“Nukae Avɔ Dzẽ La Fia?”

DZIÐUÐUDƆWƆLA aɖe si le Republic of Korea ƒe dɔwɔƒe si kpɔa senyawo gbɔ si le Seoul, ŋlɔ be: “Mexɔ Gbetakpɔxɔ aɖe le Yehowa Ðasefo aɖe si nyitsɔ laa. Esi menɔ exlẽm la, meva srɔ̃ nanewo tso alesi Nazitɔwo kple Kɔmiunisttɔwo ti Yehowa Ðasefowo yomee ŋu. Gake medi be mabia nya aɖe. Foto si le akpaa dzi la nye dzesidevɔ dzẽ si le dzogoe etɔ̃ me si wotɔ ɖe Yehowa Ðasefowo ƒe awuwo ŋu. Nukae avɔ dzẽ la fia?”

Yehowa Ðasefo siwo nɔ Germany le Nazitɔwo ƒe dziɖuɣi la gbe Hitler dodo ɖe dzi, eye womede akpa aɖeke dzi le dunyahehe kple asrafonyawo me o. Eyata Nazitɔwo ti wo yome kutɔkutɔe hede Ðasefo siwo ade 12,000 gaxɔ kple fuwɔamegaxɔwo me hena ɣeyiɣi didime vovovowo. Wo dometɔ 2,000 kloe ku, eye ɖe wowu wo dometɔ gbogbo aɖewo.

Nukae dzesidevɔ dzẽ si le dzogoe etɔ̃ me si nɔ woƒe awuwo ŋu la fia? Agbalẽ si nye ​Anatomy of the SS State ɖe eme be: “Dzeside vovovowoe nɔ amesiwo [Nazitɔwo] de gaxɔ me la ƒe awuwo ŋu. Ðoɖo si wowɔe nye be woatɔ avɔ aɖe si le dzogoe etɔ̃ me ɖe gamenɔla ɖesiaɖe ƒe awu ŋu, eye amadede si woatɔ ɖe awua ŋu afia nusita wolée ɖo: amesiwo wolé ɖe dunyahehe ta la tɔ le dzĩ; Yehowa Ðasefowo tɔ le dzẽ; amesiwo tsia tre ɖe hadomeɖoɖowo ŋu tɔ le yibɔ; nuvlowɔlawo tɔ le gbemu; ŋutsu siwo dɔna kple ŋutsu kpakple nyɔnu siwo dɔna kple nyɔnu tɔ biã vie; dukɔ bubu me tɔwo tɔ le blɔ. Le Yudatɔwo gome la, wotɔ dzesidevɔ aŋutiɖiɖi aɖe kpe ɖe esi le amadede bubu me le woƒe awuwo ŋu xoxo la ŋu, si na wòva le abe Dawid ƒe Ɣletivi si le dzogoe ade me ene.”

Agbalẽnyalagã John K. Roth ŋlɔ ɖe eƒe agbalẽ si nye ​Holocaust Politics me be: “Ne dzidzime siwo ava va la ase egɔme be agbenyuinɔnɔ ye ɖe dzesi le amesiwo ƒe awu ŋu dzesidevɔ dzẽ nɔ le dzogoe etɔ̃ me ŋu la, ate ŋu akpɔ mía ta tso afɔku me, anye ametakpɔnu si ana míadi be míawɔ nyui gãtɔ kekeake si dze bubu.” Yehowa Ðasefowo ta video si ƒe tanyae nye Jehovah’s Witnesses Stand Firm Against Nazi Assault (La fermeté des Témoins de Jéhovah face à la persécution nazie) [Yehowa Ðasefowo Nɔ Te Sesĩe le Nazitɔwo ƒe Amedzidzedze Me], eye woxɔ nunana ɖe eta. Ðe manyo be nàbia Yehowa Ðasefo aɖe be wòana nàkpɔ video sia oa?