Nufiafia Vavãtɔwo Afikae Nàte Ŋu Akpɔ Wo Le?

ŊUTSU aɖe si le Tibet le nugoe aɖe si wotɔ ɖe ati ŋu, si me woŋlɔ gbedodoɖawo ɖo la trom. Exɔe se be ɣesiaɣi si yeatroe la, egbugbɔa nya siwo yegblɔ le gbedodoɖa me la gblɔna ake. Le aƒe gã aɖe me le India la, wogblẽ xɔ vi aɖe da ɖi si me wowɔa puja le—enye subɔsubɔ aɖe si me wote ŋu tsɔa nanewo abe lifi, seƒoƒo, kple nu bubuwo saa vɔe na mawuwo kple mawunɔwo ƒe nɔnɔmewɔwɔe vovovowo. Le teƒe aɖe le Italy si didi kilometa geɖe la, nyɔnu aɖe dze klo le sɔlemexɔ gã aɖe me ɖe Maria si nye Yesu dada ƒe nɔnɔmewɔwɔ ŋkume le gbe dom ɖa eye wòlé dzonu si nye rosario ɖe asi.

Ðewohĩ wò ŋutɔ èkpɔ alesi mawusubɔsubɔ kpɔ ŋusẽ ɖe amewo ƒe agbe dzii. Agbalẽ si nye The World’s Religions—Understanding the Living Faiths (Subɔsubɔha Siwo Le Xexeame—Woƒe Dzixɔsewo Me Ðeɖe) gblɔ be: “Mawusubɔsubɔ . . . nye amegbetɔ ƒomea ƒe akpa vevi aɖe eye wòkpɔtɔ le nenema le xexeame katã.” John Bowker gblɔ le eƒe agbalẽ si nye God—A Brief History me be: “Amegbetɔƒome aɖeke menɔ anyi kpɔ si kadodo menɔ woa kple Mawu dome kpɔ o, zi geɖe la Mawu nyea mɔfiala kple ŋusẽdoamela na wo. Alea ke wòle le amesiwo bua wo ɖokui mawumanɔsitɔwoe gɔ̃ hã dome.”

Le nyateƒe me la, mawusubɔsubɔ kpɔ ŋusẽ ɖe ame miliɔn geɖe ƒe agbe dzi. Ðe esia mefia be gbɔgbɔmenuhiahiãwo nɔa amegbetɔwo ŋu eye wodinɛ vevie oa? Susuŋutinunyala xɔŋkɔ Ðk. Carl G. Jung gblɔ le eƒe agbalẽ si nye The Undiscovered Self me ku ɖe didi si le ame me be woasubɔ amesi si ŋusẽ le wu ŋu be, “woate ŋu  akpɔ esia ƒe dzesiwo le amegbetɔ ƒe ŋutinya katã me.”

Ke hã ame geɖewo li siwo meɖenɛ fiana be yewoxɔ Mawu dzi se loo alo be yewotsɔ ɖe le mawusubɔsubɔ me o. Susu vevitɔ si ta ame aɖewo siwo kea ɖi Mawu ƒe anyinɔnɔ alo gblɔna be meli o wɔa nu nenema lae nye be susubɔsubɔha si me wonɔ la mete ŋu kpɔ woƒe gbɔgbɔmenuhiahiã gbɔ na wo o. Woɖe mawusubɔsubɔ gɔme be enye “dzixɔse aɖe me léle ɖe asi; nuteƒewɔwɔ me léle ɖe asi sesĩe; fɔléle ɖe nu ŋu; kuku ɖe mawuvɔvɔ̃ ŋu.” Numeɖeɖe sia fia be amesiame kloe léa mawusubɔsubɔ aɖe me ɖe asi le agbe me. Esia lɔ mawudzimaxɔselawo gɔ̃ hã ɖe eme.

Amegbetɔwo ƒe agbagbadzedze be yewoakpɔ yewoƒe gbɔgbɔmenuhiahiãwo gbɔ le ƒe akpe geɖeawo ƒe ŋutinya me la kplɔ wo to mɔ geɖewo dzi. Nusi do tso emee nye mawusubɔsubɔ dzixɔse vovovo siwo le xexeame godoo. Le kpɔɖeŋu me, togbɔ be subɔsubɔhawo katã kloe ɖea ŋusẽ aɖe si kɔkɔ wu dzi xɔse fiana hã la, woƒe dzixɔsewo ku ɖe amesi wònye alo nusi wònye ŋu la to vovo. Subɔsubɔha geɖewo hã hea susu yi xɔxɔ alo ɖeɖe ƒe vevienyenye dzi. Gake woƒe nufiafia ku ɖe nusi xɔxɔ nye kple alesi woawɔ akpɔe la ŋu to vovo. Esi wònye dzixɔse vovovowoe li la, aleke míawɔ anya nufiafia vavãtɔ si dzea Mawu ŋu?