Xɔ Hehe Nyuitɔ Kekeake si Li!

BIBLIA ƒo nu tso Yehowa Mawu ŋu be enye nuwo katã, kple amegbetɔwo siaa, Wɔla. (Mose I, 1:27; Nyaɖeɖefia 4:11) Abe Nufialagã ene la, efia nu atsu kple asi gbãtɔ, Adam kple Xawa, eye efia wo alesi woanɔ agbee le Eden-bɔ dzeania me. Eƒe tameɖoɖoe wònye be yeayi edzi ana hehe wo ahalé be na wo tegbee. (Mose I, 1:28, 29; 2:15-17; Yesaya 30:20, 21) Wò ya de ŋugble tso mɔkpɔkpɔ ma ŋu kpɔ ko!

Ke hã, nublanuitɔe la, ame eve gbãtɔ siawo gblẽ nusianu dome. Woƒe tomaɖomaɖo wɔe be amegbetɔƒomea ƒe agbe vlo nɔnɔ kple gbɔdzɔgbɔdzɔ le ŋutilã me dze egɔme. (Mose I, 3:17-19; Romatɔwo 5:12) Esime Biblia nɔ nu ƒom tso dzidzime siwo nɔ agbe le amegbetɔ wɔwɔ vɔ megbe teti dometɔ aɖewo ŋu la, egblɔ be: “Yehowa kpɔ bena, amegbetɔwo ƒe vɔ̃ɖivɔ̃ɖi va sɔ gbɔ le anyigba dzi, eye woƒe tamesusuwo kple dzimedidiwo nye vɔ̃ ko ɖaa.”—Mose I, 6:5.

Ƒe 4,500 kloe nye esia si Yehowa gblɔ be amegbetɔ ƒe dzi lɔ̃a nu vɔ̃ɖi ɣesiaɣi, eye ameƒomea ƒe nɔnɔme gblẽ ɖe edzi fifia wu tsã. Alakpadada megakpea ŋu na ame geɖe o, wofia fi, eye wodzea ame bubuwo dzi. Kuxiwo le dzidzim ɖe edzi gbesiagbe, evɔ ɖetsɔtsɔ le ame bubuwo ƒe nyonyo me ya megabɔ o. Ðe nu megblẽ le ƒomedodo si le amewo dome, kple esiwo le ƒometɔwo gɔ̃ hã dome, ŋu oa? Ke hã, mele be woabu fɔ Mawu ɖe nɔnɔme siwo li fifia ta, alo asusu be metsɔ ɖeke le kuxi siwo li egbea me o. Yehowa tsɔ ɖe le amegbetɔwo ƒe nyonyo me ɣesiaɣi, eye ele klalo be yeafia nu amesiwo dia eyome mɔ hena mɔfiame si ana woakpɔ dzidzɔ le agbe me. Ƒe akpe 2,000 enye esia esi wòdɔ Via, Yesu Kristo, ɖe anyigba dzi eye wòɖe Eƒe didi be yeafia nu amesiwo dina be yewoakpɔ dzidzedze le agbe me fia. Yesu ɖo hehexɔxɔ ƒe kpɔɖeŋu deblibo na mí elabena Nufialagã lae nae hehe ƒe gbogbo aɖewo siwo mele xexlẽ me o.

Kristotɔnyenye Vavãtɔ​—Naa Hehe Ame

Yesu Kristoe ɖo Kristotɔnyenye vavãtɔ si nye agbemɔ si wotu ɖe lɔlɔ̃ dzi la anyi. Kristotɔnyenye vavãtɔ bia be ame ƒe tamesusuwo kple nuwɔnawo katã nawɔ ɖeka kple Mawu ƒe lɔlɔ̃nu wɔwɔ bena wòahe bubu kple kafukafu vɛ na eƒe ŋkɔa. (Mateo 22:37-39; Hebritɔwo 10:7) Yehowa, Yesu Fofo, ye nɔ megbe na Yesu ƒe nufiafia siwo kplɔa ame toa agbemɔ sia dzi. Míexlẽ kpekpeɖeŋu si Yesu xɔ tso Mawu gbɔ ŋu nya le Yohanes 8:29 be: ‘Amesi dɔm ɖa la, li kplim, eye megblẽ nye ɖeka ɖi o, elabena nye la mewɔa nusi dzea eŋu ɖaa.’ Ẽ, Yesu xɔ kpekpeɖeŋu kple mɔfiame tso Fofoa gbɔ le eƒe subɔsubɔdɔa wɔɣi katã. Yesu yomedzela gbãtɔwo medze ŋgɔ agbemekuxiwo mɔfiafia maxɔmaxɔe o. Yehowa to Via dzi fia nu wo. Yesu ƒe nufiafiawo kple kpɔɖeŋuwo yomedzedze na be wozu ame ɖɔʋuwo. Nenema kee wòle le eyomedzela siwo li egbea hã gome.—Kpɔ aɖaka si ƒe tanyae nye “Ŋusẽ Nyui si Yesu ƒe Nufiafiawo Kpɔna ɖe Ame Dzi,” le axa 6.

Kristotɔnyenye vavãtɔ ƒe akpa ɖedzesi ɖekae nye alesi eƒe amehehe kpɔa ŋusẽ ɖe tamesusu kple dzi dzie, eye wòtrɔna ame le ememe ke. (Efesotɔwo 4:23, 24) Abe kpɔɖeŋu ɖeka pɛ ko ene la, de ŋugble le nusi Yesu fia ku ɖe nuteƒewɔwɔ  na ame srɔ̃ ŋu, ŋu kpɔ: “Miese wogblɔ bena: Megawɔ ahasi o; ke nye la mele egblɔm na mi bena: Amesiame, si ke kpɔ nyɔnu aɖe wòdzroe la, ewɔ ahasi kplii xoxo le eƒe dzi me.” (Mateo 5:27, 28) Yesu to nya siawo gbɔgblɔ me nɔ eƒe nusrɔ̃lawo fiam be ele be ame ƒe dzime nadza, eye be ne womewɔ susu manyomanyo kple dzodzro vɔ̃wo dzi o hã la, woate ŋu agblẽ nu vevie. Ðe menye nyateƒe be susu vɔ̃wo ate ŋu ana woadze agɔ le Mawu dzi ahawɔ nu vevi ame bubuwo oa?

Eyatae Biblia ɖo aɖaŋu sia be: “Migana miaƒe anyinɔnɔ naɖi xexe sia me o, hafi mitrɔ miaƒe nɔnɔme to miaƒe tamesusu ƒe yeyewɔwɔ me boŋ, bene miadzro nusi nye Mawu ƒe lɔlɔ̃nu, si nyo, eye wòdzea eŋu nyuie, eye wòle blibo la me akpɔ.” (Romatɔwo 12:2) Ðewohĩ àbia be: ‘Ðe woate ŋu ato amehehe dzi atrɔ ame ƒe tamesusu wòazu yeye ŋutɔŋutɔa?’ Tamesusu wɔwɔ wòazu yeye bia be woahe susua wòanɔ nu bubu ŋu to gɔmeɖose kple mɔfiafia siwo le Mawu ƒe Nya me dede eme dzi. Míate ŋu awɔ esia ne míexɔ hehe si Mawu nana to eƒe Nya la dzi.

Ena Wotrɔ Nɔnɔme

“Mawu ƒe nya la le agbe, eye wòsẽa ŋu.” (Hebritɔwo 4:12) Egakpɔtɔ le ŋusẽ kpɔm ɖe amewo dzi, hele eɖem fia be yenye agbalẽ si me nyawo wɔa dɔ ɣesiaɣi. Ate ŋu aʋã ame wòatrɔ agbenɔnɔ, axɔ Kristotɔnyenye vavãtɔ, ahatrɔ azu ame ɖɔʋu. Kpɔɖeŋu siwo gbɔna ɖe asixɔxɔ si le Biblia ƒe amehehe ŋu fia.

Emilia, amesi ƒe nya míegblɔ le nyati si do ŋgɔ na esia me, gblɔ be: “Agbagba dzedze le ɖokuinye si ɖeɖe mena nɔnɔmeawo ɖɔ ɖo le nye aƒeme o. Esi Yehowa Ðasefowo dze Biblia sɔsrɔ̃ gɔme kplim la, meva de dzesii be mɔkpɔkpɔ li eye medze egɔme be matrɔ nye nɔnɔme. Mesrɔ̃e be ele be magbɔ dzi ɖi wu tsã, eye mele be manɔ dziku dom heliheli o. Ɣeyiɣi kpui aɖe megbe la, srɔ̃nye hã va lɔ̃ míesrɔ̃ nua ɖekae. Menɔ bɔbɔe nɛ be wòadzudzɔ ahanono o, gake ete ŋui mlɔeba. Esia ʋu mɔnukpɔkpɔ yeye na mí be míagadze míaƒe srɔ̃ɖeɖea gɔme yeyee. Fifia míezu Kristotɔ siwo le dzidzɔ kpɔm, eye míele Biblia me gɔmeɖose nyuiwo ƒãm ɖe mía viwo me.”—Mose V, 6:7.

Hehe si Kristotɔnyenye vavãtɔ nana ate ŋu awɔe be ame nadzudzɔ nugbegblẽwɔwɔ kple agbegbegblẽnɔnɔ. Nenema tutue wònɔ le Manuel gome. * Esi wòxɔ ƒe 13 la, eʋu le aƒeme eye wòdze gbekui nono gɔme. Eteƒe medidi o edze heroin zazã. Enɔ agbegbegblẽ kple ŋutsuwo kple nyɔnuwo siaa be wòate ŋu akpɔ mlɔƒe kple ga. Ɣeaɖewoɣi la, Manuel da adzo amewo hã hafi kpɔa nu ɖuna. Ezãna atike muamewo ɣesiaɣi kloe. Le eƒe ŋutasesẽnuwɔna ta la,  wodee mɔ zi geɖe. Esi wònɔ gaxɔ me ɣeaɖeɣi hena ƒe ene la, eva kpɔ gome le aʋawɔnuwo dzadzra me. Manuel yi edzi kpe eƒe agbenɔnɔ me tsonuwo ƒe fu esi wòɖe srɔ̃ megbe kura gɔ̃ hã. Egblɔ be: “Kokloxɔ aɖee va zu míaƒe aƒe. Megaɖoa ŋku edzi kokoko be anyikpe aɖewo dzie srɔ̃nye ɖaa nu lena. Míaƒe nɔnɔmea va gblẽ ɖe edzi ale gbegbe be nye ƒometɔwo ŋutɔ de dzi ƒo na srɔ̃nye be wòagbem.”

Nukae trɔ eƒe agbenɔnɔ? Manuel ɖo eŋu be: “Ame nyanyɛ aɖe va mía ƒeme va ƒo nu na mí tso Biblia ŋu. Melɔ̃ wòge ɖe aƒea me kple susu be mana wòanya be Mawu aɖeke meli si tsɔa ɖe le eme na amegbetɔwo o. Mesusui be nye nɔnɔmea ŋutɔ nye eƒe anyimanɔmanɔ ƒe kpeɖodzi ɖeka. Ewɔ nuku nam be Ðasefoa gbɔ dzi ɖi eye wòde bubu ŋunye, eyata melɔ̃ be made kpekpeawo le Fiaɖuƒe Akpata me. Togbɔ be amesiwo le afima dometɔ aɖewo nya amesi ƒomevi menye hã la, wodo gbe nam xɔlɔ̃tɔe. Wona mese le ɖokuinye me abe wo dometɔ ɖekae menye xoxo ene. Esia nye akɔfafa gã aɖe nam. Ewɔ dɔ ɖe dzinye ale gbegbe be metso nya me be maɖe asi le atike muamewo zazã kple wo dzadzra ŋu ne madi dɔ ɖɔʋu aɖe awɔ. Esi medze Biblia sɔsrɔ̃ gɔme ɣleti ene megbe la, medze kplɔ wo ɖo yi gbeƒã ɖeƒe, eye ɣleti ene bubu megbe la, mexɔ nyɔnyrɔ hezu Yehowa Ðasefo.”

Vi kae Kristotɔnyenye vavãtɔ ɖe na Manuel kple eƒe ƒomea? “Ne menye Bibliae wosrɔ̃ kplim o la, anye ne meku gbaɖegbe va yi xoxo. Agbemɔ si Yesu fia dzi toto na be nye ƒomea gatrɔ va gbɔnye. Mele be ɖevi sue eve siwo le asinye nato nɔnɔme siwo me meto esime menye sɔhɛ la ke me o. Enye dada nam be ƒomedodo nyui le nye kple srɔ̃nye dome fifia, eye medana akpe na Yehowa ɖe esia ta. Ame aɖewo siwo nyam xoxo dometɔ aɖewo kafum eye wogblɔ nam be yewosusu be alesi mele agbe nɔmee fifia ye nye nyuitɔ kekeake.”

 Hekpe ɖe agbenyuinɔnɔ ŋu la, Kristotɔnyenye bia be woanɔ dzadzɛ le ŋutilã me. John si le South Africa (Afrique du Sud) ƒe nuto dahe aɖe me la va kpɔ esia dze sii. Eɖe eme be: “Ɣeaɖewoɣi la, mía vinyɔnuvia melea tsi o hena kwasiɖa ɖeka, gake mía dometɔ aɖeke metsɔa ɖeke le eme nɛ o.” Srɔ̃a lɔ̃ ɖe edzi be yewoƒe aƒeame ƒo ɖi ɣemaɣi ale gbegbe. Gake hehe si Kristotɔnyenye na wo wɔe be nuwo trɔ. John dzudzɔ hadede kple adzoha siwo ŋu wòkpena ɖo wova fina ʋu, eye wòte beléle na eƒe ƒomea. “Míesrɔ̃e be ele be Kristotɔwo nalé be na woƒe ametia kple nudodowo woanɔ dzadzɛ. Petro I, 1:16 me nya siwo xlɔ̃ nu mí be míanɔ kɔkɔe elabena Yehowa Mawu le kɔkɔe, doa dzidzɔ nam ŋutɔ. Fifia míedzea agbagba be aƒe sue si le mía sia me nanɔ dzadzɛ ahanya kpɔ.”

Àte Ŋu Axɔ Hehe Nyuitɔ Kekeake

Menye amesiwo ƒe nya míegblɔ va yi si koe nuteƒekpɔkpɔ siawo le o. Hehe si Biblia na ame akpe geɖe wɔe be wova srɔ̃ alesi woanɔ agbe wòanyo wu. Woƒe anukwareɖiɖi kple dɔsesẽwɔwɔ na be woƒe dɔtɔwo lɔ̃ woƒe nya. Wova zu aƒelika kple xɔlɔ̃ nyuiwo, eye wotsɔa ɖe le wo haviwo ƒe nyonyo me. Woɖoe kplikpaa be yewoatsri nugbegblẽwɔwɔ kple ŋutilã me nudzodzrowo, eyata woléa be na wo ɖokui le ŋutilã, susu, kple seselelãme gome. Le esi teƒe be woagblẽ ga ɖe agbe baɖa nɔnɔ ŋu la, wozãnɛ boŋ tsɔ kpɔna wo ɖokui kple woƒe ƒomewo dzii. (Korintotɔwo I, 6:9-11; Kolosetɔwo 3:18-23) Ðikeke mele eme o be Yehowa ƒe se siwo le Biblia me tsɔtsɔ wɔ dɔe me tsonuwo ɖo kpe edzi be Kristotɔnyenye vavãtɔe nye nu nyuitɔ kekeake le agbe me, eye be hehe nyuitɔ kekeake wònana ame. Biblia gblɔ le amesi ƒe agbenɔnɔ wɔ ɖeka kple Mawu ƒe sewo ŋu be: “Nusianu, si wòwɔna la, ewɔnɛ wua nu nyuie.”—Psalmo 1:3.

Enyanya be Yehowa, Mawu Ŋusẽkatãtɔ la, ƒe didie wònye be yeana hehe mí dea dzi ƒo na mí ŋutɔ. Egblɔ le eɖokui ŋu be: “Nye Yehowa, wò Mawu, enye amesi fia nusi nyo na wò la wò, nyee akplɔ wò to mɔ, si dzi nato la.” (Yesaya 48:17) Ẽ, Yehowa fia mɔ si dzi míato la mí to Via, Yesu Kristo, ƒe kpɔɖeŋuwo kple nufiafiawo dzi. Eƒe nufiafiawo na be amesiwo nyae esime wònɔ anyigba dzi ƒe agbenɔnɔ trɔ, eye nenema kee wòɖea vi na amesiwo wɔna ɖe eƒe nufiafiawo dzi egbea hã. Nukatae màdi ɣeyiɣi asrɔ̃ nu geɖe tso nufiafia mawo ŋu o? Yehowa Ðasefo siwo le miaƒe nutoa me akpɔ dzidzɔ be yewoakpe ɖe ŋuwò naxɔ hehe vevi sia.

[Etenuŋɔŋlɔ]

[Aɖaka/Nɔnɔmetata si le axa 6]

Ŋusẽ Nyui si Yesu ƒe Nufiafiawo Kpɔna ɖe Ame Dzi

Esi Zaxeo nye nudzɔlawo ƒe amegã ta la, ezã ɖoƒe si nɔ esi da dzo amewo eye wòba ame dahewo hezu kesinɔtɔ. Gake etrɔ eƒe agbenɔnɔ esi wòwɔ ɖe Yesu ƒe nufiafiawo dzi.—Luka 19:1-10.

Saul si tso Tarso dzudzɔ Kristotɔwo yome titi eye wòtrɔ zu Kristotɔ, heva zu apostolo Paulo.—Dɔwɔwɔwo 22:6-21; Filipitɔwo 3:4-9.

Kristotɔ siwo nɔ Korinto-hamea me dometɔ aɖewo nye ‘matrewɔlawo, trɔ̃subɔlawo, ahasiwɔlawo, ŋutsu siwo dɔna kple ŋutsuwo, fiafitɔwo, ŋubiãlawo, ahamulawo, dzrewɔlawo, kple adzodalawo tsã.’ Gake esi wova srɔ̃ Kristotɔnyenye vavãtɔ la, ‘wole tsi na wo, wona wo ŋuti kɔ, eye wotso afia na wo le woƒe Aƒetɔ Yesu Kristo ƒe ŋkɔ me.’—Korintotɔwo I, 6:9-11.

[Nɔnɔmetata si le axa 7]

Biblia ate ŋu afia wò alesi nàwɔ agbe nadze edzi na wò