɔgbe kabakaba ta la, ewɔa bometsinu. Gake nukatae woléa fu amesi nye ayedzela ɖo?

Gɔmesese evee le Hebri-gbe me nya si gɔme woɖe be “ɖoa aye ɖe tame [“tamebubu ŋutetewo,” NW]” la ŋu. Le gɔmesese nyoameŋutɔa nu la, ate ŋu afia nugɔmesese alo tagbɔɖaɖɛ. (Lododowo 1:4; 2:11; 3:21) Alo le gɔmesese manyoameŋutɔa nu la, nyagbɔgblɔa ate ŋu afia tameɖoɖo vɔ̃wo alo ayedzedze vɔ̃ɖi.—Psalmo 37:7; Lododowo 12:2; 24:8.

Ne nyagbɔgblɔ ma si nye ‘amesi nye ayedzela’ fia tamevɔ̃ɖola la, ke masesẽ be míanya nusitae woalé fu amesia tɔgbe o. Gake ɖe menye nyateƒe hã be nugɔmemaselawo ate ŋu alé fu nugɔmesela oa? Le kpɔɖeŋu me, xexeame léa fu amesiwo wɔa woƒe tamesusu ŋutetewo ŋudɔ hetiana be yewomanye ‘xexeame ƒe akpa aɖeke o’ la. (Yohanes 15:19) Woɖua fewu le Kristotɔ sɔhɛ siwo wɔa woƒe tamebubu ŋutetewo ŋudɔ hetsia tre ɖe wo hatiwo ƒe nyaƒoɖeamenu vɔ̃wo ŋu be yewoanɔ agbe ɖɔʋu la ŋu. Nyateƒeae nye be xexeame, si le vɔ̃ɖitɔ Satana Abosam si me la, lé fu nyateƒe tadeagulawo.—Yohanes I, 5:19.

“Ame Vɔ̃ɖitɔwo Abɔbɔ”

Vovototo bubu gale ŋuɖɔɖola, alo aɖaŋudzela, kple amebebewuwo dome. “Amebebewuwo tɔe nye bometsitsi, ke nunyalawo vàa sidzedze goŋgoŋ [wònyea tatsyɔnu nɛ, NW].” (Lododowo 14:18) Bometsitsi tso aƒe ɖe amebebewuwo gbɔ le esi woda ahe le nugɔmesese me ta. Eyata bometsinu koe wowɔna. Gake sidzedze ɖoa atsyɔ̃ na aɖaŋudzela ya abe alesi fiakuku ɖoa atsyɔ̃ na fiae ene.

Fia nyanu la gblɔ bena: “Ame vɔ̃ɖitɔwo abɔbɔ na ame nyuiwo, eye nuvɔ̃wɔlawo anɔ ame dzɔdzɔewo ƒe agbo nu.” (Lododowo 14:19) Ne míagblɔe bubui la, ame nyuiwo ava ɖu ame vɔ̃ɖiwo dzi mlɔeba. Bu alesi Mawu ƒe amewo ƒe xexlẽme le dzidzim ɖe edzii kple alesi woƒe agbenɔnɔ ɖɔ ʋu wu sasasã egbeae la ŋu kpɔ. Ne tsitretsiɖeŋulawo kpɔ yayra siawo siwo Yehowa le dudum kɔ ɖe esubɔlawo dzi la, aƒoe ɖe tsitretsiɖeŋulawo dometɔ aɖewo nu be ‘woabɔbɔ’ na Yehowa ƒe kpɔɖeŋu dziƒonyɔnu, si teƒe amesiamina susɔeawo le le anyigba dzi. Ne tsitretsiɖeŋula mawo yi edzi gbe tanana hã la, mlɔeba le Harmagedon me ya la woakpɔe adze sii  be Mawu ƒe habɔbɔa ƒe akpa si le anyigba dzi lae nya le habɔbɔa ƒe akpa si le dziƒo la teƒe vavã.—Yesaya 60:1, 14; Galatiatɔwo 6:16; Nyaɖeɖefia 16:14, 16.

‘Hiãtɔwo Nu Veve’

Esi Salomo nɔ ŋku lém ɖe amegbetɔ ƒe nɔnɔme ŋu la, egblɔ bena: “Ame dahe ƒe hatiwo ke hã léa fui; ke xɔlɔ̃ bɔ ɖe kesinɔtɔ si.” (Lododowo 14:20) Aleke gbegbe esia nye nyateƒe le amegbetɔ madeblibowo gomee nye si! Esi ɖokuitɔdidi xɔ amegbetɔwo me ta la, wolɔ̃a kesinɔtɔwo nu veve wu ame dahewo. Togbɔ be xɔlɔ̃ bɔ ɖe kesinɔtɔ si hã la, eƒe xɔlɔ̃dzedze sia manɔ anyi ɖaa o abe alesi ko eƒe kesinɔnuawo hã manɔ anyi ɖaa o ene. Ekema ɖe manyo wu ne míeƒo asa na ga zazã atsɔ adze xɔlɔ̃e alo ameŋkumenuwɔwɔ ƒe xɔlɔ̃dzedze ɖe ga ta oa?

Ke ne mía ɖokui me dzodzro anukwaretɔe na míekpɔe be míelɔ̃a ameŋkumenuwɔwɔ be míadze kesinɔtɔwo ŋu eye míedoa vlo ame dahewo ya ɖe? Ele be míanyae be Biblia meda asi ɖe ameŋkumekpɔkpɔ nuwɔna ma dzi o. Biblia gblɔ be: “Amesi doa vlo ehavi la, ewɔ nuvɔ̃; ke amesi vea hiãtɔ nu la, woayrae!”—Lododowo 14:21.

Ele be míaɖe ameŋububu afia amesiwo le nɔnɔme sesẽwo me tom. (Yakobo 1:27) Aleke míate ŋu awɔ esiae? To ‘xexemenu’ siwo wotsɔna léa agbe ɖe tee, siwo ate ŋu anye ga, nuɖuɖu, mlɔƒe, kple nudodo nana wo kpakple ɖetsɔtsɔ le wo me me. (Yohanes I, 3:17) Dzidzɔtɔe nye amesi vea amesiawo tɔgbe nu, elabena “dzidzɔ geɖe le nana me wu xɔxɔ.”—Dɔwɔwɔwo 20:35, NW.

Aleke Wònɔna na Wo?

Gɔmeɖose si nye be “nusi ke ame ƒãna la, esia ke wòaŋe” la ku ɖe aɖaŋudzela kple bometsila siaa ŋu. (Galatiatɔwo 6:7) Aɖaŋudzela wɔa nu nyui; ke bometsila ɖoa tame vɔ̃. Fia nyanu la bia bena: “Ðe amesiwo ɖoa vɔ̃ ɖe tame la, metrana oa?” Ŋuɖoɖoae nye ẽ; wotraa mɔ. “Ke amenuveve kple nyateƒe vana na amesiwo ɖoa nyuie ɖe tame.” (Lododowo 14:22) Amewo vea amesiwo wɔa nyui nu eye Mawu ƒe amenuveve hã nɔa wo dzi.

Esi Salomo tsɔ dzidzedzekpɔkpɔ do ka kple dɔsesẽwɔwɔ eye wòtsɔ kpododonu hã do ka kple nukpoloe ƒoƒo fũ dɔ boo aɖeke mawɔmawɔe la, egblɔ bena: “Agbagbadzedze hea viɖe vɛ; ke nu kpoloe ƒoƒo hea hiã vɛ.” (Lododowo 14:23) Enye nyateƒe be gɔmeɖose sia ku ɖe míaƒe gbɔgbɔmedɔwɔnawo hã ŋu. Ne míewɔ Kristotɔwo ƒe subɔsubɔdɔa moveviɖoɖotɔe la, míeŋea emetsonu si nye Mawu ƒe Nya la me nyateƒe si nana agbexɔxɔ tsɔtsɔ yi na ame bubuwo. Teokrasidɔ ɖesiaɖe si woade mía si wɔwɔ nuteƒewɔwɔtɔe ahe dzidzɔ kple dzidzeme vɛ na mí.

Lododowo 14:24 gblɔ be: “Nunyalawo ƒe kesinɔnu enye fiakuku; ke bometsilawo ƒe bometsitsi la, bometsitsi ko wònye.” Esia ate ŋu afia be nunya si aɖaŋudzelawo dzena agbagba be wòasu yewo si lae nye kesinɔnu na wo, eye wòzua fiakuku, alo atsyɔ̃ɖonu, na wo. Gake bometsilawo ya la, bometsitsi dzi koe wonɔna. Abe alesi numekugbalẽ aɖe gblɔe ene la, lododo sia agate ŋu afia be “kesinɔnu ate ŋu anye atsyɔ̃ɖonu na amesiwo zãnɛ le mɔ nyuitɔ nu la . . . [le esime] bometsilawo ƒe bometsitsi tsina wo si.” Eɖanye kae wòfia o, eme nyona na aɖaŋudzela wu bometsila.

Israel-fia la gblɔ bena: “Ðasefo nyateƒetɔ enye amexɔla ɖe agbe; ke aʋatsoɖasefo enye alakpatɔ.” (Lododowo 14:25) Togbɔ be esia nye nyateƒe le ʋɔnudrɔ̃nyawo me hã la, bu alesi wòku ɖe míaƒe subɔsubɔdɔa ŋui ŋu kpɔ. Míaƒe Fiaɖuƒegbeƒãɖeɖe kple nusrɔ̃lawɔwɔdɔa lɔ ɖaseɖiɖi tso Mawu ƒe Nya la me nyateƒea ŋu ɖe eme. Nyateƒe sia ɖea dzianukwaretɔwo tso alakpasubɔsubɔ me eye wòxɔa ame ɖe agbe. Ne míekpɔ mía ɖokui kple míaƒe nufiafia dzi nyuie la, míaxɔ mía ŋutɔwo kple amesiwo ɖoa to mí la ɖe agbe. (Timoteo I, 4:16) Esi míeyi edzi le dɔ sia wɔm la, mina míanɔ ŋudzɔ aɖe aɖaŋudzedze afia le míaƒe agbemenuwɔnawo katã me.

[Etenuŋɔŋlɔwo]

[Nɔnɔmetata si le axa 18]

Veviedodo Mawu ƒe Nya la me nyateƒe goglowo sɔsrɔ̃ hiã vevie hafi míate ŋu ade vovototo nyui kple vɔ̃ dome

[Nɔnɔmetata si le axa 18]

Ðe ŋutilãmenudidi ɖia ƒo na ame nyateƒea?