Alekee Nàwɔ Nyametsotsowo Wòasɔ Kple Mawu ƒe Didi?

ŊUTSU aɖe si le Amerika tsɔ dɔlar 25,000 yi dada ge ɖe gadzraɖoƒe. Eɖoe be yeada gaa ɖe afima hena ɣeyiɣi vi aɖe ko. Gake gadzraɖoƒedzikpɔlaa ɖo aɖaŋu nɛ be wòade gaa dɔ aɖe me boŋ, elabena ema ana wòakpɔ viɖe ɖe gaa dzi wu. Ŋutsua wɔ ɖe aɖaŋuɖoɖoa dzi. Gake eteƒe medidi o, dɔ si me wòde gaa la ɖu agba.

Nudzɔdzɔ sia ɖee fia be nyametsotso nyui wɔwɔ mele bɔbɔe o. Ke nyametsotso vovovo siwo dzea ŋgɔ mí le agbe me ya ɖe? Nyametsotso geɖe siwo míewɔna la ate ŋu ana míakpɔ dzidzedze loo alo míaɖu ŋukpe—ate ŋu ava nye ku kple agbe ƒe nya hã. Ekema, aleke míawɔ aka ɖe edzi be míele nyametsotso nyuiwo wɔm?

“Mɔ la Enye Si”

Míewɔa nyametsotso le nusi míaɖu, awu si míado, afisi míayi, kple bubuawo ŋu gbesiagbe. Nyametsotso aɖewo adze nu maɖinuwoe, ke hã, woate ŋu agblẽ nu le ame ŋu vevie. Le kpɔɖeŋu me, sigaret kpekpe zi gbãtɔ ate ŋu ana sigaretnono nava zu numame na ame. Mele be míabu nyametsotso siwo wɔwɔ adze nu sue la be womele vevie o gbeɖe o.

Afikae míadi mɔfiamewo le ne míele nyametsotsowo wɔm, ne edze abe womele vevie o ene gɔ̃ hã? Aleke wòadzɔ dzi na míi enye esi be ame aɖe si dzi míeka ɖo naɖo aɖaŋu na mí ne míele nyametsotso sesẽ aɖe wɔm! Àte ŋu akpɔ aɖaŋuɖola nyui ma. Blemagbalẽ aɖe si me nyawo gaɖea vi egbea gblɔ be: “Miaƒe to ase nya sia le mia megbe bena: Mɔ la enye si, mito edzi! nenye ɖusi me alo mia me miebe, yewoato.” (Yesaya 30:21) Amekae gblɔ nya sia? Eye aleke nàwɔ aka ɖe edzi be eƒe mɔfiamea nyo?

Biblia, si ame miliɔn geɖe srɔ̃ heva kpɔe be Yehowa Mawu si nye Wɔla lae na woŋlɔe, mee kakaɖedzinya sia le. (Timoteo II, 3:16, 17) Yehowa nya míaƒe wɔwɔme, eyata eyae ate ŋu afia mɔ nyuitɔ kekeake mí. Ate ŋu anya alesi etsɔme ava nɔ hã, elabena eyae “nye amesi ɖe nuwuwu fia le gɔmedzedzea me ke kple nusi gbɔna dzɔdzɔ ge la fia le blema ke gblɔ bena: Nye tameɖoɖo ava me.” (Yesaya 46:10) Esia ta hakpala aɖe gblɔ  alesi wòka ɖe Yehowa ƒe Nya la dzii ale: “Wò nya enye akaɖi na nye afɔ kple kekeli na nye toƒe.” (Psalmo 119:105) Gake aleke Yehowa kpena ɖe mía ŋu míetoa xexeame kuxiwo me dona dedie? Alekee míawɔ nyametsotsowo wòasɔ kple Mawu ƒe didi?

Wɔ Biblia ƒe Gɔmeɖosewo Dzi

Yehowa Mawu na gɔmeɖosewo Kristotɔwo ale be woate ŋu awɔ nyametsotso nyuiwo. Míate ŋu atsɔ Biblia ƒe gɔmeɖosewo sɔsrɔ̃ kple wo dzi wɔwɔ asɔ kple gbe yeye sɔsrɔ̃ kple edodo. Ne ènya se gbea nyuie ko la, àte ŋu anya ne ame aɖe mele edom nyuie o, elabena masɔ tome na wò o. Ðewohĩ màte ŋu aɖe nusi tututu gblẽ le nya si wògblɔ la ŋu me ya o, gake ènya be menye nenemae wogblɔnɛ o. Nenema kee ne èsrɔ̃ Biblia me gɔmeɖosewo nyuie henya alesi wòle be woazã woe la, àte ŋu anya ne nyametsotso aɖe mesɔ o, alo ne mesɔ ɖe Mawu ƒe gɔmeɖosewo nu o.

Le kpɔɖeŋu me, bu nyametsotso si ɖekakpui aɖe awɔ le ɖakpakpa ŋu la ŋu kpɔ. Ðakpakpa ŋuti se tẽ aɖeke mele Biblia me o. Ke hã, bu Biblia me gɔmeɖose aɖe ŋu kpɔ. Apostolo Paulo ŋlɔ bena: “Nyɔnuwo nado awu ɖe nɔnɔme nyui me, eye woawɔ leke na wo ɖokui le ŋukpekpe kple ɖokuidziɖuɖu me; menye kple ɖaƒoƒo vivivo kple sika alo adzagbawo alo awu xɔasi dodo o, ke nusi dze nyɔnu, siwo ʋua Mawu ƒe subɔsubɔ me la, enye be, woawɔ leke na wo ɖokui to dɔwɔwɔ nyuiwo me.” (Timoteo I, 2:9, 10) Nyɔnuwoe Paulo gblɔ nya siawo na ya, gake gɔmeɖose si le eme la yi na ŋutsuwo kple nyɔnuwo siaa. Gɔmeɖosea enye ka? Mele be míaƒe dzadzraɖo natɔ ŋku o, ke boŋ wòaɖe ameŋububu fia. Eyata ɖekakpuia ate ŋu abia eɖokui be, ‘Ðe ɖa si makpa aɖee afia be meɖɔa ŋu ɖo abe Kristotɔ enea?’

Nusrɔ̃la Yakobo hã gblɔ be: “Mi ahasiwɔlawo, mienya bena, xexeame ƒe xɔlɔ̃dzedze enye ketɔnyenye na Mawu oa? Eyaŋuti amesi dina be, yeanye xexeame ƒe xɔlɔ̃ la, etsɔ eɖokui wɔ Mawu ƒe ketɔ.” (Yakobo 4:4) Gɔmeɖose nyui kae le nya siawo me na sɔhɛwo? Kristotɔwo medina kura be yewoadze xɔlɔ̃ xexe sia si nye Mawu ƒe ketɔ la o. Ne ɖa si ƒomevi ehatiwo kpana dzronɛ la, ɖe ekpakpa ana woabui be enye Mawu xɔlɔ̃ loo alo xexeame xɔlɔ̃a? Ðekakpui si le ɖa si wòakpa ŋu bum la ate ŋu awɔ nyametsotso nyuiwo ne ezã Biblia me gɔmeɖose vevi mawo. Nyateƒee, Mawu ƒe gɔmeɖosewo ate ŋu akpe ɖe mía ŋu míawɔ nyametsotsowo. Eye ne míenɔa te ɖe Mawu ƒe gɔmeɖosewo dzi wɔa nyametsotso nyuiwo edziedzi la, anɔ bɔbɔe na mí be míanya nusi míawɔ le nɔnɔme ɖesiaɖe me, si mava gblẽ nu le mía ŋu emegbe o.

 Míate ŋu akpɔ gɔmeɖose geɖe le Mawu ƒe Nya la me. Nyateƒee, ɖewohĩ míakpɔ mawunyakpukpui aɖe si aku ɖe míaƒe nyaa ŋu tẽ ya o. Ke hã, míate ŋu akpɔ amesiwo wɔ Mawu ƒe gɔmeɖosewo dzi kple amesiwo mewɔe o la ŋuti nyawo axlẽ le eme. (Mose I, 4:6, 7, 13-16; Mose V, 30:15-20; Korintotɔwo I, 10:11) Ne míexlẽa nuŋlɔɖi mawo hedea ŋugble le nusiwo do tso eme na ameawo ŋu la, míava nya Mawu ƒe gɔmeɖose siwo ate ŋu akpe ɖe mía ŋu míawɔ nyametsotso siwo Mawu dina.

Le kpɔɖeŋu me, bu dze kpui aɖe si Yesu Kristo ɖo kple eƒe apostolo Petro ŋu kpɔ. Adzɔxɔlawo bia Petro be: “Alo miaƒe nufiala ya menaa mawuxɔ me nudzɔdzɔ o mahã?” Petro ɖo eŋu be: “Enana!” Emegbe Yesu bia Petro be: “Anyigba dzi fiawo la, ameka si woxɔa adzɔ alo nudzɔdzɔ lena mahã? Le woa ŋutɔwo ƒe viwo si loo, alo le amedzrowo si mahã?” Esi Petro ɖo eŋu be: “Le amedzrowo si” la, Yesu gblɔ nɛ be: “Ekema viwo le wo ɖokui si. Ke ne míagaɖia wo nu o la, yi ƒu ta nada ƒu, eye lã, si ke naɖe gbã la, lée, eye ne èke eƒe nu la, àkpɔ ga; eyae natsɔ ana ɖe mía kpli wò ta.” (Mateo 17:24-27) Mawu ƒe gɔmeɖose kawoe dze le nuŋlɔɖi sia me?

Nya vovovo siwo Yesu bia Petro na wòva kpɔe be esi Yesu nye Mawu ƒe Vi ta la, mele be wòaxe adzɔ hafi o. Togbɔ be Petro menyae alea tsã o hã la, Yesu kpe ɖe eŋu wòva nyae. Ne ame aɖe wɔ vodada la, míate ŋu agblɔe nɛ lɔlɔ̃tɔe abe alesi Yesu wɔe na Petro ene, tsɔ wu be míagblɔe na amea kaŋ alo abu fɔe.

Eyata Petro va nya susu si ta Yesu xe adzɔa ɖo—eyae nye be wòagaɖia amewo nu o. Esia kplɔ mí va gɔmeɖose bubu si hã le nuŋlɔɖi sia me gbɔ. Bubu dede ame bubuwo ƒe dzitsinya ŋu le vevie wu tɔ tete ɖe nusiwo míekpɔ mɔ awɔ dzi.

Nukae ʋãa mí be míawɔ nyametsotso siwo aɖee fia be míedea bubu amewo ƒe dzitsinya ŋu? Havilɔlɔ̃ ye. Yesu Kristo fia nu be le luʋɔ blibo tsɔtsɔ lɔ̃ Mawui megbe la, mía haviwo lɔlɔ̃e kplɔe ɖo. (Mateo 22:39) Ke hã, ɖokuitɔdilawo domee míele, eye nuvɔ̃me siwo míenye wɔnɛ be míedia mía ɖokui tɔ. Eyata hafi ame nalɔ̃ ehavi abe ye ŋutɔ ɖokui ene la, ele be wòatrɔ nɔnɔme.—Romatɔwo 12:2.

Ame geɖe wɔ tɔtrɔ sia, eye ne wole nyametsotso suewo kple gãwo siaa wɔm la, wobua amewo ŋu. Paulo ŋlɔ be: “Elabena, nɔviwo, woyɔ mi va ablɔɖenyenye gbɔ; ɖekoe ablɔɖenyenye la naganye mɔnunana ŋutilã o, ke boŋ misubɔ mia nɔewo le lɔlɔ̃ me!” (Galatiatɔwo 5:13) Aleke míate ŋu awɔ esiae? Bu ɖetugbi aɖe si ʋu yi kɔƒe aɖe me be yeakpe ɖe amewo ŋu woasrɔ̃ Mawu ƒe Nya ŋu kpɔ. Esi wònɔ gbeƒã ɖem na amewo la, ede dzesii be amewo va nɔ nu ƒom tso yeƒe nudodowo ŋu, togbɔ be awu tsɛwo koe wonye na dugã me tɔwo ya hã. Eƒe dzadzraɖo metɔa ŋku o, ke hã, etso nya me be yeadzra ɖo wòasɔ kple ameawo tɔ, “bena  woagagblɔ busunya ɖe mawunya la ŋuti o.”—Tito 2:5.

Ne eva hiã be nàwɔ nyametsotso aɖe le wò dzadzraɖo alo nu bubu aɖe ŋu la, alekee nàwɔe? Ka ɖe edzi be Yehowa akpɔ dzidzɔ ɖe ŋuwò ne wò nyametsotsowo ɖee fia be èbua ame bubuwo ŋu.

Bu Nuwo Ŋu Yi Ŋgɔe

Ne míele nyametsotso wɔm la, nu bubu ka hã ŋue míabu tsɔ kpe ɖe Biblia me gɔmeɖosewo kple bubudede amewo ƒe dzitsinya ŋu ŋuti? Togbɔ be se aɖewo kplɔa Kristotɔwo hã la, woate ŋu anɔ te ɖe Mawu ƒe gɔmeɖosewo dzi awɔ nyametsotso aɖewo le wo ɖokui si. (Mateo 7:13, 14) Ehiã be míabu alesi nyametsotso siwo míawɔ la akpɔ ŋusẽ ɖe míaƒe gbɔgbɔmenyenye, susu, seselelãme, kple míaƒe ametia dzii le etsɔme la ŋu.

Tsɔe be èle dɔ aɖe wɔwɔ ŋu bum. Ðewohĩ naneke megblẽ le dɔa ŋutɔ ŋu o. Mɔnukpɔkpɔ asu asiwò nàde Kristotɔwo ƒe kpekpewo kple takpekpewo. Fetua hã nyo ŋutɔ. Wò ŋutetewo hã dze dɔtɔa ŋu ale gbegbe eye wòadi be yeade dɔ geɖe asi na wò. Hekpe ɖe eŋu la, dɔa dzɔa dzi na wò ŋutɔ hã. Ðe nane axe mɔ na wò be màwɔ dɔ sia oa? Ke ne èkpɔe do ŋgɔ be alesi yelɔ̃ dɔae la ana yeazã ɣeyiɣiawo katã ɖe eŋu ya ɖe? Wogblɔ na wò be womazi dziwò be nàwɔ dɔ wòagbɔ wò dɔwɔɣiwo dzi o. Gake ne mèwu dɔ aɖe si gɔme nèdze nu o la, ɖe wòadzro wò be yeanɔ dɔa me azã ɣeyiɣi geɖe akpee be yeawu enua? Ðe nɔnɔme sia ate ŋu ava nɔ mo dom ɖa edziedzia? Ðe esia ava nɔ ɣeyiɣi si nèzãna ɖe wò ƒomea kple gbɔgbɔmedɔ siwo mele be nàda aƒu kuraa hafi o la xɔm le asiwòa?

Bu nyametsotso sesẽ si Jim wɔ le eƒe dɔwɔɖui ŋuti ŋu kpɔ. Edoa vevie dɔ wɔna ale gbegbe be wodoe ɖe ŋgɔ le dɔa me. Mlɔeba eva zu dɔnunɔlagã ɖe woƒe dɔwɔƒe si le Asia bliboa nu, kple dɔdzikpɔlagã na dɔwɔƒea ƒe alɔdze bubu siwo le Amerika, eye wòzu akameti siwo kpɔa dɔa dzi le Europa la dometɔ ɖeka. Gake esi ganyawo trɔ kpata le Japan la, eva kpɔe be viɖe aɖeke mele ga kple ɖoƒe didi ŋu o. Ga gbogbo siwo wòkpe fu kpɔ la megava ɖi naneke o. Megava nya nusi wòawɔ le agbe me o. Ebia eɖokui be: ‘Nuka wɔ ge mele fifia?’ Azɔ eva kpɔe be taɖodzinuwo le ye srɔ̃ kple ye viwo ya si le agbe me. Ƒe geɖe enye ema si wonɔ ha dem kple Yehowa Ðasefowo. Jim di be ye hã yeakpɔ dzidzɔ kple dzidzeme si yeƒe ƒomea me tɔwo kpɔna la. Eyata ena wote Biblia sɔsrɔ̃ kplii.

Eteƒe medidi o Jim va kpɔe be dɔ gbogbo siwo nɔ ye dzi la mete ŋu na yenɔ agbe si ŋu taɖodzinu nyuiwo le abe Kristotɔ ene o. Esi wònye ezɔa mɔ yia Amerika, Europa, kple Asia dukɔwo me edziedzi ta la, mekpɔa ɣeyiɣi srɔ̃a Biblia hedea ha kple haxɔsetɔwo o. Eva bia eɖokui be: ‘Ðe makpɔtɔ ayi edzi anɔ agbe nɔm abe alesi menɔe le ƒe 50 siwo va yi me ene loo, alo ɖe wòle be matrɔ asi le eŋua?’ Edo gbe ɖa le nyaa ŋu heɖoe be yeaɖe asi le ɖoƒe siwo katã yele la ŋu, negbe ɖeka koe asusɔ, bene yeate ŋu akpɔ ɣeyiɣi ɖe gbɔgbɔmedɔwo ŋu. (Timoteo I, 6:6-8) Nyametsotso sia wɔwɔ na wòkpɔ dzidzɔ, elabena ena wòkpɔ ɣeyiɣi geɖe ɖe Kristotɔwo ƒe dɔwɔnawo ŋu.

Nyametsotso ɖesiaɖe si nàwɔ la le vevie, eɖanye gãwo alo suewo o. Nyametsotso si nàwɔ egbea ate ŋu ana nàkpɔ dzidzedze loo alo nàɖu ŋukpe le etsɔme, ate ŋu anye agbe kple ku ƒe nya kura gɔ̃ hã. Ne ètsɔ Biblia me gɔmeɖosewo wɔ dɔe, bu amewo ƒe dzitsinya ŋu, eye nèbu nusiwo ado tso wò nyametsotsoa me ŋu yi ŋgɔe la, ana nàwɔ nyametsotso nyuiwo. Wɔ nyametsotso siwo sɔ ɖe Mawu ƒe didi nu.

[Nɔnɔmetata si le axa 13]

Nyametsotso siwo dzena nu maɖinuwoe la ate ŋu agblẽ nu le ame ŋu vevie

[Nɔnɔmetata si le axa 14]

Aleke Biblia me gɔmeɖosewo ate ŋu akpe ɖe eŋu wòawɔ nyametsotso nyuiwoe?

[Nɔnɔmetata si le axa 15]

Yesu ƒo nu na Petro lɔlɔ̃tɔe