Nu Vevi Siwo Akpe Ðe Ŋuwò Nàɖo Dze Kple Srɔ̃wò

‘MELE BE magblɔ nya ma hafi o.’ ‘Menye nenemae medi be magblɔ hafi o.’ Ðe nèse le ɖokuiwò me nenema kpɔ esi nètee kpɔ be yeaɖo dze kple ye srɔ̃a? Aɖaŋunu gã aɖee dzeɖoɖo nye, eye ehiã be míatui ɖo. Abe alesi wòle le aɖaŋudɔ ɖesiaɖe sɔsrɔ̃ me ene la, dzeɖoɖo nɔa bɔbɔe na ame aɖewo, gake ame bubuwo ya ʋlina vevie hafi te ŋu srɔ̃nɛ. Ne dzeɖoɖo sesẽna na wò hã la, àte ŋu asrɔ̃ alesi nàɖe wò susuwo agblɔ wòadze to ne miele dze ɖom.

Le teƒe aɖewo la, dekɔnuwo kpɔa ŋusẽ ɖe alesi amewo wɔa nui ɖe wo srɔ̃wo ŋu dzi. Ðewohĩ wogblɔna na ŋutsuwo be: ‘Ŋutsu meƒoa  nu fũ o.’ Ðewohĩ womebua ŋutsu nukpoloeƒolawo ɖe ɖeke me o. Nyateƒee, Biblia gblɔ be: “Amesiame naɖe abla le nusese me, nanɔ blewu le nuƒoƒo me.” (Yakobo 1:19) Ke hã, aɖaŋuɖoɖo sia yi na ŋutsuwo kple nyɔnuwo siaa heɖee fia be dzeɖoɖo menye nuƒoƒo dzro ko o. Ame eve ate ŋu anɔ nu ƒom na wo nɔewo, gake womanɔ to ɖom wo nɔewo nyuie o. Míate ŋu ayɔ ema be dzeɖoɖo ŋutɔŋutɔ o. Abe alesi mawunyakpukpui si míeyɔ va yi ɖee fia ene la, nu vevi aɖe si nana woɖoa dze nyuie enye toɖoɖo ame nɔewo.

Dzeɖoɖo Numaƒomaƒoe

Le teƒe aɖewo la, womeɖe mɔ na srɔ̃nyɔnuwo be woaɖe woƒe susu agblɔ o. Eye srɔ̃ŋutsuwo hã meƒoa nu kabakaba le aƒeme o. Le nɔnɔme siawo me la, ehiãna be ɣesiaɣi la, ŋutsua alo nyɔnua ŋutɔ natsɔ susu akpɔ nusi dim srɔ̃a le. Srɔ̃nyɔnu aɖewo te ŋu kpɔa wo srɔ̃wo ƒe nuhiahiãwo dzea sii bɔbɔe hekpɔa egbɔ na wo enumake. Ne edzɔ alea la, ekema srɔ̃tɔ mawo le dze ɖom numaƒomaƒoe. Ke hã, le dzeɖoɖomɔnu sia me la, ame ɖeka koe te ŋu kpɔa nɔvia ƒe nuhiahiãwo dzea sii bɔbɔe zi geɖe. Togbɔ be srɔ̃nyɔnua ate ŋu ava nya srɔ̃a ƒe didiwo kple seselelãmewo bɔbɔe hã la, womekpɔa mɔ boo aɖeke na ŋutsuwo ya be woawo hã woade dzesi wo srɔ̃wo ƒe seselelãmewo nenema o.

Ele eme baa be le teƒe aɖewo la, ŋutsuwo te ŋu dea dzesi wo srɔ̃wo ƒe seselelãme hedzea agbagba be yewoakpɔ wo gbɔ na wo ya. Gake le teƒe mawo hã la, aɖe vi geɖe ne srɔ̃tɔawo srɔ̃ alesi woawɔ aɖo dze nyuie wu.

Nu Ƒoƒo Kple Ame Nɔewo Le Vevie

Ame ƒe dzimenyawo ŋutɔŋutɔ gbɔgblɔ ate ŋu atsi masɔmasɔwo kple nugɔmemasenamewo nu. Le Israel-viwo ŋɔli la, Ruben, Gad, kple Manase toa ƒe akpa siwo nɔ Yordan-tɔsisia ƒe ɣedzeƒe la ɖi “vɔsamlekpui gã nyui aɖe” ɖe tɔsisia to. To mamlɛawo mese woƒe nuwɔnaa gɔme o. Esi to siwo nɔ ɣetoɖoƒe gome susui be yewo nɔvi siwo le Yordan-tɔsisia godo dze aglã ta la, woɖoe be yewoaho aʋa ɖe wo ŋu. Gake hafi woaho ɖe wo ŋu la, wodɔ amewo ɖo ɖe to siwo le ɣedzeƒe la gbɔ. Nunyanue wònye wowɔ! Wova nyae be menye trɔ̃wo ƒe vɔsamlekpuie wònye woɖi be yewoanɔ nu mem le edzi o. Ðe to siwo nɔ ɣedzeƒe la nɔ vɔvɔ̃m be ɖewohĩ to mamlɛawo ava gblɔ na yewo gbeɖeka be: “Gome aɖeke mele Yehowa gbɔ na mi o!” Ðeko vɔsamlekpuia anye dzesi be Yehowa subɔlawoe woawo hã nye. (Yosua 22:10-29) Woyɔ vɔsamlekpuia be Ðasefo, ɖewohĩ le esi wòɖo kpe edzi be woawo hã wobu Yehowa be eyae nye Mawu vavã la ta.—Yosua 22:34.

Woƒe numeɖeɖe la na to mamlɛawo se woƒe nuwɔnaa gɔme, si na woɖe asi le aʋa hoho ɖe to eve kple afã la ŋu ŋuti. Nyateƒee, dzimenya ŋutɔŋutɔ ɖeɖe gblɔ tsi aʋaa nu. Emegbe, esi Israel dze aglã ɖe Yehowa Mawu si le abe srɔ̃a ene ŋu la, egblɔ na wo be yeakpɔ nublanui na wo eye ‘yeaƒo nu wòade dzi me na wo.’ (Hosea 2:16) Kpɔɖeŋu nyui ka gbegbee nye esi wòɖo na srɔ̃tɔwo! Ẽ, dze agbagba nàƒo nu wòade dzi gbɔ na srɔ̃wò ale be wòase wò seselelãmewo gɔme. Esia hiã ŋutɔ, vevietɔ le seselelãmenyawo gome. Pattie Mihalik, si nye nyadzɔdzɔŋlɔla le Amerika, gblɔ be: “Ame aɖewo gblɔna be, nya si woakpɔ agblɔ ya kpɔkpɔ menye nu sesẽ aɖeke o, gake egbɔgblɔ ŋue asixɔxɔ gã aɖe nɔna. Eye togbɔ be asesẽ na ame aɖewo be woaɖe woƒe seselelãme agblɔ hã la, wo gbɔgblɔ ate ŋu aɖe vi geɖe wu ga si wode gadzraɖoƒe.”

Dzeɖoɖo ƒe Aɖaŋu Tutu Ðo

Ame aɖewo agblɔ be: ‘Míaƒe srɔ̃ɖeɖe ya me gblẽ tso gɔmedzedzea me ke.’ Ame bubuwo hã ate ŋu aƒo nya ta be: ‘Míagate ŋu awɔ naneke le míaƒe srɔ̃ɖeɖea ŋu o.’ Woabui be maganya wɔ be yewoaɖo dze nyuie  wu le yewoƒe srɔ̃kpegbea megbe o. Ke hã, bu amesiwo le dukɔ siwo me dzilawoe ɖea srɔ̃ na wo viwo le la ŋu kpɔ. Srɔ̃tɔ yeye siawo te ŋu va ɖoa dze nyuie le woƒe srɔ̃ɖeɖe me emegbe.

Le Ɣedzeƒedukɔ aɖe me la, dzila aɖewo wɔwɔ ɖoɖo be yewoaɖe srɔ̃ na wo viŋutsu. Wodɔ ame aɖe be wòazɔ mɔ ayi teƒe didi aɖe ava ɖe srɔ̃ vɛ na wo via. Togbɔ be srɔ̃tɔ yeye siawo nɔ anyi ƒe 4,000 aɖewoe nye esi va yi hã la, wotu dzeɖoɖo ƒe aɖaŋu nyuiwo ɖo. Viŋutsua, si ŋkɔe nye Isak, do go ame dɔdɔa kple nyɔnu si woɖe vɛ nɛ la le agble me. Ame dɔdɔa “xlẽ nusiwo katã wòwɔ la fia Isak.” Biblia yi srɔ̃ɖeɖe sia ŋuti nuŋlɔɖia dzi be: “Eye Isak [kplɔ Rebeka] yi ɖe dada Sara ƒe agbadɔ me [esia sɔ kple srɔ̃kpekpe], eye wòɖe Rebeka wòzu srɔ̃a, eye wòlɔ̃nɛ ŋutɔ.”—Mose I, 24:62-67.

De dzesii be Isak se dɔgbedelaa ƒe nyawo nyuie gbã, eye emegbe exɔ Rebeka wòzu srɔ̃a. Dɔgbedela la nye Isak ƒe Mawu Yehowa subɔla wɔnuteƒe aɖe si dzi eƒe aƒetɔ ka ɖo. Isak tɔ dzɔ be wòaka ɖe ŋutsu sia dzi. Ema megbe la, Isak ‘va lɔ̃’ Rebeka si wòɖe la ‘ŋutɔ.’

Ðe Isak kple srɔ̃a Rebekaa va nya alesi woɖoa dzee nyuiea? Esi wo vi Esau ɖe Xititɔ eve la, kuxi sesẽ aɖe do mo ɖa le ƒomea me. Rebeka “gblɔ” na Isak enuenu be: “Agbenɔnɔ tim le Xitivi-nyɔnuawo ta. Ne Yakob [si nye wo vi ɖevitɔ] hã aɖe . . . Xitiviwo ƒe vinyɔnu aɖe la, ekema nukaŋuti megale agbe ɖo?” (Mose I, 26:34; 27:46) Edze ƒã be eɖe nusiwo nɔ fu ɖem nɛ la gblɔ wo me kɔ nyuie.

Isak gblɔ na Esau ƒe vedzɔ, Yakob, be wòagaɖe Kanaan nyɔnu o. (Mose I, 28:1, 2) Isak se Rebeka ƒe nyaa gɔme. Srɔ̃tɔ siawo ɖo dze tso ƒomekuxi sesẽ sia ŋu, eye wònye kpɔɖeŋu nyui aɖe na mí egbea. Ke ne srɔ̃tɔwo meva lɔ̃ ɖe nya ɖeka dzi o ya ɖe? Nukae woate ŋu awɔ?

Ne Nukpɔsusuwo To Vovo

Ne mia kple srɔ̃wò ƒe susu mewɔ ɖeka le nya aɖe ŋu o la, mègazi kpi nànɔ ekpɔm ko o. Esia aɖee fia be nya la medzɔ dzi na wò o, eye be mèdi be srɔ̃wòa hã nakpɔ dzidzɔ o. Ke hã, ɖewohĩ srɔ̃wòa manya nusi tututu dim nèle alo alesi tututu nèle sesem le ɖokuiwò me o.

Ahiã be mia kple srɔ̃wòa miadzro nyaa me. Ne dzikunyae la, ɖewohĩ manɔ bɔbɔe be miagbɔ dzi ɖi na mia nɔewo o. Isak dzilawo, Abraham kple Sara, ɖo kuxi sesẽ aɖe me ɣeaɖeɣi. Esi Sara nye konɔ ɣemaɣi ta la, ewɔ nusi amewo lɔ̃a wɔwɔ, hetsɔ eƒe kosi Hagar na srɔ̃a, bene wòadzi vi na yewo. Hagar dzi ŋutsuvi na Abraham, si ŋkɔe nye Ismael. Gake emegbe Sara ŋutɔ hã va fɔ fu hedzi ŋutsuvi na Abraham, si wotsɔ ŋkɔ na be Isak. Esi Sara tso no na Isak vɔ la, ede dzesii be Ismael nɔ anyra wɔm le Isak ŋu. Eyata esi Sara kpɔe be ye via ƒe agbe ɖo afɔku me la, eƒoe ɖe Abraham nu be wòanya kosia kple via Ismael. Ẽ, Sara ɖe eƒe seselelãme gblɔ tẽ. Gake eƒe didia medzɔ dzi na Abraham kura o.

Aleke wokpɔ kuxia gbɔe? Biblia ƒe nuŋlɔɖia gblɔ be: “Mawu gblɔ na Abraham bena: Megana nya sia nave wò le ŋutsuvi la kple wò kosi la ta o; ke boŋ ɖo to Sara le nusianu, si wòdi tso gbɔwò la me, elabena Isak me wò dzidzimeviwo adzɔ tso.” Abraham ɖo to Yehowa Mawu ƒe gbe hewɔ ɖe edzi.—Mose I, 16:1-4; 21:1-14.

Ðewohĩ àgblɔ be: ‘Ne ɖe míase Mawu ƒe gbe tẽ tso dziƒo la, ekema míalɔ̃ ɖe nya ɖeka dzi bɔbɔe hafi.’ Esia kplɔ mí va ɖo nu vevi bubu si nana wokpɔa srɔ̃ɖeɖe me nyaʋiʋliwo gbɔ la dzi. Srɔ̃tɔwo ate ŋu aɖo to Mawu ƒe gbe. Le mɔ ka nu? To Mawu ƒe Nya la xexlẽ ɖekae kple nusi wògblɔ tso Mawu ƒe mɔfiafia ŋu la dzi wɔwɔ me.—Tesalonikatɔwo I, 2:13.

 Srɔ̃nyɔnu Kristotɔ kpɔnuteƒe aɖe gblɔ be: “Ne ɖetugbi aɖe va be maɖo aɖaŋu na ye tso eƒe srɔ̃ɖeɖe ŋu la, mebianae be woa kple srɔ̃a woxlẽa Biblia ɖekae hã. Srɔ̃tɔ siwo dome kuxiwo ɖona la dometɔ akpa gãtɔ mexlẽnɛ ɖekae o.” (Tito 2:3-5) Mí katã míate ŋu asrɔ̃ nu tso nusi nɔvinyɔnu sia kpɔ de dzesi la me. Mia kple srɔ̃wò mixlẽ Mawu ƒe Nya la ɖekae edziedzi. Esia ana “miaƒe to ase” nusi Mawu gblɔ tso alesi mianɔ agbee gbesiagbe ŋu. (Yesaya 30:21) Gake míaɖo afɔ afɔ ta na mi: Mègalé mawunyakpukpui siwo dzi nèsusu be ye srɔ̃ mele wɔwɔm ɖo o la ɖe nu, wòazu ati nàtsɔ nɔ eƒom o. Midze agbagba boŋ miakpɔe ɖa be aleke mia kple evea miate ŋu atsɔ nusiwo miexlẽna la awɔ dɔe hã.

Ne miele kuxi sesẽ aɖe gbɔ kpɔm la, ɖe manyo be miadi nya tso nusi koŋ le fu ɖem na mi la ŋu le Watch Tower Publications Index (Index des publications de la Société Watch Tower) * me oa? Ðewohĩ èle dziwòla tsitsiwo gbɔ kpɔm, si wɔe be masɔmasɔwo ɖo miaƒe srɔ̃ɖeɖea me. Le esi teƒe be mianɔ glãka hem le nusi wòle be miawɔ alo nusi mele be miawɔ o ŋu la, ɖe manyo be mianɔ anyi ɖekae adi kuxia gbɔkpɔnu le Index la me oa? Gbã la midi tanya gã si nye “Parents” (Dzilawo). Miate ŋu awɔ numekuku le agbalẽ siwo woyɔ le tanya sue si nye “caring for aged parents” (“prendre soin des parents âgés”) (dzila tsitsiwo dzi kpɔkpɔ) te. Mixlẽ Yehowa Ðasefowo ƒe agbalẽ siwo ku ɖe miaƒe kuxia ŋu ɖekae. Ðewohĩ nusiwo miakpɔ le Biblia-srɔ̃gbalẽ siawo me, siwo kpe ɖe Kristotɔ geɖe siwo di vevie be yewoakpɔ yewoƒe kuxiwo gbɔ ŋu, la awɔ nuku na mi.

Agbalẽawo didi kple wo me nyawo xexlẽ ɖekae akpe ɖe mia ŋu miakpɔ ta na miaƒe kuxiawo. Miakpɔ mawunyakpukpui siwo ana mianya Mawu ƒe susu le nyaa ŋu. Midi mawunyakpukpuiawo, eye mixlẽ wo ɖekae. Nyateƒee, miase nya si Mawu agblɔ na mi le miaƒe kuxia ŋu!

Dzeɖoɖomɔnua Nenɔ Ʋuʋu Ði

Ètee kpɔ be yeaʋu ʋɔ aɖe si womegaʋu kpɔ o la kpɔa? Asesẽ vie hafi nàte ŋu aʋui le esi ga siwo le ʋɔa ŋu la lé ɣebia ta. Ke ne woʋua ʋɔa edziedzi hedea ami eƒe gawo me ya ɖe? Eʋuʋu anɔ bɔbɔe. Nenema kee wòle le dzeɖoɖo hã gome. Ne mieɖoa dze edziedzi, eye mielɔ̃a mia nɔewo vevie abe Kristotɔwo ene la, ekema miate ŋu aɖe miaƒe susuwo agblɔ bɔbɔe ne nya sesẽwo do mo ɖa kura gɔ̃ hã.

Ehiã be miawɔe godoo. Togbɔ be dzeɖoɖo gɔme toto bia agbagbadzedze geɖe hã la, midze agbagba miawɔe. Ekema mia kple srɔ̃wò dome anɔ nyuie, eye esia ana nugɔmesese na mia nɔewo ava zu numame na mi.

[Etenuŋɔŋlɔ]

[Nɔnɔmetata si le axa 7]

Ne masɔmasɔwo do mo ɖa la, ɖe miadi Mawu ƒe mɔfiamea?