“Wole Ʋuwo me Zɔ Atsiaƒu Dzi”

WOTSƆ gadzẽ wɔ nɔnɔmetata aɖe si me melikula aɖe le agbagba dzem be yeaku yeƒe meli to tsi kple ya sesẽwo dome, le Gloucester si le Massachusetts, U.S.A. melidzeƒea ƒe ŋku me. Kpememe ma nye Gloucester tɔƒodela akpe geɖe siwo ku le ƒu dzi la ƒe ŋkuɖodzinu. Woŋlɔ Psalmo 107:23, 24 me nyawo ɖe kpememea gɔme kple le ŋkuɖodzikpe aɖe si te ɖe eŋu dzi, be: “Wole ʋuwo me zɔ atsiaƒu dzi, eye wotsa asi le tɔ gãwo dzi. Wokpɔ Yehowa ƒe dɔwɔwɔwo kple eƒe nukunuwo le tɔ gɔme.”

Afɔku gã aɖe le dɔwɔwɔ le Atlantik-ƒua dzi me. Amesiwo sɔ gbɔ vie wu 30,000 ye le Gloucester fifia, eye ŋutsu siwo bu woƒe agbe esime wonɔ lã ɖem le ƒua dzi la de ame 5,368 sɔŋ le ƒe siwo va yi me. Nusi woŋlɔ ɖe ŋkuɖodzikpea dzi xlẽ be: “Yaƒoƒo sesẽwo kple ƒutsotsoe gã siwo dzieheɣedzeƒeya gblẽnu aɖe he vɛ ye wu wo dometɔ aɖewo le vome. Wo dometɔ aɖewo ku tsi ʋuvi siwo me woawo ɖeɖe nɔ la me esi ʋuawo tra mɔ dzo le meli gãa si te ŋu nana woɖona gota gbɔ. Tsi kple ya sesẽwo na meli aɖewo do go kple wo nɔewo si na wonyrɔ. Meli gãwo lɔ wo dometɔ aɖewo.”

Ŋkuɖodzikpea nye agbagba siwo lãɖelawo dze kple afɔku siwo me woto ƒe alafa geɖe ŋuti ɖaseɖiɖi wɔnublanui aɖe. Kpɔ avi si gbegbe veveselawo afa ɖe wo srɔ̃wo, fofowo, nɔviŋutsuwo, kple viŋutsuwo ta ɖa. Ke hã, Yehowa Mawu meŋlɔa ahosiwo, tsyɔ̃eviwo, alo amesiwo bu woƒe agbe le atsiaƒu dzi la be o. Apostolo Yohanes ƒo nu tso nane si adzɔ le etsɔme ŋu be: “Atsiaƒu ɖe ame kuku, siwo le eme la, hena, eye ku kple tsiẽƒe woɖe ame kuku, siwo le wo si la, hena.” (Nyaɖeɖefia 20:13) Ne wova fɔ amesiwo nɔ “ʋuwo me zɔ atsiaƒu dzi” ɖe tsitre la, ekema woakpɔ ‘Yehowa ƒe dɔwɔwɔ’ wɔnukuwo ŋutɔŋutɔ.