‘Kesinɔtɔe Nènye le Mawu Gbɔa’?

LO GBOGBO siwo Yesu Kristo do tsɔ na amewo bu tame la dometɔ ɖeka ku ɖe anyigbatɔ kesinɔtɔ aɖe ŋu. Esi anyigbatɔ sia nɔ agbagba dzem be yeana yeƒe etsɔme nanɔ didie ta la, eɖoe be yeatu ava siwo lolo wu la ɖe xoxoawo teƒe. Ke hã, woyɔ ŋutsua le Yesu ƒe lododoa me be “ame tsibome.” (Luka 12:16-21) Biblia gɔmeɖeɖe geɖewo gɔ̃ hã zã nya “gegeme” nɛ. Nukatae wogblɔ nya ma gbegbe ɖe eŋu?

Edze ƒã be kesinɔtɔ sia mebu Mawu ŋu le eƒe ɖoɖoawo wɔwɔ me o; eye mekafu Mawu ɖe anyigbaa ƒe nu gbogboawo wɔwɔ ta o. (Mateo 5:45) Ðe eteƒe la, eƒo adegbe be: “Luʋɔ, èkpɔ nu nyui geɖe, siwo nèdzra ɖo hena ƒe geɖewo; gbɔ ɖe me, ɖu nu, no nu, na dzi nadzɔ wò.” Ẽ, ebui be yeƒe agbagbadzedze me tsonuwo anye “gli kɔkɔwo” si akpɔ ye ta.—Lododowo 18:11.

Esi nusrɔ̃la Yakobo nɔ nu xlɔ̃m ku ɖe dadagbɔgbɔ sia tɔgbe ŋu la, eŋlɔ bena: “Azɔ la miheyi, mi amesiwo gblɔna bena: Egbe alo etsɔ míayi du si kple du si me, eye míanɔ afima ƒe ɖeka, eye míatsa asi, eye míakpɔ viɖe! Gake mienya nusi ava dzɔ etsɔ o; elabena nukae nye miaƒe agbe mahã? Elabena dzudzɔ, si dzena ɣeyiɣi kpui aɖe, eye emegbe la megadzena o la, ke mienye.”—Yakobo 4:13, 14.

Alea tututue wòva eme na Yesu ƒe lododoa me kesinɔtɔ lae, esi wogblɔ nɛ be: “Ame tsibome, zã sia me ke woabia wò agbe le asiwò me; ke nusiwo nèdzra ɖo la, ameka tɔ woazu mahã?” Abe dzudzɔ si wokpɔna sẽ ko enu yina ene la, kesinɔtɔ la aku hafi eƒe mɔkpɔkpɔ nava eme. Nukae esia fia? Yesu gblɔ be: “Ale amesi le nu nyuiwo dzram ɖo na eɖokui, eye kesinɔnuwo mele esi le Mawu gome o la, le enye si.” ‘Kesinɔtɔe nènye le Mawu gbɔa’?