Nyabiabia Siwo Tso Exlẽlawo Gbɔ

Ne gbɔgbɔ vɔ̃wo le fu ɖem na ame aɖe la, nukae wòate ŋu awɔ be wòavo tso wo si me?

Mawu ƒe Nya la ɖee fia be amesiwo gbɔgbɔ vɔ̃wo le fu ɖem na la ate ŋu avo tso fuɖenameawo me. Gbedodoɖa wɔa akpa vevi aɖe le esia me. (Marko 9:25-29) Gake ɖewohĩ ahiã be amesi gbɔgbɔ vɔ̃wo le fu ɖem na la nawɔ nu geɖe wu gbedodoɖa ko. Nusiwo dzɔ le ƒe alafa gbãtɔ me Kristotɔwo ŋɔli la ɖe nu bubu siwo wòle be woawɔ la fia.

Amesiwo nɔ blemadu Efeso me la nye gbɔgbɔyɔlawo hafi va zu Kristotɔwo. Gake esi wova tiae be yewoasubɔ Mawu la, “ame geɖe, siwo ka afa la, wotsɔ woƒe agbalẽwo va ƒo ƒu, eye wotɔ dzo wo le wo katã ƒe ŋku me.” (Dɔwɔwɔwo 19:19) Kristotɔ yeye siawo siwo nɔ Efeso la tɔ dzo woƒe akunyawɔgbalẽwo; esia nye kpɔɖeŋu na amesiwo katã di be yewoavo tso gbɔgbɔ vɔ̃wo ƒe amedzidzedzewo si me egbea. Ehiã vevie be amesiawo naɖe nusiwo katã do ƒome kple gbɔgbɔyɔyɔ la ɖa. Esiawo dometɔ aɖewoe nye agbalẽ, video, kɔmpiuta dzi nyatakaka, hadzidzi siwo ku ɖe gbɔgbɔyɔyɔ ŋu, kpakple atiblɛ alo nu bubu siwo amewo dona be “woakpɔ yewo ta” loo alo esiwo do ƒome kple gbɔgbɔyɔyɔnuwɔnawo.—Mose V, 7:25, 26; Korintotɔwo I, 10:21.

Esi Kristotɔ siwo nɔ Efeso tɔ dzo woƒe akunyawɔgbalẽwo vɔ la, Paulo ŋlɔ le ƒe aɖewo megbe be: ‘Míele kame tem kple vɔ̃ɖinyenye ƒe gbɔgbɔwo.’ (Efesotɔwo 6:12) Paulo xlɔ̃ nu Kristotɔwo be: “Mido Mawu ƒe aʋawɔnu blibo la katã, bene miate ŋu anɔ te ɖe Abosam ƒe aɖaŋu vɔ̃wo [alo ayemenuwɔnawo] nu.” (Efesotɔwo 6:11) Viɖe gale aɖaŋuɖoɖo ma ŋu kokoko. Ele be Kristotɔwo nabla akpa sesĩe le gbɔgbɔ me ale be gbɔgbɔ vɔ̃wo ƒe asi nagakpe wo dzi o. Paulo te gbe ɖe edzi be: “Hekpe ɖe nusiawo katã ŋuti la milé xɔse ƒe akpoxɔnu, si miate ŋu atsɔ atsi vɔ̃ɖitɔ la ƒe atsurɔ bibiawo la me ɖe asi.” (Efesotɔwo 6:16) Biblia sɔsrɔ̃e nana ame ƒe xɔse gasesẽna ɖe edzi. (Romatɔwo 10:17; Kolosetɔwo 2:6, 7) Eyata Biblia sɔsrɔ̃ edziedzi kpena ɖe mía ŋu míetua xɔse sesẽ si akpe ɖe mía ŋu míanɔ te ɖe gbɔgbɔ vɔ̃wo ƒe ŋusẽkpɔɖeamedziwo nu la ɖo.—Psalmo 91:4; Yohanes I, 5:5.

Egahiã be Kristotɔ siwo nɔ Efeso la naɖe afɔ vevi bubu aɖe hã. Paulo gblɔ na wo be: “Mitsɔ gbedodoɖa kple kukuɖeɖewo katã do gbe ɖa le ɣeawokatãɣi me le [gbɔgbɔ] me.” (Efesotɔwo 6:18) Nyateƒee, ele vevie ŋutɔ be amesiwo di be yewoavo tso gbɔgbɔ vɔ̃wo ƒe fuɖenamewo me egbea la nado gbe ɖa atraɖii na Yehowa be wòakpɔ yewo ta. (Lododowo 18:10; Mateo 6:13; Yohanes I, 5:18, 19) Biblia gblɔe wòsɔ nyuie be: “Eyaŋuti mibɔbɔ mia ɖokui ɖe Mawu te; ke mitsi tre ɖe Abosam ŋu, eye wòasi le mia gbɔ.”—Yakobo 4:7.

Togbɔ be ele na amesi gbɔgbɔ vɔ̃wo le fu ɖem na la be wòado gbe ɖa vevie be yeavo tso wo si me hã la, Kristotɔ vavãwo hã ate ŋu ado gbe ɖa ɖe amesi le ʋiʋlim vevie be yeado le gbɔgbɔ vɔ̃wo si me, bene yeasubɔ Yehowa, la ta. Woate ŋu abia Mawu be wòakpe ɖe amesi gbɔgbɔ vɔ̃wo le fu ɖem na la ŋu be wòasẽ ŋu le gbɔgbɔ me bene wòate ŋu anɔ te ɖe gbɔgbɔ vɔ̃wo ƒe amedzidzedzea nu. Esi wònye Mawu ƒe Nya la gblɔ be “ame dzɔdzɔe ƒe kukuɖeɖe, si nu sẽna la, tea ŋu wɔa nu geɖe” ta la, gbe si Mawu subɔlawo ado ɖa la aɖe vi na amesiwo gbɔgbɔ vɔ̃wo le fu ɖem na, siwo le agbagba ɖesiaɖe dzem be ‘yewoatsi tre ɖe Abosam ŋu’ la godoo.—Yakobo 5:16.

[Nɔnɔmetata si le axa 31]

Xɔsetɔ siwo nɔ Efeso la tɔ dzo woƒe akunyawɔgbalẽwo