Biblia La Gɔme Sese Ahe Dzidzɔ Vɛ na Wò

NYATEƑENYA vevi siwo tso Mawu gbɔ la le Biblia me. Egblɔ tameɖoɖo si le agbe ŋu, nusitae amegbetɔwo le fu kpem, kple nusi ameƒomea ate ŋu anɔ mɔ kpɔm na le etsɔme. Efia alesi míawɔ akpɔ dzidzɔ, alesi míadze xɔ̃e, kple alesi míawɔ akpɔ kuxiwo gbɔ dzidzedzetɔe. Vevietɔ wu la, míesrɔ̃a nu tsoa mía Wɔla Yehowa, si nye mía Fofo si le dziƒo la ŋu le eme. Sidzedze sia na míekpɔa dzidzɔ, eye enana tameɖoɖo va nɔa míaƒe agbe ŋu.

Biblia tsɔ nusɔsrɔ̃ tso Mawu ŋu sɔ kple nuɖuɖu. Yesu gblɔ be: “Menye abolo ɖeɖe ko ŋuti ame lanɔ agbe ɖo o, negbe ɖe nya sia nya, si dona tsoa Mawu ƒe nu me la ŋuti.” (Mateo 4:4; Hebritɔwo 5:12-14) Abe alesi ko nu nyui ɖuɖu gbesiagbe hiã hafi míanɔ agbee ene la, nenema kee Mawu ƒe Nya la xexlẽ edziedzi hiã hafi míate ŋu akpɔ agbe mavɔ si ŋugbe Mawu do la.

Alesi wowɔ mí tae nuɖuɖu doa dzidzɔ na mí ɖo, elabena ekpɔa míaƒe nuhiahiã vevi aɖe gbɔ. Ke hã, nuhiahiã vevi bubu aɖe li si gbɔ wòle be míakpɔ ne míedi be míakpɔ dzidzɔ. Yesu gblɔ be: ‘Dzidzɔtɔwoe nye amesiwo tsɔa ɖe le woƒe gbɔgbɔ me nuhiahiã me.’ (Mateo 5:3) Míate ŋu akpɔ dzidzɔ, elabena míate ŋu akpɔ nuhiahiã ma gbɔ ne míese Mawu ƒe Nya la gɔme nyuie.

Nyateƒee wònye be ewɔna na ame geɖe be Biblia la gɔme sese sesẽ. Le kpɔɖeŋu me, ɖewohĩ àhiã kpekpeɖeŋu le mawunyakpukpui aɖewo siwo ku ɖe nuwɔna siwo ŋu mènya nu tso nyuie o ŋu alo kpɔɖeŋunyagbɔgblɔwo gɔmesese me. Azɔ hã nyagblɔɖi aɖewo li siwo woŋlɔ  le kpɔɖeŋunyagbɔgblɔ me, eye mawunyakpukpui bubu siwo ku ɖe nya ma ke ŋu koe ate ŋu akpe ɖe mía ŋu míase wo gɔme. (Daniel 7:1-7; Nyaɖeɖefia 13:1, 2) Togbɔ be ele nenema hã la, kakaɖedzi li be àte ŋu ase Biblia la gɔme. Aleke míewɔ nya?

Ate Ŋu Ahe Dzidzɔ Vɛ na Amesiame

Mawu ƒe Nyae Biblia la nye. Mawu ɖe eƒe lɔlɔ̃nu fia mí le eme. Ðe Mawu atsɔ agbalẽ aɖe si gɔme míate ŋu ase o, alo esi gɔme agbalẽnyalagãwo ko ase, la ana mía? Ao, Yehowa mawɔ nu ame ŋu mabumabui alea o. Kristo Yesu gblɔ be: “Fofo ka le mia dome, si via abia aboloe, eye wòana kpee, alo tɔmelã, eye wòana dae ɖe tɔmelã teƒe mahã? Alo ne abia koklozi la, wòana dziɖegbee mahã? Azɔ mi, amesiwo nye ame vɔ̃ɖiwo, mienya alesi miana nunana nyui mia viwo, ʋuu keke Fofo, si le dziƒo la, mana [gbɔgbɔ] kɔkɔe amesiwo bianɛ la o mahã?” (Luka 11:11-13) Eyata kakaɖedzi li be àte ŋu ase Biblia la gɔme, eye ne èbia Mawu tso dzi me be wòakpe ɖe ye ŋu yease eƒe Nya la gɔme la, akpe ɖe ŋuwò. Le nyateƒe me la, ɖeviwo kura gɔ̃ hã ate ŋu ase Biblia ƒe nufiafia veviwo gɔme!—Timoteo II, 3:15.

Togbɔ be ehiã na kutrikuku hafi míase Biblia la gɔme hã la, ema wɔwɔ ate ŋu ado ŋusẽ mí ŋutɔ. Le Yesu ƒe tsitretsitsi megbe la, eɖe eɖokui fia eƒe nusrɔ̃la eve aɖewo heɖe Biblia me nyagblɔɖi aɖewo me na wo. Luka ƒe nuŋlɔɖia gblɔ be: “Eye esi wòdze egɔme tso Mose kple nyagblɔɖilawo katã dzi la, eɖe nusiwo le ŋɔŋlɔawo katã me le eŋuti la, ƒe gɔme fia wo.” Nukae do tso eme? Esi nusrɔ̃laawo nɔ ŋugble dem tso nusi wose fiẽ ma ŋu la, wogblɔ na wo nɔewo be: “Alo míaƒe dzi melé dzo le mía me, esi wòle nu ƒom na mí le mɔa dzi, eye wòle ŋɔŋlɔawo me ɖem na mí la o mahã?” (Luka 24:13-32) Mawu ƒe Nya la gɔme sese na wokpɔ dzidzɔ elabena edo ŋusẽ woƒe xɔse be Mawu ƒe ŋugbedodowo ava eme, eye wotsɔ dzidzɔ nɔ mɔ kpɔm na etsɔ me nudzɔdzɔwo.

Le esi teƒe be kutrikuku be míase Mawu ƒe Nya la gɔme nanye agba na mí la, ewɔwɔ vivina heɖea vi, abe alesi ko nu vivi aɖe ɖuɖu doa dzidzɔ na amee ene. Nukae wòle be nàwɔ be nàse Biblia la gɔme? Nyati si kplɔe ɖo ɖe alesi nàwɔ ‘nusɔsrɔ̃ tso Mawu ŋu’ navivi nuwòe me.—Lododowo 2:1-5.

[Nɔnɔmetata si le axa 4]

Abe vifofo lɔ̃ame ene la, Yehowa nana gbɔgbɔ kɔkɔea mí be wòakpe ɖe mía ŋu míase Biblia la gɔme