Kpekpeɖeŋu le Seselelãmewo Dzi Ðuɖu Me

ÐE SESELELÃME manyomanyowo ɖea fu na wò ɣeaɖewoɣia? Ðe nu tena ɖe dziwò, nèdoa dziku, alo tɔtɔna kabakabaa? Ðe wòwɔ abe agbemedzimaɖitsitsiwo wu tsɔtsɔ na wò enea? Nukae ate ŋu akpe ɖe ŋuwò?

Nu ɖea fu na amesiame ɣeaɖewoɣi le agbe me godoo. Ne míete ŋu kpɔa seselelãme ƒe fuɖenamewo gbɔ nyuie la, wonana agbea vivina. Gake Biblia lɔ̃ ɖe edzi be “[nuteɖeamedzi] doa bometsila nunyalawo.” (Nyagblɔla 7:7) Le xexe sia si me ŋutasẽnuwɔwɔ kple afɔkuwo bɔ ɖo me la, amekae li si dzi nusiwo dzɔna metena ɖo o? Ke hã, Ŋɔŋlɔawo gagblɔ be: “Enyo wu na amegbetɔ be, wòakpɔ dzidzɔ le eƒe dɔwɔwɔ ŋu.” (Nyagblɔla 3:22) Eyata be agbe navivi mía nu wu la, ele be míatu seselelãme nyui siwo ana dzi nadzɔ mí ɖo. Aleke míawɔ seselelãme nyuiwo naxɔ aƒe ɖe mía me eye míaɖu gbegblẽawo dzi?

Zi geɖe la, ne míeɖe afɔ nyuiwo la, enana alesi gbegbe nu ate ɖe mía dzii la dzi aɖe akpɔtɔ. Le kpɔɖeŋu me, ne míetsi dzi ɖe nusiwo ŋu míate ŋu awɔ naneke le o ŋuti la, ɖe manyo be míawɔ tɔtrɔwo le nusiwo míewɔna gbesiagbe ŋu alo adzo le afisi míele wu be míana nusiawo naxɔ míaƒe susu me anɔ fu ɖem na mí ɖaa oa? Zɔzɔ aɖi tsa dziɖeɖitɔe, ha fakɔnamewo sese, kamedefefe aɖe si bia ŋusẽ zazã wɔwɔ, alo dɔmenyonu aɖe wɔwɔ na ame aɖe si hiãe la ate ŋu ana míakpɔ gbɔdzɔe eye wòana dzi nadzɔ mí.—Dɔwɔwɔwo 20:35.

Gake ŋuɖoɖo ɖe mía Wɔla la ŋue nye mɔ nyuitɔ kekeake si dzi míato aɖu tamebubu tso dziɖeleameƒonuwo ŋu dzi. Ne míete ŋu le dziɖeleameƒonuwo ŋu bubu dzi ɖum o la, ele be ‘míatsɔ míaƒe dzimaɖiwo katã ada ɖe Mawu dzi’ to gbedodoɖa me. (Petro I, 5:6, 7) Biblia ka ɖe edzi na mí be: “Yehowa tsɔ ɖe amesiwo ƒe dzi gbã gudugudu la gbɔ, . . . Ame dzɔdzɔe ƒe fukpekpewo sɔ gbɔ, ke Yehowa ɖenɛ tsoa wo katã me.” (Psalmo 34:19, 20) Aleke miawɔ aka ɖe edzi be Mawu anye “kpeɖeŋutɔ kple xɔnametɔ” na mí? (Psalmo 40:18) Miate ŋu awɔ esia to Biblia sɔsrɔ̃ kple ŋugbledede le kpɔɖeŋu siwo fia alesi Mawu tsɔ ɖe le esubɔlawo ƒe nyonyo me ŋutɔŋutɔe me ŋu.