Agbemeŋutinya

Dzidodo Hea Dzidzɔ Vɛ

ABE ALESI MÁRIO ROCHA DE SOUZA GBLƆE ENE

“Ðewohĩ Aƒetɔ Rocha matsi agbe le dɔwɔwɔ sia me o.” Togbɔ be ƒe 20 enye esia si ɖɔkta aɖe gblɔ nya ɖedzileameƒo siawo nam hã la, megakpɔtɔ le agbe, nye Yehowa Ðasefo ɣeyiɣiawo katã ƒe gbeƒãɖela. Nukae kpe ɖe ŋunye medo dzi le ƒe siawo katã me?

SANTO ESTÊVÃO nye kɔƒedu aɖe le Bahia nuto me le Brazil ƒe dzieheɣedzeƒe, eye agble aɖe si te ɖe eŋu mee metsi le. Esime mexɔ ƒe adre la, mete kpekpe ɖe Papa ŋu le agbledɔwo wɔwɔ me. Ne megbɔ tso suku gbesiagbe la, eɖoa dɔ nam. Le ɣeyiɣi aɖe megbe la, ne Papa yina dɔ aɖe wɔƒe le Salvador, si nye fiadua me la, egblẽa agblea ɖe asinye.

Elektrikkaɖi, pɔmpi me tsi, kple nu geɖe siwo bɔ egbea menɔ mía si o, ke hã, míekpɔa dzidzɔ. Metsɔa pepa wɔa yameʋu alo kua ʋu siwo mía kple xɔ̃nyewo míetsɔ ati wɔe. Mekua kpẽ le sɔleme hã. Menɔ sɔleme si nɔ mía gbɔ ƒe hadziha me, eye afimae mekpɔ agbalẽ aɖe si woyɔna be História Sagrada (Ŋutinya Kɔkɔe) le, si na medi be maxlẽ Biblia.

Le ƒe 1932 me, esime mexɔ ƒe 20 la, kuɖiɖi gã aɖe gblẽ nu le Brazil ƒe dzieheɣedzeƒe. Míaƒe nyiwo ku eye míaƒe agblewo hã fiã, eyata meʋu yi Salvador va nɔ ʋu kum. Emegbe mehaya xɔ eye mena dzinyelawo kple nɔvinyewo va nɔ gbɔnye. Le ƒe 1944 me la, Papa ku hegblẽ Dada kple nɔvinyenyɔnu enyiawo kpakple nɔvinyeŋutsu etɔ̃awo dzi kpɔkpɔ ɖe dzinye.

Meɖe Asi le Ʋukuku Ŋu Va Zu Nyanyuigblɔla

Nu gbãtɔ si mewɔ esi meva Salvador enye be meƒle Biblia. Le Baptist-ha me nɔnɔ ƒe aɖewo  megbe la, meva dze xɔlɔ̃ Durval, si hã nye ʋukula. Mía kple Durval míetsɔ gaƒoƒo gbogbo aɖewo dzroa Biblia me. Gbeɖeka etsɔ agbalẽvi si ƒe tanyae nye Where Are the Dead? * (Afikae Kukuawo Le?) nam. Togbɔ be mexɔe se be luʋɔ makumaku le amegbetɔwo me hã la, edzrom be maxlẽ mawunyakpukpui siwo agbalẽvia yɔ la. Ewɔ nuku nam be Biblia ɖo kpe edzi be luʋɔ si wɔ nuvɔ̃ la aku.—Xezekiel 18:4.

Esi Durval kpɔ be metsɔ ɖe le nyaa me ta la, ebia Antônio Andrade, si nye Yehowa Ðasefo ɣeyiɣiawo katã ƒe subɔla be wòava srãm kpɔ. Zi etɔ̃lia si wòva la, Antônio gblɔ nam be makplɔ ye ɖo míafia Biblia amewo. Esi wòƒo nu le aƒe eve gbãtɔwo me vɔ la, egblɔ bena: “Fifia eɖo dziwò.” Mevɔ̃ ŋutɔ, gake ƒome si meɖe gbeƒã na la ɖo to se nyaa, eye woxɔ agbalẽ eve siwo metsɔ na wo la. Vaseɖe egbea, ne mekpɔ ame aɖe le gbeadzi eye wòtsɔ ɖe le Biblia me nyateƒea me la, edoa dzidzɔ nam ŋutɔ.

Gbesigbe míeɖu Kristo ƒe ku ƒe Ŋkuɖodzi le April 19, 1943 ye mexɔ nyɔnyrɔ le Atlantik-ƒugã si gogo Salvador me. Esi wònye be nɔvi Kristotɔ tsitsi aɖeke menɔ hamea me o ta la, wotiam be makpe ɖe Ðasefo siwo ƒoa ƒu ɖe Nɔviŋutsu Andrade ƒe aƒe me ŋu. Aƒea le mɔ aɖe si le Salvador dua ƒe dziehe kple anyiehe dome.

Tsitretsiɖeŋu Dze Egɔme

Ame geɖe meda asi ɖe míaƒe Kristotɔwo ƒe gbeƒãɖeɖedɔa dzi le Xexemeʋa II ƒe ɣeyiɣiwo (1939-45) me o. Dziɖuɖumegã aɖewo buna nazã ɖe mía ŋu be míenye Dziehe Amerikatɔwo ƒe ŋkutsalawo, elabena Amerika ye míaƒe agbalẽ gbogbotɔwo tsona. Ema wɔe be le ɣeyiɣi mawo me la, woléa nɔviwo biana gbe wo edziedzi. Ne Ðasefo aɖe yi gbeadzi gake megbɔ o la, ke míesusuna be ɖe wolée, eye míeyina kpovitɔwo gbɔ be míabia be woaɖe asi le wo ŋu.

Le August 1943 me la, Adolphe Messmer, si nye Ðasefo tso Germany, va Salvador be yeakpe asi ɖe ɖoɖo siwo wonɔ wɔwɔm be míawɔ takpekpe le afima zi gbãtɔ ŋu. Esi dziɖuɖumegãwo ɖe mɔ na mí be míawɔ takpekpea la, míena dukɔa me nyadzɔdzɔgbalẽwo ɖe gbeƒã dutoƒonuƒo si ƒe tanyae nye “Ablɔɖe le Xexe Yeyea Me,” eye míeklã tanya ɖe nudzraƒewo ƒe fesrewo nu kple ɖe ʋuwo ŋu. Gake le takpekpea ƒe ŋkeke eveagbe la, kpovitɔ aɖe gblɔ na mí be wote fli ɖe mɔɖegbalẽvi si wona mí be míawɔ takpekpea me. Bisiɔpgã si le Salvador ƒoe ɖe kpovitɔwo ƒe amegã nu be woatɔ te míaƒe takpekpea. Gake le April si kplɔe ɖo me la, wogaɖe mɔ na mí míeƒo dutoƒonuƒo si ŋuti míeɖe gbeƒã tsoe la.

Meɖo Taɖodzinu na Ðokuinye

Le ƒe 1946 me la, wokpem be mayi Dukɔ Kpɔdzidzɔwo Teokrasi Takpekpe le São Paulo  dugã me. Meli aɖe si nɔ Salvador ƒe ʋumefia ɖe mɔ na mía dometɔ aɖewo be míaɖo yeƒe melia ne míalɔ̃ amlɔ agbatsɔnua dzi ko. Togbɔ be ahom tu eye míenɔ xe ɖem hã la, míeva ɖo Rio de Janeiro melidzeƒea dedie le ŋkeke ene megbe. Ðasefo siwo nɔ Rio de Janeiro xɔ mí kple dzidzɔ, eye míenɔ wo gbɔ ŋkeke ʋɛ aɖewo hafi yi mɔzɔzɔa dzi kple keteke. Esi míaƒe ketekea va ɖo São Paulo la, nɔvi ʋɛ aɖewo lé agbalẽ siwo dzi woŋlɔ ɖo be “Yehowa Ðasefowo, Miawoe Zɔ” ɖe asi tsɔ do dzaa na míi.

Esime metrɔ va Salvador teti la, megblɔ nye didi be mazu mɔɖela, si nye alesi woyɔna Yehowa Ðasefowo ƒe ɣeyiɣiawo katã subɔlawoe la, na nɔviŋutsu Harry Black si nye dutanyanyuigblɔla tso Amerika. Harry ɖo ŋku edzi nam be ƒomegbanɔamedziwo le dzinye, eyata eɖo aɖaŋu nam be magbɔ dzi ɖi vie. Mlɔeba la, kaka June 1952 naɖo la, nɔvinyeawo va su te kpɔa wo ɖokui dzi, eyata woɖom mɔɖelae be masubɔ le hame sue aɖe si nɔ ƒutadu Ilhéus, si nɔ Salvador ƒe anyiehekpa dzi, eye wòdidi kilometa 210 tso egbɔ me.

Dɔmenyonunana Aɖe

Le ƒe si kplɔe ɖo me la, woɖom ɖe Jequié, si nye du gã aɖe si le dukɔa ƒe titina nuto me, afisi Ðasefo aɖeke menɔ o. Ame gbãtɔ si meva srã kpɔe nye osɔfo si nɔ afima. Ede se nam be magaɖe gbeƒã le dua me o elabena ye tɔe nye dua. Exlɔ̃ nu hameviawo be “aʋatso nyagblɔɖila” aɖe va dua me, eye wòɖo amewo ɖe ŋunye be woanɔ ɖiayem. Ke hã, mema Biblia-srɔ̃gbalẽ 90 kple edzivɔ hedze nusɔsrɔ̃ gɔme kple ame ene gbemagbe. Le ƒe eve megbe la, wova tu Fiaɖuƒe Akpata ɖe Jequié, si me Ðasefo 36 nɔ! Hame enyi si me gbeƒãɖela 700 kloe le ye le Jequié egbea.

Le nye Jequié nɔnɔ ƒe ɣleti gbãtɔawo me la, menɔ xɔ sue aɖe si mehaya le dua me la me. Emegbe meva do go Miguel Vaz de Oliveira, si tɔe Sudoeste Amedzrodzeƒea nye. Amedzrodzeƒe sia nye esiwo nyo wu le Jequié dometɔ ɖeka. Miguel lɔ̃ be masrɔ̃ Biblia kple ye, eye wòƒoe ɖe nunye be maʋu ava nɔ yeƒe amedzrodzeƒexɔ ɖeka me. Miguel kple srɔ̃a va zu Ðasefowo.

Nuteƒekpɔkpɔ nyui siwo dzi meɖoa ŋkui le nye Jequié nɔɣi dometɔ ɖekae nye esime medo go Luiz Cotrim, si nye nufiala le sekɛndrisuku (lycée) aɖe me, si mesrɔ̃ Biblia kplii. Luiz gblɔ nam be ne melɔ̃ la, yeakpe ɖe ŋunye manya Portugalgbe kple akɔnta nyuie wu. Gɔmedzesuku koe mede, eyata melɔ̃ be wòakpe ɖe ŋunye. Míesrɔ̃a nua kwasiɖa sia kwasiɖa le Biblia-nusɔsrɔ̃a wɔwɔ vɔ megbe, eye esia dzram ɖo ɖe mɔnukpɔkpɔ bubu siwo meva xɔ le Yehowa ƒe habɔbɔa me le ema megbe kpuie la ŋu.

Kuxi Yeye aɖe Gbɔ Kpɔkpɔ

Le ƒe 1956 me la, mexɔ lɛta aɖe be mava míaƒe alɔdzedɔwɔƒe si nɔ Rio de Janeiro ɣemaɣi, be mava xɔ hehe azu nutome sue dzikpɔla, si nye ŋkɔ si woyɔna na Yehowa Ðasefowo ƒe subɔla mɔzɔlawo. Mía kple ame enyi bubuwoe xɔ hehe sia si xɔ ɣleti ɖeka kple nu vi aɖe ko la. Esi hehexɔxɔa wu enu la, wode dɔ asi nam be masubɔ le São Paulo, si na be metsi dzi vie. Megblɔ na ɖokuinye be: “Nuka wɔƒee nye, ameyibɔ, meyina le Italytɔ mawo dome? Ðe woawɔ nu ɖe ŋunye nyuiea?” *

 Le hame gbãtɔ si mesubɔ le Santo Amaro nutoa me me la, esi mekpɔe be hati Ðasefowo kple ɖetsɔlemetɔwo yɔ Fiaɖuƒe Akpataa me taŋtaŋ ta la, dzi ɖo ƒonye. Nusi na meka ɖe edzi be mesɔ be matsi dzi o ye nye be gbeƒãɖela 97 siwo katã le hamea me la de gbeadzi kplim kwasiɖanuwuwu ma. Megblɔ na ɖokuinye be: ‘Nɔvinyewoe wonye vavã.’ Nɔviŋutsu kple nɔvinyɔnu vevi mawo ƒe vividoɖeameŋu ye de dzi ƒo nam be mayi nutome sue subɔsubɔdɔa dzi.

Tedziwo, Sɔwo, Kple Liʋuiwo

Kuxi sesẽ siwo dzikpɔla mɔzɔlawo doa goe le ɣeyiɣi mawo me dometɔ ɖekae nye alesi wòhiã be woazɔ mɔ legbee hafi aɖo hamewo kple Ðasefowo ƒe ƒuƒoƒo sue siwo le kɔƒenutowo me gbɔ. Le teƒe mawo la, ʋu nyuiwo mebɔ o, alo womeli kura o, eye mɔawo dometɔ akpa gãtɔ hã menyo o.

Nutome sue aɖewo ƒlea tedzi alo sɔ na nutome sue dzikpɔlaa be wòazã, tsɔ kpɔa kuxia gbɔ. Zi geɖe la, le Dzoɖagbewo la, medoa agba na nye sɔa hedonɛ yia hame bubu gbɔ, eye ɣeaɖewoɣi la, mɔzɔzɔa xɔa gaƒoƒo 12 sɔŋ. Le Santa Fé do Sul la, tedzi si wotsɔ ŋkɔ na be Dourado (Goldie) nɔ Ðasefoawo si, eye enya mɔ siwo woato ayi ƒuƒoƒo siwo le kɔƒenutoawo me gbɔ. Dourado tɔna ɖe kɔƒeawo ƒe agbo nu helalana dzigbɔɖitɔe be maʋu agboawo. Ne mesrã nɔviawo kpɔ vɔ la, mía kple Dourado míeyia ƒuƒoƒo bubu gbɔ.

Nyatakakamɔnuwo ƒe anyimanɔmanɔ hã wɔe be nutome sue dzikpɔlawo ƒe dɔa sesẽ. Le kpɔɖeŋu me, hafi mate ŋu ava srã Ðasefowo ƒe ƒuƒoƒo sue aɖe si le agble aɖe dzi le Mato Grosso Nuto me la, ele be maɖo tɔdziʋu atso Araguaia-tɔsisia, eye emegbe mado tedzi abe kilometa 25 ene ato ave me. Ɣeaɖeɣi la, meŋlɔ lɛta be matsɔ na nyanya ƒuƒoƒo sia be megbɔna, gake anye be lɛtaa bú, elabena nɔvi aɖeke meva do gom le tɔsisia godo o. Ɣetrɔ mee meva ɖo, eyata megblẽ nye agbawo ɖe ahadzraƒe sue aɖe dzikpɔla gbɔ, eye melé nye akplo suea ko ɖe asi to afɔ yina kɔƒea me.

Eteƒe medidi hafi zã do ɖem o. Esi menɔ zɔzɔm le vivitia me la, mese liʋui aɖe ƒe xɔxlɔ̃ sesĩe. Evɔ mese kpɔ be liʋui te ŋu tsona ɖe afɔ nu tsɔa eƒe asi siwo me ŋusẽ le la wua ame. Eyata ne mese nane ƒe xɔxlɔ̃ le avea me la, meléa nye akploa ɖe ŋgɔ tsɔ kpɔa ɖokuinye tae. Le azɔli zɔzɔ gaƒoƒo geɖe megbe la, meva ɖo tɔ sue aɖe to. Esi zã do ta la, nyemekpɔe be wotsɔ gaviwo tɔ kpɔ ɖe tɔa ƒe go kemɛ o. Eyata medzo flɔ tɔa, gake nublanuitɔe la, meva dze gaviawo dzi si na mexɔ abi!

Mlɔeba la, meva ɖo agblea me eye avuwo dze wowó ɖe ŋunye. Fiafiwo lɔ̃a alẽwo fifi ɣemaɣi, eyata esi woʋu ʋɔ nam la, meɖe ɖokuinye nu enumake. Esi wònye be nye awuwo  vuvu eye woƒo ʋu ta la, nye nu anya wɔ nublanui na nɔviawo, gake dzi dzɔ wo be meva.

Togbɔ be kuxiwo nɔ anyi le ɣeyiɣi mawo me hã la, míekpɔa dzidzɔ. Sɔ dodo alo afɔ toto azɔ mɔ legbe mawo do dzidzɔ nam, eye ɣeaɖewoɣi la, megbɔna ɖe eme le atiwo te nɔa xeviwo ƒe xɔxlɔ̃ sem henɔa abeiwo kpɔm wova nɔa mɔ me tsom, eye wonɔa yiyim le mɔ ma siwo ame geɖe metona o la dzi. Nu bubu si hã doa dzidzɔ nam ye nye nyanya be nye sasrãkpɔwo ɖe vi na amewo vavã. Ame geɖe ŋlɔa lɛta tsɔ daa akpe nam. Ame bubuwo daa akpe nam ne míedo go le takpekpewo me. Dzidzɔ gã aɖee wònye nam be mekpe ɖe amewo ŋu woɖu woƒe kuxiwo dzi hewɔ gbɔgbɔ me ŋgɔyiyi!

Mekpɔ Kpeɖeŋutɔ Mlɔeba

Le ƒe mawo siwo me menɔ dzikpɔla mɔzɔla dɔa wɔm la, srɔ̃ menɔ asinye o, eye esia na meɖo ŋu ɖe Yehowa ŋu bliboe be eyae nye “nye aga, si mesi tso, [kple] nye akpoxɔnu” (Psalmo 18:3) Hekpe ɖe eŋu la, mekpɔe be tre nɔnɔ kpe ɖe ŋunye be nye susu katã nɔ Fiaɖuƒea ƒe nuwo ŋu.

Gake le ƒe 1978 me la, medo go nɔvinyɔnu mɔɖela aɖe si ŋkɔe nye Júlia Takahashi. Eɖe asi le dɔ nyui aɖe si wɔm wònɔ abe dɔnɔdzikpɔla ene le São Paulo ƒe kɔ gã aɖe dzi la ŋu ale be wòasubɔ le afisi Fiaɖuƒegbeƒãɖelawo hiã le wu. Kristotɔ hamemegã siwo nyae la kafui be enye mɔɖela bibi si si nɔnɔme nyuiwo le. Abe alesi nàsusui ene la, ewɔ nuku na ame aɖewo be le tre nɔnɔ ƒe geɖe megbe la, meɖoe be maɖe srɔ̃ azɔ. Xɔ̃nye vevi aɖe mexɔe se o, eyata edo ŋugbe be ne meɖe srɔ̃ nyateƒe la, yeanam nyitsu aɖe si ƒe kpekpeme ade kilogram 270. Nyitsu mae míetsɔ mè tsitsiŋga le srɔ̃kpegbea, le July 1, 1978 dzi.

Dzi Dodo Togbɔ Be Lãmesẽkuxiwo Li Hã

Júlia va kpe ɖe ŋunye le dzikpɔla mɔzɔla dɔa me, eye mía kplii míesubɔ amesiwo le Brazil ƒe anyiehe kple anyieheɣedzeƒe le ƒe enyi siwo kplɔe ɖo me. Ɣemaɣie medze dzidɔ. Zi eve sɔŋ meyi ɖi me esime menɔ gbeƒã ɖem na amewo. Le nye nɔnɔmeawo ta la, míeva nɔ subɔsubɔm abe mɔɖela veviwo ene le Birigüi, si le São Paulo Nuto me.

Esime nua dzɔ la, nɔvi siwo le Birigüi kɔm ɖe ʋu me yi ɖɔkta aɖe gbɔ le Goiânia, si didi kilometa 500 kloe tso Birigüi. Esi nye nɔnɔmea ka ɖe eme la, wowɔ dɔ nam hetsɔ elektrikmɔ̃ aɖe si akpɔ ŋusẽ ɖe nye dzi ƒe tsotso dzi (pacemaker alo stimulateur cardiaque) de lãme nam. Ƒe 20 enye sia va yi. Togbɔ be wogawɔ dɔ nam tso nye dzi ŋu zi eve hã la, megakpɔtɔ le vevie dom nu le nusrɔ̃lawɔwɔ dɔa me. Júlia doa ŋusẽm hedea dzi ƒo nam edziedzi abe alesi srɔ̃nyɔnu Kristotɔ wɔnuteƒe geɖe wɔna na wo srɔ̃wo ene.

Togbɔ be lãmesẽkuxiwo na nyemegate ŋu wɔa geɖe o eye dzi ɖena le ƒonye ɣeaɖewoɣi hã la, megate ŋu le mɔɖeɖedɔa wɔm. Meɖoa ŋku edzi be Yehowa medo ŋugbe na mí be míakpɔ dzidzɔ le agbe me ɣesiaɣi o. Ne apostolo Paulo kple Kristotɔ wɔnuteƒe bubuwo hiã dzidodo le blema ɖe, ɖe mía tɔ ya ato vovoa?—Dɔwɔwɔwo 14:22.

Nyitsɔ laa la, meke ɖe Biblia gbãtɔ si meƒle le ƒe 1930 me ŋu. Meŋlɔ 350 ɖe eme—Fiaɖuƒegbeƒãɖela siwo katã nɔ Brazil esime mete Kristotɔwo ƒe kpekpewo dede le ƒe 1943 me la ƒe xexlẽmee ma. Ne wogblɔ na wò be Ðasefo 600,000 kple edzivɔ ye le Brazil fifia la, màxɔe ase o. Mɔnukpɔkpɔ gã aɖe ŋutɔe wònye nam be nye hã mewɔ akpa sue aɖe le dzidziɖedzi sia me. Nyateƒee, Yehowa ɖo nye dzidodo teƒe nam wu gbɔgblɔ. Mate ŋu agblɔ abe hakpala la ene, be: “Nu gãe Yehowa wɔ na mí vavã, eyata dzi dzɔ mí ɖo!”—Psalmo 126:3.

[Etenuŋɔŋlɔwo]

[Nɔnɔmetata si le axa 9]

Ðasefo siwo nɔ gbeƒã ɖem tso takpekpe gbãtɔ si wowɔ le Salvador ŋu, le ƒe 1943 me

[Nɔnɔmetata si le axa 10]

Ðasefowo va ɖo Dukɔ Kpɔdzidzɔwo Takpekpe le São Paulo le ƒe 1946 me

[Nɔnɔmetata si le axa 11]

Mele dzikpɔla mɔzɔla dɔa me le ƒe 1950-awo ƒe nuwuwu

[Nɔnɔmetata si le axa 12]

Mía kple srɔ̃nye Júlia