“Womena Ta O”

YESU KRISTO gblɔ na eƒe nusrɔ̃lawo bena: ‘Dzidzɔtɔwoe mienye ne woadzu mi, eye woati mia yome, eye woaka aʋatso agblɔ nya vɔ̃ bubu ƒomeviwo katã ɖe mia ŋuti le tanye.’ (Mateo 5:11) Le ɖekawɔwɔ me kple Kristo ƒe nufiafia la, Yehowa Dasefowo nye dzidzɔtɔwo elabena, wogbe be ‘yewomanye xexeame ƒe akpa aɖeke o’ eye womedea akpa aɖeke kura dzi le dunyahehe me o, ke boŋ woléa nuteƒewɔwɔ blibo na Mawu me ɖe asi le nɔnɔme ɖesiaɖe me.—Yohanes 17:14; Mateo 4:8-10.

Ku ɖe tenɔnɔ sesĩe maʋamaʋã si me Yehowa Ðasefo lé ɖe asi le Soviet-dziɖuɖu si nɔ anyi tsã te, si nye dziɖuɖu si te Estonia hã nɔ ɣemaɣi, ŋu la, Luthertɔ mawunyaŋununyala kple Biblia-gɔmeɖela Toomas Paul, ŋlɔ ɖe eƒe agbalẽ si nye Kirik keset küla (Sɔlemeha si le Kɔƒea Titina) me be: “Ame ʋɛ aɖewo ŋutɔ koe se nusi dzɔ le April 1, 1951, ƒe fɔŋli me. Woho ɖe Yehowa Ðasefowo kple wo dzi delawo katã ŋu le dukɔa me—amesiwo wolé katã ƒe xexlẽme nye 279 eye wokplɔ wo dzoe yi Siberia . . . Wona mɔnukpɔkpɔ wo be ne wode asi agbalẽvi aɖe te tsɔ ɖee fia be yewogbe nu le yewoƒe xɔse gbɔ ko la womagakplɔ wo adzoe loo alo ade wo ga me o. . . . Amesiawo hekpe ɖe ame bubu siwo wolé do ŋgɔ ŋu la va le ame 353, wo dometɔ siwo ade 171 ya teti nye ame yeye siwo nɔ ha dem kple Ðasefoawo ƒe hamewo. Womena ta o—womena ta le Siberia gɔ̃ hã o. . . . Xɔse sia si le Yehowa Ðasefowo si mele [Estonia Luther] Sɔlemehaa me tɔ akpa gãtɔ si o.”

Yehowa Ðasefo siwo le xexeame katã ɖoa ŋu ɖe Mawu ŋu be wòakpe ɖe yewo ŋu be yewoayi edzi alé nuteƒewɔwɔ nɛ me ɖe asi ahaɖo to eyama le yometiti me gɔ̃ hã. Dzi dzɔa wo le esi wonyae be yewoƒe nuteƒewɔwɔ ƒe teƒeɖoɖoa lolo la ta.—Mateo 5:12.