“Yehowa Kple Gideon Tɔe Nye Yi La!”

FUTƆAWO sɔ gbɔ abe ʋetsuviwo ene, wole anyigba wɔnu la dome gblẽm keŋkeŋ. Enye nusi le dzɔdzɔm le ɣeyiɣi si me ʋɔnudrɔ̃lawo le Israel dzi ɖum la me, eye dzi ɖe le Israel-viawo ƒo. Ƒe adre sɔŋ, ne nukuwo nya te miemie ko la, Midiantɔwo kple Amalekitɔwo kpakple Ɣedzeƒeviwo hona ɖe wo ŋu eye woa kple woƒe kposɔ gbogboawo va ƒona ɖi bibibi ɖe anyigba la dzi va hana woƒe nuwo. Adzohaawo ƒe lãhawo va kaka ɖi le gbeɖuƒe dim, ale woɖua gbe dama ɖesiaɖe ƒiaƒiaƒia. Gake tedzi, nyi, alo alẽ aɖeke kura mele Israel-viawo si o. Midiantɔwo ƒe ŋɔdzidonamea nu sẽ ale gbegbe be nɔnɔmea va ƒoe ɖe Israel-vi siawo siwo da ahe kolikoli la nu be wowɔ bebeƒe, siwo woadzra nukuwo ɖo la, ɖe towo dzi kple agadowo me kpakple nɔƒe siwo yiyi sesẽ.

Nukae na wova le nɔnɔme wɔnublanui ma gbegbe me? Israel-vi xɔsegbelawo le alakpamawuwo subɔm. Ale wɔ Yehowa tsɔ wo de asi na ameteɖeanyilawo. Esi tenɔnɔ ɖe nɔnɔmea nu va glo Israel-viwo la, wodo ɣli yɔ Yehowa be wòaxɔ na yewo. Ðe wòaɖo to woa? Nukae míate ŋu asrɔ̃ tso nusi dzɔ ɖe Israel-viwo dzi la me?—Ʋɔnudrɔ̃lawo 6:1-6.

Agbledela Ðɔŋuɖoe loo alo ‘Ŋutsu Kalẽtɔe’?

Zi geɖe la, Israel-viwo zãna nyitsu kple luƒotasiaɖam tsɔ ƒoa lu siwo woxa lae le teƒe gbadza aɖe, si ya ƒona lena be yaƒoƒoa nate ŋu aƒo gbe kple tsroawo adzoe le nukua ŋutɔ ŋu ne wole lua gbɔm. Gake adzohaawo ƒe tameɖoɖo be woaha anyigba la dzi nuwo ƒe ŋɔdzia wɔe be luƒoƒo le teƒe siawo tɔgbe anye haɖeɖe ame ɖokui. Gideon ƒoa lu le weinfiãƒe aɖe—anye agado aɖe mee—le afisi Midiantɔawo makpɔe le o. (Ʋɔnudrɔ̃lawo 6:11) Le teƒe sia la, anɔ eme be agbɔsɔsɔ suesuesuewo me koe wòate ŋu aƒo lua le. Eyata nusianu si ko Gideon akpɔ azã le nɔnɔme sia me la ŋudɔ wɔmee wòle.

Kpɔe ɖa le susu me alesi wòawɔ nuku na Gideon esi Yehowa ƒe dɔla do ɖe edzi gblɔ nɛ bena: “Yehowa li kpli wò, wò ŋutsu kalẽtɔ!” (Ʋɔnudrɔ̃lawo 6:12) Esi wònye be Gideon le lu ƒom le ɣaɣlaƒe le weinfiãƒe aɖe ta la, edze ƒã be mase le eɖokui me be yenye kalẽtɔ o. Ke hã nya mawo ɖe Yehowa ƒe kaka ɖe Gideon dzi be ate ŋu anye kplɔla kalẽtɔ le Israel la fia. Gake ele be eya ŋutɔ hã nakpɔ kakaɖedzi.

Esi Yehowa de dɔ asi na Gideon be ‘wòaɖe Israel tso Midiantɔwo si me’ la, egblɔ ɖokuibɔbɔtɔe be: “Taflatse, nye aƒetɔ! Nuka tsɔ ge mala aɖe Israel? Kpɔ ɖa, nye ƒome enye suetɔ le Manase, eye nyee nye dɔmlɔea le fofonye ƒe me!” Gideon ŋuɖɔɖolaa, bia dzesi si aɖo kpe edzi nɛ be Mawu anɔ kpli ye yeasi Midiantɔwo, eye Yehowa lɔ̃ be yeawɔ Gideon ƒe didi si me susu le si ana wòakpɔ kakaɖedzi la dzi. Eyata Gideon trɔ asi le nuɖuɖu aɖe ŋu na eƒe amedzro si nye mawudɔla la, eye dzo do tso agakpe me hefiã nuɖuɖua katã. Esi vɔvɔ̃ lé Gideon eye Yehowa na dzi ɖo eƒo megbe la, Gideon ɖi vɔsamlekpui aɖe ɖe teƒe ma.—Ʋɔnudrɔ̃lawo 6:12-24.

‘Baal Neʋli Eɖokui Ta’

Menye Midiantɔwo ƒe ameteteɖeanyi lae nye Israel-viwo ƒe kuxi gãtɔ kekeake o. Ke boŋ alesi wotsɔ wo ɖokui wɔ kluvii na Baal-subɔsubɔ ye. Yehowa nye “Mawu ŋuʋãla,” eye ame aɖeke mate ŋu asubɔe wòadze eŋu ne egadea ta agu na mawu bubuwo o. (Mose II, 34:14) Eyata Yehowa de se na Gideon be wòagbã Baal ƒe vɔsamlekpui si nye fofoa tɔ eye wòalã asera, si le eŋu la ɖa. Esi Gideon le alesi fofoa kple ame bubuwo awɔ nui,  nenye be ewɔ nusia le ŋkeke me, vɔ̃m ta la, ewɔe le zã me, le eƒe dɔla ewo ƒe kpekpeɖeŋu me.

Gideon tɔ dzɔ be ewɔ nu le ŋuɖɔɖɔɖo me, elabena esi dua me tɔ siwo subɔa Baal va de dzesi eƒe nuwɔna sia si wobu be enye “bubumademade nu kɔkɔe ŋu” megbe la, wodi be yewoawui. Gake Gideon fofo, Yoas, zã nuŋububu si ŋu womate ŋu aʋli nya le o tsɔ de ŋugble kple ameawo be ne Mawue Baal nye la, aʋli eɖokui ta. Eyata Yoas na ŋkɔ si sɔ ɖe enu via be Yerub-Baal, si gɔmee nye “Baal newɔ dzre kplii.”—Ʋɔnudrɔ̃lawo 6:25-32.

Mawu yrana esubɔlawo ɖe tadedeagu vavãtɔ taʋiʋli dzinɔameƒotɔe ta ɣesiaɣi. Esi Midiantɔwo kple wo dzidelawo gava dze Israel-viwo ƒe anyigbaa dzi la, ‘Yehowa ƒe gbɔgbɔ yɔ Gideon me fũ.’ (Ʋɔnudrɔ̃lawo 6:34) Le Mawu ƒe gbɔgbɔ, alo dɔwɔŋusẽ, ƒe ŋusẽdoame te la, Gideon ƒo asrafohawo nu ƒu tso to siwo nye Manase, Aser, Zebulon, kple Naftali me va kpe wo.—Ʋɔnudrɔ̃lawo 6:35.

Dzadzraɖo na Aʋahoho

Togbɔ be fifia asrafo 32,000 sɔŋ le Gideon si hã la, ebia dzesi Mawu. Egblɔ be ne yeda lãgbalẽ ɖe lugbɔƒe eye zãmu dza ɖe lãgbalẽa ɖeɖeko dzi eye anyigba nɔ ƒuƒuie la, ke esia afia be Mawu aɖe Israel to ye dzi. Yehowa na nukunu sia dzɔ, eye Gideon gabia be wòana zãmu nadza ɖe anyigba boŋ dzi eye lãgbalẽ la nanɔ ƒuƒuie, eye esia hã va eme, ale wòkpɔ kakaɖedzi. Ðe Gideon le ŋu ɖɔm ɖo akpaa? Ao, manye nenemae o, elabena Yehowa lɔ̃ hewɔ eƒe didi be yeakpɔ kakaɖedzi ƒe biabiaa dzi nɛ. (Ʋɔnudrɔ̃lawo 6:36-40) Míekpɔa mɔ na nukunu mawo tɔgbe egbea ya o. Ke hã míate ŋu axɔ Yehowa ƒe mɔfiafia ahakpɔ kakaɖedzi tso eƒe Nya la me.

Azɔ Mawu gblɔ be Gideon ƒe asrafoawo sɔ gbɔ akpa. Ne wotsɔ aʋakɔ gã ma ɖu woƒe futɔwo dzii la, Israel-viwo ate ŋu aƒu asi akɔ be yewoxɔ na yewo ɖokui. Gake Yehowae wòle be aʋadziɖuɖu si woakpɔ la ƒe kafukafu nayi na. Aleke wokpɔ nya sia gbɔe? Ele na Gideon be wòawɔ Mose ƒe Sea me mɔfiame aɖe ŋudɔ ahabia tso amesiwo le vɔvɔ̃m si be woatrɔ adzo. Eva eme be eƒe ameawo dometɔ 22,000 sɔŋ trɔ dzo, eye ame 10,000 ko susɔ.—Mose V, 20:8; Ʋɔnudrɔ̃lawo 7:2, 3.

Le Mawu ƒe susu nu la, ameawo gasɔ gbɔ akpa kokoko. Ebia tso Gideon si be wòakplɔ wo ayi tɔ toe. Yudatɔ ŋutinyaŋlɔla Josephus gblɔ be Mawu na Gideon kplɔ eƒe aʋakɔawo yi tɔsisi aɖe to esime ŋdɔ nu sẽ. Eɖanye aleke kee nɔnɔmea nɔ o, Gideon lé ŋku ɖe alesi ameawo le tsia nomee la ŋu. Ame 300 koe tsɔ asi ɖeka le tsia kum le nonom hele ŋudzɔ ɖe futɔwo ƒe amedzidzedze hã ŋu. Kalẽtɔ 300 la koe ayi kple Gideon. (Ʋɔnudrɔ̃lawo 7:4-8) Kpɔe ɖa le susu me be yee ma le woƒe nɔnɔmea me. Esi futɔawo ƒe xexlẽme nye 135,000 sɔŋ ta la, àlɔ̃ ɖe edzi godoo be Yehowa ƒe ŋusẽ me koe dziɖuɖu ato ava, ke menye mia ŋutɔ miaƒe ŋusẽ me o!

Mawu gblɔ na Gideon be wòakplɔ dɔla aɖe ɖe asi ava kpɔ Midiantɔwo ƒe asaɖaa me ɖa. Esi woyi la, Gideon see ŋutsu aɖe le drɔ̃e lĩm na nɔvia, eye enumake nɔvia ɖe egɔme nɛ bena Mawu ɖoe be  yeatsɔ Midiantɔwo ade asi na Gideon. Nya ma tututue wòhiã be Gideon nase. Ekpɔ kakaɖedzi be Yehowa ana ye kple yeƒe ame 300-awo yewoaɖu Midiantɔawo dzi.—Ʋɔnudrɔ̃lawo 7:9-15.

Mɔ si Nu Woawɔ Aʋaa Le

Womã ame 300-awo ɖe aʋalɔgo etɔ̃ me, eye ame 100 le aʋalɔgo ɖesiaɖe me. Wotsɔ kpẽ kple ze gã ƒuƒlu na ame ɖesiaɖe. Woɣla akakati ɖe zea me. Gideon ƒe gbeɖeɖe gbãtɔe nye be: ‘Mikpɔ asinyenu, eye miawɔ nusi mawɔ! Ne meku kpẽa la, ekema miaku mia tɔwo hã ahado ɣli bena: “Yehowa kple Gideon tɔe nye yi la!”’—Ʋɔnudrɔ̃lawo 7:16-18, 20.

Israel-vi aʋawɔla 300-awo wɔ dzadzadza yi ɖatsi tre ɖe futɔawo ƒe asaɖa blibo la toga. Anɔ abe fiẽ ga ewo me lɔƒo—esime woɖɔli ŋudzɔnɔlawo megbe teti. Edze abe esia nye ɣeyiɣi nyuitɔ be woadze futɔwo dzi ene, elabena axɔ ɣeyiɣi vie hafi dzɔla yeyeawo ate ŋu akpɔ nu le vivitia me.

Aleke gbegbe ŋɔdzi alé Midiantɔawo fifiae nye si! Elabena le vome zi ɖeka kasia ze 300-awo gbagbã, kpẽ 300-awo kuku, kple ame 300-awo ƒe ɣlidodowo, va xɔ ɖe ɖoɖoezizi si li la teƒe. Azɔ hã, ɣli si wodo be “Yehowa kple Gideon tɔe nye yi la!” koŋ gana dzidzi ƒo Midiantɔawo eye woawo ŋutɔ te ɣlidodo hoo. Zitɔtɔa na womegate ŋu nya amesi nye futɔ kple amesi menyee o. Ame 300-awo tɔ ɖe woƒe teƒeteƒewo esi Mawu na futɔawo tsɔ woa ŋutɔwo ƒe yiwo le wo nɔewo wumee. Asaɖaa me tɔ aɖewo te sisi, woxe mɔ na sisilawo, wodɔ amewo wonyã futɔawo ɖe nu ŋkubiãtɔe eye wosi wo gbidigbidi heto esia me tsi Midiantɔwo ƒe ŋɔdzidonamea nu keŋkeŋ. Ale wɔ ŋutasesẽ le ame ŋu kutɔkutɔe ƒe amedzidzedze hena ɣeyiɣi didi la wu enu mlɔeba.—Ʋɔnudrɔ̃lawo 7:19-25; 8:10-12, 28.

Le aʋadziɖuɖu sia megbe gɔ̃ hã la, Gideon bɔbɔ eɖokui. Esi Efrayimtɔwo, amesiwo anɔ eme be wobui be woda yewo ɖe anyi le esi womeyɔ yewo na aʋa la wɔwɔ o ta, he dzre kplii vevie la, eɖo nya ŋu na wo le dɔmefafa me. Eƒe nyaŋuɖoɖo fafɛa na woƒe dziku la nu fa.—Ʋɔnudrɔ̃lawo 8:1-3; Lododowo 15:1.

Fifia esi wole ŋutifafa me ta la, Israel-viawo bia tso Gideon si be wòanye yewoƒe fia. Tetekpɔ ka gbegbee nye si! Gake Gideon gbe. Meŋlɔ amesi ƒe ŋusẽ mee woɖu Midiantɔwo dzi le la be o. Egblɔ be: “Nye ŋutɔ alo vinyeŋutsu míaɖu fia ɖe mia dzi o, ke boŋ Yehowa neɖu fia ɖe mia dzi!”—Ʋɔnudrɔ̃lawo 8:23.

Gake menye ɣesiaɣie Gideon wɔ nyametsotso si sɔ o le esi wònye ame madeblibo ta. Le susu aɖe, si womegblɔ o, nu la, Gideon tsɔ aboyonuawo ƒe ɖe wɔ kɔmewu hetsɔ da ɖe eƒe du me. Nuŋlɔɖia gblɔ be Israel blibo la te kɔmewu la ‘subɔsubɔ.’ Wode ta agu nɛ, eye wòzu mɔ̃ na Gideon kple eƒe aƒe la gɔ̃ hã. Ke hã meva zu trɔ̃subɔla keŋkeŋ o, elabena Ŋɔŋlɔawo yɔe be enye ŋutsu si xɔ Yehowa dzi se.—Ʋɔnudrɔ̃lawo 8:27; Hebritɔwo 11:32-34.

Nusɔsrɔ̃ Siwo Le Eme na Mí

Gideon ƒe ŋutinya nye nuxlɔ̃ame kple dzideƒoname siaa na mí. Exlɔ̃ nu mí be ne míenɔ agbe maɖɔʋu eye Yehowa ɖe eƒe gbɔgbɔ kple yayra ɖa le mía dzi la, míaƒe nɔnɔme le gbɔgbɔ me anɔ abe amesiwo da ahe kolikoli siwo ƒe anyigba dzi ʋetsuviwo va ɖu nu le ƒiaƒiaƒia ene. Míele ɣeyiɣi sesẽwo me eye mele be míaŋlɔ be gbeɖe o be Yehowa ƒe yayrae ‘wɔa ame kesinɔtɔ eye mekpea vevesese ɖe eŋu o.’ (Lododowo 10:22) Míexɔa Mawu ƒe yayra elabena ‘míesubɔnɛ kple dzi blibo kpakple luʋɔ blibo.’ Gake esia mawɔmawɔ ana wòagbe nu le mía gbɔ.—Kronika I, 28:9.

Míate ŋu akpɔ dzideƒo tso Gideon ƒe ŋutinyaa me, elabena eɖo kpe edzi be Yehowa ate ŋu aɖe eƒe amewo tso nɔnɔme doŋɔdziname ɖesiaɖe me, eye ate ŋu awɔ esia to amesiwo dze abe ame beliwo alo wɔnamanɔŋutɔwo ene gɔ̃ hã zazã me. Alesi Gideon ƒe ame 300-awo te ŋu ɖu Midiantɔ 135,000 sɔŋ dzi la ɖo kpe Mawu ƒe ŋusẽ si mele gbɔgblɔ me o la dzi. Nɔnɔme sesẽ tsodzikaƒonamewo ate ŋu anɔ fu ɖem na mí eye wòadze abe míaƒe futɔwo sɔ gbɔ wu mí kura ene. Gake Biblia ƒe nuŋlɔɖi si ku ɖe Gideon ŋu dea dzi ƒo na mí be míaka ɖe Yehowa dzi, amesi ayra amesiwo katã ɖea Eyama dzixɔxɔse fiana eye wòaɖe wo hã.