Hehe Ka Ƒomevi Xɔxɔe Ana Agbe Nadze Edzi na Wò?

ÐE KUXI aɖewo gbɔ kpɔkpɔ sesẽ na wò kpɔ ale gbegbe be mèkpɔ goléƒe aɖeke o, eye nèse le ɖokuiwo me ko abe tɔsisi aɖee lé wò kplɔ dzo yinae enea? Wò ya de ŋugble le fukpekpe si gbegbe wòate ŋu ahe vɛ ne mèkpɔ kuxi mawo dometɔ ɖeka alo geɖe gbɔ nyuie o ŋu kpɔ! Womedzi mía dometɔ aɖeke kple ŋutete be wòakpɔ kuxiwo gbɔ dzidzedzetɔe, ahawɔ nyametsotso nyuiwo ɣesiaɣi o. Esia tae hehe nyui xɔxɔ le vevie ɖo. Afikae nàte ŋu akpɔ hehe si ana nàkpɔ agbemekuxiwo gbɔ dzidzedzetɔe le?

Ame geɖe, ɖeviwo kple tsitsiawo siaa, gblɔna be agbalẽnyanya le vevie ŋutɔ. Agbalẽnyalagã aɖewo kura gɔ̃ hã gblɔ be “yewoka ɖe edzi ŋutɔŋutɔ be ne ame mede suku kɔkɔ o la, mate ŋu akpɔ dɔ ɖɔʋu aɖeke awɔ o.” Ke hã, amegbetɔ ƒe nuhiahiã aɖewo li siwo gbɔ agbalẽnyanya mate ŋu akpɔ o. Le kpɔɖeŋu me, ɖe suku geɖe dede ate ŋu ana nàzu dzila, srɔ̃tɔ, alo xɔlɔ̃ ɖɔʋua? Le nyateƒe me la, amesiwo ŋu wodea bubui le woƒe agbalẽnyanya deŋgɔ ta dometɔ aɖewo ate ŋu ava zu ame gbegblẽwo, woƒe ƒomewo agbã, alo woawu wo ɖokui kura gɔ̃ hã.

Ame aɖewo trɔ ɖe subɔsubɔhawo ŋu be yewoaxɔ mɔfiafia, gake dzi koe va ɖe le wo ƒo elabena womekpɔ aɖaŋuɖoɖo wɔdɔ si ana woakpɔ agbemekuxiwo gbɔ o. Esi Emilia * si nye Mexicotɔ nɔ esia ŋuti nuteƒekpɔkpɔ gblɔm la, egblɔ be: “Ƒe 15 ye nye esia si mese le ɖokuinye me be mía kple srɔ̃nye míagate ŋu anɔ anyi ayi ŋgɔe o. Míewɔa dzre ɣesiaɣi. Nyemete ŋu na wòdzudzɔ ahanono o. Enuenu la, megblẽna mía vi sueawo ɖeɖe ɖe aƒeme henɔa tsatsam nɔa srɔ̃nyea dim. Nye dzi sea veve ale gbegbe. Mede sɔleme zi geɖe be maxɔ aɖaŋuɖoɖo si ana makpɔ kuxia gbɔ. Togbɔ be woxlẽa Biblia ɣeaɖewoɣi hã la, nyemese aɖaŋuɖoɖo aɖeke si ku ɖe nye kuxia ŋu tẽ kpɔ o; eye ame aɖeke hã mete ɖe ŋunye kpɔ gblɔ nusi hiã be mawɔ nam o. Anyinɔnɔ ɖe sɔlemexɔ me hena ɣeyiɣi aɖe, agbugbɔ anɔ gbedodoɖa aɖewo gblɔm, mena dzidzemem o.” Dzi ate ŋu aɖe le ame aɖewo ƒo ne wokpɔe be woa ŋutɔwo woƒe subɔsubɔha ŋgɔnɔlawo mele agbe nyui aɖeke kura nɔm o. Le esia taa, ame geɖe megakana ɖe subɔsubɔhawo ƒe nufiafia alo hehe si wonana dzi, be ana yewoakpɔ dzidzedze le agbe me o.

Eyata, ɖewohĩ àbia ɖokuiwò be, ‘Hehe ka ƒomevie wòle be maxɔ be makpɔ dzidzedze le agbe me?’ Ðe Kristotɔnyenye vavãtɔ ate ŋu ana woakpɔ nyabiase vevi sia ƒe ŋuɖoɖoa? Míadzro nya sia me le nyati si kplɔe ɖo me.

[Etenuŋɔŋlɔ]